Засгийн газрын ээлжит хуралдаанаар хэлэлцэн шийдвэрлэсэн асуудлын талаар Шадар сайд Ц.Оюунбаатар мэдээлэл хийв. Тэрбээр мэдээлэл хийснийхээ дараа сэтгүүлчдийн сонирхсон асуултад ингэж хариуллаа.
-Г.Шийлэгдамба сайд ярилцлагадаа таныг миний өмнөөс бланкин дээр өргөдөл бичиж, гарын үсэг зуруулсан гэсэн. Энэ талаар тайлбарлахгүй юу?
-Би ямар ч бланкин дээр гарын үсэг зуруулаагүй. Тийм цаг хугацаа, боломж ч байхгүй. АТГ-аас байцаалтад ирсэн үед нь би хамгийн сүүлд ажил төрлийн асуудлаар санал солилцсон. Энэ асуудлаар Ерөнхий сайдад санал тавьж байсан. Энэ хүрээд миний оролцоо дууссан. Тэр гарын үсэг зурсан, өргөдөл хүсэлт гаргасан асуудал дараагийнх.
-Намын санхүүжилтийн тухайд?
-Намын сан хөмрөг хариуцсан хүн нь би биш. Санхүү мөнгөний асуудалд би хэзээ ч, хаана ч оролцож байгаагүй. Энэ талын мэдээлэл надад алга.
-Та хандив цуглуулдаг уу?
-Би өөрийнхөө цалингаар амьдардаг. Би 40 жил Монголын төрд ажиллаж байна. Хууль дүрмээ барьж ажиллаж байгаа. Хэн нэгнээс юм гуйж явсангүй. Хэн нэгэнд ч юм өгч явсангүй.
-Шадар сайдаар Н.Энхбаяр даргыг томилоод таныг Эрүүл мэнд, спортын сайдаар томилох тохироо хийгдсэн гэдэг. Үнэн үү?
-Наадахаа Ерөнхий сайд Ч.Сайханбилэгээс асуу.
УИХ-ын 2015 оны 108 дугаар тогтоолд заасан 2015 оны улсын төсвийн тухай хуульд өөрчлөлт оруулах тухай хуулийн хавсралтад заасан, бодит гүйцэтгэл нь 2016 оны нэгдүгээр сарын 1-ний байдлаар 80-аас дээш хувьтай хэрэгжиж байгаа, гэрээний дагуу үлдэгдэл төлбөр бүхий, мөн “Барих-шилжүүлэх” концессын хэлбэрээр хэрэгжүүлж, ажил нь дууссан энэ тогтоолын 1-2 дугаар хавсралтад заасан төсөл арга хэмжээний төлбөрийг векселиэр баталгаажуулахыг Сангийн сайдад зөвшөөрлөө.
Засгийн газрын хуралдаанаар Хэнтий аймгийн Бор-Өндөр суманд газрын тос боловсруулах үйлдвэр, дамжуулах хоолой барихад шаардлагатай арга хэмжээг авч ажиллахыг Аж үйлдвэрийн сайд Д.Эрдэнэбатад даалгасан байна.
Мэргэжлийн хяналтын байгууллагаас хүнсний чиглэлээр үйл ажиллагаа эрхлэгч 300 аж ахуйн нэгж, байгууллага, 1244 иргэнийг шалган 1194 зөрчил илрүүлж, 67 хувийг газар дээр нь арилгуулан, албан шаардлага, дүгнэлт, акт өгчээ. Сар шинийн баяр дөхөж байгаатай холбогдуулан урьдчилан сэргийлэх хяналт шалгалт хийж байгаа юм байна.
Монголд бүтэхгүй, болохгүй гэж газрын гаваар ортлоо муулуулж хөөгдсөн юм болгон гадаадад гараад үнэд орох юм. Угтаа муу юмыг гаргаж хөөсөн бол тэр нь муугаараа байх атал эсрэгээрээ байгаа жишээ олон. Францын “Арева” групп Монголд орж ирж ураны хайгуул, олборлолтод техникийн дэмжлэг үзүүлэн идэвхтэй үйл ажиллагаа явуулсан. Ингэхийн тулд олон тэрбумын хөрөнгө оруулалтыг зарцуулсан байдаг. XX зууны эхний хагаст хүн төрөлхтөн атомын хүчийг бүрэн эзэмшиж, цөмийн хүч, цөмийн зэвсэгтэй болчихсон. Цөмийн хүчийг ашиглаж байгаа орнууд л хүчтэйд тооцогдож, цахилгааны хомсдолын асуудлаасаа гарч байна. Монголчууд алт, зэс, нүүрсээрээ дэлхийд тодорч байсан бол цөмийн энерги, шар нунтгаараа гарч ирэх боломж байсан. Дэлхийн томоохон улсууд атомын цахилгаан станцыг олноор барьж ашиглалтад оруулж байхад Монгол оронд атомын ганц станц байгуулчихад гэмгүй гэсэн санал гарахад элдвээр хараан доромжилж “Биднийг дэлбэлэх нь. Хордуулж алахыг санаархаж байна” гэж муйхарласан. Цөмийн эрчим хүчний салбарт хамтарч ажиллая, Монголыг улс шиг улс болгоод өгье гэж АНУ, Франц, Япон зэрэг улсаас бидэнд санал тавьсан ч бүгдээс нь татгалзсан.
Өнгөрсөн нэгдүгээр сарын 30-31-нд Монте Карлогийн фестивалийн залуу циркчдэд зориулсан “New Generation” уралдаан болж өнгөрчээ. 2012 онд Моназогийн гүнж Стефанигийн санаачлан бий болгосон, 20 хүртэлх насны циркчдийн уралдаанд манай уран нугараачид оролцож тусгай байр эзэлсэн байна.
Энэ өвөл Монгол орны ихэнх нутгаар өмнөх жилүүдийнхээс харьцангуй хүйтэн байгаа. Цочир хүйтрэлийн улмаас Шарга, Хүйсийн говиор нутагладаг хар сүүлт зээр, монгол бөхөн ихээр хорогдож байгаа аж.
Улсын заан Ц.Баярсайханыг өнөөдөр Эрүүгийн хэргийн давж заалдах шатны шүүхэд шүүх юм. Түүнийг бусдаас их хэмжээний мөнгө залилсан гэх хэргээр анхан шатны шүүх хурлаас чанга дэглэмтэй хорих ангид 11 жил хоригдох ял оноогоод байгаа.
МЗЭ-ээс жил бүр уламжлал болгон зохиодог яруу найргийн “Болор цом-2016” наадам өнөөдөр орой Соёлын төв өргөөнд болно.