Month: June 2016

Дэлхий цусны донорын өдөр энэ сарын 14-ний мягмар гаригт тохионо. Дэлхийн нийтийн цусны доноруудын өдрийг Дэлхийн Эрүүл Мэндийн Байгууллага санаачилж 2004 оны зургаадугаар сарын 14-нөөс эхлэн тэмдэглэж ирсэн.

2002 оны байдлаар сайн дурын донорт суурилсан 39 улс байсан бол өнөөдөр 62 улс болон өргөжсөн байна. Мельбурны 2009 оны тунхаглалаар 2020 он гэхэд улс орнуудыг 100 хувь сайн дурын донортой болохыг уриалсан юм.

Энэ өдрийг угтаж Цусны төвөөс “Донор та амьдрал бэлэглэгч” гар зургийн уралдааныг зарлаж байна. Хүүхэд залуусын дунд зарласан уралдааны бүтээлийг маргаашийг хүртэл хүлээн авна.

Төрийн орон сууцны корпораци /ТОСК/-ийн захиалгаар босч буй хамгийн том орон сууцны хороолол болох “Буянт-Ухаа II” хорооллын хоёрдугаар ээлжийн 3900 айлын орон сууцны барилгын ажлыг өнөөдөр эхлүүлж байна. “Буянт-Ухаа- II” хороолол энэ ондоо багтаад 3900 айлын орон сууцаар бүл нэмэх ажээ.

Хан-Уул дүүргийн IX хорооны нутаг дэвсгэрт, хотын төвөөс 14.75 км-ын зайд баригдах шинэ хороолол нийт 19.32 га талбайг эзлэх бөгөөд 240 хүүхдийн багтаамжтай гурван цэцэрлэг, 1200 хүүхдийн хоёр сургууль, худалдаа үйлчилгээний хэсэг, кинотеатр, газар доорх авто зогсоол, амралт чөлөөт цагийн бүстэй байх гэнэ.

Налайх дүүрэгт хууль бусаар нүүрс олборлох нь ихсэж түүнийг дагаад харамсалтайгаар амь насаа алдах тохиолдол багагүй гардаг. Өчигдөр Налайх дүүргийн 1-р хорооны нутаг дэвсгэрт байрлах 53 настай иргэн Д-гийн эзэмшлийн зөвшөөрөлгүй нүүрс олборлохоор ухсан аманд ажиллаж байсан, Налайх дүүргийн 1-р хороонд суух 27 настай А, Налайх дүүргийн 7-р хороонд суух 27 настай Г нар шороонд дарагдаж нас барсан хэрэг өчигдөр гарчээ. Уг хэргийг тус дүүргийн цагдаагийн хэлтэс шалгаж байна.

Улаанбаатар хотын Замын цагдаагийн газрын Жижүүрийн шуурхай удирдлагын хэлтэс 06 сарын 07-ны өдөр нийт 282 дуудлага мэдээлэл хүлээн авснаас зам тээврийн ослын 202 дуудлага бүртгэгдсэн байна. Үүнээс гэмт хэргийн шинжтэй гомдол мэдээлэл 6 бүртгэгдэж, 7 хүн хүнд хөнгөн гэмтжээ. Үүнээс сургуулийн өмнөх насны 1, сургуулийн насны 2 хүүхэд зам тээврийн осолд өртсөн тохиолдол гарсан бөгөөд согтуугаар тээврийн хэрэгсэл жолоодсон 64 жолоочийг журамлан гарч болзошгүй осол хэргээс урьдчилан сэргийлж ажиллаа.
Хөдөө орон нутгийн замд хөдөлгөөнд оролцохдоо тээврийн хэрэгслийн техникийн бүрэн бүтэн байдлыг сайтар хангах, тээврийн хэрэгслийн хурдаа зөв тохируулах, архи согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх, хамгаалалтын бүсийг хэрэглэж хэвших, хөдөлгөөний аюулгүй байдлыг сайтар хангаж, бие биеэндээ хүндэтгэлтэй хандан гэрэл хэрэглэх дүрмээ баримтлахыг Улаанбаатар хотын Замын цагдаагийн газраас анхааруулж байна.

Монгол банкнаас мэдээлснээр арилжааны банкууд 7514 иргэний 463.9 тэрбум төгрөгийн зээлийн хүсэлтийг хүлээн авсан байна. Үүнээс 2214 иргэний 5 хувийн хүүтэй 105.7 тэрбум төгрөгийн, 4408 иргэний 8 хувийн хүүтэй 296.1 тэрбум төгрөгийн зээлийг тус тус олгохоор шийдвэрлэсэн байна. Түүнчлэн Улаанбаатар хотын гэр хорооллын дахин төлөвлөлтийн хүрээнд хамрагдах орон сууц, Улаанбаатар хотын алслагдсан дүүргүүд болох Багануур, Багахангай, Налайх, нийслэлийн шинэ суурьшлын бүс, 21 аймгийн нутаг дэвсгэрт орон сууц худалдан авсан 903 зээлдэгчийн 36.9 тэрбум төгрөгийн орон сууцны ипотекийн зээлийн хүүг 8 хувиас 5 хувьд шилжүүлээд байна.

Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Уралдаан зохион байгуулах тухай” А/453 дугаар захирамж гаргалаа. Захирамжийн дагуу нийслэлийн Засаг даргын үйл ажиллагааны хөтөлбөр, нийслэлийн эдийн засаг, нийгмийн 2016 оны зорилтыг хэрэгжүүлэх ажлын хүрээнд Улаанбаатар хотын Замын цагдаагийн албан хаагчдын мэргэжлийн ур чадвар, ёс зүй, албаны бэлэн байдлыг шинэ түвшинд гаргах, тэднийг чадавхижуулах зорилгоор “Чадварлаг хамт олон“ шалгаруулах уралдаант тэмцээнийг зохион байгуулна. ”Чадварлаг хамт олон” шалгаруулах уралдааныг дүгнэх ажлын хэсэг, уралдаан шалгаруулалтын ажлын хэсэг, уралдааны болзлыг тус тус батлав.

Уралдааныг нийслэлийн хэмжээнд Замын цагдаагийн нийт бие бүрэлдэхүүнийг бүрэн хамруулан батлагдсан төсвийн дагуу зохион байгуулж, тайланг Нийслэлийн удирдлагын зөвлөлийн хуралд танилцуулахыг нийслэлийн Засаг даргын Тамгын газрын Нийгмийн хөгжлийн бодлогын хэлтэст, Улаанбаатар хотын Цагдаагийн газрын Замын цагдаагийн газарт тус тус үүрэг болголоо.

Уралдаанд шаардагдах 74 сая150 мянган төгрөгийг нийслэлийн дүүрэг, хороодын эрүүл аюулгүй байдлын индексээр хэмжих урамшуулдаг тогтолцоог нэвтрүүлэх 2016 оны батлагдсан зардлаас санхүүжүүлэхийг нийслэлийн Засаг даргын Тамгын газарт даалгав.

Дээрх арга хэмжээг зохион байгуулахад нэгдсэн удирдлагаар хангаж, хяналт тавьж ажиллахыг Уралдаан дүгнэх Ажлын хэсэгт үүрэг болгов гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.