Month: February 2016

Түүхий эдийн Эмээлт захад өчигдрийн байдлаар ченжүүд нэг кг ямааны ноолуурыг 40-45 мянган төгрөгөөр авч байна. Өнгөрсөн жил тус түүхий эдийн дээд ханш 60 гаруй мянган төгрөгт хүрч байжээ. 2014 онд 80-85 мянган төгрөгөөр худалдаалагдаж байсантай харьцуулахад буурсан үзүүлэлт юм. Үнэ буурсан шалтгааныг ченжүүд ноолуурын татвар өссөнтэй холбон тайлбарлаж байсан. Тодруулбал, өнгөрсөн жил нэг кг ноолууранд ногдох татварыг тодорхой хэмжээгээр нэмсэн. Үүнтэй холбоотойгоор ноолуурын үнийг хиймлээр өсгөж, худалдан авалт хийдэг хятадуудын худалдан авалт эрс багассан байна. Энэ жилийн хувьд ч өнгөрсөн жилийн ханшаас давахгүй гэсэн таамаглал байгаа тухай Монголын ноос, ноолуурын бэлтгэн нийлүүлэгчдийн холбооны тэргүүн Б.Мөнх-Алдар хэлжээ.

Хөдөө аж ахуйн гаралтай бараа, түүхий эдийн арилжааг зохион байгуулж, төлбөр тооцоог гүйцэтгэдэг байгууллага болох Хөдөө аж ахуйн бирж өнгөрсөн онд 480 шахам арилжаа хийж нэг их наяд гаруй төгрөг олжээ. Тус байгууллагын өнгөрсөн оны дэлгэрэнгүй тайлан гараагүй байгаа юм. Харин 2014 онд зургаан мянга гаруй тонн ямааны ноолуур, 12 мянга гаруй тонн тосны ургамал, мянган тонн тэмээний ноос, долоон мянга гаруй тонн хонины ноос, 24 тонн тэмээний ноос, 878 тонн хонины завод ноос, 12 толгой хонь тус тус арилжсан байна.

2016 оны нэгдүгээр сард Хөдөө аж ахуйн бирж 20 тонн ноолуур арилжжээ. Үүнд боловсруулаагүй бараан болон цайвар ноолуур 65 мянган төгрөгөөр арилжаалагдсан байна.

ОБЕГ-аас улсын хэмжээнд гарсан гал түймрийн мэдээг ирүүллээ. Хот, хөдөөгүй гал түймрийн дуудлага буурахгүй байгаа юм. Тиймээс гал түймрээс сэрэмжтэй байхыг анхааруулж байна.

Нийслэлийн Налайх дүүргийн 7 дугаар хороо, Баянгол дүүргийн 11 дүгээр хороо, Cүхбаатар дүүргийн 19 дүгээр хороо, Шаргаморьтын зуслан зэрэг газруудад байшин шатсан бол Дорнод аймгийн Хэрлэн сумын 7 дугаар багийн “Бүсийн оношлогоо эмчилгээний төв”-ийн амбулторийн ариун цэврийн өрөө шатжээ. Сэлэнгэ аймгийн Мандал сумын Баян-Арцат багийн ерөнхий боловсролын 3 дугаар сургуулийн сантехникийн өрөө болон Увс аймгийн Улаангом сумын 5 дугаар багт байрлах Монгол банкны байранд гарсан галыг Онцгой байдлын газрын Гал унтраах, аврах ангийн албан хаагчид дор бүр нь шуурхай ажиллан унтраажээ.

Нийслэлд ч мөн олон нийтийн хөлийн гзаар байрласан Баянгол дүүргийн 18 дугаар хороо, “Таван-Эрдэнэ” хүнсний захын урд чингэлэг, Чингэлтэй дүүргийн 18 дугаар хороо, Чингэлтэйн шинэ эцэст авто замын хажууд автомашин шатсан дуудлагаар дээрх дүүргийн Онцгой байдлын хэлтсийн Гал унтраах, аврах ангийн албан хаагчид шуурхай ажилласан байна.

Нийслэлийн Сүхбаатар дүүргийн 3 дугаар хороо, Иргэдэд үйлчлэх төвийн хажууд цагдаагийн байр шатаж байна гэх дуудлагаар Чингэлтэй дүүргийн Онцгой байдлын хэлтсийн Гал унтраах, аврах 10 дугаар ангийн 6 албан хаагч очиж унтраасан зэрэг мэдээллийг ОБЕГ-аас өглөө.

Монголын уул уурхайн хамгийн том, бас хамгийн чухалд тооцогддог “Mongolia Mining” олон улсын уул уурхайн үзэсгэлэнг ирэх дөрөвдүгээр сарын 6-8- нд “Буянт-Ухаа” спорт цогцолборт зургаа дахь удаагаа зохион байгуулах гэж байна.

