“Өдрийн сонин”-ы бямба гаригийн дугаар уншигчдын гарт хүрлээ. Өнөөдрийн шинэ дугаарын тэргүүн нүүрт Гандантэгчинлэн хийдээс бэлтгэсэн сурвалжлага нийтлэгдлээ. Мөн Төв аймгийн Цээл сумын арван жилийн дунд сургуулийн 2007 оны төгсөлтийнхний тухай дурсамж нийтлэгдсэн байна. Нийгмийн чиг хандлагыг тодорхойлогч “Өдрийн сонин”-ы алдарт гуравдугаар нүүрт сэтгүүлч Ц.Баасансүрэнгийн Цагаан сарын баярын тухай нийтлэл хэвлэгдлээ. Өнөө жилийн сар шинээр монголчууд архи согтууруулах ундаа бага хэрэглэж, гэмт хэрэг, осол эндэгдэл бага гарчээ. Энэ нь нөгөө талаар монголчууд төрт ёсоо дээдэлж уламжлалт баяраа хүндэтгэдэг болжээ.
Дөрөвдүгээр нүүрт Хэлэх эрхийн индэр орсон бол хоёрдугаар нүүрт улс төрийн хүрээнд өрнөсөн үйл явдлын мэдээлэл багтсан байна. Харин тавдугаар нүүрт “Өдрийн зочин” булангийн энэ удаагийн зочноор Тод манлай уяач цол хүртсэн Одгэрэлийн талаар өгүүллээ. Наймдугаар нүүрт дэлхийн хүмүүс, аравдугаар нүүрт танин мэдэхүйн уламжлалт нүүр орсон бөгөөд сонирхолтой мэдээ мэдээлэл багтсан юм. Есдүгээр нүүрт зураач Б.Болдын сонирхолтой ярилцлага дэлгэгдэв. Арваннэгдүгээр нүүрт зохиолч П.Лувсанцэрэнгийн “Ус шиг цэнхэр” өгүүллэг энэ удаа нийтлэгдсэн байна.
Нийслэлийн ИТХ-ын Тэргүүлэгчдийн 2016 оны 2 дугаар сарын 08-нд болсон ээлжит хуралданаар Гэр хорооллын газрыг шинэчлэн зохион байгуулах төслийн 9 талбарыг баталлаа.
Сар шинийн баярын амралт дуусч худалдаа үйлчилгээний газрууд өнөөдрөөс ердийн цагийн хуваариараа ажиллаж эхэллээ. Харин томоохон захууд ажиллахгүй юм байна.
“Узбекистан 2016” футзалны Азийн аварга шалгаруулах тэмцээн Ташкент хотод эхэллээ. Энэ сарын 10-21-ний өдрүүдэд болох тус тэмцээнд урьдчилсан шатнаас эрхээ авсан 16 баг дөрвөн хэсэгт хуваагдан өрсөлдөж байна. Одоогоор багууд хэсгийн эхний тоглолтоо хийсэн бөгөөд “А” хэсэгт Узбекстан, Лебан, “В” хэсэгт Иран, Иран, “С” хэсэгт Тайланд, Вьетнам, “D” хэсэгт Австрали, Японы багууд эхний хожлоо авч хүснэгтийг тэргүүлж эхэллээ. Шөвгийн наймд өрсөлдөх багууд энэ сарын 15-ны өдрөөс тодорно.
Үндэсний үйлдвэрлэлээ дэмжих зорилгоор жил бүрийн сар шинийн өмнө Аж үйлдвэрийн яам, Хүнс хөдөө аж ахуйн яам, Нийслэлийн Засаг даргын Тамгын газар хамтран үзэсгэлэн худалдаа зохион байгуулдаг. Энэ жилийн “Цагаан сар 2016” үзэсгэлэн худалдаанд 450 орчим үйлдвэрлэгчид оролцож, 120 гаруй нэр төрлийн бүтээгдэхүүнээ худалдан борлуулснаар нэг тэрбум төгрөгийн борлуулалт хийсэн байна.
Өчигдөр зарим аймгийн нутгаар цас орж, цасан шуурга шуурч, хөдөөгийн замд түгжрэл үүсч, цасанд суусан тохиолдол их гарчээ. Ямартай ч одоогоор цасан шуурганы улмаас хаагдсан зам даваа байхгүй гэдгийг Онцгой байдлын ерөнхий газраас мэдээллээ.
Холливудын алдарт жүжигчин Леонардо ДиКаприо Монголд аялах эрхийн бичгийг 95 мянган ам.доллароор худалдан авчээ. Тодруулбал, энэ сарын 10-нд AmFAR олон улсын сангаас зохион байгуулсан буяны дуудлага худалдааны үеэр Монгол Улс руу аялах эрхийн бичгийг тэрээр худалдан авсан байна. Түүнтэй хамт хэд хэдэн холлевудын одууд үнэ хаялцжээ. Тэр Монголд аялалаар хэзээ ирэх нь тодорхой бус байгаа ч энэ сарын 28-нд болох Оскарын шагнал гардуулах ёслолын дараах Леонардо ДиКаприогийн анхны зогсоол нь Монгол Улс байна хэмээн цахим ертөнцөд шуугиж байна.
Хилийн боомтууд өнөөдрөөс хэвийн ажиллана. Сар шинийн баяртай холбогдуулан Монгол-Хятадын хилийн авто замын боомтууд 2016 оны хоёрдугаар сарын 07-11, Монгол-Оросын хилийн авто замын боомтууд 09-11-ний өдрүүдэд амарсан юм. Харин өнөөдрөөс хэвийн ажиллана.
АСЕМ-ын хурлын тохижилтын ажлын шуурхай штабыг Улаанбаатар хотын Ерөнхий менежер Б.Бадрал удирдаж байгаа бөгөөд энэ хүрээнд хотын 13 гудамжийг шинэлэг хэлбэрээр тохижуулахаар төлөвлөж зураг төслийг гаргажээ. Мөн Улаанбаатар хотын Шуурхай удирдлага зохицуулалтын төв яаралтай нөөцийн менежментийг хариуцан, удирдлага хяналт мэдээллээр ханган ажиллах юм байна.