Month: May 2016

АНУ-д ажиллаж, амьдардаг Гансүхийн Зулцэцэг хэмээх монгол бүсгүй сураггүй алга болоод хорь гаруй хоногийн хугацаа өнгөрч буйг тус улсын телевизээр мэдээлжээ. АНУ-ын цагдаа нарын хэлснээр, Г.Зулцэцэг 38 настай бөгөөд АНУ-ын Чикаго хотын баруун хойд захын ДесПлэйнес хотоос гурван долоо хоног гаруйн өмнө алга болжээ. Түүнийг эрж хайх ажиллагаа явагдаж байгаа бөгөөд Г.Зулцэцэгийг харсан, сонссон хүмүүсээс түүний тухай мэдээллийг ДесПлэйнес хотын цагдаагийн газрын (847) 391-5400 тоот утсаар авч байгаа аж.

Хамгийн сүүлд Г.Зулцэцэг дөрөвдүгээр сарын 11-ний өглөөний 10:00 цагийн орчимд өрөөнийхөө найзуудаас салсан бөгөөд нэг найзтайгаа уулзана гээд гарсан аж. Харин тэр өдрийнхөө 12:00 цагийн орчимд АТМ-аас бэлэн мөнгө авсныг цагдаа нар тогтоосон байна. Мөрдөгчдийн хэлснээр Г.Зулцэцэг тухайн өдөр өөрийн 2001 оны мөнгөлөг “Хонда Аккорд” суудлын тэргээ унаж явжээ. Түүнчлэн автомашин нь зэргэлдээх хотынх нь хяналтын камерт оройн 22:12 цагийн үед бичигдсэн байна. Г.Зулцэцэгийг таньдаг дөрвөн хүнийг олж уулзсан ч сураг нь гараагүй гэнэ. Г.Зулцэцэг 2015 оны арваннэгдүгээр сард АНУ-д ирсэн бөгөөд Ривервүүдст “Korean BBQ” болон Гленвьюд “Суширесторан”-д тогоочоор ажиллаж байжээ. Г.Зулцэцэгийг алга болсноос хоёр хоногийн дараа буюу дөрөвдүгээр сарын 13-нд түүний найзууд нь Г.Зулцэцэгийг ажилдаа ирэхгүй байна хэмээн цагдаад мэдэгджээ.

Сураггүй
болсон эмэгтэйн унаж явсан машин

Ажлынх нь газрын дарга Колин Анын хэлснээр “Г.Зулцэцэг цаг баримталдаг, найдвартай бас шаргуу ажилладаг” гэжээ. Дашрамд дурдахад, түүнийг найзууд нь Монгол дахь хамаатан саднууддаа их санаа зовдог, алга болохоосоо өмнө хэд хэдэн танилцах сайтаар зочилж байсныг цагдаа нарт ярьжээ. Цагдаа нар монгол бүсгүйн утас уруу залгаад амжилт олохгүй байгаа аж.

Манай гадаад хэргийн яамЧикаго хотын цагдаагийн байгууллагатай хамтарчажиллаж байна гэв

Г.Зулцэцэгийн ар гэрийнхэн болон хоёр хүүхэд нь Монголд байдаг бөгөөд түүнийг алга болсноос хоёр хоногийн дараа ар гэрийнхэн нь Гадаад хэргийн яаманд хандсан байна. Г.Зулцэцэг гэдэг монгол эмэгтэй сураггүй алга болсон тул АНУ-ын Чикаго хотын хууль хяналтын байгууллагад хандаж, түүнийг эрэн сурвалжлуулах ажлыг зохион байгуулахыг хүссэн өргөдөл гаргажээ. Үүний дагуу Гадаад хэргийн яамнаас тус улсад байгаа Элчин сайдын яамаар дамжуулан хотын цагдаагийн байгууллагад хандсан аж. Энэ талаар Гадаад хэргийн яамнаас тодруулахад, “38 настай эмэгтэй Чикаго хотод дөрөвдүгээр сарын 16-ны өдөр алга болсон. Ажилдаа явна гэж гэрээсээ гараад сураггүй болсон байна. Ар гэрийнхэн нь манайд хандсан даруйд тэндхийн Элчин сайдын яамаар дамжуулаад хуулийн байгууллагад хандан мэдээлэл солилцон, хамтарч ажиллаж байна. Манай зүгээс эмэгтэйг таньдаг хүмүүсийг зааж өгөх, тэндхийн цагдаагаас ирсэн мэдээллийг ар гэрийнхэнд нь дамжуулах зэргээр ажиллаж байна. Одоогоор эрэн сурвалжлах ажиллагаа үргэлжилж байгаа. Эмэгтэйг таньдаг дөрвөн хүнтэй холбогдсон ч сураг нь гараагүй байна” гэв.

