Month: January 2016

Зудын улмаас Баян-Өлгий аймагт аргаль бэлчээр, өвс тэжээлээр гачигдаж эхэлжээ. Нутгийн иргэдийн мэдээлснээр уулнаас буусан 400-500 орчим аргаль айлын хотонд орж ирэн, малын бэлчээр булаалдаж эхэлжээ.

Өнгөрсөн жилүүдэд байгаль хамгаалах байгууллагуудын зүгээс тэдэнд өвс тэжээл хүргэж өгдөг байсан нь энэ жил тасарчээ. Аргалийн тоо толгой харьцангуй өссөн ч гадны анчдын “олз” болсоор буй аж. Иймд мал сүргийн нэгэн адил энэ ховор амьтныг байгалийн гамшгаас аврах арга хэмжээ авах хэрэгтэйг нутгийн иргэд мэдээлэв.

Энэ сарын 16-ны өдөр Завхан аймгийн Алдархаан сумын Богдын гол багийн Сархиаг гэх газар өвөлжилж байсан малчны 15 настай хүү хониндоо яваад ор сураггүй болжээ. Энэ талаархи мэдээллийг ар гэрийнхэн нь Онцгой байдлын албаны утсанд өгсөн байна. Дуудлагын дагуу Гал унтраах 43 дугаар ангийн 10 алба хаагч, онцгой байдлын алба хаагчид ар гэрийнхний найман хүнтэй хамтарч эрэн сурвалжлах ажиллагааг явуулж, хүүгийн цогцсыг олжээ. Хүү гэрийнхээ ойролцоох өндөр хаднаас унаж амиа алдсан байжээ.

Өнөөдрөөс ихэнх нутгаар хүйтний эрч эрс чангарч, нойтон цас орохыг Ус, цаг уурын хүрээлэнгээс анхааруулав. Маргаашнаас нэгдүгээр сарын 21-нийг хүртэлх цаг агаарын урьдчилсан төлөвөөр, 17-нд зарим газраар, 18-нд зүүн зүгийн нутгаар, 19-нд баруун болон төвийн нутгийн зарим газраар, 20-нд нутгийн хойд хэсгээр цас орж, явган шуурга шуурна. Салхи 17,18-нд зарим газраар, 19, 20-нд говь талын нутгаар секундэд 12-14 метр хүрч ширүүснэ.

Хүйтний эрч чангарч Дархадын хотгор, Идэр, Тэс, Отгон голын хөндийгөөр шөнөдөө 45-50 хэм, өдөртөө 31-36 хэм, Увс нуурын хотгор болон Хэнтийн уулархаг нутаг, Орхон-Сэлэнгэ, Хараа, Ерөө, Туул, Тэрэлж, Хэрлэн, Халх голын сав, Дарьгангын тал нутгаар шөнөдөө 38-43 хэм, өдөртөө 26-31 хэм, говийн бүс нутгийн баруун хэсгээр шөнөдөө 22-27 хэм, өдөртөө 14-19 хэм, бусад нутгаар шөнөдөө 30-35 хэм, өдөртөө 21-26 хэм хүйтэн байна. Тиймээс жолооч нар шатах тослох материалын нөөцтэй, тээврийн хэрэгслийн техникийн бэлэн байдпыг хангуулж замд гарах, онцын шаардлагагүй бол аян замд гарахгүй байх, мал аж ахуй эрхэлдэг иргэд, малчид малын өвс тэжээл, түлээ, нүүрсээ сайн базаах, малаа дагаж явж осгож хөлдөхөөс урьдчилан сэргийлэх, малаа аль болохоор ойр бэлчээх, дулаан хувцаслахыг Онцгой байдлын ерөнхий газраас анхааруулав.

НӨАТ-ын урамшууллын системийг улс даяар нэвтрүүлж, анхны сугалааг өчигдөр буюу нэгдүгээр сарын 17-ний ням гаригт явууллаа. Сугалааны тохирлыг МҮОНТ-ээр шууд дамжуулсан юм. Сугалаа явагдахаас өмнө тус урамшууллын системийн төслийн нэгжээс анхны сугалаагаар хамгийн багадаа 570 азтан тодорно гэж мэдэгдэж байсан. Тэгвэл өчигдрийн сугалаанаас нийтдээ 1044 азтан тодорчээ.

Хамгийн өндөр дүнтэй хонжвор нь 500 мянган төгрөг байсан бөгөөд хагас сая төгрөг хожсон азтанаар есөн хүн тодорчээ. Түүнчлэн 89 хүн 100 мянган төгрөг хожсон бол 946 хүн 20 мянган төгрөг хожсон байна. Сугалааны тусгай кодных нь сүүлийн 3,4,5 орон нь тохирлын үеэр таарсан нийт азтануудын гар утас руу мэдээлэл хүргүүлсэн байна. Сугалаанаас 20-100 мянган төгрөг хожсон иргэд ebarimt.mn сайтад нэвтэрч, хувийн мэдээлэл хэсэгт банкны дансаа бичиж, тохируулах учиртай юм. Ингэснээр сугалааны хонжвор таны данс руу шууд орно. Харин 500 мянган төгрөг хожсон иргэд өөртөө хамгийн ойр татварын байгууллагад хандахыг хүслээ. 500 мянган төгрөгийн азтанууд татварын албанд биеэр очиж, өргөдөл бичин, дансаа тохируулах ажээ.

Дашрамд дуулгахад, НӨАТ-ын урамшууллын системийн сугалаанд хонжвор хожсон азтанууд сугалааны үнийн дүнгээсээ ашгийн гэх тодотгол бүхий арван хувийн татварыг суутгуулахгүй юм байна. Учир нь сугалааг төрөөс зохион байгуулж буйн дээр энэхүү сугалаа нь ашгийн төлөө явагдаагүй учир азтанууд хожсон мөнгөн шагналаа бүхлээр нь авна.

Магадгүй уншигч та ч азтан болчихоод түүнийгээ мэдээгүй явж байж болох юм. Тиймээс та дээрх зурган дээр байгаа цэнхэр бөмбөлөг дэх тоонуудыг өөртөө байгаа QR код бүхий талонтой тааруулаарай. Хэрвээ таны талон дээрх тооны сүүлийн гурван орон цэнхэр бөмбөлөгтэй тохирч байвал 20 мянган төгрөг, дөрвөн орон таарч байвал 100 мянган төгрөг хожно.

Харин ар талд нь байгаа улаан бөмбөлөг дээрх 8 оронтой тоо наймуулаа тохирч байх юм бол та шууд 150 сая төгрөгийн супер шагналын эзэн болно шүү. Сугалааны код бүхий баримтаа дахин нэг нягтлаад зурган дээрх тоонуудтай тохирч буй эсэхийг шалгаарай.