“Өдрийн сонин”- даваа гаригийн дугаар хэвлэгдэн захиалагчдадаа хүрч байна. Өнөөдрийн дугаараа тоймлон хүргэе.
Даваа гариг бүр тогтмол хүрч заншсан “Танайд өнжье” булангийн энэ удаагийн дугаарт “Хүүхдийн цэцэрлэгийн өнгө өнгийн төрх”-ийг бичлээ. Улсын хэмжээнд хүүхдийн цэцэрлэгийн хүрэлцээ муугаас Хүүхэд харах үйлчилгээний тухай хуулийг баталж, энэ оны эхнээс хэрэгжүүлж байгаа. Тэгвэл Гадаад хэргийн яам ажилчдынхаа хүүхдийн цэцэрлэгийн асуудлыг шийдэж, дэргэдээ хүүхдийн цэцэрлэгтэй болж, яамныхаа автобаазын хашаанд нийслэлийн 16 дугаар цэцэрлэгийн салбарыг байгуулсан байна. Энэ цэцэрлэгт өнжсөн тэмдэглэлийг нэг, 12, 13 дугаар нүүртээ нийтэллээ.
Өнөөдрийн дугаараас онцлох ярилцлага бол БОНХАЖ-ын сайд Н.Батцэрэгийн ярилцлага байна. Тэрбээр салбар яамныхаа ажил болоод цаг үеийн асуудлаар ярилцлага өгсөн юм. Ярилцлагадаа “Туул голд барих усан санд бага оврын цахилгаан станц барина” гэв. Түүний ярилцлагыг нэг, хоёрдугаар нүүрээс уншаарай.
Саяхан Өвөрхангай аймагт дунд сургуулийн хүүхэд амь насаа алдсан хэрэг гарсан. Уг хэрэгтэй холбогдуулан аавыг нь цагдан хориод байгаа. Энэ хэргийн талаар С.Сүрэнхорлоотой хийсэн ярилцлагыг нэг, долдугаар нүүрээс уншина уу. “Талийгаач хүү ангийнхандаа “Цагдаа нарт зодуулаад бөөлжөөд байна” гэж хэлсэн байна” гэх гарчигтай энэ ярилцлагад хэргийн талаар юу болсныг өгүүлжээ.
“Өдрийн сонин”-ы нийтлэлийн бодлогыг тодорхойлогч гуравдугаар нүүрт П.Хашчулууны “Өнөөдөр 18 настай хүүхдээр улсынхаа хилийг байтугай үүдээ мануулах байгууллага ч байхгүй” нийтлэл хэвлэгдлээ.
Уг нийтлэлд “…Тэдэнд эх орноосоо урвасан гэх маш том ял онооно. Магадгүй хүний нийгэм дэх хамийн том ял энэ байх. Тэгвэл маш том ялыг бацаанууддаа ойлгуулах, ухамсарлуулах ажил хийсэн юм уу” хэмээн бичжээ. Бүрэн эхээр нь гуравдугаар нүүрээс уншаарай.
Оны өмнөхөн гавьяат цол хүртсэн дуучин Ж.Цэцгээгийн ярилцлага “Хүмүүс” буланд хэвлэгдлээ. Түүнийг Төрийн соёрхолт дуучин Д.Болдын ээж, мөн алдарт морин хуурч Жамъяны охин гэдгийг урлаг сонирхогчид мэднэ. 19 дүгээр нүүрээс ярилцлагыг уншаарай.
Манай сонины брэнд булангуудын нэг болох “Удам судар” булан шинэ дугаараа хүргэж байна. Энэ удаад зураач С.Цогзолын удмынхны үүх түүхийг нийтэллээ.
Эдгээр онцлох нийтлэл, ярилцлага, тэмдэглэлээс гадна цаг үеийн бусад мэдээлэл, тодруулга өнөөдрийн дугаарт гарлаа.
Нийт 95 эрэгтэй шатар сонирхогч өрсөлдсөнөөс тэмцээний эцсийн дүнгээр нийслэлийн оролцогч Б.Цэцэнбаатар 7.5 оноогоор нэгдүгээр байрт шалгарлаа. Хоёрдугаар байрт Нийслэлийн Баянзүрх дүүргээс оролцсон М.Алтангэрэл 7 оноогоор, гуравдугаар байрт Дорнод аймгийн оролцогч Д.Дүүрэнжаргал 7 оноогоор шалгарав. Шагналт дөрөвдүгээр байрт нийслэлийн Баянгол дүүргээс оролцсон С.Жаргалсайхан 7 оноогоор, тавдугаар байрт Хан-Уул дүүргийн оролцогч А.Энхтөгс 7 оноогоор тус тус шалгарсан юм.
