Month: May 2016

Нийслэлийн Засаг дарга бөгөөд Улаанбаатар хотын захирагч Э.Бат-Үүл Засгийн газрын “Сайдын цаг” уулзалтаар мэдээлэл хийлээ.

Тэрээр “Засгийн газрын хуралдаанаар “Сайн хашаа” хөтөлбөр, түүнийг хэрэгжүүлэх журмыг батласан. “Сайн хашаа” хөтөлбөр нь гэр хорооллын айлууд өөрийнхөө амьдрах орчныг сайжруулах аюулгүй орчинд амьдрах эрхээ хэрэгжүүлэхэд нь зориулж 10 сая төгрөг хүртэлх зээлийг олгох шийдвэр гарсан. Гэр хороололд 200 гаруй мянган хашаатай айл байгаа. Энэ хөтөлбөр нь тодорхой цаг хугацаанд явагдана. Эхний ээлжинд хөрсний бохирдол, утаатай төвийн бүсийн 69200 хашаа хамрагдана гэж тооцож байгаа. Эхний ээлжийн хөтөлбөрт зориулж 200 тэрбум төгрөгийн эх үүсвэр гаргахаар шийдсэн. Цаашдаа айлуудын хашаанд инженерийн үйлчилгээ хүргэж өгөх чиглэлээр үйл ажиллагаа явна. Зээл авах үндсэн болзол нь юу вэ гэхээр Улаанбаатар хотын хот төлөвлөлтийн үйл ажиллагаатай нийцэх ёстой. Нэг айл 10 сая төгрөгийн зээл аваад хашаандаа инженерийн байгууламж барина гэж бодох юм бол ганцаараа хийх үү, хөршөөрөө хийх үү, өөр олон айлтай нийлэх үү гэдэг зураг төсөв гарах ёстой. Энэ нь Ерөнхий төлөвлөгөөний газраар хянагдаж, батлагдсан байх ёстой” гэв.

Мөн анх удаа хашааны газраар нь барьцаалж зээл олгож байгаагаараа онцлог аж. Харин хот байгуулалтын дүрэм журам, Ерөнхий төлөвлөгөө болон болон дүүргийн төлөвлөлттэй нийцсэн байх шаардлагатай аж. Зээлийг Төрийн банкаар дамжуулан олгох юм байна.

Гэрэл зургийг Ц.МЯГМАРСҮРЭН

-ИРГЭДИЙН ЦАЛИН НЭМЭГДЭЭГҮЙ УЧИР ТЭДНЭЭС АВАХ ТАТВАР 10.2 ТЭРБУМААР ТАСАРЧЭЭ-

Нийслэлийн иргэдийн төлөөлөгчдийн хурлын /НИТХ/ ээлжит бус хуралдаан өнөөдөр болж, нийслэлийн 2015 оны төсвийн гүйцэтгэл, 2016 оны төсөвт тодотгол хийх асуудлыг хэлэлцлээ. Улаанбаатар хотын 2016 оны төсөв 693.6 тэрбум төгрөг байх буюу энэ хэмжээний орлого олно гэж НИТХ баталсан юм. Ингээд эхний гурван сард 125.4 тэрбум төгрөгийн орлого олж, хотын бүтээн байгуулалт, төрийн албан хаагчдыг цалинжуулах зэрэг асуудлыг санхүүжилнэ гэж хот тооцсон. Гэвч нийслэлийн төсвийн зардал олох орлогоосоо давж, зургаан тэрбум төгрөгөөр тасарчээ. Оюутны төлбөр, шинэ орон сууц худалдан авсан иргэнд төр Хувь хүний орлогын албан татвараас /ХХОАТ/ тодорхой хувийг нь буцаан олгодог. Энэ жишгээр хот ХХОАТ-ын буцаан олголтод 8 тэрбум төгрөгийг гуравдугаар сард олгохоор төлөвлөсөн ч, санхүүжилтийг дүгээр сард олгосон нь нийслэлийн төсвийн орлого 2.1 тэрбум төгрөгөөр буюу 1.1 хувиар давж биелжээ. Гэсэн хэдий ч улс орны эдийн засгийн уналтаас болж ажил хийж буй иргэдийн цалин нэмэгдээгүй нь нийслэлийн төсвийг бүрдүүлэх гол судас ХХОАТ-аас олох орлого 10.2 тэрбум төгрөгөөр тасарчээ. Цаашид ч тасрах магадлалтайг НИТХ-д суудалтай сөрөг хүчнийхэн ярьж байна. Гэхдээ эх баригч АН-ын бүлэг иргэдийн эрүүл мэнд, хотынхоо бүтээн байгуулалтад хөрөнгө харамгүй зарцуулж, тасалдсан татварын орлогыг орлуулж, хөрөнгийг босгоно гэсэн эерэг төсөөллтэй байлаа. Дөрвөн жилийн өмнөх нийслэлийн хөрөнгө оруулалт, 2012 оноос хойш нэмэгдээгүй, буурч явааг Н.Батаа орлогч тайлбарласан юм.

