Month: June 2016

УИХ-ын сонгуульд нэр дэвшигчид урьдчилсан байдлаар тодорлоо. Удахгүй бие даагчид нэмэгдэх байх. Ганц нэг хүмүүс нэрээ татах болов уу. Зарим нэр дэвшигчийн хувьд тойргийн өөрчлөлт ч гарч магадгүй. Ер нь бол процесс үргэлжилнэ. Нэр дэвшигчид тодорсноос хойш харин тэднийг элдвээр хэлж ярих нь ихэслээ. Сайн хүн ер алга. Дийлэнх нь л муу муухай хүмүүс юм байх. Гэхдээ сайн, муу нийлж сав дүүрдэг болохоор УИХ-ын чуулганы танхим дүүрэх нь л дүүрнэ. Дүүргэх хүмүүс дотор нь төрөл бүрийн салбарын, янз бүрийн ажил төрөл амжуулж явсан хүмүүс байх нь тодорхой. Одоогийн байдлаар дуучид гэхэд тав, зургаан хүн байна. “Темон оо би чамтай шөнийг өнгөрөөмөөр байна…” гэж дуулдаг залуугаас эхлээд “Нулимсыг минь арчиж хайрлаарай…” гэж дуулдаг бүсгүй гэхчилэн урлагийн хүмүүс байна. Бас бөх барилддаг байсан арваад хүн нэр дэвшиж өрсөлдөхөөр шийджээ. Хэрэг түвэгт орооцолдож явсан хүмүүс ч цөөнгүй байна. Ер нь тэгээд бас бус хүмүүс байна аа, байна. Гэхдээ энэ бүх хүн Үндсэн хуулиар олгогдсон сонгох, сонгогдох эрхтэй. Хүний энэ эрхэд хэн ч халдаж чадахгүй. Ардын сургаал бий, “Бөгсөө үмхий гээд тайрч хаядаггүй” гэж. Өнөөдөр монголчууд бидний байгаа нүүр царай л энэ. Нийгмийн тусгал нь энэ. Тийм болохоор бид эдэн дотроосоо л сонгоно. Монголчууд бид чинь төрөө байгуулах ёстой юм байгаа биз дээ. Төргүй Монгол Улс байх юм уу. Төсөөлөөд үз дээ. Хэрэвзээ төр засаггүйдээ хүрлээ гэвэл тэгсгээд гадны дагавар, өөртөө засах орон л болох байх даа. Тийм болохоор өнөөдөр нэр дэвшигчдийг элдвээр зүхэж байгаа, газар дор ортол муулж байгаа, Монголын төр засгийг муухай харагдуулахыг зорьж байгаа хүмүүс бол бүгдээрээ гадныхны гар хөл. Тийм муухай өнгө аяс сошиал дахь мэдээллээс хүмүүст шууд үнэртэж байна.

Нэрэлхээд нэрээ идэх биш, гэртээ хариад гэрээ идэх биш гэж үг бий. Нэрэлхэх юм нэр дэвшигчдэд байх хэрэггүй. Чаддагаасаа чадахгүйгээ хүртэл зөв сайхнаар өрсөлд. Нэр дэвшигчдийг элдвээр зүхдэг түүх бүх улс оронд үеийн үед байсан. Зуун жилийн өмнөх Америкийн сонгуульд ч болж байсан үйл явц. 1920-иод оны үеийн Америкийн сенатын сонгуульд өндөр зэрэглэлийн 11 биеэ үнэлэгч сонгогдсон байдаг юм. Өнөөдрийн Италийн парламентад буруу гарын төлөөлөл болох бүлгийн хэмжээний гишүүн бий. Биеэ үнэлэгчдийг сонгодгоороо Италийн парламент бүр алдартай. Монголынх ийм байг гэж хэлж байгаа юм биш. Цөөхөн монголчуудын хувьд байх боломж ч үгүй. Зүгээр л дэлхийн парламентын түүх ийм эрээн бараантэй, элдэв өнгөтэй байдаг гэдгийг л хэлж байна.

