Month: February 2016

Монгол түмний уламжлалт сар шинийн баярын өмнө Монгол Улсын Засгийн газраас “Улсын сайн малчин”-ыг тодруулдаг. Энэ жилийн Улсын сайн малчныг баасан гарагт Засгийн газраас зарлана. 2015 оны хувьд манай улсад түүхэндээ хамгийн өндөр буюу 18 сая төл мал хүлээн авсан. Үүнийгээ дагаад сайн малчдын тоо ч мөн нэмэгдэж байна.

Өнгөрсөн оны есдүгээр сард ХХААЯ-наас “Аваргуудаа сонсъё” сэдэвт Монгол Улсын хөдөлмөрийн баатар, гавьяат, Улсын сайн малчдын уулзалт, зөвлөгөөнийг зохион байгуулсан. Энэ үеэр ХХАА-н сайд Р.Бурмаа “Цаашид Улсын гавьяат малчин, сайн малчин зэрэг цол тэмдгийг эхнэр, нөхөр хоёрт хамтад нь олгохоор ярилцаж байна. Учир нь мал маллах, малынхаа тоо толгойг өсгөх зэрэг нь малчин гэр бүлийн хамтын ажиллагаа байдаг. Тиймээс нэг гэр бүлийн эхнэр, нөхөр хоёрт хоёуланд нь олгох нь зүйтэй юм” гэсэн санал гаргасныг малчид баяртай хүлээн авсан. Энэ ажил биелэлээ олж “Улсын сайн малчин” цол, тэмдгийг эхнэр, нөхөр хоёрт олгох Засгийн газрын тогтоол гарсан байна.
Энэ талаар ХХАА-н сайд Р.Бурмаа “Улсын сайн малчныг малаа өсгөсөн байдлаас гадна малын ашиг шимийг нэмэгдүүлсэн, туслах малчин ажиллуулсан, нийгэмд тустай ажил хийсэн зэргийг харгалзан үзэж шалгаруулдаг. Харин энэ бүхнийг өрхийн тэргүүн ганцаараа биш гэр бүл хамтаараа хийж бүтээсэн байдаг. Тиймээс цол, тэмдгийг эхнэр, нөхөрт хамтад нь өгөхөөр болсон” гэлээ. “Улсын сайн малчин”-ы өргөмжлөл нь өрхийн тэргүүний нэр дээр байх бөгөөд эхнэр, нөхөр хоёрт ижилхэн тэмдэг зүүж өгөх аж.

“Жолоочийн зөрчлийн бүртгэлийн оноо тооцох журам” өчигдөр буюу хоёрдугаар сарын 1-ний 00.00 цагаас хүчин төгөлдөр мөрдөгдөж эхлээд буй. Үүнтэй холбогдуулан Хууль зүйн яам, Замын цагдаагий газар, Улаанбаатар хотын цагдаагийн газар хамтран сэтгүүлчдэд мэдээлэл хийлээ.

Журам мөрдөгдөж эхэлсэн эхний өдрийн 09.30 минутын байдлаар 476 жолооч оноогоо хасуулжээ. Үүний 400 тохиолдол нь нэг оноо, 74 тохиолдол хоёр оноо, хоёр тохиолдолд гурван оноо хассан тухай Замын цагдаагийн газрын, цагдаагийн хошууч Ж.Энхбат мэдээллэв. Тэрбээр “Оноог хасахдаа бүх хуулийн заалтаар хасахаар журамлагдаагүй. Хүний амь, эд хөрөнгөд эрсдэл учруулахуйц 19 тохиолдлыг оруулж өгсөн. Үүний долоон тохиолдолд нэг оноо хасагдана. Мөн долоон тохиолдолд хоёр оноо, үлдсэн гурван тохиолдолд 3-5 оноо хасагдах юм. Харин архи, согтууруулах ундаа хэрэглэсэн үедээ жолоо барьсан, урсгал сөрөх, хурдны дээд хязгаарыг хэтрүүлсэн тохиолдолд арван оноо шууд 0 болохоор журам батлагдсан. Нэг жилд 50 түүнээс дээш торгуулсан хүмүүс ч байдаг. Эдгээр жолоочид нэгдсэн арга хэмжээ авч торгууль ногдуулсан ч нөлөө үзүүлэхгүй байгаа учраас илүү хариуцлагатай байлгах үүднээс онооны журам тооцож эхэлсэн” хэмээв.