Өмнөх хотын удирдлагын үед орон нутгийн болон нийслэлийн өмчит үйлдвэрийн газруудын зардал нэг төгрөг 31 мөнгөөс эхэлдэг байсныг Э.Бат-Үүл даргын багийнхан нэг төгрөг 7 мөнгө болгон бууруулжээ. Гэтэл НИТХ-дахь МАН-аас ашигтай ажилладаггүй, аудитын дүгнэлтээр 13.9 тэрбум төгрөгийн зөрчил илэрсэн нийслэлийн болон орон нутгийн өмчит үйлчилгээний байгууллагын тоог, тэдгээрийг санхүүжүүлэх хөрөнгө нэмэгдлээ гэж шүүмжилж байна. Тэд нийслэлийн иргэдийн дунд өвчлөл нэмэгдсэн иймээс эрүүл мэндийн салбарт зарцуулах мөнгөний хэмжээг нэмэх санал гаргалаа. Шударга ёс эвслийн тухайд элэгний хавдрыг эмчлэх тоног төхөөрөмжийг худалдан авахад төсвөөс нэг тэрбум төгрөгийг гаргая гэсэн НИТХ дахь АН-ын бүлгийн саналыг дэмжлээ.

Нийтийн тээврээр үнэгүй зорчих иргэдийн зардлаас 16.6 тэрбум төгрөгийг бууруулж, үйлчилгээнд явж буй том оврын автобусны цагийн зардалд 9.7 тэрбум төгрөгийг нэмэх. Мөн гэр хорооллолд хийгдэх бүтээн байгуулалтын ажлаа тууштай дэмжиж , гэр хорооллын иргэдийн бүлгийг санхүүжүүлэх зардлыг 625 сая төгрөгөөр нэмэх зэргээр нийслэлийн 2016 оны төсвийн тодотголыг хийх саналыг хотын удирдлагууд гаргасан. НИТХ-ын гишүүдийн олонх дээрх саналыг дэмжиж, баталлаа. Ингэснээр хотын шууд урсгал зардал нийт 5 тэрбум 548.6 сая төгрөгөөр буурч, 299 тэрбум 676.5 сая төгрөг болох юм.

Улаанбурхан өвчний тархалтыг бууруулах чиглэлээр хэрэгжүүлж байгаа арга хэмжээний талаар Эрүүл мэнд, спортын сайдын үүргийг түр хариуцагч бөгөөд Шадар сайд Ц.Оюунбаатар сэтгүүлчдэд мэдэлэл хийлээ.

НҮБ-ын Хүүхдийн сангаас Улаанбурхан-Улаануудын эсрэг нэмэлт дархлаажуулалт хийх 627,500 хүн/тун вакциныг хүлээж авсан. Энэ вакциныг 18-30 насныханд өнөөдрөөс хийж эхэллээ. Нэмэлт вакцин болон эмчилгээний тоног төхөөрөмж авах асуудлыг Засгийн газрын энэ оны гуравдугаар сард шийдвэрлэсэн бөгөөд Засгийн газрын шийдвэрүүд ажил хэрэг болж байна.