Шатар сонирхогчдын улсын аварга шалгаруулах дөрөв дэх удаагийн тэмцээнд 34 эмэгтэй шатарчин оролцсноос Хан-Уул дүүргийн оролцогч Ж.Даваасүрэн 8 оноогоор тэмцээнийг тэргүүлсэн бол Дархан-Уул аймгийн оролцогч Т.Мандах 7 оноогоор удаалж, Налайх дүүргээс оролцсон Г.Ариунбаяр 7 оноогоор гуравдугаар байрт шалгарсан байна.
Мөн шилдэг ахмад эрэгтэй тоглогчоор Хэнтий аймгаас ирж оролцсон 77 настай Р.Дамдинсүрэн, шилдэг ахмад эмэгтэй тоглогчоор 59 настай М.Жаргалсайхан нарыг тодруулсан юм. Түүнчлэн “Оюунлаг түшээ”-гээр Ардын Их Хурлын депутат Д.Чилхаажав тодорчээ.
Монгол Улсын Их Хурлын даргын ивээл дор зохион байгуулдаг Монгол Улсын Ардчилсан шинэ Үндсэн хуулийн өдөрт зориулсан Шатар сонирхогчдын улсын аварга шалгаруулах дөрөв дэх удаагийн тэмцээнийг хааж Улсын Их Хурлын Тамгын газрын Ерөнхий нарийн бичгийн дарга Б.Болдбаатар үг хэллээ. Тэрээр хэлсэн үгэндээ, Улсын Их Хурлын даргын ивээл дор зохион байгуулагддаг Монгол Улсын Ардчилсан шинэ Үндсэн хуулийн өдөрт зориулсан Шатар сонирхогчдын улсын аварга шалгаруулах дөрөв дэх удаагийн тэмцээн амжилттай болж өндөрлөлөө. Энэхүү тэмцээн жил ирэх тутам хүрээгээ тэлж, ач холбогдол нь өндөрсөж байгаа. Энэ жилийн тэмцээний онцлог нь гадаад улс оронд ажиллаж амьдарч байгаа монгол иргэд маань өөрсдөө санаачлага гаргаж тэмцээнд оролцсон гэдгийг онцлов. Мөн тэрээр тэмцээнийг Монголын шатарын холбоо, нийслэлийн шатарын холбоо хамтран зохион байгуулж явуулсанд талархал илэрхийлээд, тэмцээний явцыг анх удаа найман өрөг дээр онлайн нүүдэл хийж, хийсэн нүүдэл бүр вэб сайт дээр тавигдаж байснаараа онцлогтой байсан гэдгийг тэмдэглэн хэллээ.Түүнчлэн ирэх жил зохион байгуулагдах тэмцээний үеэр хийгдэх өргийн тоо нэмэгдэнэ гэдэгт итгэлтэй байна гэлээ.
Ардчилсан шинэ Үндсэн хууль батлагдсаны 24 жилийн ойн өдөрт зориулан Улсын Их Хурлын даргын ивээл дор улсын хэмжээнд зохион явуулсан Шатар сонирхогчдын аварга шалгаруулах тэмцээнд нийтдээ 4800 шатар сонирхогч хамрагдсан байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
Чөлөөт бөхийн насанд хүрэгчдийн улсын аварга шалгаруулах тэмцээний шилдгүүд тодорсоор байна. “Буянт-Ухаа” спортын ордонд болж буй тэмцээний 61, 74, 86 кг-ын жингийн барилдаанууд болов.
Чөлөөт бөхийн насанд хүрэгчдийн 2016 оны УАШТ “Буянт-Ухаа” спортын ордонд хоёр дахь өдрөө үргэлжилж, медальтнуудаа тодруулж байна.
Жудо бөхийн Улсын аварга шалгаруулах тэмцээн Эрдэнэт хотод гурав дахь өдрөө үргэлжлэв. Өнөөдөр багийн аварга тодруулах барилдаан болж, эмэгтэйчүүдээс “Хилчин” спорт хорооны тамирчид багаараа түрүүллээ. Харин хоёрдугаар байрт “Женко” клубийн охид шалгарав.
