Сангийн яамнаас улсын нэгдсэн төсвийн энэ оны хоёрдугаар сарын гүйцэтгэлийг гаргажээ.
Гүйцэтгэлийн мэдээгээр нэгдсэн төсвийн тэнцвэржүүлсэн нийт орлогын бүрдүүлэлт 90.2 хувийн, нийт зарлага 63.5 хувийн гүйцэтгэлтэй гарсан байна. Ингэснээр төсвийн нийт тэнцэл 258.5 тэрбум төгрөгийн алдагдалтай гарсан аж. Төсвийн орлого дутуу төвлөрөхөд ашигт малтмалын нөөц ашигласны төлбөрийн орлого 13.0 тэрбум, импортын барааны НӨАТ-ын орлого 10.6 тэрбум, төсөвт байгууллагуудын орлого 17.5 тэрбум, гадаад хандив тусламжийн орлого 63.9 тэрбум төгрөгөөр тасарсан нь голлон нөлөөлсөн байна.
Улаанбаатар смарт карт компани, нийтийн тээврийн автобусуудын орлогын алдагдлыг бууруулах, бэлэн мөнгөтэй холбоотой зөрчлийг арилгах үүднээс “Иргэдийн хяналтыг урамшуулах аян” зарлажээ. Аяны хүрээнд, нийтийн тээврийн зөрчлийг илрүүлж баримтжуулсан иргэнийг урамшуулах журам баталсан байна.
Монгол Улсын Үндсэн хуулийн цэц Үл хөдлөх эд хөрөнгийн барьцааны тухай хуулийн 47 дугаар зүйлийн 47.1; 53 дугаар зүйлийн 53.4, 53.5 дахь хэсэг Үндсэн хуулийн холбогдох заалтыг зөрчсөн гэж үзэж 2015 оны 11 дүгээр сарын 18-ны өдөр 15 дугаар дүгнэлтийг гаргасан билээ.
Авлигатай тэмцэх газраас ХОМ-ын албан ёсны дүнг нэгтгэн гаргалаа. Улсын хэмжээнд 39853 мэдүүлэг гаргагч бүртгэгдсэнээс 39850 мэдүүлэг гаргагч буюу 99,9 хувь нь бүртгүүлсэн. Үүнээс заасан хугацаандаа 39848 мэдүүлэг гаргагч бүртгүүлсэн бол 2 мэдүүлэг гаргагч хугацаа хожимдуулж, 3 мэдүүлэг гаргагч мэдүүлгээ гаргаж өгөөгүй байна. Тухайлбал, Төрийн тусгай хамгаалалтын газрын Харуулын албаны дарга Ж.Самбалхүндэв, Нийслэлийн Чингэлтэй дүүргийн ИТХ-ын төлөөлөгч Ч.Дэчингалсан, Нийслэлийн Сүхбаатар дүүргийн ИТХ-ын төлөөлөгч Л.Гэрэлт-Од нар мэдүүлгээ гаргаж өгөөгүй, Нийслэлийн Чингэлтэй дүүргийн ИТХ-ын төлөөлөгч Ц.Эрдэнэбаяр, Санхүүгийн зохицуулах хорооны Захиргаа, хүний нөөцийн газрын дарга А.Ундрах хуулийн хугацаа хожимдуулж мэдүүлгээ бүртгүүлсэн байна.
Олон улсын эмэгтэйчүүдийн эрхийг хамгаалах өдрийг тохиолдуулан Монгол Улсын Ерөнхийлөгч Ц.Элбэгдорж өнөөдөр эмэгтэйчүүдийн төрийн бус байгууллагын төлөөлөлтэй санал солилцох өглөөний цай уулзалтад оролцлоо.