Тэгэхээр юу хэлэх гээд байна гэхээр ийм л өнгө солонго бүхий нэр дэвшигчдээс бид зөвийг нь сонгоно. Харин сонгуульд бүгдээрээ оролцож, саналаа өгч, төрөө сонгох үүргээ нэр төртэй биелүүлье гэж уриалъя. Энэ бол ардчилсан нийгэм дэх иргэн хүн бүрийн өндөр ухамсар юм. Өөрсдөө саналаа өгөөгүй байж дараа нь элдвээр хэлэх хэрэггүй. Залуучууд сонгуульд идэвхтэй оролцох ёстой. Санал хураалтад хамгийн идэвхгүй оролцдог хэсэг нь 18-35 хүртэлх насны оюутан, залуус байдгийг судалгаагаар тогтоосон. Энэ насныхан нийт сонгогчдын 60 хувийг эзэлдэг. Судалгааны дүнгээс харахад 18-35 хүртэлх насны залуусын 20 орчим хувь, 18-25 хүртэлх насныхны ердөө 10 хувь нь л сонгуульд оролцдог гэсэн дүн гарчээ. Энэ нь сонгуулийн ирц хуульд заасан хэмжээндээ хүрч чадах эсэхэд хүрч байна. Ирц хүрэхгүй тохиолдолд муудсан эдийн засгаа улам муутгах болно. Татвар төлөгчдийн мөнгө дахин сонгуульд үрэгдэнэ. Монгол Улсад сүүлийн жилүүдэд хамгийн өндөр хувьтай санал өгсөн газар бол Завхан аймгийн сонгогчид 77,1 хувь, хамгийн бага санал өгсөн нь Сүхбаатар аймаг, нийслэлийн дүүргүүд болоод байгаа юм. Сонгуульд заавал оролцох учиртайг ЕБС-д байхаас нь суулгаж өгөх цаг болжээ. Эцэг, эхчүүд насанд хүрсэн хүүхдүүддээ сонгуульдаа идэвхтэй оролцож, өөрт нь болон улс оронд хэрэгтэй гэсэн хүнийхээ төлөө саналаа өгөхийн ашиг тусыг ойлгуулж өгмөөр байна. Өөрийн чинь өмнөөс өөр хүмүүс сонголт хийгээд байна гэдгийг бас ойлгуул. Өмнөх сонгуулиас харж байхад өглөөний 11:00 цагийн байдлаар сонгогчдын идэвх маш сайн, зарим тойрогт 25 хувь хүрч байснаа үдээс хойш идэвх эрс буурч 20:00 цаг гэхэд санал хураах байрууд ямар ч хүнгүй болж байсан. Ийм нөхцөл байдал давтагдах магадлалтай байгаа тул өмнөх сонгуулиар ашиглаж байсан саналаа өгсөн сонгогчид зориулсан урамшууллыг янз бүрийн хэлбэрээр өргөнөөр бий болгох хэрэгтэй. Сонгогчдод зориулсан урамшууллын механизм олон улсад байдаг. Тэдний жишгээр хийе.

Энэ жилийн хувьд бас нэг анхаармаар асуудал бий. Тэр нь Европын аварга шалгаруулах хөлбөмбөгийн тэмцээн цаг хугацааны хувьд УИХ-ын сонгуультай давхцаж байгаа нь сонгуулийн ирцэд нөлөөлнө. Бүр гол тоглолтууд санал өгөх өдрийн өмнөх шөнө болохыг тооцох ёстой. Учир нь Монголын залуу үе тэр чигээрээ хөлбөмбөгийн хорхойтнууд болсон. Тэмцээний хагас шигшээгийн тоглолт Францын хотуудад болох нь манай цагаар шөнө байгаа нь залуучуудын хувьд сонгуульд очиж саналаа өгөхөд сөргөөр нөлөөлөх магадлалтай. Учир нь өмнөх сонгуулийн ирцэд энэ тэмцээн нөлөөлсөн нь ажиглагдсан юм.