900 газарт дархлаажуулалтын түр цэг, 300 гаруй нүүдлийн цэг байгуулан дархлаажуулах бэлтгэл хангасан. Энд ажиллах 1,200 эмч, 350 сувилагчийг бэлтгэн сургалтад хамруулсан” гэлээ.

Улаанбурхан өвчний тархалтыг бууруулахад чухал нөлөө үзүүлэх нэмэлт дархлаажуулалтын ажлыг олон нийтэд сурталчилж, ач холбогдлыг нь хүүхэд залуучуудад тайлбарлан таниулахад хамтран ажиллахыг хэвлэл мэдээллийн байгууллагуудад Шадар сайд уриаллаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Гэрэл зургийг Ц.МЯГМАРСҮРЭН

УИХ-ын Төрийн Байгуулалтын Байнгын Хорооны хуралдаанаар УИХ-ын сонгуулийн тойрог байгуулах, тойргийн мандатын тоо, дугаар, нутаг дэвсгэр, төвийг тогтоох тухай асуудлыг хэлэлцэж байна.

Тодруулбал, Сонгуулийн Ерөнхий Хорооноос Төрийн Байгуулалтын Байнгын Хороонд ирүүлсэн сонгуулийн мандат, тойргийн асуудлыг хэлэлцэж эхлээд байна.

Хуралдааны үеэр УИХ дахь МАН-ын бүлгийн гишүүд СЕХ-ны дарга Ч.Содномцэрэнг захиалгаар мандат тойргийг хуваарилсан хэмээн “загнаж” байв. Үүний хариуд Ч.Содномцэрэн дарга “Бид ямар нэгэн захиалгаар ажиллаагүй” гэсэн тайлбарыг хэллээ.

МАН-ын гишүүдийн маргалдаж буй гол шалтгаан нь АН өөрийн эрх ашигтаа нийцүүлж сонгуулийн хуулийг өөрчилж тойрог, мандатыг хуваарилж байна. Сонгогчдын эрх ашгийг зөрчиж байна гэсэн зүйл ярьж байв. Тухайлбал, УИХ-ын гишүүн Ё.Отгонбаяр “Бүх амьтан тэгш эрхтэй гахай илүү эрхтэй гэдэгтэй адил болж байна” хэмээв.

Гэрэл зургуудыг Ц.МЯГМАРСҮРЭН

УИХ-ын 2016 оны сонгуульд бие даан нэр дэвших иргэд хуулийн дагуу тавдугаар сарын 16-ны дотор бичиг баримтаа бүрдүүлж өгөх ёстой. Харин СЕХ-оос бие даагчдын материалыг шалгаад тавдугаар сарын 23-нд хариу хэлэх юм.

Хуулийн дагуу Үндэсний аудитын газар орон нутаг дахь салбар аудитын газруудаараа дамжуулан аймаг, нийслэлийн ИТХ-ын сонгуульд оролцох 325 бие даан нэр дэвшигчийн сонгуулийн мөрийн хөтөлбөрт аудит хийжээ. Түүнчлэн энэхүү дүгнэлтээ сонгуулийн хороодод хүргүүлсэн байна.

Үүнтэй зэрэгцээд хэвлэл мэдээллийн хэрэгслүүдээр бие даан нэр дэвших иргэдийн талаарх мэдээлэл цацагдсаар байгаа юм. Тухайлбал, нийслэлийн Баянгол дүүрэгт дуучин Нара буюу Мөнхтөрийн Нарантуяа, Баянзүрх дүүрэгт Монголын чөлөөт ахмадын холбооны тэргүүн Г.Баасан, Сүхбаатар дүүрэгт Хүний эрхийн хуульч М.Ичинноров, мөн ХҮН-ын С.Боргил болон сэтгүүлч Т.Алтаншагай нарын нэр дурдагдаж эхлээд байна.