Олон өдөр үргэлжилж буй жагсаал тэмцлийн улмаас Дели хотын 10 сая хүн ундны усгүй болсон байна. Жагсагчид хотын ундны усны гол сувгийг хаан боогдуулж улмаар ундны усны сувгийг жагсагчдаас чөлөөлөхөөр цэргийнхнийг дайчиллаа. Хэвийн үйл ажиллагааг нь дахин сэргээхэд 3-4 өдөр шаардагдах аж. Дели хотын олон сая хүнийг ундны усаар хангадаг суваг нь Харьяна мужаар дайран өнгөрдөг.
Энэтхэгийн хойд хэсгийн Харьяна мужид цагдаа, цэргийнхэн болон жагсагчдын хоорондох мөргөлдөөнд таван хүн амь үрэгдсэн аж. Тус мужийн Рохтак, Жинд хотод жагсагчид цагдаагийн автомашин, нийтийн тээврийн автобус, дэлгүүр хоршоодыг галдан шатаасан байна.
Энэтхэгийн кастын системийг эсэргүүцсэн жат нийгмийн давхаргынхан өнгөрсөн долоо хоногоос хойш олон хотод жагсаал тэмцэл өрнүүлж байна. Тэд төрийн албанд ажиллах болон төрийн их дээд сургуульд элсэн суралцах квотыг нэмэгдүүлэхийг шаардан жагсчээ.
Хөдөлмөрийн яам, харьяа байгууллагынхан өвөлжилт хүндэрсэн аймаг, сумын малчдад туслах аяныг салбарын хэмжээнд өрнүүлж эхэлсэн. Аяны эхний ээлжинд цугласан хандивын мөнгө, эд материалын зүйлсийг Хөдөлмөрийн сайд Г.Баярсайхан өнөөдөр МУЗН-ийн Гамшгийн менежментийн багт өглөө.
Монголын боксын эмэгтэй шигшээ багийн гурван тамирчин Болгарын Софид болж буй “Странжа 2016” тэмцээнд оролцохоор эх орноосоо мордлоо. Багийн бүрэлдэхүүнд ирэх гуравдугаар сард БНХАУ-д болох олимпийн эрхийн төлөөх тэмцээнд оролцох 51 кг-д М.Нандинцэцэг, 60 кг-д О.Сувд-Эрдэнэ, 75 кг Э.Эрдэнэтуяа нар Б.Энхтайван дасгалжуулагчийн хамтаар Болгарт очоод байна. 67 дахь удаагийн “Странжа 2016” тэмцээн хоёрдугаар сарын 22-ноос 28-нд Болгарын Софи хотод болно. Эрэгтэй боксчдын хувьд энэ жил тус тэмцээнийг өнжиж, Германы Химийн цомд оролцохоор болжээ.
УИХ-ын гишүүн О.Баасанхүү өнөөдөр хэвлэлийн бага хурал хийн Ерөнхий сайд Ч.Сайханбилэгийг халз мэтгэлцээнд урьж байгаагаа мэдэгдлээ.
Гааль, татварын ерөнхий газрын дэргэд гааль, татварын бүртгэл, мэдээллийн нэгдсэн сан үүсгэх, түүний үйл ажиллагааны аюулгүй байдлыг хангах, нэгдсэн системийг хөгжүүлэх, нэвтрүүлэх, техник, технологийн хэвийн үйл ажиллагааг хариуцан ажиллах чиг үүрэг бүхий “Гааль, татварын мэдээллийн технологийн төв” улсын төсөвт үйлдвэрийн газрыг байгуулж, дүрмийг баталлаа. Мөн тус газрын бүтцийн болон орон тооны жишиг, хязгаарыг тогтоон, үйл ажиллагаанд нь шаардагдах хөрөнгийг 2016 оны төсвийн багцаас хуваарилах, цаашид зардлыг жил бүрийн улсын төсөвт тусгахыг Сангийн сайд Б.Болорт зөвшөөрлөө.
Мал аж ахуйн үйлдвэрлэлийн бүтээмж, үр ашгийг сайжруулж, малчид фермерийн орлогыг нэмэгдүүлэх зорилгоор Засгийн газраас “Сайн малчин” хөтөлбөрийг баталлаа. Энэхүү хөтөлбөр нь мал аж ахуйн үйлдвэрлэлд дэвшилтэт технологи тогтмол нэвтрүүлэх, анхан шатны үйлдвэрлэлээс эцсийн хэрэглэгч хүртэлх үе шатны санхүүгийн үйлчилгээний хүртээмжийг нэмэгдүүлэх зорилготой юм. Хөтөлбөрийн хүрээнд малын үр ашгийг сайжруулах замаар бүтээмж, бүтээгдэхүүний өрсөлдөх чадварыг дээшлүүлж, экспортыг нэмэгдүүлэн малчид, фермер эрхлэгчдийн орлого, амьжиргааг сайжруулахаар төлөвлөжээ.
Нийслэлийн Засаг дарга Э.Бат-Үүл Японы Стандарт хөрөнгө оруулалтын банкны эзэмшигч ноён Күбо Такаакитэйг хүлээн авч уулзлаа. Тус уулзалтаар гэр хорооллын дахин төлөвлөлтийн төслийн талаар санал солилцов. Гэр хорооллын дахин төлөвлөлтийн төслийг хөрөнгө оруулагчид маш ихээр сонирхож байгаа бөгөөд “Стандарт проперти групп” ХХК гэр хорооллын дахин төлөвлөлтийн төслийг эхлүүлээд жил болж байгаа. Энэ хугацаанд бага зэрэг асуудал тулгарч байгаа ч бэрхшээлүүдийг тухай бүрт нь шийдэж чадвал төслийг цогцоор нь үргэжлүүлэн хэрэгжүүлэх боломжтой аж.
Өнөөдрийн байдлаар 120 мянга гаруй малчин өрх Хаан болон Төрийн банкинд 222 тэрбум төгрөгийн 30 гаруй хувийн хүүтэй зээлтэй гэх тооцоо бий. Тиймээс төр өөрийн банкаар дамжуулан малчны зээлийн хүүг энэ сарын эхээр 18 хувь болгон бууруулсан.
Зэвсэгт хүчний дугаар ангид гурван цэрэг улаанбурханаар өвчилсөн байна. Эмнэлзүйн шинж тэмдэг бүхий зургаан хүнийг ХӨСҮТ-д хэвтүүлж, зургаан цэргийг анги дээр нь тусгаарлажээ. Түүнчлэн 80 цэргийг улаанбурханы эсрэг вакцинаар дархлаажуулсан байна.