Month: March 2016

Нийслэлийн захирагч Э.Бат-Үүлийн гаргасан захирамжид ИТХ-ын 28 дугаар тогтоолд үндэслэн авто тээврийн болон өөрөө явагч хэрэгсэл эзэмшигч иргэний тээврийн хэрэгслийн улсын дугаарын сүүлийн оронгоор нь тооцож татварт хамруулна гэж заасан байдаг.

Тиймээс өнгөрсөн хоёрдугаар сард хоёр болон долоогоор төгссөн жолооч нар албан татвараа төлсөн. Харин энэ сард гурав болон наймаар төгссөн тээврийн хэрэгсэлтэй жолооч нар татвараа төлөх учиртай. Хэрэв тухайн жолооч заасан хугацаанд татвараа төлөөгүй тохиолдолд замын цагдаа нар зогсоож торгох, бичиг баримтыг нь хураан авах зэрэг арга хэмжээ авч байгаа юм байна. Ингэхдээ тухайн жолоочийн бичиг баримтыг зогсоосон дүүргийнх нь татварын хэлтэст аваачиж өгч байгаа аж. Тухайлбал, Сүхбаатар дүүрэгт явж байхад цагдаа зогсоогоод татвараа төлөөгүй байвал бичиг баримтыг нь хурааж Сүхбаатар дүүргийн татварын хэлтэст аваачиж өгнө. Тухайн жолооч бичиг баримтаа авахдаа тэр дүүргээс л очиж авах юм байна.

Мөн гааль, татвар, Авто тээврийн үндэсний төв, Замын хөдөлгөөний удирдлагын төв хамтран сүүлийн дөрвөн жил ямар ч оношилгоо, шинжилгээнд ороогүй, татвар төлөөгүй, замын камерт өртөөгүй машинуудыг улсын бүртгэлээс хасахаар шийдвэрлэсэн. Одоогоор 700 орчим машины дугаарыг улсын бүртгэлээс хассан байна.

Өмнөд Солонгосын Засгийн газар урт хугацааны визийн хүсэлт гаргагчдад сүрьеэ өвчний урьдчилсан шинжилгээ хийлгэх шаардлага тавихаар төлөвлөж байгаагаа зарлав. Тодруулбал, сүрьеэ өвчинтэй гадаад ажилчдын тоо эрчимтэй нэмэгдэж байгаатай холбогдуулан тус улсын Засгийн газар визний шаардлагаа өндөрсгөхөөр болсон байна.

Өмнөд Солонгосын Эрүүл мэндийн хяналт, урьдчилан сэргийлэх төвийн мэдээллээр, тус улсад оршин суух гадаад иргэдийн дотор сүрьеэ өвчний илрэл 2009 онд 637 байснаа 2014 онд 1858 болж бараг гурав дахин өсчээ. 2014 онд илэрсэн өвчтөнүүдийн 63 хувь нь эрэгтэйчүүд аж. Насны хувьд 34.2 хувь нь 30 хүртэл насныхан, 19.7 хувь нь 40 хүртэл насныхан, 18.1 хувь нь 60 хүртэл насныхан, 17.3 хувь нь 50 хүртэл насныхан, 6.5 хувь нь 70 хүртэл насныхан байгаа гэжээ.

Мөн тус улсын эрх баригчдын сэжиглэж байгаагаар, гадаадын иргэд өвчнөө эмчлүүлэхээр Өмнөд Солонгост ирдэг байж болзошгүй. Учир нь Солонгост сүрьеэ эмчлүүлэхэд үнэ төлбөргүй байдаг аж. Хэрвээ ийм зорилгоор Өмнөд Солонгост ирсэн нь батлагдвал эмчлүүлж дууссаны дараа албадан гаргах юм байна.

