Month: January 2016

Нийслэлийн Удирдах ажилтнуудын ээлжит Шуурхай зөвлөлгөөн боллоо. Зөвлөлгөөнийг нийслэлийн Засаг даргын Санхүү, эдийн засгийн асуудал хариуцсан орлогч Н.Батаа удирдан явуулав. Зөвлөлгөөнөөр өмнөх хурал дээр өгсөн үүргийн биелэлтийг танилцуулж, нийслэлийн Засаг даргын орлогч Н.Батаа үүрэг даалгавар өгч, дүүргийн Засаг дарга нар өнгөрсөн 21 хоногийн нөхцөл байдлын талаар танилцууллаа. Өнгөрсөн 21 хоногийн хугацаанд Баянгол, Баянзүрх, Чингэлтэй, Налайх дүүрэгт гэмт хэргийн шинжтэй мэдээлэл буурсан үзүүлэлттэй байгаа бол Хан-Уул, Багахангай, Сүхбаатар, Сонгинохайрхан дүүрэгт өсчээ.

Өмнөх зөвлөлгөөн дээр өгсөн үүрэг даалгаврын биелэлт:

Нийслэлийн хэмжээнд нийт 871,2 тонн бодис, 1586,6 тонн давс цацав

Явган хүний зам талбай, гарцан дээрх халтиргаа гулгааг цэвэрлэх, халтиргаа, гулгааг арилгах, сэргийлэх зорилгоор давс, бодисыг нэмэгдүүлэх үүргийн хүрээнд нийслэлийн хэмжээнд 2015-2016 оны өвлийн улиралд нийт 871,2 тонн бодис, 1586,6 тонн давс, 1760 метр күб элс дайрга цацав. Одоогоор давс бодисны зарцуулалт 70 гаруй хувьтай байгаа нь урьд жилүүдээс өндөр байна. Нөөцийг нэмэгдүүлэх үүднээс нэмэлтээр 100 тонн бодис, 350 тонн давс авахаар ажиллаж байна.

Халтиргаа гулгааг бууруулахад хяналт тавих 153 олон нийтийн байцаагч ажиллаж байна

Явган болон зам тээврийн осол гэмт, хэрэг ихээр гарч байгаа цэгүүдийг тогтоож, цаашид авах арга хэмжээний хүрээнд Улаанбаатар хотод халтиргаа гулгаа үүсдэг 329 цэгийн байршлыг тогтоон халтиргаа гулгаа, хог хаягдлыг бууруулахад хяналт тавих нийт 153 олон нийтийн байцаагч ажиллаж байна. Мөн “Явган болон зам тээврийн осол гэмт, хэрэг ихээр гарч байгаа цэгүүдийг тогтоож, цаашид авах арга хэмжээ”-ний талаар танилцуулга мэдээлэл бэлтгэн, журмын дагуу 12 сарын 25-ны Нийслэлийн Удирдлагын зөвлөлийн хуралд танилцуулж, гүүрэн гарц, хайс хашлага байршуулах санхүүгийн тооцоо судалгаа гаргах үүрэг даалгавар өгчээ.

Шинэ жилийг тэмдэглэн өнгөрүүлэх ажлын хүрээнд нийт байгууллагууд идэвхтэй ажиллалаа

Шинэ жилийн баярын өдрүүдэд мэргэжлийн чиг үүргийн байгууллагууд хэрэглээний халуун, хүйтэн болон ундны ус, дулаан, цахилгаанаар тасалдалгүй хэвийн хангах, шуурхай бригадыг бэлэн байлгах, нийтийн тээврийн үйлчилгээний чанар, цагийн хуваарьт хяналт тавих ажиллалаа. Шинэ жилийг тэмдэглэн өнгөрүүлэх авах арга хэмжээний хүрээнд нийт байгууллагууд идэвхтэй оролцож ажилласан байна.

