Month: May 2016

Монгол Улсын Ерөнхийлөгч Ц.Элбэгдорж энэ өдрүүдэд БНСУ-д албан ёсны айлчлал хийж байгаа билээ. Тэрээр энэ үеэр БНСУ-ын Ерөнхийлөгч Пак Гын Хэ нар албан ёсны хэлэлцээ хийсэн. БНСУ-ын Ерөнхийлөгч Пак Гын Хэ “Өнгөрсөн онд хоёр орны хооронд дипломат харилцаа тогтоосны 25 жилийн ой тохиож, хоёр талаас амжилттай зохион байгуулж тэмдэглэн өнгөрүүлсэнд сэтгэл хангалуун байна. Хоёр орны харилцаа хамтын ажиллагаа сайжирч байгаа, цаашид өргөжин тэлэх нөөц бололцоо бий” гэдэгт итгэлтэй байгаагаа хэлжээ.

Түүнчлэн хэлэлцээний үеэр хоёр тал, ардчилал болон зах зээлийн эдийн засгийг зэрэгцүүлэн амжилттай хөгжүүлж чадсан, IT болон ногоон технологийн хөгжлөөрөө дэлхийн тэргүүлэгч улс болох БНСУ-тай эдийн засгийн хамтын ажиллагааг эрчимжүүлэх, худалдаа, хөрөнгө оруулалтыг нэмэгдүүлж, харилцан ашигтай хамтын ажиллагааг хөгжүүлэх өргөн боломж байгааг дурдсан байна. Мөн Улаанбаатар-Бусаны чиглэлд 2016 оны 6 дугаар сараас байнгын нислэг үйлдэж эхлэх болсныг дурдсан байна.

УИХ-ын чуулганы нэгдсэн хуралдаанаар Ялтан шилжүүлэх тухай Монгол Улсын Засгийн газар, Бүгд Найрамдах Хятад Ард Улсын Засаг захиргааны онцгой бүс Хонконгийн Засгийн газар хоорондын хэлэлцээрийг соёрхон батлах тухай хуулийн төслийг хэлэлцэв. Одоогийн байдлаар гадаад оронд Монголын 300-гаад иргэн цагдан хоригдсон. Үүнээс 130 нь ял эдэлж байгаа юм байна.

“Хонконгод манай иргэд үзэсгэлэнгээс хулгай хийсэн хэрэгт холбогдсон. Тэд ял эдэлж байна уу, цайраад ирсэн үү? Хар тамхины наймаатай холбогдсон иргэдийг хэр байна” гэсэн Д.Лүндээжанцан гишүүний асуултанд Хууль зүйн сайд Д.Дорлигжав доорх хариултыг өгсөн юм.

-Хулгайн хэргээр 4 жилийн хугацаатай ял эдэлж байгаа 3 хүн байна. Нэг нь давж заалдсан. Хар тамхины хэрэгт холбогдсон иргэдийн тухайд “юу авч явж байгаагаа мэдээгүй байсан” гэсэн тайлбар тавьдаг. МИАТ-д “Таны өөрийн чинь ачаа биз. Өөр хүний зүйл авч яваагүй биз” гэсэн сануулгыг байнга тавьдаг. Олон улсад мөрдөгддөг зүйл.

Гишүүд асуулт асууж, үг хэлж дууссаны дараа Ялтан шилжүүлэх тухай Монгол Улсын Засгийн газар, Бүгд Найрамдах Хятад Ард Улсын Засаг захиргааны онцгой бүс Хонконгийн Засгийн газар хоорондын хэлэлцээрийг соёрхон батлах тухай хуулийн төслийг гишүүдийн олонх нь баталсан юм.

Өнөөдөр Хөдөлмөрийн сайд Г.Баярсайхан монгол залуус дэлхийн шилдэг тоног төхөөрөмж үйлдвэрлэгч Япон улсад мэргэжил дээшлүүлэх боломжийг бүрдүүлэх эхний алхам хийгдсэн талаар мэдээлэл хийлээ.

Энэ сарын 16, 17-нд Хөдөлмөрийн сайд Г.Баярсайхан тэргүүтэй төлөөлөгчид Япон улсад ажлын айлчлал хийжээ. Айлчлалын үеэр Г.Баярсайхан сайд Япон Улсын Эрүүл мэнд, хөдөлмөр, нийгмийн халамжийн сайд Я.Шиозакитай уулзалт хийсэн байна. Уулзалтаар УИХ-ын дарга З.Энхболдын ирэх сарын 01-нээс 03-нд Япон улсад хийх албан ёсны айлчлалын үеэр Монгол залуусыг Япон улсад мэргэжил дээшлүүлэхэд дэмжлэг үзүүлэх тухай Засгийн газар хоорондын санамж бичигт гарын үсэг зурахаар тохирчээ. Ингэснээр монгол залуус Япон улсад мэргэжил дээшлүүлж, эх орныхоо хөгжилд хувь нэмрээ оруулах боломж бүрдэнэ гэдгийг Г.Баярсайхан сайд онцоллоо.