“Хүүхэд харах үйлчилгээний тухай хууль” энэ оны нэгдүгээр сарын 1-нээс хэрэгжиж эхэлсэн ч хүүхэд асрагч бэлтгэх, хүүхэд харах үйлчилгээний байрыг нэмэх зэрэг олон ажил хүлээгдэж буй. Хүүхэд харах үйлчилгээний тухай хууль”-тай холбоотой ХАХНХ-ын сайдын хоёр тушаал гарч, яг өнөөдрийн байдлаар 1,8 тэрбум төгрөг Хүүхдийн төлөө газрын дансанд шилжсэн байна. Энэ улиралд багтаагаад хүүхэд харагчдад уг мөнгийг хуваарилан олгох аж. Үүнээс өмнө Сангийн яамнаас орон нутагт квот тогтоох юм байна. Цэцэрлэгт ороогүй бүх хүүхдийг хамруулах боломжгүй учраас эхний удаад 9000 орчим хүүхэд хамруулах болжээ. 1700 хүүхэд харагч бэлтгэхээс 1680 асрагч бэлтгэгджээ. Тэдний 1000 орчим нь стандартад нийцсэн байр саваа бэлтгээд, зөвшөөрлөө авч эхлээд байна.

Энэ сарын 8-9-нд Цагдаагийн байгууллагад иргэд, аж ахуйн нэгж байгууллагаас гэмт хэргийн 137, зөрчлийн 1337, согтуугийн 447, зам тээврийн ослын 280 мэдээлэл бүртгэгдэж, гэмт хэргийн шинжтэй 44 үйлдлийг холбогдох нэгжүүд шалган, 21 хэргийн эзэн холбогдогчийг илрүүлжээ.

Улаанбаатар хотод золгүй байдлаар гурван хүн нас барж, дээрэмдэх гэмт хэрэг 2, хулгайлах гэмт хэрэг 24, бусдын биед гэмтэл учруулах гэмт хэрэг 1, танхайрах гэмт хэрэг 2, залилан мэхлэх гэмт хэрэг 2, зам тээврийн хэрэг 5, осол 10 гарч 5 хүн гэмтсэн байна.

“Улаанбаатар төмөр зам”-аас өнгөрсөн сард хавдартай иргэдийг жилдээ нэг удаа төмөр замаар үнэгүй зорчуулах шийдвэр гаргасан. Тэгвэл энэ сараас хэрэгжиж эхэлж байгаа юм байна.

“Улаанбаатар төмөр зам”, “Хавдрын үндэсний зөвлөл” ТББ байгууллага хамтран энэ ажлыг хэрэгжүүлж байгаа бөгөөд төмөр зам дагуу байрладаг Дархан-Уул, Сэлэнгэ, Орхон, Говьсүмбэр, Дорноговь аймгийн хавдартай иргэд энэ үйлчилгээнд хамрагдах аж. Учир нь эдгээр аймагт жилд 800 орчим хүн хавдрын өвчлөлтэй хэмээн оношлогддог бөгөөд орон нутагт хавдрын эсрэг эмчилгээ, мэс заслын үйлчилгээ хүртээмж муутай байдгаас Улаанбаатарыг зорьдог байна. Иймээс эдгээр иргэдийг жилд нэг удаа галт тэргээр үнэгүй зорчих нөхцөлийг хангаж байгаа юм.

Үнэгүй зорчих иргэдэд тодорхой насны хязгаартай ба хорт хавдраар оношлогдсон 18 нас хүртэлх хүн, мөн 55-аас дээш насны ахмадууд багтах юм байна.

Өнгөрсөн оны есдүгээр сарын 9-10-нд шилжих шөнө Эрүүгийн цагдаагийн газрын Төлөвлөлт, зохион байгуулалтын хэлтсийн албан хаагчид Налайх дүүргийн 6 дугаар хорооны нутаг дэвсгэрт амрахаар очсон байдаг. Улмаар нэг алба хаагч нь зодуулсны улмаас амиа алдсан хэрэг гарсан юм.

Энэ хэргийн мөрдөн байцаалтын ажиллагаа дуусч Багахангай, Налайх дүүргийн эрүүгийн хэргийн анхан шатны шүүхэд шилжсэн байна. Шүүх хурал өнөөдөр болохоор товлогджээ. Хэрэгт Б.Өлзийбуянг буруутган Эрүүгийн хуулийн тусгай ангийн 91 дүгээр зүйлийн 91.1 дэх хэсэгт зааснаар яллах дүгнэлт үйлджээ. Хэрвээ шүүхээс түүнийг гэм буруутай гэж үзвэл 10-15 жилийн хорих ял оноох хуулийн заалттай аж.