Шуурхай зөвлөлгөөн дээр нийслэлийн Засаг даргын Санхүү, эдийн засгийн асуудал хариуцсан орлогч Н.Батаа дараах үүрэг даалгаврыг өглөө. Үүнд:

• Нийслэлийн хэмжээнд Худалдан авах ажиллагааг ил тод болгон сурталчлах, төсвийн жилийг эхлүүлэх бэлтгэлийг хангах ажлын хүрээнд энэ сарын 20-нд “Улаанбаатар худалдан авалт-2016” бизнес чуулга уулзалт зохион байгуулах төлөвлөгөөний дагуу ажил хариуцсан байгууллагууд шуурхай ажиллах

• 2016 онд Төсвийн ерөнхийлөн захирагч, төсвийн шууд захирагчтай байгуулах үр дүнгийн гэрээний бэлтгэл ажлыг хангах, гэрээний хавсралт болох үйл ажиллагааны төлөвлөлтийг бодитой, тоо хэмжээ, цаг хугацаагаар хэмжигдэн дүгнэгдэхүйц байдлаар томьёолон хийж батлуулах

• Нийслэлийн ИТХ-ын 2015 оны “Нийслэлд тээврийн хэрэгслийг зориулалтын автомашинаар зөөж шилжүүлэх, түр саатуулах хашаа ажиллуулах, үйл ажиллагааны төлбөрийн хэмжээг тогтоох тухай” 33/35 дугаар тогтоолыг 2016 оны 1 дүгээр 1-нээс мөрдөж эхэлсэнтэй холбогдуулан зөөж шилжүүлэх байгууллага, аж ахуйн нэгжийг сонгон шалгаруулах, одоо байгаа тэмдэг, тэмдэглэгээг сэргээх, нөхөж байршуулах ажлуудыг эрчимжүүлж ажиллах

• Нийслэлийн дүүргүүд, хэрэгжүүлэгч агентлагууд, Улаанбаатар хотын Захирагчийн харъяа газрууд болон нийслэлийн өмчит үйлдвэрийн газрууд, нийслэлийн төсөвт байгууллагуудын 2015 оны үйл ажиллагааны үр дүнгийн үнэлэх ажлыг хэсгүүд байгуулагдсан тул нийт байгууллагууд ажлын хэсгийг ажиллах боломжоор хангахыг даалгав гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

“Улаанбаатар худалдан авалт – 2016” бизнес чуулга уулзалт энэ сарын 20-нд болно

Нийслэлийн Засаг даргын санаачилгаар нийслэлийн Засаг даргын Тамгын газар, Улаанбаатар хотын худалдааны танхимтай хамтран “Улаанбаатар худалдан авалт – 2016” бизнес чуулга уулзалтыг энэ сарын 20-нд хоёр дахь жилдээ зохион байгуулах гэж байна.

Тус чуулга уулзалт нь нийслэлийн эдийн засгийн хөгжлийг дэмжих, бизнес эрхлэгчдийн эрх ашгийг хамгаалах, төр хувийн хэвшлийн хамтын ажиллагааг хөгжүүлэх, хөрөнгө оруулалт, бизнесийн таатай орчинг бүрдүүлэх зорилготой юм. Чуулга уулзалтад Улсын Их хурал, Засгийн газрын гишүүд, Монгол Улсад суугаа Онц Бөгөөд Бүрэн Эрхт Элчин сайд нар, нийслэлийн ИТХ-ын төлөөлөгчид, Нийслэлийн нутгийн захиргааны байгууллагын удирдлагууд, Улаанбаатар хотын худалдааны танхимын гишүүд, Олон улсын байгууллагын төлөөлөгч, Үндэсний баялаг бүтээгчид, хөрөнгө оруулагчид оролцоно.

“Улаанбаатар худалдан авалт – 2016” бизнес чуулга уулзалтаар нийслэлд хэрэгжүүлэхээр төлөвлөж буй хөрөнгө оруулалтын томоохон төслүүдийг танилцуулж, дэлгэрэнгүй нээлттэй мэдээлэл өгөх ба тус хөтөлбөрүүдэд хувийн хэвшлийнхэн хэрхэн оролцох боломжтой талаар харилцан санал солилцоно. Мөн төр хувийн хэвшлийнхэнтэй хамтран ажиллахад нийслэлээс баримталж буй худалдан авалтын бодлого, горим, төлөвлөгөөг танилцуулах юм. Тус чуулга уулзалт энэ сарын 20-нд Шангри-Ла зочид буудалд болох бөгөөд нэгдсэн хуралдаан 9:00-12:30, салбар хуралдаан 14:00-17:00 цаг хүртэл үргэжилнэ. Чуулга уулзалтад оролцох хүсэлтэй нийслэлд үйл ажиллагаа явуулдаг бизнес эрхлэгчид www.ubchamber.mn цахим хуудсанд хандаж, бүртгүүлэх боломжтой.

