Month: February 2016

Монголын Бурхны шашинтны Төв Гандантэгчэнлин хийд өнөөдөр сүсэгтэн олны хөлд дарагджээ. Цагаан сарын шинийн 8-ны билэгт сайн өдөр Дээрхийн Гэгээнтэн IX Богд Жэвзүндамба Хутагтын “Лагшин эрдэнэ”-ийг хүндэтгэн залах ёслол Гандантэгчилэн хийдэд боллоо. Дээрхийн гэгээнтэн IX Богд Жэвзүндамба хутагт шавь олныг дээдийн номын айлдвар гүн дэлгэр зарлиг сургаалаараа хөтлөн зохиож байгаад XVII жарны усан луу жилийн хаврын тэргүүн сарын шинийн 8 буюу 2012 оны гуравдугаар сарын 1-ний луу цагт мөнх бусын дүрийг үзүүлэн, дүрст лагшинг номын агаарт хураасан билээ. Түүнээс хойш дөрвөн жилийн турш Богд гэгээнтний шавь нар Багшийнхаа лагшин шүтээнийг дээдэс лам нарын адил уламжлал ёсоор бурханчлан шүтээн болгон бүтээсэн билээ.

Шүтээнчлэн бүтээсэн лагшин эрдэнийг Гандантэгчэнлин хийдийн Гандан дуганд өнөөдөр 13:00 цагт залж, равнай мандал өргөлөө. Гандантэгчинлэн хийдэд V, VII, VIII дугаар Богдын шарилын сүм байдаг аж. Их хэлмэгдүүлэлтийн жилүүдэд эдгээр Богдын шарилыг бүрэн бүтэн авч үлдсэн бөгөөд өдгөө ийнхүү IX Богдын “Лагшин Эрдэнэ” нэмэгдэж байгаа юм байна. Сүсэгтэн олон IX Богдын “Лагшин Эрдэнэ”-д мөргөх үйл ажиллагаа нээлттэй бөгөөд IX Богд Жэвзүндамба хутагтын “Лагшин Эрдэнэ” Гандантэгчинлэн хийдийн төв дуганд байх юм.

Энэ жил Улаанбаатар хотод ирэх жуулчдын тоог 10 хувиар буюу 40 мянгаар нэмэгдүүлнэ гэсэн зорилтыг тавин аялал жуулчлалын салбарт 3.6 тэрбум төгрөгийг зарцуулахаар төсөвлөсөн. Өнгөрсөн жил 3.4 тэрбум төгрөгийг жуулчдыг татах ажилд зориулж, эргээд аялал жуулчлалын салбараас 20 гаруй тэрбум төгрөгийн орлого олсон аж. Харин энэ онд дээрх мөнгөн урсгалыг өсгөх зорилготойгоор Монголын үндэсний түүх соёлыг түгээн дэлгэрүүлэх, олон улсад сурталчилан таниулах 25 багц ажил хийхээр нийслэлийн Аялал жуулчлалын газар төлөвлөсөн тухайгаа өнөөдөр мэдээллээ.

Уг ажилд Үндэсний их баяр наадмын хүрээнд зохион байгуулах урлаг, соёлын арга хэмжээ, “Даншиг наадам-Хүрээ цам-2016″, Сонгодог урлагийн үдэш, төв талбайд зохиогддог цуврал фестивалиуд багтжээ. Жуулчдын тоог нэмэхийн тулд Зочид буудал, дэн буудлын стандартыг шинэчлэх, төрийн байгууллагуудаас зохион байгуулдаг олон улсын хурал, зөвлөгөөнийг аялал жуулчлалын бус улиралд зохион байгуулах зэрэг зохицуулалт хийхээр төлөвлөсөн байна.

