Month: January 2016

“Aspire Mining” компани Монгол улсад төмөр замын холболтын цэг тавих болон шугам зам тавих сүүлийн зөвшөөрлийг авсан талаар www.worldcoal.com мэдээлжээ.

Өнгөрөгч оны арванхоёрдугаар сард Монгол Улсын Засгийн газраас тус компанийн охин компани болох “Northern Railways”-тэй Эрдэнэт- Овоот чиглэлд төмөр зам тавих тухай гэрээ хийгээд байсан юм. Уг гэрээг хийснээр” Aspire Mining” компанийн эзэмшиж буй Овоотын нүүрсний ордыг Монголын гол төмөр замтай холбох аж. Гэрээний хугацаа гучин жил ба урьдчилсан байдлаар 1.2 тэрбум ам.долларын хөрөнгө оруулалт шаардагдах тооцоо гараад байгаа юм. “Northern Railways” нь өөрийн хамтран ажиллаж буй China Railways-тай хамтран хөрөнгө оруулалт татахад зориулсан ТЭЗҮ-ийг хийх юм. Мөн Овоотын коксжих нүүрсний ордоос эхний ээлжинд жилд 5 сая тн нүүрс олборлохоор төлөвлөсөн бөгөөд цаашид 10 сая тн болгож нэмэгдүүлэх аж. Ордын ашиглах хугацааг 21 жил гэж тооцжээ.

Уг мэдээлэл олон нийтэд цацагдсанаар хувьцааны ханш 12.5 хувиар өсөөд байгаа тухай Лондоны хэвлэл мэдээллээр цацагджээ.

Идэр гурван есийн хүйтэн ид дундаа үргэлжилж байна. Ойрын хэдэн жилд гурав, дөрвөн есөд ч төдий л хүйтрээгүй. Харин энэ жилийн хувьд олон жилийн дунджаас давж хүйтэрч байна. Өнгөрсөн даваа гарагаас эхлээд ихэнх нутгаар хүйтэрчээ. Нийслэл Улаанбаатар хотын төв хэсэгт л гэхэд шөнөдөө 35 хэм хүйтэрч, Яармаг, Сонгинын орчимд 40 хэм хүртэл хүйтэрснийг Ус, цаг уур, орчны судалгаа, мэдээллийн хүрээлэнгийнхэн хэлж байна.

нэ сарын 16-наас эхлэн хүйтний эрч эрс чангарч, цас ихээр орох төлөвтэй байгаа аж. Баруун, Төв Сибирээс манайх руу хүйтэн агаарын масс чиглээд ирэх үед хүйтний эрч эрс чангардаг. Үүнтэй холбоотойгоор энэ сарын 15, зарим нутгаар 16-20-ныг дуустал хүйтний эрч эрс нэмэгдэж, цас орох юм байна. Нэгдүгээр сарын 15-16-нд ихэнх нутгаар, 17-нд нутгийн зүүн хагаст, 18-19-нд зарим нутгаар цас орж, зөөлөн цасан шуурга шуурна. 15-17-нд салхи Алтайн уулс, говь талын нутгаар зарим үед 12-14 м/с хүрч ширүүсэх төлөвтэй. 15-нд нутгийн хойд хэсгээр 16-наас бүх нутгаар хүйтний эрч эрс чангарна. Идэр, Тэс, Отгон голын сав, Дархадын хотгороор шөнөдөө 43-48 градус, өдөртөө 31-36 градус, Увс, Завхан, Орхон, Булган, Төв, Дархан, Хэнтий, Сэлэнгэ зэрэг аймгийн зарим сумдаар шөнөдөө 38-43 хэм, өдөртөө 25-30 хэм, Говь-Алтай, Өмнөговь, Баянхонгор, Дундговь зэрэг аймгуудын нутгаар 23-28 хэм, өдөртөө 12-17 хэм, бусад нутгаар шөнөдөө 29-34 хэм, өдөртөө 19-24 хэм хүйтэн байна гэж цаг уурчид мэдээллээ.

