Увс аймгийн ихэнх нутгаар өчигдөр шөнөөс эхлэн хүчтэй цасан шуурга шуурч, байгалийн гамшигт үзэгдэл болжээ. Цаг агаарын гамшигт үзэгдэл нь баруун Сибирээс шилжин ирж байгаа бага даралтын оронтой холбоотой бөгөөд энэ бага даралтын орон нь өнөө шөнө баруун аймгуудын нутгаар орж ирээд, Хангайн нурууг давж, Орхон, Сэлэнгийн сав газарт гүнзгийрч өндрийн бага даралтын орон үүсэх нөхцөл бүрэлдэж байгаа юм байна.
Үүнтэй холбоотойгоор аймгийн Засаг дарга тээврийн хэрэгслийн хөдөлгөөнийг түр хугацаагаар хязгаарлах шийдвэр гаргасан байна. Тодруулбал, Улаангом сумаас гадагш гарах автомашины хөдөлгөөн, сумдаас Улаангом сум болон бусад чиглэлд зорчих автомашиныг хөдөлгөөнийг өнөөдөр, маргааш хязгаарлажээ.
Өнгөрөгч сарын 29-ний өдөр Булган аймаг дахь МАХН-ын дарга асан С.Дашдондог намдаа өгсөн хагас тэрбум гаруй төгрөгөө нэхэмжилж, АТГ-т хандсан байна. Энэ тухайгаа тэрээр “Н.Энхбаяр даргын үгэнд итгэж МАХН-д өгсөн хагас тэрбум гаруй төгрөгөө авахаар нэхэмжлэл бичиж, АТГ-д өнөөдөр өглөө. Энхбаяр дарга энэ асуудлыг АТГ-т өг гэж 2015 оны 9-р сарын 23-нд өөрөө хэлсэн юм. Хэлсэн үгийг нь ёсоор болголоо. Шийлэгдамба болон Цогтбаатар нар шиг шоронд орох, над шиг мөнгө төгрөг, бүх насан туршдаа үнэнчээр зүтгэж босгосон нэр хүнд капиталаа Н.Энхбаяр даргад завшуулчих вий гэж болгоомжлох үүднээс залуус дүү нартаа анхааралтай хандахыг ахмад хүний хувьд зөвлөж байна” хэмээн өөрийн цахим хуудсандаа бичсэн байна.
Нийслэлийн Өмчийн харилцааны газраас газрын эрхийн дуудлага худалдааг өнөөдөр зохион байгуулжээ. Нийслэлийн 13 байршил дахь газрыг дуудлагаар худалдсан ч энэ удаад нэг байршилд л худалдан авах санал иржээ.
“Нарантуул” олон улсын худалдааны төвийн бөс барааны хэсэгт өнөөдөр үүрээр гал гарав. Галыг онцгой байдлын албаны 100 гаруй албан хаагч, нийслэлд буй гал унтраах ангийн 90 гаруй хувийг дайчлан ажиллуулж, галын тархалтыг өглөөний 07:00 гэхэд бүрэн унтрааж чадсан юм. Одоогийн байдлаар цагдаагийн 75 албан хаагч захыг хамгаалалтад авч галын шалтгааныг мэргэжлийн байгууллагууд шалгаж эхлээд байна. 
Баянзүрх дүүргийн цагдаагийн гуравдугаар хэлтсийн алба хаагчид 50 гаруй үйлдэлд холбогдох хулгайн гэмт хэрэг хийсэн бүлэг этгээдийг илрүүлэн мөрдөн байцаалтын ажиллагаа хийж байгаа аж. Энэ хэрэгт сэжигтнээр М, Б, Д, Ө, О гэх этгээдүүдийг дайчлан баривчилж шалгалтын ажиллагаа явуулж байгаа юм байна. Гэмт этгээдүүд амар хялбар аргаар мөнгө олох зорилгоор БЗД-ийн 9, 23, 28, 20, 11 хороо СБД-ийн 20, ЧД-ийн 18 хорооны нутаг дэвсгэрээс иргэдийн иргэдийн орон байранд хууль бусаар нэвтэрч удаа дараагийн үйлдлээр LCD зурагт, зөөврийн компьютер, алт, мөнгөн ээмэг бөгж, эдлэл, хөөрөг зэрэг эд зүйлийг хулгайлж их хэмжээний хохирол учруулж байжээ. Хулгайн 50 гаруй үйлдэл нь мөрдөн байцаалтын явцад илэрсэн байна.
МУГЖ С.Жавхлан, Т.Баясгалан нар “Илгээлтийн эзэд” нэртэй хамтарсан тоглолт хийх болсон талаараа өнөөдөр мэдээлэл хийлээ. Гавьяатууд тоглолт хийхийн зэрэгцээ малчин түмэндээ туслах “Илгээлтийн эзэд” аяныг эхлүүлж буй ажээ. Уг тоглолтоо Монгол Улсын хэмжээнд эдийн засгийн хямрал болон цаг уурын хүндхэн нөхцөл байдалд хэцүүхэн амьдарч байгаа малчин ард түмнээ дэмжих зорилготойгоор хийж байгаа аж. Тэд тоглолтоо Улаанбаатар хотод хийгээд бүх аймаг, суманд хийх бөгөөд тоглолтын бүх ашиг нь цаг уурын хүндхэн нөхцөлд амьдарч байгаа малчин гэр бүлүүдэд сэтгэлийн дэм болохоос гадна эд материал болон бэлэн мөнгө болж очих юм.