Month: March 2016

ХӨСҮТ-ийн мэдээгээр манай улсын хэмжээнд он гарснаас хойш менингококкт халдварын таван тохиолдол бүртгэгдсэн бөгөөд цаашид ч нэмэгдэх хандлагатай байгаа аж. Нийгмийн эрүүл мэндийн хүрээлэнгээс дараахь зөвлөмжийг гаргасан байна.

Менингококкт халдварын явц маш хурдан бөгөөд хэдхэн цагийн дотор нас барах тохиолдол ч гардаг.

Харин эцэг эхчүүд өвчний талаар мэдлэг дутмагаас болж улаан бурхан, салхин цэцэг зэрэг тууралт өгдөг өвчинтэй андуурч эмнэлгийн байгууллагад яаралтай хандалгүй цаг алдаж байна. Тууралт гарсан тохиолдол бүрт эмнэлгийн байгууллагадэхлэн хандаж, үйлчлүүлэх шаардлагатай. Менингит туссан үед өндөр халуурах, олон удаа бөөлжих шинж илрэхэд хоолны хордлого, тархины доргилт гэх мэтээр андуурч эмчилгээг буруу хийснээс хүндрэх нь олонтаа.

Менингококктын халдвар нь Niesseria meningitidisнянгийн гаралтай амьсгалын замын цочмог халдварт өвчин. Арьсан дээрх өвөрмөц, зөв биш хэлбэртэй, хэмжээ нь ижилгүй цусархаг тууралт болон тархины зөөлөн бүрхүүл, тархины эдийн үрэвслээр илэрдэг.

Халдварлах зам:Агаар дуслын замаар өвчтэй хүнээс эрүүл хүнд халдварладаг.

Нууц хугацаа нь 6-7 хоног ба өвчний эхний өдрөөс эхлэн бусдад халдварлах боломжтой. Менингококкын халдвараар 19 хүртэлх насны хүмүүс, түүний дотроос 6 сараас 3 хүртэлх насны хүүхдүүд зонхилон өвчилнө.

Илрэх шинж тэмдэг:

– 38-42 хэм хүртэл гэнэт өндөр халуурч, хоол унданд дургүйцэх, бие сулрах, дотор муухайрах, уур уцаартай цочромхой эсвэл ноомой болох, царай цонхийх;

– Бага насны хүүхдэд гэдсээр өвдөх, 1-2 удаа шингэн суулгах зэрэг ерөнхий хордлогын шинжээр эхэлж, 1-2 хоногт эмнэл зүйн сонгомол шинжүүд тод илэрнэ;

– Менингококкт хамар залгиурын үрэвслээр өвчилсөн үед залгиур хоолойн арын хана маш улайсан, хөөсөн, хамар битүүрсэн бронхитын шинж илэрнэ;

– Хөнгөн явцтай үед улаанбурханы тууралттай төстэй гүвдрүүт тууралт бүх биеэр гарах бөгөөд тэдгээрийн аль нэг нь дотроосоо цусархаг шинжтэй болсон байна. Цусархаг тууралт нь өвчин эхэлснээс хойш 4-12 цагийн дотор ихэвчлэн хөл, гуяар гарна.

Менингококкт халдвараас урьдчилан сэргийлэхийн тулд:

– Гараа тогтмол угаах;

– Өрөө тасалгаанд чийгтэй цэвэрлэгээ тогтмол хийж, агааржуулах;

– Биеийн дархлааг сайжруулах;

– Илчлэг ихтэй, тэжээллэг хоол хүнс хэрэглэх;

– Спортоор хичээллэж биеэ чийрэгжүүлэх;

– Идэж уух зүйлээ хувааж хэрэглэхгүй байх;

– Хүн олноор цуглардаг газар, нийтийн арга хэмжээнд бага насны хүүхдээ дагуулж явахгүй байх;

– Уруулын будаг, шүдний сойз зэргийг дамжуулан хэрэглэхгүй байх;

– Тамхи хувааж татахгүй байх;

– Бал, харандааны үзүүрийг амандаа хийхгүй байх;

– Бага насны хүүхдээ хооллохдоо угж, халбагыг шүлсдэхгүй, амаараа дамжуулахгүй байх;

– Өвчний анхны шинж тэмдэг ханиад томуугийн үед илрэх шинж тэмдэгтэй ижил байдаг учир эцэг эхчүүд хүүхдээ эмчийн хяналтанд байлгах шаардлагатай.

