Month: June 2016

Тайваний Хүүхэд гэр бүлийг дэмжих сан Эх хүүхдийн эрүүл мэндийн үндэсний төв, Уруул тагнайн төрөлхийн эмгэг судлалын нийгэмлэгтэй хамтран “Хязгаар нутгийн инээмсэглэл” төслийг Хөвсгөл аймагт хэрэгжүүлж байна.

Тус аймагт хоёр дахь удаагаа хэрэгжиж буй эл төслийн хүрээнд уруул тагнайн сэтэрхийн эмгэгтэй хүүхдүүдэд үзлэг оношилгоо хийж, 25 хүүхдэд үнэ төлбөргүй хагалгаа хийхээр болжээ. Өмнө нь “Хязгаар нутгийн инээмсэглэл” төсөл Хөвсгөл аймагт 2013 онд хэрэгжиж, 45 хүүхдэд мэс засал хийсэн юм.

Дашрамд өгүүлэхэд Монгол Улсын хэмжээнд уруул, тагнайн эмгэгтэй 1000 гаруй хүүхэд эмчийн хяналтад байдгийн 60 нь Хөвсгөлд амьдардаг аж.

Усчин аврагчдын үүрэг гүйцэтгэлийн чадамжийг нэмэгдүүлэх зорилготой усан бассейны сургалт явагдаж байна. Тус сургалтад 20 аймгийн 81 аврагч хамрагдаж байгаа юм.

Усанд эрэн хайх, аврах ажиллагаа явуулна гэдэг олон талын чадвар, тэсвэр тэвчээр шаарддагддаг. Зарим аврагч усны мандал дээр сэлэлт сайтай боловч гүний шумбалт тааруу байх нь бий. Тиймээс энэ удаагийн сургалтаар 3-4 төрлөөр сэлэлт хийх, гол, нууранд хэрхэн хүний амь нас аврах, усанд эндсэн хүнийг хэрхэн гүнээс гаргаж авах, хүн үүрээд уснаас хэрхэн гарах, усан дотор хоорондоо дохиогоор хэрхэн ойлголцох зэрэг арга техникийг эзэмшиж байгаагаараа үр дүнтэй сургалт болж байгаа аж.

Түүнчлэн энэ удаагийн сургалт Төв усан бассейнд хийгдэж байгаагаараа давуу талтай аж. Учир нь усан бассейн нь гүндээ 5 м, гүехэндээ 1,2 м байдаг учир гүний аврах ажиллагааны шумбалтын дасгалуудыг хийхэд тохиромжтой юм байна. Дашрамд сонирхуулахад, өврөөр даллах сэлэлтийн насанд хүрэгчдийн улсын аварга шалгаруулах тэмцээнд Аврах тусгай ангийн аврагч Д.Батболд амжилттай оролцож, усан спортын 3-р зэрэг хамгаалжээ.

Манжуурын аяллын автобус осолдож, хоёр монгол иргэн нас барсан харамсалтай хэрэг гарчээ. Тодруулбал, энэ сарын 3-ны өдөр БНХАУ-ын ӨМӨЗО-ны Хөлөнбуйр хотын Шинэ барга хошууны төвөөс Манжуур хот руу аяллын шугамаар зорчиж явсан 90-67 УБА улсын дугаартай “Истана” маркийн бага оврын автобус осолдож, улмаар Монгол Улсын хоёр иргэн нас баржээ.

Мөн ослын улмаас зургаан иргэн бэртсэн байна. ӨМӨЗО-ны Хөлөнбуйрт суугаа Консулын газраас гэмтсэн болон нас барсан иргэдийн ар гэрийнхэнд хэргийн талаар мэдэгдэж, эмгэнэл илэрхийлжээ.

Одоогоор авто ослын шалтгааныг тодруулахаар Хөлөнбуйрын Консулын газар, БНХАУ-ын холбогдох байгууллагатай хамтран ажиллаж байгаа аж.

Нийслэлийн Засаг даргын 2016 оны А/435 дугаар захирамжаар эрүүл мэндийн чиглэлээр мэргэжлийн үйл ажиллагаа явуулдаг зарим аж ахуйн нэгжийн тусгай зөвшөөрлийг хүчингүй болголоо.

Тус захирамжаар тусгай зөвшөөрлийг хуулийн хүчинтэй хугацаанд сунгуулаагүй, сүүлийн 24 сар буюу түүнээс дээш хугацаанд мэдээ тайлан ирүүлээгүй эрүүл мэндийн байгууллагын үйл ажиллагааг зогсоолоо. Мөн тусгай зөвшөөрөл эзэмшигч хүсэлт гаргасан, татан буугдсан, тусгай зөвшөөрлийг хуулийн хүчинтэй хугацаанд сунгуулаагүй, эмнэлэг сувилал, эмийн сан зэрэг 39 байгууллагын үйл ажиллагаа эрхлэх тусгай зөвшөөрөл хүчингүй боллоо гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Улаанбурханы эсрэг улааны вакцинд 18-30 насны залуусыг хамруулах аян өнгөрсөн сараас эхлэн энэ сарын 01-нд дуусав. Нийгмийн харилцаанд идэвхтэй оролцдог, бага насны хүүхэдтэй залуус эцэг эхийг хамруулсан бөгөөд залуус идэвхтэй сайн хамрагджээ.

Улсын хэмжээнд 18-30 насны 624 мянга орчим иргэн бий. Тэгвэл тэдний 88 хувь нь вакцин хийлгүүлжээ. Нийслэлээс Сонгинохайрхан, Баянзүрх, Сүхбаатар дүүрэгт ирц 95-98 хувьтай сайн байсан бол Багануур Налайхын залуус хойрго ханджээ. Харин орон нутгийн залуус вакциндаа онц сайн хамрагдсан гэж байна.

“Рио-2016” олимпод оролцох Монголын багийн хувцсыг “Шилмэл загвар” салон урлахаар боллоо. “Лондон-2012” олимпод оролцсон манай багийн хувцсыг хийсэн туршлагатай тэд тамирчдын хувцасны загвар, өнгө зэргийг хэрхэн хийх журмыг Монголын үндэсний олимпийн хорооноос баталсны дараа хийж эхлэх аж.

Ойролцоогоор долдугаар сарын 9 гэхэд олимпод оролцох Монголын багийн хувцас бэлэн болох юм байна.

Харин энэ тендэрт өрсөлдөж байсан “Ариунаа Сүри” брэнд сайн дураараа нэрээ татжээ. Тэд Сочигийн өвлийн олимпод өрсөлдсөн манай тамирчдын хувьцсыг урласан юм.

Улаанбаатар хотын дулааны төв шугамын нягтын шахалт болон засварын ажлууд хийгдэж байна. Энэхүү хуваарийн дагуу өнөөдрөөс энэ сарын 25-ны хооронд Хар хорин зах, Өнөр хороолол, Гурвалжин зах, Техник импорт, Голден парк хороолол, 4-р хороолол буюу 3-н билэг ХХК, Түндэмүн саун, Төмөр замын соёлын төв орчмын халуун усыг хаах юм.

Түүнчлэн “УБДС” ТӨХК-аас мэдээлснээр 2016 онд дулааны шугам сүлжээний “0” зогсолт хийгдэхгүй тул холбоос шугамуудын таслах хаалтуудын засварыг үндсэн шугамын зогсолттой уялдуулан тухайн магистралийг түр зогсоох аж.