Бас нэг асуудал байгаа нь зөвхөн Монголд л байдаг зовлон байх. Манай иргэдийн нэлээд нь иргэний үнэмлэхээ дэлгүүр хоршоо, ломбард, такси… гэхчилэн олон газарт барьцаанд тавиад авч чадахгүй байгаа. Тийм хүмүүс яадаг вэ гэхээр “За санал өгөхийн тулд түүнтэй хөөцөлдөж явах гэж яршиг. Тэгж байгаад нэг авахаас” гэдэг. Тийм болохоор энэ удаагийн сонгуулиар ТҮЦ машины тодорхойлолтоор санал өгүүлэх хэрэгтэй. Тэр нь нийт сонгогчдын таван хувьтай тэнцэнэ гэсэн нэгэн ТББ-ын судалгаа бий. Энэ мэтээр жижиг гэхгүй амьдралын үнэнийг олж харж, ирцийг бүрдүүлэх арга хэмжээг дорвитой авахгүй бол хамгийн сүүлийн Ерөнхийлөгчийн сонгуулиар нийт сонгогчдын 63.9 хувь буюу өмнөхөөсөө даруй 40 хувь буурсан байдаг. Эдгээр саналаа өгсөн сонгогчдын 50.23 хувийн саналаар нэр дэвшигч ялалт байгуулсан юм. Энэ байдал дахин давтагдвал одоо болох сонгууль дахин явагдах магадлалтай болчихоод байна.

Энэ мэтээр сонгогчдын дийлэнх болох залууст онцгой анхаармаар байна. Тэрнээс манай улсын 40-өөс дээш насныхан бол сонгуулийн саналаа хангалттай өгч иржээ. Монгол Улсын эдгээр насны иргэдийн 70 хувь нь саналаа өгдөг нь судалгаагаар тогтоогдсон юм. Эдгээр насны иргэдийн санал өгөх хувь нь угаасаа олон улсад ийм л багцаанд байдаг аж.

“Өдрийн сонин”-ы мягмар гаригийн дугаар хэвлэгдэн, захиалагчдадаа хүрлээ. Энэ өдрийн дугаарт гарсан нийтлэл, сурвалжлага, ярилцлага, мэдээ мэдээллээс онцолж, тоймлон хүргэж байна.

Нүүрсийг 30 ам.доллараас 1500 ам.долларт хүргэх боломж нийтлэлийг уншаарай. Энэ талаарх дэлгэрэнгүйг та IV нүүрнээс унших боломжтой.

МАН-ын УИХ дахь бүлгийн хуулийн зөвлөх Б.Энхбаярын “Энэ сарын 11-н хүртэл нэр дэвшигчид тайлангаа сониноор гаргах нь хуулиар нээлттэй” ярилцлага хэвлэгдэн гарлаа. Та энэ талаарх дэлгэрэнгүйг VI нүүрнээс уншаарай.

Улс төрийн нүүрнээс УИХ-ын хаврын чуулганы тавдугаар сарын 19-ний нэгдсэн хуралдаанаар Гэр бүлийн хүчирхийлэлтэй тэмцэх тухай хуулийн шинэчилсэн найруулгыг баталсан юм. Шинэчилсэн найруулгад “Гэр бүл хүчирхийлэлтэй тэмцэн хуулиар хүүхдийнхээ дэргэд архи ууж болохгүй” гэх заалт багтжээ. Та энэ талаарх дэлгэрэнгүйг V нүүрнээс унших боломжтой. Мөн “Хар жагсаалт”-ыг зарласан талаарх болон үйл явдлын мэдээ мэдээллийг уншаарай.

“Өдрийн сонин”-ы нийтлэлийн бодлогыг тодорхойлж байдаг, нийгмийн нэгэн залуур чиг болж байдаг Баримт, үзэл бодлын гуравдугаар нүүрт нийтлэлч Д.Мөнгөндалайн “Газар дээрх ганц ах минь нисээд өнгөрөлгүй буугаад явсан нь яамай даа” нийтлэлийг унших боломжтой.

Баримт, үйл явдал нүүрнээс Ё.Лхагвасүрэнгийн “Хэрвээ та хүсвэл таны нэр дээр хуурамчаар нээсэн файсбүүк, твиттер хаягийг устгуулж болно” ярилцлага хэвлэглэгдсэн байна.

МҮРОНТ-ийн “Монголын мэдээ” сувгийн захирал Ц.Мөнхтөрийн ““Монголын мэдээ” суваг “Евро 2016” тэмцээнийг HD форматаар шууд дамжуулна” ярилцлагыг уншаарай. Мөн хүмүүс нүүрнээс “Алдарт эх” онгоор энгэрээ мялаасан Ч.Болор-Эрдэнийн “Зарим хүмүүс дөрвөн хүүхэдтэй гэхээр итгэдэггүй” ярилцлага хэвлэгджээ.

