УИХ-ын гишүүн Ц.Оюунгэрэл сонгуульд нэр дэвшихгүй, нэг хэсэгтээ улс төрөөс хөндийрч, номоо бичнэ гэж өмнө нь цахим сүлжээгээр мэдэгдэж байсан билээ. Тэгвэл тэрбээр шийдвэрээ өөрчилж, 2016 оны УИХ-ын сонгуульд нэр дэвшихээр шийдсэн гэнэ. Энэ тухайгаа өөрийн цахим хуудастаа бичиж, “Сонгуулийн хууль эмэгтэйчүүдэд хатуу болох чиг рүүгээ орсон учраас оролцоог улам бууруулахгүйн тулд 2016 оны сонгуульд өрсөлдөхөөр шийдлээ” хэмээжээ.
УИХ-ын чуулганы өнөөдрийн нэгдсэн хуралдаанаар Үндсэн хуулийн цэцийн дүгнэлтийг хүлээн авч, намын жагсаалтаар сонгогдох хуулийн заалтыг хүчингүй болгосон. Ингэснээр эмэгтэйчүүдийн квотыг үгүй хийх, багасгаж болзошгүй хэмээн эмэгтэй гишүүд болгоомжилж буй аж.
Энэтхэгийн Засгийн газраас манай Засгийн газарт нэг тэрбум ам.долларын хөнгөлөлттэй зээл олгох ерөнхий хэлэлцээрийг баталсан. Өнгөрсөн дөрөвдүгээр сарын 28-ны өдөр БНЭУ-ын энэ зээлийн Ерөнхий хэлэлцээрт Монгол Улсаас БНЭУ-д суугаа Онц бөгөөд Бүрэн эрхт Элчин сайд Г.Ганболд, Энэтхэг улсын Экзим Банкны Дэд захирал Дэвид Раскүйнха нар гарын үсэг зурсан юм. Үүний хүрээнд Энэтхэгийн Экзим банкны зүгээс Монголд итгэл хүлээлгэж төмөр зам болон дэд бүтцээ хөгжүүлэхэд зориулан тэрбум ам.долларын зээлийн шугамыг нээхээр болжээ.
Өнөөдөр СЕХ-ноос 11 нам, гурван эвсэлд сонгуульд оролцох батламжийг гардуулсан. Гэхдээ ХҮН, ИЗНН-ыг бүртгэхээс татгалзсан юм. Иргэний Зориг Ногоон Намыг сонгуульд оруулахгүй болсон гэх энэ шийдвэртэй холбогдуулан 14:00 цагт ИЗНН-аас өөрийн байрандаа яаралтай хэвлэлийн бага хурал зарласан байна.
УИХ-ын гишүүн Д.Тэрбишдагва, Ч.Улаан нар мэдээлэл хийж, намаасаа гарахаа мэдэгдлээ.
Өнөөдөр СЕХ-оос 11 нам, гурван эвсэл батламжаа гардаж авлаа. Хуулийн хугацаанд багтаж 13 нам, гурван эвсэл бүртгүүлсэн юм байна. Харин СЕХ-ны зүгээс ХҮН болон ИЗНН-ыг бүртгэхээс татгалзжээ. 
Ховд-Улаанбаатар чиглэлийн ОМ7056 дугаар аялал гүйцэтгэсэн El-CXV бүртгэлийн дугаар бүхий агаарын хөлөгт гэмтэл гарсан талаар МИАТ компаниас тайлбар хийв. Онгоц хөөрөлтийн өмнөх гүйлтийн үед 60 knt орчим хурдан дээр чиглэл алдсанаас хөөрөлтийг зогсоосон юм байна.
ХҮН-ын гишүүн С.Боргил, Б.Найдлаа, Т.Доржханд, Д.Гантулга нарыг намын гишүүнээс хасахаар болсон гэнэ. Тус намын дарга Т.Ганболд тушаал гаргасан аж. Тэднийг намын дүрмээ зөрчсөн төдийгүй намынхаа хуучин тамга, санхүүгийн баримтуудыг хулгайлан авч хууль бусаар ашигласан гэж үзжээ. Түүнчлэн тэднийг сонгуульд бие даан нэр дэвшихийг уриалан тус намын сонгуулийн мөрийн хөтөлбөрийг хэрэгжүүлэх нөхцөлийг таслан зогсоосон зэрэг үндэслэлүүдийг дурдсан байна. 
РИО-2016 олимпийн наадамд бүтэн багаараа өрсөлдөх эрх олж авах үлдсэн ганц боломжийн төлөө чөлөөтийнхөн мордлоо. Тэмцээн тавдугаар сарын 6-8-нд Туркийн Стамбулд болно.