Агаарын температур нийт нутгаар энэ сарын 20-ныг дуустал эрс чангарах нөхцөл бүрдэж байгаа тул зам талбайд халтиргаа гулгаа үүсэх, малын хэвтэр бууц хөлдөх, мал бэлчээрт гарч чадахгүй болох, хот, суурин газрын төвлөрсөн халаалтад таагүй нөлөө үзүүлж болзошгүйг онцгойлон анхаарууллаа.

Ерөнхий сайд асан Н.Алтанхуягийн ахлах зөвлөх Л.Гансүхийн өмгөөлөгчөөр ажиллаж буй Ц.Баасандорж өмгөөлөгчийг Баянзүрх, Сүхбаатар, Чингэлтэй дүүргийн шүүхээс дахин торгожээ. Тодруулбал, түүнийг хөдөлмөрийн хөлсний доод хэмжээг 10 дахин нэмэгдүүлсэнтэй тэнцэх буюу сая 920 мянган төгрөгөөр торгосон байна. Торгох болсон шалтгаан нь өмгөөлөгч Ц.Баасандоржийг тус дүүргийн шүүгч Х.Идэрт нөлөөлсөн гэж үзжээ. Учир нь өмгөөлөгч Ц.Баасандорж өнгөрсөн оны есдүгээр сард болсон шүүх хурлын үеэр шүүгч Х.Идэрээс татгалзаж, үүнийгээ хэвлэл мэдээллийн хэрэгслээр ярьсан юм. Түүний эл үйлдлийг шүүхээс шүүгчид нөлөөлсөн гэж үзэн ийнхүү торгосон аж.

Өмгөөлөгч Ц.Баасандорж шүүгч Х.Идэрээс татгалзах болсон шалтгаанаа “Х.Идэр шүүгчийн ах Х.Тамир прокурор хар тамхины хэргээр шалгагдаж байгаа. Гэтэл шалгаж байгаа ажлын хэсгийг АТГ ахалж байна. Ингээд бодохоор цаанаасаа захиалгатай нь харагдаж байгаа биз. Х.Идэр шүүгчийн ахыг Л.Гансүхийн хэрэг шийдэгдэхээс өмнө ганц худагт хорьж, дүүд нь хэргийг хуваарилаж байна. Бид дуугүй л байсан. Гэтэл асуудал ийм байдалд хүрчихлээ. Өөрөөр хэлбэл, Х.Идэр шүүгч Л.Гансүхийг яллавал ах Х.Тамир нь ялгүй гарна. Яллаж чадахгүй бол ах нь шоронд орно гэх барьцаа байхыг үгүйсгэхгүй” гэж тайлбарлаж байсан юм.

Антарктид тив судлаач Д.Батмөнх Дэлхийн Өмнөд туйлд 10 гаруй хоног судалгаа хийгээд өнгөрсөн долоо хоногт эх орондоо иржээ. Тэрбээр Болгар, Испани улсын судлаачдын багтай хамтран ажилласан байна. Д.Батмөнх нь Өмнөд туйлд судалгаа хийсэн монголын долоо дахь эрдэмтэн болж байгааг Антарктид тивийн судлалын нийгэмлэгийнхэн хэлсэн юм.

Урьд нь манай улсын судлаачид бусад улс орны судлагааны багтай хамтрахгүйгээр өмнөд туйлд очих боломжгүй байжээ. Харин өнгөрсөн онд Монгол Улс Антарктидын гэрээнд нэгдсэнээр өөрийн гэсэн судалгааны багийн мөсөн тивд байгуулах эрхтэй болсон.