Машин нь “харууд”-ын хорооллоос олдсон учраас муу зүйл болсон байх гэж таамаглаж байна

Чикаго хотын монголчууд Г.Зулцэцэг гэдэг эмэгтэйг алга болсныг дуулаад нэг нэгэндээ сэрэмжтэй явахыг анхааруулж эхэлжээ. Танихгүй хүнтэй юм ярихгүй байх, гадуур явахдаа эргэн тойрноо ажиглаж байх зэргээр сэрэмжтэй байхыг анхааруулж байгаа аж. Улмаар тэндхийн монгол иргэд Г.Зулцэцэгийг эрэн сурвалжлах ажлыг яаравчлуулахыг хүссэн өргөдлийг цагдаагийн байгууллагад нь өгч, эрэн сурвалжлах ажилд нь туслахаар төлөвлөжээ.

Чикаго хотод амьдарч буй монгол иргэд эмэгтэйг ямар шалтгаанаар алга болсон талаар өөр өөрсдийн таамгийг дэвшүүлж байгаа аж. Хамгийн сүүлд харуудын амьдардаг хорооллоос түүний машин олдсон учир ямар нэг муу зүйл тохиолдсон байж магадгүй хэмээн таамаглаж байгаа гэнэ. Тус хотын хувьд хүний наймааны хэрэг бага гардаг ч хар тамхи, мансууруулах бодистой холбоотой хэрэг маш их байдаг гэнэ. Алга болсон монгол эмэгтэйн хувьд Чикагод ирээд удаагүй учраас таньдаг хүн ховор байсан гэнэ. Мексик залуутай найзалдаг байсан бөгөөд хамгийн сүүлд найз залуутайгаа уулзаад салсан нь тэнд байгаа монголчуудад сэжиг төрүүлж байгаа аж. Цагдаагийнхан мексик эрээс байцаалт авсан бөгөөд тэрээр “Г.Зулцэцэг ажилдаа явлаа гээд салсан, юу болсныг мэдэхгүй” гэжээ. Энэ хэрэгт найз залууг нь холбоотой гэх нотлох баримт одоогоор байхгүй учраас цагдаа нар байцаалт аваад явуулсан аж. Г.Зулцэцэг тэр өдөр үдээс өмнө монгол найз эмэгтэйтэйгээ уулзахаар болзсон байсан ч ийнхүү ажилдаа очилгүй сураггүй алга болсон байна.

Чикаго хотын төв телевизээр 38 настай монгол эмэгтэй алга болсон талаар удаа дараа мэдээлж, эрэн сурвалжилсаар байгаа аж.

Х.ЦЭНД

“The Lemons” хамтлагийн соло гитарчин А.Энхтулгатай ярилцлаа.

-“The Lemons” хамтлаг “Unplugged” тоглолтоо хийх гэж байна. Тоглолтод хэдэн дуу дуулагдах вэ?

-Манай хамтлагийн “Un­plugged” тоглолт тавдугаар сарын 27-ны өдөр болно. Зарлалаа хамтлагийн page хуудсанд эрт тавьсан болохоор хүмүүс хүлээгээд эхэлчихсэн бололтой, асуугаад байгаа. Тоглолтдоо гурван цомгийнхоо шилдэг гэсэн 16 дууг дуулахаар сонгоод бэлтгэлээ хийж байна.

-Хүлээлт үүсгэчихсэн юм байна. Билетээ хэдэн төгрөгөөр борлуулж байгаа вэ?

-Өнөөдрөөс л борлуулалтаа эхэлнэ дээ. Суудлын ангиллаар 40, 60, 80 мянган төгрөгөөр борлуулна. Хүмүүс эхнээсээ суудлаа захиалаад эхэлчихсэн. Улсын дуурь бүжгийн эрдмийн театр 500 хүний суудалтай учраас билетийн борлуулалт эхлэхээр хурдан дуусах шинжтэй байна. Нэг талаараа энэ манай хамтлагийн бараг сүүлийн тоглолт байх. Магадгүй бүр хөгширчихөөд 50-60 насандаа бас нэг тоглолт хийхийг үгүйсгэхгүй. Тэгэхээр энэ тоглолтыг үзэхэд харамсахгүй гэж хэлмээр байна.