Мөн үүнтэй холбоотойгоор НЗДТГ-аас “Найрсаг Улаанбаатар” хөтөлбөрийг хэрэгжүүлж байгаа. Энэхүү хөтөлбөрийн хүрээнд жуулчдын мэдээлэл шуурхай авах нөхцөлийг бүрдүүлэх, хот орчмын явган аялалын гол чиглэлийг олон улсын стандартын дагуу үлгэр жишээ тохижуулах, Улаанбаатар хотын онцлог, давуу талыг тусгасан, жуулчдын хэрэгцээнд нийцсэн бүтээгдэхүүн, шинэ үйлчилгээг гаргах зэрэг багц ажлыг хийхээр болжээ.Тодруулбал, Гандантэгчинлэн хийд орчмыг жуулчдад зориулан тохижуулж, соёл, аялал жуулчлалын дүүрэг болгон шинэчлэх төлөвлөгөөг гаргасан байна. Мөн үндэсний ёс заншил, уламжлалт зан үйлийг хадгалсан Хуримын ордон, түүхт хөшөө дурсгалыг жуулчдад очдог газар болгон нэрлэж, эдийн засгийн эргэлтэд оруулахаар тооцсон байна. Энэ жилийн тухайд “Хүрэл тогоот” одон орон судлалын төвийг аялал жуулчлалын эргэлтэд оруулж, цэлмэг тэнгэр, од эрхсийг жуулчдад харуулж, цаашид байнга энэ газрыг жуулчид заавал зорьж очдог, сонирхдог газар болгох арга хэмжээнүүдийг нийслэлээс зохион байгуулахаар болжээ.

Өнөөдөр өглөө иргэд Цэцийн дарга, гишүүдийг огцрохыг шаардаж, жагслаа. Цэцийг улстөржсөн шийдвэр гаргаж, эрх зүйн чадамжгүй болсон учраас ийнхүү тэмцэж байгаа аж.

Үндсэн хуулийн Цэцийн дарга Ж.Амарсанаа сар шинийн өмнө хийсэн мэдээлэлдээ “Би Монгол Улсын дөрөвдүгээр хүн. Дөрөвдүгээр хүн эксель унах юм уу. Туулах чадвар сайтай машин унах ёстой” гэсэн нь иргэдийн бухимдлыг хүргэсэн учир жагсагчдын зарим нь эксель унаж очсон байна.

Тэд “Иргэдийг талцуулж, ялгаварлан гадуурхахаа боль”, “Үндсэн хуулийг зарж идэхээ боль”, “Лексус-570” бэлгэнд авч, сонирхлын зөрчилтэй шийдвэр гаргаснаа тайлбарла”, “Үндсэн хууль зөрчихөө боль”, “Ипотекийн зээлийг зогсоосон хариуцлагаа хүлээ”, “Албан тушаалаа өг”, “Үндсэн хуулийн Цэцийн дээр хөх тэнгэр биш ард түмэн байдаг юм” зэрэг бичигтэй лоозон барьсан байв.

Үндсэн хуулийн Цэцийн хамгаалалтынхан, цагдаа нар жагсагчдыг хүчээр тараасан учир шаардах бичгээ Цэций даргад өгч чадаагүй байна.

Монголбанкны захиалгаар Үл хөдлөх хөрөнгийн Тэнхлэг зууч компанийн хараат бусаар хийсэн 2016 оны 01-р сарын “Орон сууцны үнийн индекс”-ийн (ОСҮИ) судалгааг олон нийтэд танилцуулж байна.

Тус судалгаагаар ОСҮИ 01-р сард 5.7 хувьтай гарлаа. Энэ нь өмнөх сараас 0.16 хувиар өссөн үзүүлэлт байна. Харин өнгөрсөн оны мөн үетэй буюу 12 сарын өмнөхтэй харьцуулахад -10.4 хувиар буурчээ.

Шинэ орон сууцны үнийн индекс 18.2 хувьтай гарлаа. Энэ нь өмнөх сараас -0.7 хувиар буурсан үзүүлэлт юм. Харин өнгөрсөн оны мөн үетэй харьцуулбал -7.0 хувиар буурчээ.

Хуучин орон сууцны үнийн индекс -1.8 хувьтай гарлаа. Энэ нь өмнөх сараас -0.4 хувиар, өнгөрсөн оны мөн үеэс -14.2 хувиар буурсан үзүүлэлт юм.

ОСҮИ-ийг Хедоник регрессийн аргаар тооцоолж буй бөгөөд энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин нийт 5062 орон сууцны мэдээллийг хамрууллаа.