Өмнөд туйлд дэлхийн цэнгэг усны нөөцийн 70 хувь хадгалагдаж байгаа мөн их хэмжээний ашигт малтмалын нөөц бий гэсэн судалгаа байдаг. Тиймээс өндөр хөгжилтэй улс орнууд судалгааны багаа олноор Антарктид руу илгээх болжээ. Зарим улс байнгын судалгааны багтай болсон байна. Гэхдээ олон улсын Антарктидын гэрээнд “Мөсөн тив хэн нэгний өмч биш. Тиймээс ашгийн төлөө үйл ажиллагаа явуулахыг зөвшөөрөхгүй” гэж заасан байдаг. Бид энэ гэрээний дагуу өмнөд туйлд судалгаа явуулах боломж нээгдэж байгаа нь дэлхийд өөрсдийгөө сурталчлах, монгол эрдэмтдийн чадамжийг олон улсад үнэлүүлэхэд чухал алхам болно гэж үзэж байна.

Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Төсөл хэрэгжүүлэгчээр батламжилж, гэрээ байгуулах эрх олгох тухай” А/1011 дүгээр захирамж гаргалаа. Захирамжаар Баянгол дүүргийн 2 дугаар хорооны нутаг дэвсгэр дэх ашиглалтын шаардлага хангахгүй болсон нийтийн зориулалттай орон сууцны 1, 2, 3, 5, 6, 7 дугаар байрны барилгажилтын төслийг боловсруулж, төсөл хэрэгжүүлэгчээр “Хабул констракшн” ХХК шалгарсныг батламжиллаа. Шалгарсан компанид сууц өмчлөгч болон нийслэлийн Засаг даргатай гурван талт гэрээг батлагдсан загварын дагуу байгуулах эрх олгов. Захирамжийн хэрэгжилтэд хяналт тавьж ажиллахыг нийслэлийн Ерөнхий төлөвлөгөөний газарт даалгалаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Нийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Газар эзэмшүүлэх, ашиглуулах эрх олгож, баталгаажуулах тухай” А/1002 дугаар захирамж гаргалаа. Захирамжийн дагуу 24 иргэн, аж ахуйн нэгж, байгууллагын газар эзэмших, ашиглах эрхийг баталгаажуулав.

Газар эзэмших эрх нь баталгаажсан иргэн, аж ахуйн нэгж, байгууллагуудтай холбогдох хууль тогтоомж, журмын дагуу гэрээ байгуулж, гэрчилгээ олгон, хэрэгжилтэд хяналт тавьж ажиллахыг нийслэлийн Өмчийн харилцааны газарт даалгалаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

2015 онд улсын хэмжээнд 28 мянга орчим гэмт хэрэг бүртгэгдсэн байна. Энэ нь өмнөх оны мөн үетэй харьцуулахад 1.6 хувиар өссөн үзүүлэлт гэдгийг ЦЕГ-аас мэдээллээ. Үүний дотор гэр бүлийн хүчирхийлэлтэй холбоотой гэмт хэрэг улсын хэмжээнд 26 хувиар өссөн үзүүлэлт юм. Зөвхөн өнгөрсөн онд гэхэд гэр бүлийн хүчирхийллийн улмаас 26 хүн амиа алджээ.

2015 онд Улаанбаатар хотын цагдаагийн 102 дугаарт сая 500 мянган дуудлага ирснээс 30 хувийг нь гэр бүлийн хүчирхийллийн хэрэг эзэлсэн. Гэр бүлийн хүчирхийлэлд өртсөн иргэдийн 78 хувь нь эмэгтэйчүүд байгаа юм. Гэр бүлийн хүчирхийлэлд өртсөн иргэдийг насны ангилалаар нь авч үзвэл 17 хүртлэх насны 43 хүүхэд, 18-24 насны 143 , 25-35 насны 571 хүн хохирсон байна. Эндээс харахад гэр бүлийн хүчирхийлэлд өртөгсдийн дийлэнх хувийг бага насны хүүхдүүд болон залуучууд өртөж байна гэсэн үг.

Нийт гэмт хэргийн 65 хувь нь Улаанбаатар хотод үйлдэгддэг. Цоожтой хаалганы цаана байдаг гэр бүлийн хүчирхийллийн улмаас ганцхан жилийн хугацаанд 26 хүн амиа алдаж, 1200 орчим хүн бэртэж гэмтсэн байна