Month: March 2016

Боловсрол, соёл, шинжлэх ухааны яамнаас сурагчдын гуравдугаар улирлын амралтын хуваарийг батлан гаргажээ. Хуваарийг нийслэл болон хөдөө орон нутагт өөр өөр хугацаатай байхаар заасан байна. Тодруулбал, Улаанбаатар хотын ЕБС-ын 1-12 дугаар ангийн сурагчид энэ сарын 29-нөөс эхлэн дөрөвдүгээр сарын дөрөвнийг хүртэл амарна.

Харин хөдөө орон нутгийн сурагчид, бага ангийнхан 3-р сарын 29-нөөс 4-р сарын 04-ний өдөр хүртэл, дунд ангийн сурагчид 3-р сарын 23-наас 4-р сарын 04-нийг хүртэл, ахлах ангийн сурагчид 3-р сарын 16-наас 29-ний өдөр хүртэл амрахаар болсон байна.

Олон улсын эмэгтэйчүүдийн эрхийг хамгаалах өдрийг тохиолдуулан “Нэг тэрбумаараа тэмцье” тайван жагсаалыг Тусгаар тогтнолын талбайд өнөөдөр зохион байгууллаа. Энэхүү хөдөлгөөнийг “Хөөрхөн зүрх” ТББ, “Гүнж” төв, казак үндэсний цөөнхийн “Арулар” холбоо тэргүүтэй хүний эрхийн төлөө ажилладаг 17 байгууллага хамтран зохион байгуулсан байна.

Энэхүү үйл ажиллагааг олон улсын эрхийн өдрийг угтан жил бүр уламжлан зохион байгуулдаг бөгөөд энэ жилдээ дөрөв дэх удаагаа өрнүүлж байгаа аж. “Хувьсгалийн төлөөх тэмцэл” сэдвийн хүрээнд энэ жил зургийн урлагаар дамжуулан нэг тэрбум эмэгтэйчүүдийн хүчирхийллийг зогсоохын төлөө ирээдүйн сэтгэл зүйчид, олон нийтийг уриалан дуудаж Тусгаар тогтнолын талбайгаас Их дэлгүүр хүртэл жагсчээ. Нийтдээ 60 гаруй охид, залуу эмэгтэйчүүд хамрагдсан байна.

Олон улсын “Нэг тэрбумаараа тэмцье” буюу “One billion rising” хөдөлгөөн нь Урлагаар дамжуулж эсэргүүцлээ илэрхийлдэг онцлогтой дэлхийн хэмжээний томоохон хөдөлгөөн юм.

Хятадын “China Daily” сонин хятадуудын жуулчлах дуртай 10 газрыг тодруулжээ. Үүнд Тэрэлжийн байгалийн цогцолборт газар багтсан байна.

Хятадуудын орлого өсч дэлхийн хамгийн их аялагчтай улс болоод байгаа. Хятадын Аялал жуулчлалын үндэсний захиргааны мэдээгээр энэ 2016 онд гадагшаа аялах иргэний тоо өмнөх 2015 онтой харьцуулахад 2.5 хувь өсч 137 саяд хүрнэ гэж тооцож байгаа юм. Мөн гаднаас Хятадад ирэх жуулчдын тоо энэ онд 6.5 хувиар өсч тэднээс 121 тэрбум ам.долларын орлого олно гэж тооцоолж байна.

Хятадуудын очих дуртай 10 газрыг жагсаалтыг БНСУ-ын Сөүл хот тэргүүлжээ. Энэхүү жагсаалтыг толилуулъя:

10.Канадын Ванкувер

9.Сингапурын Сингапур

8.Малайзын Кула Лумпур

7.Филиппиний Манила

6.Монголын Тэрэлж

5.ОХУ-ын Москва

4.АНУ-ын Нью Йорк

3.Вьетнамын Ханой

2.Японы Токио

1.Өмнөд Солонгосын Сөүл

Цахим гарын үсэг олгох техникийн бэлтгэл хийгдэж дууссан учир ирэх долоо хоног буюу гуравдугаар сарын 14-нөөс иргэд байгууллагуудад гарын үсэг олгох болсон байна. Цахим гарын үсгийг иргэдэд 5000 төгрөгөөр олгох ба дүүргийнхээ бүртгэлийн хэлтэст иргэний үнэмлэхтэйгээ очиж, гарын үсгээ авна. 2015 оны байдлаар Монгол Улсын интернет хэрэглэгчдийн тоо нэг саяд хүрсэн бөгөөд 100 хүнд 165 телефон утас оногдох болжээ. Иргэд ийнхүү интернет орчныг хязгааргүй хэрэглэх боломжтой болсон нь цахим гарын үсгийн үйлчилгээг нэвтрүүлэх бүрэн боломжтой хэмээн албаныхан мэдэгдсэн юм. Ингэхдээ иргэн бүрийг цахим гарын үсэгтэй бол гэж шаардахгүй ба гэрээ хэлэлцээр, бичиг цаасны бүрдүүлэлт хийдэг, гарын үсэг зурах шаардлагатай иргэд хэрэглэх юм.

Монгол Улсын Ерөнхийлөгчийн Тамгын газар, Шинжлэх ухааны Академийн Физик-Математик-Химийн салбарын Бага чуулган хамтран өнөөдөр Төрийн ордны Иргэний танхимд “Улаанбаатар хотын хөрсний бохирдлын эргэн тойронд” сэдэвт хэлэлцүүлгийг зохион байгуулж байна.

