Нийслэлийн Онцгой байдлын газар сар шинийн баяр амралтын өдрүүдэд өндөржүүлсэн байдалд үүрэг гүйцэтгэв.
Сар шинийн баяр, амралтын өдрүүдэд 2016 оны 02 дугаар сарын 08-ны өдрөөс 2016 оны 02 дугаар сарын 15-ны өдрүүдэд нийслэл Улаанбаатар хотын хэмжээнд гал түймэр болон аюулт үзэгдэл, техникийн холбогдолтой ослын нийт 73 дуудлага ирсэн байна. Үүнээс хэмжээнд объектын гал түймрийн 61 удаагийн дуудлагаар Гал түймэр унтраах аврах ангиудын бүрэлдэхүүн, ахуйн болон техникийн холбогдолтой ослын 12 удаагийн дуудлагаар Аврах ангийн бүрэлдэхүүн шуурхай арга хэмжээ авч үүрэг гүйцэтгэжээ.
Аюулт үзэгдэл, техникийн холбогдолтой ослоос 39 хүний амь биеийг аварч, 8 хүнд анхан шатны тусламж үзүүлэн, эмнэлгийн байгууллагад хүргэсэн байна. Дээрх хугацаанд гарсан гал түймрийн дуудлагын тоог өнгөрсөн оны мөн үетэй харьцуулахад 23.7 хувиар буурсан үзүүлэлттэй байгаа аж.
Баяр амралтын өдрүүдэд орон нутгийг зорьсон иргэдээс Төв аймгийн Сэргэлэн сум, Баянбүрд 1 дүгээр багын нутаг Адуунчулууны уурхайн баруун талд автомашины цасанд суусан дуудлагыг 2016.02.09-ний өдрийн 02:50 цагт өгчээ. Гал түймэр унтраах, аврах 80 дугаар ангийн 3 албан хаагч, 1 автомашинтай бүлгийг очиход “Тоёото прус” маркийн автомашин цасанд суусан байсныг татаж гаргаж, 3 иргэнийг хөлдөхөөс аварч аюулгүй болгосон байна.
Мөн Төв аймгийн Сэргэлэн сум, Хүрзэд уурхайн дэргэд автомашин цасанд суусан дуудлагыг 14:13 цагт өгснөөр Гал түймэр унтраах, аврах 80 дугаар ангийн 4 албан хаагч, 1 автомашинтай бүрэлдэхүүнийг гаргахад “Landcruiser-200” загварын автомашин цасанд суусан байсныг татаж, гарган дотор нь сууж явсан 12 иргэнийг авран хамгааллаа.
Сонгинохайрхан дүүргийн 32 дугаар хороо, Батлан хамгаалах яамны сургалтын төвийн урд автомашин цасанд суусан гэсэн дуудлагаар Аврах ангийн 6 албан хаагч, 1 автомашинтай бүлгийн гарч очиход “Тоёото истима” загварын автомашин цасан суусан байсныг аюулгүй газар гаргасан. Уг автомашинд зорчиж явсан 8 иргэнийг аварч, аюулгүй байдлыг нь хангасан байна.
Өнгөрсөн ням гаригт Хан-Уул дүүргийн 11 дүгээр хороо, Богдхан уул Зайсангийн зүүн аманд ганцаараа аялаж явсан эмэгтэй төөрсөн, буцах замаа мэдэхгүй байна гэсэн дуудлагыг 16:19 цагт өгчээ. Аврах ангийн бүлгийг гаргаж төөрсөн иргэнийг эрэн хайх ажиллагаа зохион байгуулахад 48 настай эмэгтэй Дугуй цагаан хэмээх овооны баруун талд ойн модон дотор төөрсөн байсныг 18:42 цагт эсэн мэнд аварч, ар гэрийн хүмүүст хүлээлгэн өгсөн байна.
Ирэх гуравдугаар сарын 3-6-ны өдрүүдэд Өмнөговь аймгийн Даланзадгад хотноо “Тэмээн поло-2016” Улсын аварга шалгаруулах тэмцээн болно. Тус тэмцээнд Өмнөговь, Дорноговь, Говь-Алтай, Өвөрхангай, Дундговь зэрэг аймгийн 20 орчим багийн 100 гаруй баг тамирчид оролцоно.
Өнөөдөр Боловсролын үнэлгээний төвөөс 2016 оны элсэлтийн ерөнхий шалгалттай холбоотойгоор мэдээлэл хийлээ. Энэ жилийн элсэлтийн ерөнхий шалгалтын журмыг Боловсролын үнэлгээний төв өөрийн цахим хуудаснаа нийтэлсэн юм. Тодруулбал, их, дээд сургууль, коллежид элсэн суралцагчдын эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшинг тогтоох, сайжруулах зорилготойгоор 2014 оноос эхлэн төгсөх ангийн бүх хүүхдүүдээс монгол хэл бичгийн шалгалт авч байхаар шийдвэрлэсэн. Тус шалгалт нь монгол хэл болон монгол бичгийн хэрэглээний чадвар сорисон сонгох болон задгай хэлбэрийн даалгавруудаас бүрдэх ба шалгалтын агуулгад шалгуулагчдын сонсоод ойлгох чадварыг шалгах даалгаврууд нэмэгдсэн аж.