Энэ жил уг үзэсгэлэнд БНХАУ, ОХУ, АНУ, Япон, Нидерланд, Швед, Казахстан, Чех, Австрали, Беларусь, Герман, Их Британи, Турк, Солонгос, Фращ зэрэг орны уул уур- хайн шилдэг 120 гаруй компани оролцох юм байна.

Уул уурхайн ханган нийлүүлэгчид, бутлуурын үйлдвэрийн тоног төхөөрөмж, тос тосолгооны материал, цахилгаан үүсгүүр, уул уурхайн кабель, гэрэлтүүлгийн систем гэх мэт төрөл бүрийн бараа бүтээгдэхүүн үйлдвэрлэгчид, харилцаа холбоо, ложистик, кэйтэринг, кэмп болон нөхөн сэргээлтийн үйлчилгээ эрхлэгчид гээд олон улсын шилдгүүд бүтээгдэхүүнээ сурталчлахаараа энэ удаагийнх илүү онцлогтой аж.

Цаг уур орчны шинжилгээний газраас гаргасан тав хоногийн цаг агаарын урьдчилсан мэдээг хүргэж байна.

2016 оны 02 дугаар сарын 25-наас 02 дугаар сарын 29-нийг хүртэлх цаг агаарын урьдчилсан төлөв:

25-нд Хөвсгөлийн уулсаар, 26-нд зарим газраар цас орж, цасан шуурга шуурна. Салхи 25-нд зарим газраар, 26-нд ихэнх нутгаар, 27-нд говь, талын нутгаар секундэд 12-14 метр хүрч ширүүснэ. Завхан голын эхээр шөнөдөө 43-48 хэм, өдөртөө 28-33 хэм, Увс нуур болон Дархадын хотгор, Идэр, Тэс голын хөндийгөөр шөнөдөө 33-38 хэм, өдөртөө 18-23 хэм, Хэнтэйн уулархаг нутаг, Хараа, Ерөө, Туул, Тэрэлж, Хэрлэн голын хөндийгөөр шөнөдөө 23-28 хэм, өдөртөө 9-14 хэм, говийн бүс нутгийн өмнөд хэсгээр шөнөдөө 13-18 хэм, өдөртөө 1-6 хэм, бусад нутгаар шөнөдөө 18-23 хэм, өдөртөө 6-11 хэм хүйтэн байна. Хугацааны сүүлчээр дулаарна.

Өнгөрсөн оны 9-р сарын 24-нд Төв аймгийн Баянчандмань сумын Засаг даргын орлогч Б.Ханбаатар гэгч нь 26 настай Б гэх бүсгүйг зодож, ёс бусаар хүчирхийлсэн байж болзошгүй хэрэг гарсан. Хэргийг Сонгинохайрхан дүүргийн цагдаагийн хэлтэс шалгаж дуусаад харьяалалын дагуу прокурорт шилжүүлсэн.

Прокуророос Төв аймгийн Баянчандмань сумын ЗДТГ-ын дарга Г.Ариунболд энэ хэрэгт хамаагүй, гэрчээр оролцож байгаа. Харин Засаг даргын орлогч Б.Ханбаатар гэгч энэ хэргийг ганцаараа үйлдсэн хэмээн үзжээ. Улмаар энэ хэрэгт Б.Ханбаатарыг Эрүүгийн хуулийн хэд хэдэн зүйл ангид заасны дагуу яллах дүгнэлт үйлдэн Баянгол, Хан-Уул, Сонгионхайрхан дүүргийн эрүүгийн хэргийн анхан шатны шүүхэд шилжүүлжээ. Одоогоор хурлын тов гараагүй байгаа аж.

Прокурорын байгууллагаас Б.Ханбаатарыг Эрүүгийн хуулийн 125.1, 126.2.1, 126.2.2, 126.2.5-д заасны дагуу яллах саналтай байгаа. Яллах саналд дурдсан зүйл ангиудыг тодруулбал: 125 дугаар зүйл. Бэлгийн дур хүслээ ёс бусаар хангах 125.1.Хүсэл зоригийнх нь эсрэг хүч хэрэглэж буюу хүч хэрэглэхээр заналхийлэх, бусдын биеэ хамгаалж чадахгүй байдлыг далимдуулан, түүнчлэн хохирогчийг тохуурхан доромжилж бэлгийн дур хүслээ ёс бусаар хангасан бол хоёроос таван жил хүртэл хугацаагаар хорих ял шийтгэнэ. 126 дугаар зүйл. Хүчиндэх 126.2.1.хохирогчийг тохуурхан даажигнаж, зовоон тарчлааж; 126.2.2.хүндэвтэр буюу хүнд гэмтэл учруулж; 126.2.5.албан тушаал, эд хөрөнгийн болон өөр байдлаар эрхшээлдээ байгаа хүнийг хүчирхийлсэн бол таваас дээш арван жил хүртэл хугацаагаар хорих ялаар шийтгэнэ хэмээн заажээ.