-Танай хамтлаг тарж байгаа юм уу?

-Хамтлаг тараагүй. Бид тоглолтоо дуусгаад дөрөв дэх цомгийн ажилдаа орно. Цомгийнхоо аяыг зохиогоод эхэлчихсэн байгаа. Зун Англи явж тоглолт хийж магадгүй.

-Хэд дэх бие даасан тоглолт вэ. Тоглолт дээрээ үзэгч, сонсогч нартаа ямар бэлэг барих гэж байна?

-Хамтлагийн бие даасан дөрөв дэх тоглолт. “Un­plugged” тоглолт найруулгын хувьд хүмүүсийн төсөөлснөөс тэс өөр байхаар бэлтгэлээ хийж байгаа. Бидний ард Филармонийн 15-16 хөгжимчин хөгжимдөнө. Дуунуудаа хийл, оркестртой дуулна. Мөн хамтлагийнхан бүгд банзан гитартай дуулахаар бэлтгэж байгаа. Тэгэхээр тоглолт маань үзэх, сонсох зүйлтэй сайхан болно. Хамгийн гол нь ганцхан удаа тоглогдох учраас хүмүүс үзэх гээд хүлээгээд байгаа байх.

-500 хүний суудалтай зааланд тоглолт хийхэд сонсогчид чинь бүгд үзэж чадахгүй юм биш үү?

-Харин суудал хязгаартай. Найруулгын хувьд хүмүүст хүрсэн сайхан тоглолт хийхийн тулд заалаа ингэж сонгосон. Манай хамтлагийг 20-40 насныхан сонсдог гэхээр багагүй тоо гарна. Тоглолт ганцхан удаа болох учраас английн студиэр бичлэг хийлгэнэ. Тэрийгээ DVD, CD болгож гаргахаар төлөвлөөд байна.

-Бэлтгэлээ хаана хийж байгаа вэ?

-”Gandan live house”-д хийж байгаа.

-Хамтлагийн анхны дуу болох “Хайртай” дууг сонсогчид андахгүй. “The Lemons” хамтлаг урын сандаа хэдэн дуутай болсон байна вэ?

-2002 онд “Хайртай” дууны үгийг Одноо бичиж байлаа. Тухайн үед өөрсдийн бэлтгэлийн байрандаа приставкны VHS хальсан дээр бичүүлж “FM”-ээр цацуулж байсан юм. Цацагдсан даруйдаа дуу маань хит болж байсан. Сүүлд 2006 онд цомог гаргахдаа шинээр бичиж оруулж байсан. Дуу маань 2007 онд “Пентатоникийн шилдэг алтерьнатив” шагнал авч байлаа. Анхны гэх тодотголтой учраас үзэгчид маань ч сайн мэддэг юм. Одоо хамтлагийн урын санд 50 дуутай болсон байна.

-“The Lemons” хамтлаг хэзээ байгуулагдаж байв. Гишүүд өөрчлөгдсөн үү. Одоо ямар бүрэлдэхүүнтэй байгаа вэ?

-“The Lemons” хамтлаг 2004 оны долдугаар сарын 9-нд албан ёсоор байгуулагдаж байсан. Анхны бүрэлдэхүүнээсээ зарим нь гарсан. Одоо хамтлагийн дуучнаар Ц.Одбаяр, соло гитарчнаар А.Энхтулга, базз гитарчнаар Д.Анар, бөмбөрчнөөр М.Өнөрбаяр нар ажиллаж байна. Ерөнхийдөө 2004 оноос хойш одоогийн бүрэлдэхүүнээрээ нэгдээд 12 жил өнгөрчээ.

-Танай хамтлаг анх Hifi-тай гэрээ хийж байсан байх аа?

-Манайх анх “Hifi lebel”-тэй хоёр цомогны гэрээ хийж байсан. “Hifi lebel” байгуулагдах үед дэлхийн стилийг тоглож байсан хамтлаг манайх л байсан.

-Дуугаа ямар төрөл жанраар туурвидаг вэ?

-Ер нь “Independent” рок урсгалаар уран бүтэлээ туурвиж байна.

-Та хамтлагийнхаа соло гитарчин. Яаж сурч байв?