Тэрээр “Айлчлалын үеэр Токио хотноо “Монгол Японы хөдөлмөрийн форум” зохион байгуулсан. Монгол, Японы Засгийн газар хоорондын “Эдийн засгийн хамтын ажиллагааны хэлэлцээр”-ийн хүрээнд хоёр орон бараа бүтээгдэхүүнээ харилцан хөнгөлөлттэй нөхцөлөөр борлуулах болсон. Үүний тулд бид Япон Улсад хэрэгцээтэй бараа бүтээгдэхүүнийг дотооддоо үйлдвэрлэх хэрэгтэй. Бүтээгдэхүүн үйлдвэрлэж эхэлхийн тулд нэн тэргүүнд тухайн улсад залуусыг сургаж, эрэлт хэрэгцээг нь судлах, үйлдвэрлэл эрхлэх туршлагаас нь судлах чухал юм. Хөдөлмөрийн форумын үеэр Японы аж ахуйн нэгжүүд Монголоос мэргэжлийн ур чадвартай залуусыг олноор авч ажиллуулах сонирхолоо илэрхийлсэн. Мөн Японы мэргэжлийн ур чадвартай залуусыг бэлтгэдэг “JITCO” байгууллагын удирдлагатай уулзаж, Монгол залуусыг тус улсад мэргэжил дээшлүүлэхэд дэмжлэг үзүүлэх, хэлний сургалтад хамруулах чиглэлээр хамтран ажиллах Санамж бичигт гарын үсэг зурсан” гэлээ.

Хөдөлмөрийн сайд Г.Баярсайхан дараа нь сэтгүүлчдийн сонирхсон асуултад хариуллаа.

-Монгол залуусыг Японд сургахад тодорхой дэмжлэг үзүүлнэ гэсэн байна. Ямар дэмжлэг үзүүлэх вэ?

-Өнөөдөр Япон улсын хөдөлмөрийн зах дээр залуучуудын мэргэжлийн ур чадварыг дээшлүүлэхэд асар том өрсөлдөөн явдаг. Монгол Улсын хөгжлийг цаашид нуруундаа үүрч явах мэргэжлийн ур чадвартай залуучуудыг Японд албан ёсоор хөдөлмөрийн зах зээлд дадлагажуулахаар тохиролцож байгаа. УИХ-ын даргын айлчлалын үеэр Санамж бичигт гарын үсэг зурахад бүх мэдээлэл илүү тодорхой болно.

-Дадлагажих хүмүүст ямар шалгуур тавих вэ. Япон руу явах залуусын тоог заасан уу?

-Мэргэжлийн ур чадвартай залуучуудыг бид энэ хөтөлбөрт хамруулъя гэсэн бодлого баримталж байгаа. Жишээ нь МСҮТ, Политехникийн коллеж, мөн Их дээд сургууль төгссөн залуусыг энэ хөтөлбөрт хамруулах бодолтой байна. Яг тодорхой тоо заагаагүй.

-Ур чадвараар дадлагажиж байгаа хүмүүс аль салбарын хүмүүс байх вэ. Монголд ирээд хэрхэн ажиллах вэ?

-Япон улсад айлчлахдаа “Тоёото”, “Хюнда” автомашин үйлдвэрийн нарийн эд ангийн үйлдвэрээр орсон. Тэнд манай 20 гаруй залуу ажиллаж байна. Тухайн компаниуд Монгол Улсад салбараа нээсэн байна. Анх тэр үйлдвэрт ажиллаж байсан залуус одоо Монголдоо ирж ажиллаж байна.

-Одоогийн байдлаар Япон улсад Монголын хэдэн залуу сурч, ажиллаж байна вэ?

-Одоогийн байдлаар Япон улсад Монголын 7000 гаруй иргэн байна. Үүнээс 600 гаруй залуу мэргэжлийн ур чадвараа дээшлүүлэхээр ажиллаж байна.

УИХ-ын чуулганы нэгдсэн хуралдаанаар өнөөдөр нийт 10 гаруй асуудал хэлэлцэхээр төлөвлөөд байгаа. Энэ асуудалтай холбогдуулж УИХ-ын гишүүн Ө.Энхтүвшин “Хугацаагаар шахаж нэг дор олон хуулийг бөөндөж батлах нь гай болж ч мэдэх аюултай тул хэт олон хууль бөөндөх шаардлагагүй зогсоох ёстой” гэв.

УИХ-ын дарга З.Энхболд “Хуулиараа УИХ-ын хаврын чуулганыг долдугаар сарын 1-нд завсарлуулах ёстой ч өнөө жил сонгуультай. Зургадугаар сарын 11-29-ний хооронд УИХ-ын сонгууль зохион байгуулагдах учраас хуралдаанаа зогсоох ёстой болж байгаа. Улс төрийн намуудын сонгуульд өрсөлдөх нэр дэвшигчээ тодруулах хугацаа тавдугаар сарын 23-27-ний хооронд болно. Ийм учраас УИХ-ын чуулганыг тавдугаар сарын 31-нийг хүртэл хуралдуулах талаар УИХ-ын даргын зөвлөлөөр ярилцахаар төлөвлөж байна. Одоо хэлэлцэх хуулиудад том хууль байхгүй, жижиг хуулиуд байгаа. Мөн хугацаагаар шахаж хуулиудыг бөөндөж батлаагүй” гэсэн тайлбар хийсэн юм.