Тус чуулганаар мөн Монгол Улсын Үндсэн хуульд тунхагласан хүмүүнлэг, иргэний ардчилсан нийгмийг цогцлоох зайлшгүй нөхцөл болох иргэний нийгмийн оршин тогтнолыг иргэний оролцоо ба иргэний нийгмийн институцчилал, иргэний нийгмийн байгууллагуудын үр нөлөө, үүрэг роль, иргэний нийгмийн хөгжлийг хангах эрхзүйн орчин, санхүүжилтийн тогтолцоотой холбон хэлэлцсэнээрээ онцлог болжээ.
Өнөөдөр өглөө Хойд Солонгос өөрсдийн бүтээсэн цөмийн зэвсгээ олон нийтэд үзүүлжээ. Тус улсын “Родон Шинмүн” сонины тэргүүн нүүрэнд Ким Жөн Ун өөрийн улсынхаа бүтээсэн цөмийн зэвсгийг үзэн сонирхож буйг харуулжээ.
Улаанбаатар хотын захирагч Э.Бат-Үүлийг огцрохыг шаардан өнөөдөр хэлмэгдэгсдийн хөшөөний урд иргэд жагсаал хийлээ. Тэд Нийслэлийн Засаг даргын орлогч хэт олон байгаа нь Засаг захиргаа, нутаг дэвсгэрийн нэгж, түүний удирдлагын тухай хуулийн 30.1.2-г зөрчиж байна гэж үзжээ. Тиймээс энэ сарын 9-ний дотор зургаан орлогчоо ажлаас нь чөлөөлөхийг шаардан иргэдийн гарын үсгийг цуглуулж, суулт хийж байгаа аж. Дээрх дурдсан заалтад аймгийн Засаг дарга нэгээс илүүгүй, нийслэлийн Засаг дарга хоёроос илүүгүй орлогчтой байна гэж заасан байдаг ч нийслэлд зургаан орлогч дарга, дүүрэгт хоёр байгаа нь иргэдийг бухимдуулж байгаа гэлээ. Одоогоор 7,000 иргэний гарын үсэг цуглараад байгаа бөгөөд өгсөн шаардлагынхаа хариуг өнөөдөр 16:00 цагаас авна гэлээ.
“Монгол циркийн хөгжлийн төв” төрийн бус байгууллага, Монголын үндэсний цирктэй хамтран зохион байгуулдаг “Дэлхийн цирк Монголд 2016” олон улсын циркдийн хамтарсан тоглолт гурав дахь удаагаа болох гэж байна. Тус тоглолтод Монгол, БНАСАУ, АНУ, Англи, Канад, Испани, БНХАУ, ОХУ, Украин, Вьетнам зэрэг 12 орны 60 гаруй А зэрэглэлийн шилдэг жүжигчид оролцох юм байна.
“Хөгжил-Ардчилал” ТББ, Монгол дахь Конрад-Аденауэр-Сантай хамтран Хөгжлийн чуулганы зохион байгуулахаар болжээ. Чуулганы зорилго нь Монголын эдийн засгийн өнөөгийн байдал, цаашдын чиг хандлагын талаар улс төр, эдийн засаг, банк санхүү, нийгмийн салбарын төлөөлөгчид нэг дор цугларч Монгол улсын эдийн засгийн ололт, түүний сорилт, боломжийн талаар хэлэлцэх юм. Мөн уг арга хэмжээнд УИХ-ын гишүүн, Аж үйлдвэрийн яамны сайд Д.Эрдэнэбат “Үндэсний аж үйлдвэрийн сэргэлт” сэдвээр , МУИС-ийн багш, судлаач Г.Түмэннаст “Эдийн засгийн ардчилал ба баялагийн хуваарилалт” сэдвээр , Уул уурхайн дэд сайд асан О.Эрдэнэбулган “Уул уурхайн салбар дахь сорилт боломж” сэдвээр, Монгол банкны Еренхийлөгч Н.Золжаргал “Дундаж давхарга ба эдийн засгийн тогтвортой өсөлт” сэдвээр, ”Голомт банк”-ны Ерөнхийлөгч Ө.Ганзориг “Эдийн засгийн реформ” сэдвээр” тус тус илтгэл тавьж оролцох юм байна.