“Дэвжээ” нүүрнээс үндэсний бөхийн гуравдугаар шатны найраа буюу цэргийн арслан болох өрсөлдөөний талаарх дэлгэрэнгүйг уншаарай. Дэлгэрэнгүйг XIII нүүрнээс уншаарай.

“Эрүүл мэнд” нүүрнээс шүд эмчлүүлэх явцад өвдөнө гэх ойлголт орчин үед байхгүй болсон талаар уншаарай. Мөн цаг үеийн мэдээ мэдээлэл хэвлэгдлээ. “Утга зохиол” нүүрэнд Олон “романтик” байшин шүүмж болон “Тэнгэрийн судар”-ын тэмдэглэл шинэ номын тухай нийтэлсэн байна.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудан, “Улаанбаатар”, “Скай” шуудангийн салбаруудаас очиж авч болох ба сонин борлуулах бүхий л цэгүүд, Хэвлэлийн биржээс худалдан авах боломжтой юм. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдах авч болохыг дуулгая. “Өдрийн сонин”-ы өөрийн байранд ирж худалдан авч бас болно.

“Өдрийн сонин”-той холбоотой бүхий л мэдээллийг Мэдээлэх эрхийн утас 19001987-гоос лавлаж болох ба захиалга өгөхийг хүсвэл 9911-2954, 8811-1375 дугаарт холбогдоно уу. Хэрэв цахим хэлбэрээр нь захиалахыг хүсвэл 88071920 дугаарт холбогдож дэлгэрэнгүй мэдээллийг лавлаарай.

“ӨДРИЙН СОНИН” ӨГЛӨӨ БҮХНИЙ УРГАХ НАРНААР ТАНТАЙ ХАМТ

Улсын Их Хурлаар “Эмнэлгийн тусламж, үйлчилгээний тухай хууль” батлагдаж, 2016 оны 06 дугаар сарын 03-ны өдрөөс хэрэгжиж эхэлсэнтэй холбогдуулан уг хуулийг хүлээн авах хүндэтгэлийн арга хэмжээ өнөөдөр Төрийн ордонд боллоо. Энэхүү арга хэмжээг Улсын Их Хурлын Нийгмийн бодлого, боловсрол, соёл, шинжлэх ухааны байнгын хороо, Эрүүл мэнд, спортын яам хамтран зохион байгуулсан юм.

Хүндэтгэлийн арга хэмжээг нээж Улсын Их Хурлын дарга З.Энхболд хэлсэн үгэндээ, “Монгол Улсын Их Хурлаас энэ оны 04 дүгээр сарын 22-ны өдөр батлан гаргасан Эмнэлгийн тусламж, үйлчилгээний тухай хуулийг Монгол Улсын Засгийн газарт, Эрүүл мэнд, спортын яаманд өнөөдөр албан ёсоор хүлээлгэн өгч байна.

Монгол Улсад хуучин системийн үед эмнэлгийг шүтсэн хуучин Зөвлөлт загварын эрүүл мэндийн тогтолцоо нь зах зээлийн эдийн засагт шилжсэнтэй холбоотойгоор анхан шатны болон амбулаторийн тусламжид илүү анхаарсан тогтолцоонд шилжсэн. Өнөөгийн улсын гэх тодотголтой эмнэлгүүдийн зохион байгуулалт, удирдлагын тогтолцоонд үр ашиггүй байдал давамгайлж байгаа. Энэ тухай бид олон жил ярьсан. Эрүүл мэндийн байгууллагын төсвийн зардал нь эмнэлгийн тусламж, үйлчилгээнд биш барилга байшин, халаалтад зарцуулагдаж ирсэн. Эмнэлгийн тусламж үйлчилгээний чанар, үр ашгийг дээшлүүлэх нь хүн амын эрүүл мэндийн байдлыг сайжруулахаас гадна өсөн нэмэгдэж байгаа эрүүл мэндийн тусламж, үйлчилгээний хэрэгцээг хангах, эрүүл мэндийн улмаас иргэдэд учирч байгаа санхүүгийн дарамтыг бууруулах, чанартай тусламж эрэлхийлсэн иргэдийн гадагшаа урсгаж байгаа зардлыг эх орондоо үлдээх зэрэг эдийн засгийн олон талын ач холбогдолтой” болохыг онцлон тэмдэглэлээ.