Менингококкт халдварын эхний шинж тэмдэг илэрсэн, ялангуяа цусархаг тууралт гарсан тохиолдолд яаралтай түргэн тусламж дуудаж, өвчтөнийг маш түргэн эмнэлэгт хүргэж тусгаарлах шаардлагатайг анхаарна уу.

Өнөө шөнө болон
маргааш ихэнх нутгаар хүчтэй цасан шуурга шуурч, байгалийн аюулт үзэгдэл
болохыг Ус, цаг уур, орчны шинжилгээний газраас анхааруулж байгаа. Байгалийн гамшигт үзэгдлийн улмаас зам даваа
хаагдах төлөвтэй байгаа тул орон нутаг дахь хөдөлгөөнийг хягзаарлаж байна.
Тухайлбал, Увс аймаг автомашины хөдөлгөөнийг хязгаарлаад байгаа бол Өвөрхангай
аймгийн Онцгой байдлын газраас орон нутгийн болон хот хоорондын автомашины
хөдөлгөөнийг түр хугацаагаар хязгаарлахаар шийдвэрлэжээ.

Засгийн газраас сүүлийн жилүүдэд инновацийн орчныг бүрдүүлэх хууль эрх зүйн баримтуудыг боловсруулан, бодит ажил хэрэг болгох үүднээс их сургуулийн багш, судлаач, оюутнуудыг өөрийн бүтээлч шинэ санаа, судалгаа шинжилгээний үр дүн, шинэ технологи, бүтээгдэхүүнээ хөгжүүлэн гарааны компани байгуулах, улмаар дэлхийн зах зээлд гаргах орчин нөхцөлийг бүрдүүлэх Шинжлэх ухааны паркийг байгуулан хөгжүүлэх шийдвэр гаргасан.

Тэгвэл өнөөдөр “Мэдээллийн технологийн үндэсний парк”-ийг “Шинжлэх ухааны парк мэдээллийн технологи” болгон өөрчилж, Монгол улсын их сургууль болон Шинжлэх ухаан технологийн их сургуулиуд, “Шинжлэх ухааны парк-Биотехнологи” /хуучнаар АРМОНО/ Хөдөө аж ахуйн их сургууль, Шинжлэх ухаан технологийн их сургуулиуд хамтран шинжлэх ухаан-үйлдвэрлэлийн кластер хэлбэрээр хамтран хөгжүүлэхээр боллоо.

Шинжлэх ухааны паркийн үзэсгэлэнд дээрх их сургуулиудын эрдэмтэн судлаач багш, оюутнууд оролцож өөрсдийн бүтээлээ нийтэд танилцуулав.

Жил бүрийн гуравдугаар сарын 8-нд Олон улсын эмэгтэйчүүдийн эрхийг хамгаалах өдөр тохиодог. Энэ өдөр ирэх долоо хоногийн мягмар гаригт тохиох тул бүх нийтээр амрах юм байна. УИХ-аас баталсан Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу мартын наймнаар бүх нийтээр амрахаар хуульчилсан юм.

Дашрамд сонирхуулахад, УИХ-аас баталсан “Нийтээр тэмдэглэх баярын болон тэмдэглэлт өдрүүдийн тухай хууль”-д заасны дагуу энэ онд дараахь өдрүүдэд бүх нийтээр амрах юм байна.

Гуравдугаар сарын 8-Олон улсын эмэгтэйчүүдийн баярын өдөр

Зургаадугаар сарын 1-Эх, үрсийн баяр

Зургаадугаар сарын 29-УИХ-ийн сонгуулийн өдөр

Долоодугаар сарын 11-15-Үндэсний их баяр наадам

Аравдугаар сарын 31-Үндэсний бахархлын өдөр

Арванхоёрдугаар сарын 29-Үндэсний эрх чөлөө, тусгаар тогтнолоо сэргээсний баярын өдөр