Арван оноо дуусгавар болж, жолоодох эрхгүй болсон тохиолдолд журамд заасны дагуу хоёр цагийн сургалтанд хамрагдана. Үүний дараа замын хөдөлгөөний хууль дүрмийн зохих шалгалтыг өгөөд тэнцсэн тохиолдолд 10 оноог буцаан сэргээж олгох юм. Шалгалтыг жолоочийн үнэмлэх олгох шалгалттай адил хэлбэрээр авах бөгөөд одоогоор шалгалт өгөхөд төлбөр төлөх эсэх асуудал тодорхой шийдэгдээгүй байгаа гэнэ.

Харин жолооч хэдэн оноотой байгаа тухай мэдээллээ онлайн болон цахим хэлбэрээр авах боломж, нөхцлийг бүрдүүлэхээр ажиллаж байгаа юм байна. Мөн зөрчлийн мэдээллийн санд бүртгэгдсэн байгаа жолооч нарын мэдээлэл цагдаагийн албан хаагчдын шалгах төхөөрөмжин дээр харагдах юм байна. Цаашдаа оноогоо хасуулсан иргэний утсанд нь мэдээлэл очих байдлаар зохион байгуулахаар төлөвлөж буй тухай мэдээллээ.

Дэлхийн улс орон болгон жолоочийн зөрчлийн оноо тооцох журмыг хэрэгжүүлдэг аж. Эдгээр орны туршлагаас харахад зам тээврийн осол, согтуу жолоочийн тоо буурсан үзүүлэлт байдаг байна.

Хэдхэн хоногийн дараа Монголчуудын уламжлалт сар шинийн баяр болох гэж байна. Хонь жилийн сар шинийн баярт зориулсан барилдаанаас эхлэн, саяхан болсон Харцага цолтонд хүндэтгэл үзүүлэх барилдааныг хүртэл улс, аймгийн алдар цолтой бөхчүүдийн 25 барилдаан болжээ. Эдгээр барилдаануудад оролцсон бөхчүүдийн чансааг бодож МҮБХ-ноос албан ёсоор зарлаж байна.

Чансааны нэгд өнгөрсөн наадмаар Улсын арслан цол хүртсэн Э.Оюунболд бичигджээ. Харин түүний араас улсын арслан П.Бүрэнтөгс удаалсан байна. П.Бүрэнтөгс арслангийн хувьд энэ өвөл болсон хэд хэдэн барилдаанд түрүүлсэн билээ. Жагсаалтын гуравт улсын арслан Н.Батсуурь оржээ. Тэрээр өнгөрсөн нэгдүгээр сард болсон Үндсэн хуулийн ойн барилдаанд түрүүлсэн юм.

Ингээд хамгийн чансаа өндөртэй найман бөхийн нэрийг дор хүргэе.

• Улсын арслан Э.Оюунболд 27579 чансаагаар
• Улсын арслан П.Бүрэнтөгс 25625 чансаагаар
• Улсын арслан Н.Батсуурь 22054 чансаагаар
• Улсын харцага Ц.Содномдорж 18929 чансаагаар
• Улсын гарьд Б.Гончигдамба 16639 чансаагаар
• Улсын харцага Ө.Бат-Орших 15575 часаагаар
• Улсын заан Ч.Санжаадамба 15155 чансаагаар
• Улсын харцага Б.Пүрэвсайхан 14254 чансаагаар эхний наймд бичигдлээ.

Улсын цолтой дээрх найман бөхөөс гадна аймгийн цолтнуудаас чансаа өндөр найман бөхийг мөн нэрлэж байна. Аймгийн арслан О.Хангай 11819 чансаагаар тэргүүлж, Аймгийн хурц арслан Ш.Мөнгөнбаатар 11140 чансаагаар удаалж, Аймгийн арслан Б.Эрдэнэхүү 8793 чансаагаар гуравт, Аймгийн хурцарслан Н.Жаргалбаяр 8632 чансаагаар дөрөвт, Аймгийн арслан Д.Анар 8295 чансаагаар тавд, Аймгийн арслан М.Бадарч 8070 чансаагаар зургаад, Аймгийн арслан Ч.Хөхчирэнгэр 6860 чансаагаар долоод, Аймгийн хурцарслан О.Гантулга 6362 чансаагаар наймд тус тус шалгарсан байна.

Удахгүй болох сар шинийн барилдаанд нэр дурдагдсан эдгээр хүчит бөхчүүдээс л нэг нь түрүү хүртэх нь дамжиггүй гэж бөх сонирхогчид үзэж буй юм.