Мөн тус арга хэмжээнд Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Д.Батцогт үг хэлсэн. Тэрээр, Эмнэлгийн тусламж, үйлчилгээний тухай хууль нь 7 бүлэг, 24 зүйлтэй бөгөөд 06 дугаар сарын 03-ны өдрөөс эхлэн хэрэгжиж байна. Эмнэлгийн тусламж, үйлчилгээний тухай хууль нь эмнэлгийн тусламж, үйлчилгээний тогтолцоог боловсронгуй болгох, эмнэлгийн тусламж, үйлчилгээнд төр, хувийн хэвшлийн түншлэлийг өргөжүүлэх, эмнэлгийн хагас бие даасан засаглалыг дэмжсэн стратегийн болон гүйцэтгэлийн удирдлагын бүтэц, зохион байгуулалтын орчинг бүрдүүлж, санхүүжилтийн тогтолцоог үр ашигтай болгох, резидент эмчийг олон улсын жишгээр ажиллуулах зэрэг чухал асуудлуудыг тусгасан. Монгол Улсын гол баялаг бол эрүүл монгол хүн билээ. Энэ хууль батлагдсанаар эрүүл мэндийн салбарын өмнө тулгамдаж байсан олон асуудал шийдвэрлэгдэж, иргэд зүй зохистой, үр ашигтай байдлаар эмнэлгийн тусламж, үйлчилгээг авах боломж нээгдэнэ гэдэгт итгэлтэй байгаагаа илэрхийлэв.

Улсын Их Хурлын гишүүн, ажлын хэсгийн ахлагч С.Одонтуяа хэлсэн үгэндээ, “Өнгөрсөн хугацаанд Улсын Их Хуралд олон хууль батлахад гэрч болсон. Гэхдээ өнөөдрийн болж байгаа энэхүү арга хэмжээ шиг баярласан үйл явдал ховор байна. Учир нь ард иргэдийн эрүүл мэндийн төлөө өдөр шөнөгүй, нойр, хоолоо умартан зүтгэж байгаа та бүхний санасан, хүссэн зүйлийг энэ удаагийн Улсын Их Хурал баталж чадсанд туйлын баяртай байна. Өнөөдөр эрүүл мэндийн салбарын гацааг гаргалаа гэж энэ салбарын олон мэргэжилтнүүд хэлж байгаа. Өмнө нь эрүүл мэндийн салбар боломжин дээрээ тулгуурлаж ажилладаг байсан бол харин одоо бидэнд зорилтон дээр тулгуурлаж ажиллах сайхан боломж бүрдэж байна. Зорилт гэдэг нь монгол хүнд эрүүл мэндийн чанартай, хүртээмжтэй, тусламж, үйлчилгээ үзүүлэхийн тулд олон улсын стандартыг мөрдөж, энэ чиглэлээр төр, засаг, эрүүл мэндийн байгууллага, эмч нар бүгд хамтарч ажиллах шаардлагатай байгаа. Нөгөөтэйгүүр энэ хууль батлагдсанаар эмч нарын үнэ цэнэ нэмэгдэж байгаагийн зэрэгцээ эрүүл мэндийн салбарынхны нийгмийн асуудал нь шийдэгдэх сайхан боломж нээгдэж байгаа. Харин хуулийг хэрэгжүүлэх үйл явцад салбарынхан онцгойлон анхаарах хэрэгтэй. Азийн Хөгжлийн Банкнаас хуулийн хэрэгжилтэд буцалтгүй тусламж олгосноор хуулийн төсөл амжилттай хэрэгжих нөхцөл бүрдэнэ гэдэгт итгэж байна. Хуулийг боловсруулахад эхнээс нь батлагдах хүртэл чин сэтгэлээсээ оролцсон Улсын Их Хурлын гишүүд, Азийн Хөгжлийн банк, эмнэлгийн удирдлага, мэргэжилтнүүд, Үйлдвэрчний эвлэл, Төрийн бус байгууллага гээд хамтын хүчин чармайлтаар хууль амжилттай батлагдсан. Эрүүл монгол хүн бол Монголын үндсэн баялаг. Энэ сайхан үйлсдээ амжилттай ажиллахыг хүсч, ажлын амжилт хүсье” гэлээ.