УИХ-ын гишүүн С.Ганбаатар Хөдөлмөрийн Үндэсний намын дарга болоод удаагүй байгаа. Гэвч шинэхэн намын дарга намын гишүүд дундаа нэр хүнд муу байгаа бололтой. Намын гишүүд нь эхнээсээ түүнд хандан захидал бичиж эхэлжээ. Тухайлбал, ХҮН-ын гишүүн Ө.Мөнхбат намын даргынхаа худал хуурмаг занг тэвчихгүй байгаагаа илэрхийлж захидал бичсэн байна. Түүний захидалд “Та ХҮН-д орж ирснээр худал хуурмаг илрэв. Намын гишүүдийг хоёр хувааж, хууль бусаар ЕНБД-ыг баталгаажуулах гэж оролдсон. Та бусдыг тэмцэлдүүлэх дуртай бололтой” гэж намын даргын тухай бичсэн байна. Мөн намынхаа залуучуудын эв нэгдлийг хангаж чадахгүй байгаа хүн лидер мөн үү, бие даагаад өөрийнхөө арга барилаар явсан дээргүй юу. Бидний байгуулсан намыг битгий эвдээч хэмээн гуйжээ.
Нийслэлийн Засаг дарга, Улаанбаатар төмөр замын даргын хамтарсан захирамж, тушаалаар Улаанбаатар төмөр замын Зорчигч тээврийн үйлчилгээний буудлыг “Нийслэлийн” гэж тодорхойлж дотоод гадаадад зарлаж, газрын зураглалд тусган байршлыг тэмдэглэхээр боллоо. Монгол Улс Евро-Азийн хамтын ажиллагааны Зүүн хойд Ази дахь түшиц газар, тээврийн коридор, эдийн засгийн бүс, олон улсын аялал жуулчлалын төв болон хөгжүүлэх зорилгоор Улаанбаатар төмөр замын зорчигч үйлчилгээний буудлыг ийнхүү нэрлэхээр болжээ.
Энэ сарын 14-ний өдөр Хятадын үндэсний аялал жуулчлалын газрын мэдээлснээр, энэ оны цагаан сарын амралтын хугацаанд Хятадын хэмжээнд давхардсан тоогоор 300 сая гаруй жуулчин хүлээн авчээ. Энэ нь өнгөрсөн оны мөн үеэс 15.6 хувиар өсч, аялал жуулчлалын орлого нь 365 тэрбум 100 сая юаньд хүрсэн байна.
ДЭМБ-ын хамгийн сүүлийн мэдээгээр шумуулаар болон бэлгийн замаар дамжин тархах зика вирусын халдвар 34 оронд тархсан талаар мэдээлж буй.
Албан тушаалтнуудын хөрөнгө орлогын мэдүүлгийн хугацаа өнөөдөр дуусна. Энэ жилийн хувьд сар шинийн баярын амралт болон долоо хоногийн амралтын өдөртэй үргэлжлэн олон хоногоор амарсан. Тиймээс Авлигатай тэмцэх газрын нэр бүхий ажилтан, албан хаагчид сар шинийн өдрүүд болон амралтын өдрүүдэд албан тушаалтнуудын хувийн ашиг сонирхлын болон хөрөнгө, орлогын мэдүүлгийг бүртгэн, хүлээж авч байгаа юм. Хөрөнгө орлогын мэдүүлгийн талаар 70112468, 70112469, 70112499 дугаарын утсаар холбогдож, заавар зөвлөгөө авч болох юм. Түүнчлэн хувийн ашиг сонирхлын болон хөрөнгө, орлогын мэдүүлгийн цахим бүрдүүлэлтийн 
ОХУ-ын Ульянрвск хотод бөмбөгтэй хоккейн (bandy) ДАШТ-ий “В” ангиллын тэмцээн эдгээр өдрүүдэд боллоо. Тус тэмцээний хүрэл медалийн төлөө Монгол-Украины багууд шалгаран үлдээд байсан. Хоёр багийн тоглолтын үндсэн цаг 5-5 онооны харьцаагаар өндөрлөсөн. Ингээд нэмэлт цагт шийдвэрлэх гоолыг Украины багаас түрүүлж оруулснаар тоглолт тэдний хожлоо өндөрлөв. Манай хоккейчид хэсгийн тоглолтод Украиныг 2-1 хожсон ч медалийн төлөө шийдвэрлэх тоглолтод ялалт байгуулж чадсангүй.
Ойрын хоногуудад ихэнх нутгаар жавартай хүйтэн байна. Ирэх пүрэв гарагт буюу энэ сарын 18-нд баруун болон төвийн нутгийн хойд хэсгээр бага зэргийн цас орж, явган шуурга шуурч, хүйтний эрч чангарна.