Хятадын зохион бүтээгчид жолоочгүй нисдэг тэрэг зохион бүтээжээ. “EHANG 184” гэх энэхүү нисдэг машин мэт нисдэг тэрэгт хүн суугаад газрын зурагт очих газраа тэмдэглэхэд л болно. Жолоодох шаардлагагүй бөгөөд ийм төрлийн нисдэг тэрэгний анхны, туршилтын загвар аж. Энэхүү нисдэг тэрэг нь нэг зорчигч суух боломж бүхий их биетэй, дөрвөн хөлөндөө найман сэнстэй. Зохион бүтээгчид хэлэхдээ ашиглалтанд орох хараахан болоогүй байгаа бөгөөд Засгийн газрынхаа бүх төрлийн зөвшөөрлийг авсны дараа түүгээр нисч болох юм гэжээ. Гэхдээ Ehang төслийнхөн энэ технологийн талаар төрийн байгууллагуудтай нягт хамтран ажиллаж байгаа гэнэ. EHANG 184 нь агаарт цагт 62 миль хүртэл хурдлах боломжтой. Мөн 11,480 фут явах ба 23 минутын хүчин чадал бүхий батерэйтай аж. Тэр маш жижиг. Ердөө л 18 фут урттай, 440 фунт жинтэй. Гэхдээ үүнээс ч жижиг хэмжээтэй болох боломжтой гэнэ.
Монгол орны ихэнх гол мөрөнд тогтвортой мөсөн бүрхүүл тогтож, жижиг голууд ёроолдож хөлдсөн ба мөсний зузаан өмнөх арав хоногийнхоос 5-35 см нэмэгджээ. Хараа, Ерөө, Тэрэлж, Туул, Сэлэнгэ, Орхон, Хэрлэн, Халх, Ховд, Буянт зэрэг голуудын мөсний зузаан өнгөрсөн оны мөн үе болон олон жилийн дунджаас 10-30 см нимгэн мөсөн бүрхүүлтэй байна.
Анхан шатны шүүх энэ долоо хоногт twitter-т үзэл бодлоо илэрхийлсэн иргэнд холбогдох хэргийг хэлэлцэж, ял оноолоо. Зам тээврийн сайд асан А.Гансүхийг гүтгэсэн гэх үндэслэлээр Монголын Төмөр замын инженерийн холбооны гишүүн Л.Даваапилд анхан шатны шүүх хөдөлмөрийн хөлсний доод хэмжээг 51 дахин нэмэгдүүлсэнтэй тэнцэх (9.7 сая төгрөг) мөнгөн торгууль ногдуулсан юм. Л.Даваапил 2013 оны аравдугаар сарын 18-ны өдөр Монгол Улсын Зам тээврийн сайд А.Гансүхийн твиттер хуудсандаа “МИАТ-т хийсэн шинэчлэлээр 3.6 тэрбум төгрөг хэмнэсэн” гэж бичсэний доор нь “Самсунгтай нэг км төмөр замыг хэдээр гэрээлсэн юм бэ, сайдаа. Тэнд луйвардсан мөнгө чинь наад 3.6 чинь хол давна” гэж бичсэн нь шүүгдэх үндэслэл болжээ. Түүнд Эрүүгийн хуулийн 111.2 буюу олон нийтийн өмнө бусдыг гүтгэсэн, алдар хүндэд нь халдсан гэх үндэслэлээр ял оноосон. Өмнө нь А.Гансүхийг twitter-ээр гүтгэсэн гэх үндэслэлээр жиргээч Ц.Бат мөн шүүгдэж байсан билээ.
Утга
Гамшгийн удирдлагын төвийн мэдээлснээр, өчигдөр буюу нэгдүгээр сарын 9-ний өдөр Нийслэлд гал түймрийн 5, орон нутагт гал түймрийн 3 дуудлагатай байжээ. Сүхбаатар дүүргийн 6 дугаар хороо, Соёлын төвийн өргөө “Сод Монгол” ХХК-ийн төв офисс шатаж байна гэсэн дуудлагыг 2016.01.10-ны өдрийн 03:26 цагт иржээ. Тус дуудлагын дагуу Гал унтраах, аврах 10 дугаар ангийн 8 албан хаагч ослын газар ажиллаж галыг унтраасан байна. Мөн Баянгол дүүргийн 20 дугаар хороо, ТЭЦ-4 цахилгаан станцын урд өвс борлуулах зогсоол дээр автомашин, өвс шатаж байна гэсэн дуудлагыг 2016.01.09-ний өдрийн 16:00 цагт хүлээн авч, Гал унтраах, аврах 18 дугаар ангийн 8 албан хаагч ослын газарт очиж ажиллан унтраажээ.