Тус хэлэлцүүлгийн зорилго нь Улаанбаатар хотын хөрсний бохирдлын эх үүсвэр, бохирдлыг бууруулах асуудлыг шийдэх оновчтой гарцыг олох явдал юм. Хэлэлцүүлэгт Улаанбаатар хотын хөрсний бохирдлын эх үүсвэр, хөрсний бохирдлоос үүдэн хүн амын эрүүл мэндэд учирч буй хортой нөлөөллийн талаар эрдэм шинжилгээний байгууллагуудын гаргасан сүүлийн үеийн судалгаа, бохирдлыг шийдэхийн тулд практикт нэвтрүүлж эхэлж буй зарим боломжит арга замын талаархи судалгаа шинжилгээнд суурилсан үр дүнгийн тухай илтгэлүүд тавигдах юм.

Хурлаар ШУА-ийн Геологи-газарзүйн хүрээлэнгийн эрдэм шинжилгээний ажилтан О.Батхишиг, П.Оюунбат нар “Улаанбаатар хотын хөрсний бохирдлын өнөөгийн түвшин”, НЭМХ-ийн Орчны эрүүл хор судлалын төвийн дарга А.Энхжаргал “Гэр хорооллын нүхэн жорлон, хөрсний бохирдол”, “ШУА-ийн Хими-химийн технологийн хүрээлэнгийн Инкубатор төвийн захирал Ч.Батсүх “Хөрсний бохирдлыг бууруулах зарим шийдэл” сэдвүүдээр тус тус илтгэл хэлэлцүүлнэ.

Судалгаагаар 2014 оны байдлаар Улаанбаатар хотын хөрсний хүнд металлын бохирдолтын ерөнхий түвшин дундаж хэмжээнд байгаа бөгөөд алаг цоог байдлаар тархсан хар тугалга, хром, цайрын бохирдолт ажиглагдаж байна. Арьс ширний үйлдвэр орчим хром зонхилсон хар тугалга, кадми, цайрын бохирдолт багагүй талбайг хамарч байна. Мөн хотын хүн амын төвлөрөл ихтэй худалдаа үйлчилгээ явуулдаг томоохон төвүүдийн орчимд аммонийн бохирдолт их байна. Тухайлбал: Нарантуул захын арын хаалганы орчмоос авсан хөрсний дээжинд аммони агууламж хамгийн их 21.07мг/кг гарсан ба бэлчээрийн эрүүл хөрстэй харьцуулахад 10 дахин их байна.

Улаанбаатар хотын хөрсөнд органик гаралтай бохирдол их байгаа бөгөөд энэ нь гэр хороолол, олон нийтийн газрын ахуйн хог хаягдал, шингэн бохирдолтой шууд холбоотой юм. Бохирдлыг багасгахын тулд хог хаягдлын менежментийг сайжруулах, гэр хорооллыг багасгах, хог хаягдалтай холбоотой хууль тогтоомжийг амьдралд хэрэгжүүлэх, иргэд олон нийтийн ухамсрыг дээшлүүлэх зэрэг удаан хугацааны цогцолбор арга хэмжээ шаардлагатай байна.

Уг хэлэлцүүлэгт төр засаг, мэргэжлийн байгууллагын төлөөлөл болох Нийслэлийн Засаг даргын тамгын газар, БОНХЯ, ЭМЯ, Мэргэжлийн хяналтын газар, Стандартчлал хэмжил зүйн газар, иргэд, эрдэмтэн судлаачид болон ард иргэдийн төлөөлөл оролцоно.

Уг хэлэлцүүлгээс төр захиргааны байгууллага, мэргэжлийн байгууллага, олон нийтийн хэвлэл мэдээллийн байгууллага, иргэддээ хандсан зөвлөмж гаргах аж.

Зөвлөмжид Улаанбаатар хотын хөрс үйлдвэрийн болон ахуйн бохирдол, автомашины тос, нүүрсний үнс, цэвэрлэгээний элдэв химийн бодис их хэмжээгээр хэрэглэж байгаа зэргээс шалтгаалан аюултай хэмжээнд хүртлээ бохирдсонтой холбоотойгоор хөрсний бохирдлыг бууруулахын тулд түүнийг эрүүлжүүлэх, нөхөн сэргээх, хөрсний эко-системийг сэргээх бүтээгдэхүүн, дэвшилтэт технологийг хэрэглэх нь нийслэл хотын экологийг сэргээх гол анхдагч арга хэлбэр гэдгийг холбогдох байгууллагуудад уламжлах талаар тусгуулах аж.

“Бүргэдийн баяр-2016” өнгөрсөн амралтын өдөр Чингисийн хүрээ жуулчны баазад боллоо. Ес дэх удаагаа казах түмний бүргэдээр ан хийх соёлыг сурталчилан таниулах үйл ажиллагааг зохион байгуулж байгаа юм.

Манай улсад өвөл ирдэг жуулчдын тоог нэмэгдүүлэх, Казах түмний бүргэдээр ан хийх соёлыг гадаад, дотоодын иргэдэд сурталчлах, байгаль орчноо хамгаалах, нөхөн сэргээх ухамсар, оролцоог дээшлүүлэх зорилгоор Бүргэдийн баярыг тэмдэглэдэг юм. Энэ жилийн Бүргэдийн баярт BBC агентлагийн онцолсон бүргэдчин охин Айшолпан урилгаар оролцжээ.