Нэгдүгээр сарын нэгдүгээр арав хоногийн байдлаар Монгол орны ихэнх дунд ба түүнээс дооших эрэмбийн гол ёроолдоо хүртэл хөлдсөн бол томоохон голуудын мөсний зузаан өмнөх арав хоногийнхоос 10-45 см нэмэгдсэн байна.
Хэдийгээр нийт нутгаар ихэнх гол мөрөн, нууран дээр битүү мөсөн бүрхүүл тогтож, мөс улам зузаарч байгаа хэдий ч нуурын толио болон томоохон голын нийт уртын дагууд мөсний зузаан харилцан адилгүй байгааг Цаг уур орчны шинжилгээний газраас мэдээлээ.
Мөсний даац хүн, мал, машин тэрэг явахад аюулгүй хэмжээнд хүрч бэхжээгүй байгаа тул цаг хожих, зам товчлох зэргээр мөсөн дээгүүр явах, авто тээвэр хийхгүй байхыг онцгойлон анхааруулж байна.
МАН-аас “МАН Цэцтэй хуйвалдан орон сууцны 8 хувийн зээлийг 20 хувь болгууллаа”, “Цэц МАН-ын захиалгаар шийдвэр гаргалаа” гэх хэвлэл мэдээллийн хэрэгсэл, сошиал орчинд анх тараасан мэдээлэлтэй нь холбогдуулан АН-ын ерөнхий нарийн бичгийн даргын үүрэг гүйцэтгэгч Л.Эрхэмбаярыг шүүхэд өгсөн. Уг нэхэмжлэлийг Баянгол, Хан-Уул, Сонгинохайрхан дүүргийн иргэний хэргийн анхан шатны шүүх хүлээн авч шүүгчийн захирамжийн дагуу энэ сарын 11-нд иргэний хэрэг үүсгэсэн байна.
“Таван богд” групп Төрийн ордны зүүн талд байрлах хуучнаар Хэвлэх үйлдвэрийн барилгыг нээлттэй дуудлага худалдаагаар 23 тэрбум 850 сая төгрөгөөр авсан билээ. 
Одоогоор сар шинийн баярт зориулсан үзэсгэлэн худалдаа цөөн хэдэн газар явагдаж байна. Ерөнхийдөө үзэсгэлэн худалдаагаар үйлчлүүлэх хүний тоо өмнөх жилүүдээс харьцангуй цөөн байгааг худалдаачид хэлж байв.
Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд иргэн С.Баярмаа болон түүнд бараа нийлүүлдэг Х.Мөнх-Эрдэнэ нарт холбогдох эрүүгийн хэргийг шүүн хэлэлцжээ.
Цагдаагийн ерөнхий газраас 2015 оны гэмт хэрэг, захиргааны зөрчлийн нөхцөл байдлын тухай мэдээллээ. Цагдаагийн байгууллагад өнгөрсөн онд нийт 27 мянга 757 гэмт хэрэг бүртгэгджээ. Энэ тоог өмнөх онтой харьцуулахад гэмт хэрэг 1.6 хувиар өссөн байна. Эдгээр гэмт хэргийн 64.7 хувь нь хотод, 35.2 хувь нь орон нутагт гарчээ. Нийслэлд үйлдэгдсэн гэмт хэргийн тоо өссөн бол орон нутагт гэмт хэргийн гаралт 1.3 хувиар буурсан судалгааг ЦЕГ-ын Мэдээлэл, технологийн төвөөс гаргасан байна. Нийслэлд үйлдэгдсэн хэргийг дүүргүүдээр харьцуулахад хүн ам олноор суурьшсан Баянзүрх дүүрэгт нийт гэмт хэргийн 23 хувь буюу хамгийн олон 4272 гэмт хэрэг бүртгэгджээ. Орон нутагт Ховд аймагт гэмт хэрэг өссөн бол эсрэгээрээ Завхан аймагт гэмт хэргийн гаралт буурсан байх юм.
Улсын гарьд Б.Гончигдамба “Даян” нэртэй чөлөөт бөхийн клуб нээжээ. Тэрбээр үндэсний бөхөөс гадна ийн чөлөөт бөхөөр хичээлээж буй залууст өөрийн хувь нэмрээ оруулахын тулд өөрийн клубээ нээжээ. Байгуулагдаад удаагүй тус клубээс а.а Б.Чимэдвандан, а.з Т.Бэгзсүрэн, а.х П.Өсөхбаатар нарыг гарьд Гончигдамба өөрөө дасгалжуулан УАШТ-нд сойсон бөгөөд тэднээс а.х П.Өсөхбаатар мөнгөн медаль хүртснээр клубынхаа амжилтын гараагаа эхлүүлжээ.
Америкийн тулаант киноны од Стивен Сигал Сербийн иргэн болжээ. Сигалийг иргэн болгох шийдвэрт Сербийн ерөнхий сайд Александар Вучич энэ сарын 8-нд гарын үсэг зурсан байна. Стивен Сигал өөрийн өвөг эцгээ Оросын Монгол хүн байсан гэдэг бөгөөд харин эцгээ Оросоос Америкт дүрвэсэн Жүүд хүн гэж ярьдаг юм. Тэрбээр Монгол тулгатны 100 эрхэмд оролцож байсан, Монгол эхнэртэй билээ.
“Зөв амьдрах ухаан” ТББ-ынхан өчигдөр Чингисийн талбайд хотын удирдлагуудаас хариулт нэхэн жагслаа. Тус байгууллага нь орон гэргүй тэнэмэл, архи болон мансууруулах бодист донтсон, гэмт хэрэг үйлдээд хорих ангиас суллагдсан, өнчин ядуу, хөгжлийн бэрхшээлтэй бүх насны иргэдэд нийгэмд эзлэх байр сууриа дахин олоход тусалдаг байна. Нийслэлээс орон гэргүй тэнэмэл амьдралтай иргэдийг нийгэмшүүлэх ажлыг үр дүнтэй зохион байгуулахын тулд тус байгууллагатай өнгөрсөн 2013 онд анх хамтран ажиллах гэрээ байгуулсан байна.