УИХ-ын чуулганы нэгдсэн хуралдаанаар
Эрүүл мэнд, спортын сайдаар тус яамны Төрийн нарийн бичгийн дарга
С.Ламбааг томилуулах тухай Засгийн газрын саналыг хэлэлцэх үед УИХ дахь
Ардчилсан намын бүлгийн дарга Б.Гарамгайбаатар “МАН-ын бүлгийн гишүүд
асуудлыг улс төржүүлж байгаа учраас дөрвөн цагийн завсарлагыг Ардчилсан
намын бүлэг хүсэж байна” гэв. Энэ саналыг УИХ-ын дарга хүлээн авч
байгаагаа мэдэгдэж, 16.00 цаг хүртэл Ардчилсан намын бүлэг завсарлага
өглөө.

Хэлэлцүүлгийн шатанд УИХ-ын гишүүн
Ө.Энхтүвшин: С.Ламбаа та нэг сарын настай сайд болох нь. Эрүүл мэнд,
спортын сайдыг томилохгүй найман сар явууллаа. Мэргэжлийн хүмүүс нь
ороод ирэхээр ямар нэг шалтгаан хэлж хойшлуулсаар өнөөдөр энэ асуудал
орж ирж байгаа нь үндсэндээ зангилаа тайлагдлаа. Энэ салбарт хүйтэн
сэтгэлээр хандлаа. Байлгаж байгаад эгзэгтэй үеийг тааруулж томилгоо хийх
нь. Би хувьдаа сонгууль тойрсон асуудлаар эрүүл мэндийн салбарыг
сонгууль руу чиглүүлэх үүрэг даалгавар өгөгдөж, боловсон хүчнийг нааш
цааш нь болгох, даалгавар өгөгдөх нь гэж харж байна. Тэрийг нь С.Ламбаа
хэрэгжүүлэх юм уу, үгүй юм уу. Их том салбар. Бид шаардсан нь үнэн.
Эзэнтэй болгооч гэж шаардсан, С.Ламбаа гэдэг хүнийг чадна, чадахгүй
гэдэг талаас нь ярихгүй. Энэ нэг сарын хугацаанд юуг өөрчилнө гэж бодож
байна, юу хийнэ гэж албыг авч байна. Спортын асуудал давхар багтана.
Өнөө жил сонгууль, АСЕМ, олимп олон юм давхацсан, нам шахаж байгааг
мэдэж байна.

С.Ламбаа: Тусгай даалгавар ч байхгүй,
хуучин ажиллаж байсан байр суурин дээрээ ажиллана. Хүндрэлтэй нөхцөлд
байгаа ч эмч мэргэжилтнүүд хийдэг ажлаа хийгээд байж байгаа. Богино
хугацаанд хэд, хэдэн том зорилтыг хэрэгжүүлнэ. Эмнэлгийн тусламж
үйлчилгээтэй холбоотой 10 гаруй журмыг батлуулах ёстой. Өмнө нь
эхлүүлсэн байсан том ажлуудаа нэлээд явуулсан, Эх хүүхдийн эрүүл мэндийн
төвийн асуудлыг богино хугацаанд амжуулах зорилт тавьж байна. Сонгууль
бидэнд хамаагүй, би УИХ-ын сонгуульд нэр дэвшихгүй учраас ажлаа хийнэ
гэж бодож байна.

УИХ-ын гишүүн Ц.Даваасүрэн: Энэ нэгхэн
сарын хугацаанд гоё сайхан болгоно гэж худлаа яриад яах вэ, тогтвортой
байлгахад анхаар. Дөрвөн жилийн хугацаанд чухал салбараа самарлаа.
Хамгийн хариуцлагатай салбараа бид самарсан шүү.

Ерөнхий сайд Ч.Сайханбилэг: Томилгоог
хийхгүй хугацаа алдсан тухай ярьж байна. Гэвч одоог хүртэл
Г.Шийлэгдамбыг гэм буруутай эсэхийг тогтоосон шүүх хурал болоогүй. Ийм
учраас би хэсэг хугацаанд харзнах ёстой гэж үзсэн.

УИХ-ын гишүүн Б.Гарамгайбаатар: Ардын
намын бүлгийн гишүүд асуудлыг улстөржүүлж байгаа учраас Ардчилсан намын
бүлэг дөрвөн цагийн завсарлага хүсэж байна.

Завсарлагыг УИХ-ын дарга өглөө. Ингэхдээ 16.00 цаг хүртэл завсарлага өглөө.

Одоо чуулганы нэгдсэн хуралдаанаар
Монгол Улсын Засгийн газар Азийн хөгжлийн банк хооронд байгуулах Хилийн
үйлчилгээг сайжруулах бүс нутгийн төслийн зээлийн хэлэлцээрийг соёрхон
батлах тухай хуулийн төслийг хэлэлцэж эхлээд байна.