-Сонирхлоороо сурсан. Манай хамтлагийн Одноо, Өөжгий ч бас сонирхлоороо сурч байсан. Би 1997 онд долдугаар ангид байхдаа нэг сар хүнээр заалгаж байлаа. “Нирвана” хамтлагийн “Un­plugged” тоглолтыг үзээд гитар тоглож сурсан. Тухайн үедээ их идэвхтэй сураад тэрнээс хойш бэлтгэл хийгээгүй. Би өөрийгөө Монголын хамгийн муу гитарчин гэж боддог. Зарим дууныхаа аяыг гитарын ганцхан барилтаараа ч дараад явчихдаг үе байдаг. Энэ миний стиль болоод байна. Ер нь рок хөгжмийг мэргэжлийн хүмүүс хийдэггүй. Сонгодог мэргэжлийн хүмүүс дүрэмд баригдаад өөрийгөө өөрчилж чаддаггүй юм шиг санагддаг. Гитарчид олон барилттай сайхан үзүүлбэр үзүүлээд л олон гам уншаад байгаа ч тэр болгон өөрийгөө харуулж чадахгүй л байна. Би муу ч гэсэн өөрийнхөө стилийг гаргаад “The Lem­ons” хамтлагаар дуугаа хийж үлдээж чадсан.

-Амьд хөгжмийн хамтлаг учраас дууныхаа үгийг өөрсдөө бичдэг үү?

-Дууны үгийг манай хамтлагийн дуучин Одноо бид хоёр бичдэг. Өдөр тутмын амьдралыг энгийнээр илэрхийлдэг. Дууныхаа аяыг ч бас өөрсдөө бичнэ.

-Амьд хөгжмийн хамтлаг энгийн хэв маягтай байж болдог юм байна гэдгийг танай хамтлагаас харж байсан гэж ярих хүн цөөнгүй. Тэр үед яагаад тийм алхам хийж байв?

-Хамтлагаа байгуулж байхад хүмүүс рок хөгжим гэхээр л урт үстэй, гинж, савхи өмссөн хүмүүс гэж ойлгодог байсан. Энэ үед бид энгийн хувцастай гарч ирсэн. Тухайн үед ихэнх залуучууд “Сonverse” кет гэж мэддэггүй пүүз өмсдөг байсан үе. Манайхан “Мэлхий гүнж” дууны клипэн дээр “Сonverse” кеттэй дуулдаг юм. Тэрнээс хойш бүгд л кет сонирхдог болж байлаа шүү дээ.

-Удахгүй дөрөв дэх цомгоо гаргах юм байна. Хамтлагийн анхны цомгоо хэзээ гаргаж байв?

-Анхны цомог маань 2006 онд гарсан. “Хайртай”, “Цэнхэр нүд”, “Харах дуртай”, “Элэг бөөр” гэх дуунуудтай. Тэр оныхоо шилдэг цомог гээд бүх сэтгүүлд гарч байлаа. 2007 онд Пентатоник наадмаас гурван шагнал авч байсан. Одоо ч бас хүмүүс тэр цомгийг маань хамгийн шилдэг гэж ярьдаг юм билээ. Тэрнээс хойш гурван цомог гаргасан байна. Бүгд “In­dependent” рок урсгалаар гаргасан дуунуудтай. Сүүлийн цомог маань “Гурав” гэсэн нэртэй. Гурав дахь цомог маань учраас тэгж нэрлэсэн юм.

-Хүмүүс ямар дууг чинь илүү сонсдог вэ?

-Клиптэй дууг их сонсдог юм билээ. “Хүсэл” дуу маань хамгийн их youtube үзэлттэй байдаг. Тэр дууг электро парти, рок тоглолт, “Нисванис” хамтлагийн фестиваль дээр метал рокууд дээр очоод дуулсан ч бүгд мэддэг. Мөн хуучны “Мэлхий гүнж” “Цаг агаар” “Хайртай” гэх дууг бүгд мэддэг. Өнгөрсөн жил “Сүүлийн уянга” дуу маань онлайн таталтаар хоёрдугаар байрт орсон. Мөн хамгийн шилдэг цомог, шилдэг тоглолт хийсэн хамтлагаар тодорч байлаа.

-Сүүлийн үед ямар уран бүтээл дээрээ ажиллаж байна?

-Гурав дахь цомгийнхоо “Дөлгөөн” дуунд клип хийж цацсан. Хүмүүст их хүрсэн байна лээ. Одоогоор хамтлагийнхаа “Unplugged” тоглолтон дээр төвлөрч бэлдэж байна.