Булган аймгийн Могод сумын төвөөс урд зүгт 33 км-ийн зайд “Түлээ уул” гэдэг газар өчигдөр 4.5 магнитутын хүчтэй газар хөдлөлт болжээ. Газар хөдлөлтийн чичирхийлэл ойролцоогоор нэг минут орчим, дуу чимээтэй болж өнгөрсөн тухай аймгийн Онцгой байдлын газраас мэдээлсэн. Газар хөдлөлтийн улмаас ямар нэгэн хохирол гараагүй гэнэ.

Дашрамд сонирхуулахад, Энэ сарын 8-нд Баян-Өлгий аймгийн Булган сумын төвөөс зүүн зүгт 13 км-т өчигдөр өглөө 05:29 цагт 3,8 магнитутын газар хөдлөлт болсон юм.

Ойрын өдрүүдэд хүйтний эрч чангарч байна. Иймд иргэдийг осгож, хөлдөх аюулаас болгоомжлохыг анхааруулж байна.

Өнгөрөгч амралтын өдрүүдэд хоёр иргэн осгосны улмаас нас барсан харамсалтай хэрэг гарчээ.

Тодруулбал, Төв аймгийн Баянцогт сумын 1-р багийн нутаг Цагаан давааны эх гэх газар тус сумын харьяат 57 настай эрэгтэй нь осгож нас барсан хэргийг шалгаж буй юм байна.

Мөн Хэнтий аймгийн Хэрлэн сумын 2-р багт оршин суух, 26 настай, эмэгтэй С гэгч осгосон байдалтай эмнэлэгт хүргэгдэн, эмчлэгдэж байгаад нас барсан хэргийг харьяа дүүргийн цагдаагийн хэлтсээс шалгаж эхэлжээ.

БСШУЯ-наас
“Боловсролын чанарын шинэчлэл” хөтөлбөр хэрэгжүүлж эхэлсэн. Энэ төсөл нь
Дэлхийн банкны Хөгжлийн Ассоциацийн хөнгөлөлттэй зээлийн хөрөнгөөр хэрэгжиж
байгаа юм. Уг хөтөлбөрийн хүрээнд 200 дунд сургуулийн бичсэн төсөлд урамшуулал
болгон тус бүр 3000 ам.долларын тэтгэлгийг өнөөдөр гардуулж өгчээ. Төслийн
хувьд 30 сая ам.доллар буюу 60 тэрбум төгрөгийн зардал гарахаар тооцоолжээ.
Дээрх хөтөлбөр нь бага боловсролын эх хэл, математик, байгалийн ухааны
сургалтыг дэмжих, олон улсын түвшинд ихээхэн ач холбогдол өгч буй STEM
боловсролыг хөгжүүлэх, чанарын үнэлгээний тогтолцоог бүрдүүлж үр дүнд хүргэх
зорилготой ажээ.

Өнгөрсөн амралтын өдрүүдээр “Херо” энтертайментийн архивын бичлэгээс Ерөнхийлөгч асан Н.Энхбаярын оролцсон нэвтрүүлгийн хар материал олон нийтэд цацагдсан.

Тэгвэл уг асуудалтай холбогдуулан “Херо” энтертайментийн захирал Г.Баатар өнөөдөр сэтгүүлчдэд мэдээлэл хийлээ. Тэрээр хэлэхдээ “Манай архиваас бичлэгүүд алдагдсан. Ерөнхийлөгч асан Н.Энхбаярын болон өөр хэд хэдэн бичлэг алдагдсан. Энэ дүрсээ алдаж хариуцлагагүй байдал гаргасандаа “Херо” энтертайментийн өмнөөс Н.Энхбаяраас уучлал гуйж байна” гэв.

Мөн бичлэг алдагдсан нь маш том зохион байгуулалттай тусгай ажиллагаа гэж үзэж буйгаа илэрхийлэв. Хэргийг шалгаж байгаа учраас өөр мэдээлэл өгөх боломжгүй байна” гэлээ.

Одоогоор “Монгол тулгатны 100 эрхэм” нэвтрүүлгийн 50 нэвтрүүлэг явж байгаа аж.