Монгол Улсын Засгийн газрын гишүүн, Эрүүл мэнд, спортын сайд С.Ламбаа, Эмнэлгийн тусламж, үйлчилгээний тухай хуулийг боловсруулах, батлахад үнэтэй хувь нэмэр оруулсан Улсын Их Хурлын дарга З.Энхболд, Нийгмийн бодлого, боловсрол, соёл, шинжлэх ухааны байнгын хорооны дарга Д.Батцогт, энэ хуулийг батлан гаргахад гурван жил тасралтгүй зүтгэж, байнгын хорооны ажлын хэсгийг ахалж ажилласан Улсын Их Хурлын гишүүн С.Одонтуяа, Улсын Их Хурлын гишүүн Ё.Отгонбаяр, А.Тлейхан болон бусад гишүүд, эрүүл мэндийн байгууллагын удирдлага, эмч, мэргэжилтнүүдэд эрүүл мэнд, спортын салбарын нийт хамт олны өмнөөс баяр хүргэж, талархал илэрхийлэв.

Мөн тэрээр, эрүүл мэндийн салбарт 2011 онд батлагдсан Эрүүл мэндийн тухай хууль хэрэгжиж эхэлснээс хойш өнгөрсөн хугацаанд санхүүгийн арга аргачлалыг боловсронгуй болгох, бие дааж ажиллуулах, тусламж, үйлчилгээний чанар, хүртээмжийг нэмэгдүүлэх, иргэд, үйлчлүүлэгчдэд эрүүл мэндийн тусламж, үйлчилгээг чанартай хүргэх сонголтыг нь зөв болгох зэрэг олон асуудлууд шийдэгдэхгүй өдийг хүрсэн. Энэ нөхцлийг эрх зүйн хувьд чиглүүлж, баталгаажуулж, Эрүүл мэндийн тухай хуульд үндэслэж тодорхойлж өгсөн Эмнэлгийн тусламж, үйлчилгээний тухай хууль бол туйлын ач холбогдолтой хууль гэдгийг онцоллоо.

Хүндэтгэлийн арга хэмжээний үеэр Эмнэлгийн тусламж, үйлчилгээний тухай хуулийн төслийг боловсруулах, батлахад идэвх, зүтгэлтэй ажилласан хүмүүст Эрүүл мэнд, спортын сайд С.Ламбаа эрүүл мэндийн салбарын шагнал, өргөмжлөл гардуулах үйл ажиллагаа болов.

Ингэснээр хүн амын эрүүл мэндийг сахин хамгаалах үйлсэд оруулсан хувь нэмэр, гавьяа зүтгэлийг нь үнэлж салбарын түүхэнд тэмдэглэн Эрүүл мэнд, спортын яамны Хүндэт дэвтэрт бичиж, Эрүүл мэнд, спортын яамны хамгийн хүндтэй шагнал болох Гэрчилгээ олгож буйг салбарын сайд танилцуулж, уг Гэрчилгээг Улсын Их Хурлын гишүүн, ажлын хэсгийн ахлагч С.Одонтуяад гардууллаа.

Мөн Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Д.Батцогт, Улсын Их Хурлын гишүүн Ё.Отгонбаяр, Улсын хоёрдугаар төв эмнэлгийн захирал Г.Баясгалан нарыг Эрүүл мэндийн салбарын тэргүүний ажилтан цол, тэмдгээр шагнасан юм.

Түүнчлэн ажлын хэсэгт орж ажилласан байнгын хорооны ажлын албаны ахлах зөвлөх Л.Лхагвасүрэн, зөвлөх Ж.Чимгээ болон Эрүүл мэнд, спортын яамны хэлтэс, газрын мэргэжилтэн, эмнэлгийн удирдлага, эмч, албан хаагчдад өргөмжлөл гардууллаа хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.