Month: March 2016

“Монгол цэргийн өдөр”, орчин цагийн Зэвсэгт хүчний 95 жилийн ой энэ сард тохионо. БХЯ, ЗХЖШ-аас орчин цагийн Зэвсэгт хүчний 95 жилийн ойн хүрээнд хэд, хэдэн бүтээлч ажил зохион байгуулан ажиллаж байгаа аж. Энэ долоо хоногт гэхэд хэд, хэдэн арга хэмжээ нь зохион байгуулах ажээ.

Тухайлбал, энэ сарын 10-нд “Зэвсэгт хүчний сургалтын тогтолцоонд хийсэн шинжилгээ” эрдэм шинжилгээний хурал, “Монгол цэргийн музей”-д цэрэг эрсийн агшин гэрэл зургийн үзэсгэлэн дэлгэгдэж, “Оюутан цэрэг”-ийн нээлт энэ өдөр нийслэл болоод Ховд, Дорнод аймагт нэгэн зэрэг болно. Нийслэлд болох “Оюутан цэрэг”-ийн нээлт гуравдугаар сарын 10-ны 10.00 цагт Нийслэлийн засаг, захиргааны тавдугаар байранд болох бөгөөд УИХ, Засгийн газрын гишүүн, Батлан хамгаалахын сайд Ц.Цолмон, Нийслэлийн Засаг дарга Э.Бат-Үүл, Боловсрол, соёл, шинжлэх ухааны яамны удирдлагууд, Монголын оюутны холбоо, БХЯ, ЗХЖШ-ын удирдлагууд оролцоно.

Мөн энэ сарын 11-нд “Офицеруудын ордон”-д “Эх орны цэрэг” яруу найргийн наадам болон гадаад улсаас манай улсад суугаа Элчин сайдын яамдын ажилтнуудын “Нөхөрсөг-уулзалт тэмцээн”, Үндэсний аюулгүй байдлыг хангах тусгайлсан чиг үүрэг бүхий байгууллагуудын удирдлагуудын дундах тэмцээн болохоор товлогджээ.

УИХ-ын 2015 оны 85 дугаар тогтоолоор “Батлан хамгаалах бодлогын үндэс” бодлогын баримт бичиг шинэчлэгдэн батлагдсан билээ. Энэхүү бодлогын баримт бичигт орсон өөрчлөлт шинэчлэл, түүний онцлог, Батлан хамгаалах бодлого, үйл ажиллагааны хэрэгжилтийн талаар УИХ, Засгийн газрын гишүүн, Батлан хамгаалахын сайд Ц.Цолмон Налайх дүүрэг дэх Зэвсэгт хүчний ангиудад, яамны Стратегийн бодлого, төлөвлөлтийн газрын дарга, хурандаа Г.Сайханбаяр Зэвсэгт хүчний 016 дугаар бригадын алба хаагчдад энэ сарын 11-нд танилцуулахаар бэлтгэлээ хангаж байгаа ажээ.

Мөн ойн хүрээнд Зэвсэгт хүчний 95 жилийн ойгоор Улаанбаатар цэргийн хүрээний Үндэсний аюулгүй байдлыг хангах тусгайлсан чиг үүрэг бүхий байгууллагуудын нэгдсэн үлээвэр найрал хөгжмийн жагсаал Энхтайваны өргөн чөлөө, Чингисийн талбайд зохион байгуулж, ойн баярын хурал, хүндэтгэлийн тоглолт, хүчит 256 бөхийн барилдаан болохоос гадна Цэргийн дуу бүжгийн эрдмийн чуулгын талархалын хэсэгчилсэн тоглолтыг Улаанбаатар цэргийн хүрээний Зэвсэгт хүчний анги, байгууллагуудад зохион байгуулахаар ажиллаж байна.

Баянхонгор аймгийн Баянцагаан сумаас баруун тийш урд зүгт 14 км-ийн зайд “Эрээн дэрс” гэдэг газарт энэ сарын 5-ны өдрийн 07:32:21 цагт 3.5 магнитудын хүчтэй газар хөдлөлт болжээ. Энэ тухай Одон орон геофизикийн судалгааны хүрээлэнгээс мэдээлэв.

Сумын нутаг дэвсгэрт газар хөдлөлтийн чичирхийлэл мэдрэгдсэн хэдий ч, айл өрхүүдэд учирсан хохирол байхгүй гэдгийг Баянцагаан сумын Засаг даргын Тамгын газраас аймгийнхаа Онцгой байдлын газарт мэдэгдсэн байна.

Өнгөрсөн ням гаригт Сүхбаатар дүүргийн зургадугаар хорооны нутаг дэвсгэрт “Toyota Crown” автомашинтай залуу гар буу гарган, танхайрсан гэх мэдээлэл цагдаагийн байгууллагад ирсэн талаар мэдээлсэн. Цагдаагийн алба хаагчид шуурхай ажилласны дүнд гэмт этгээдийг баривчилжээ.

Дуудлагын дагуу шалгахад Чингэлтэй дүүргийн 19 дүгээр хороонд суух 19 настай, эрэгтэй Т-г “Hyundai Accent” маркийн автомашинтай Дөлгөөн нуураас Өлзий төвийн уулзвар орох замд явж байхад нь Баянзүрх дүүргийн нэгдүгээр хороонд суух 31 настай эрэгтэй Ч гэгч нь “Toyota Crown” автомашинаараа шахаж зогсоон, хар өнгийн металл хийцтэй, үрлэн сумаар бууддаг гар буу гарган “ална” гэж айлган сүрдүүлжээ.

Хэргийн газраас эд мөрийн баримтаар тоглоомон буу болон бууны цаасан хайрцаг хураан авч, уг үйлдлийг Сүхбаатар дүүрэг дэх цагдаагийн нэгдүгээр хэлтэст эрүүгийн хэрэг үүсгэн шалгаж эхэлсэн байна.

Соёлын биет бус өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэхэд онцгой хувь нэмэр оруулсан өвлөн уламжлагчид мөнгөн шагнал олгох шийдвэрийг Засгийн газраас гаргалаа.

Тодруулбал, биет бус өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэхэд онцгой хувь нэмэр оруулсан өвлөн уламжлагч, хувь хүн, бүлэг, хамт олныг тодруулж 100 сая төгрөгөөр шагнаж байх аж.

Монгол Улс даяаршил, хотжилтын үйл явцад татагдан орж, монголчуудын аж төрөх ёс, монгол хэл, аялгуу, ялангуяа угсаатан ястнуудын биет бус соёлын өвөрмөц өвийн амьдарч хөгжих, орон зай өөрчлөгдөн, орчин цагийн нийтийн соёл, урлаг түрэн орж ирсээр байгаа нь Монголын уламжлалт биет бус соёлын өвийг богино хугацаанд устган мөхөөх аюулд хүргэж болзошгүй байгаа тул соёлын биет бус өвийг өвлөн уламжлагчдыг урамшуулах, тэдэнд дэмжлэг үзүүлэхээр энэхүү журмыг баталжээ.