“Монгол шуудан” ХК-ийн хувьчлал амжилттай явагдаж, тус компанийн 34
хувийг Монголын Хөрөнгийн биржээр дамжуулан иргэд, олон нийтэд нээлттэй
санал болгон, арилжаад байна. Тус компанийн хувьцааг “Ард” санхүүгийн
нэгдэл, “Хишиг арвин индустриал” ХХК болон 300 гаруй иргэн худалдан
авчээ. Эдгээр хувьцаа эзэмшигчдийн төлөөллийг Ерөнхий сайд Ч.Сайханбилэг
хүлээн авч уулзлаа.
“Монгол шуудан” ХК-ийн хувьчлал нь 100 хувь төрийн өмчийн компанийн 34
хувийг анх удаа Хөрөнгийн биржээр дамжуулан, олон улсын стандартын дагуу
амжилттай хувьчилснаараа шинэ жишиг тогтоож байна гэдгийг Ерөнхий сайд
уулзалтын эхэнд онцолсон юм. Энэ хувьчлалаар хөрөнгийн зах зээлд
босгосон хөрөнгөөрөө үйл ажиллагаагаа өргөжүүлж, шинэ үйлчилгээ
нэвтрүүлэн, техникийн шинэчлэл хийх гэж байгаа нь компанийн зөв
засаглал, тогтвортой хөгжил, бизнесийн эерэг үр дагаврыг авчирч байна.
Хувьцаа эзэмшигчдийн эрх ашиг хэр хангагдана төдий чинээ иргэд хувьчлал,
хөрөнгийн зах зээлийг сонирхож, оролцох учраас нийт хувьцаа
эзэмшигчдийн хүртээмжтэй, тэгш байх зарчмыг хангаж ажиллах нь чухал
гэлээ.
Мөн 34 хувь бол Компанийн тухай хуульд заасан хяналтын багц. Эдгээр
хувьцаа эзэмшигчидгүйгээр компани аливаа том шийдвэр гаргах боломжгүй.
Тиймээс нэг ойлголт, зарчмаар компанийн удирдлагад оролцох шаардлагатай.
Та бүхний энэ хамтын ажиллагаанаас бусад хувьчлал шалтгаалах учраас
ширээний хоёр талд биш, нэг завин дээр суусан хамтрагчид гэдгээ санаж,
бусад олон компанийн хувьд сайн жишээ болохоор ажиллах хэрэгтэй. Аль ч
улсын хувьд шуудан салбар чухал. Энэ салбарт төр, хувийн хэвшлийн сайн
түншлэл хангагдана гэдэгт найдаж байна гэж Ерөнхий сайд Ч.Сайханбилэг
хэллээ.
“Ард” санхүүгийн нэгдлийн ТУЗ-ын дарга Ж.Оюунгэрэл хувьчлалыг амжилттай
зохион байгуулсан төрийн байгууллагуудад, шинээр хувьцаа хувьцаа
эзэмшигч болсон 360 гаруй хөрөнгө оруулагчдынхаа нэрийн өмнөөс талархал
илэрхийлээд “Монгол шуудан” компани төрийн өмчийг нээлттэй хувьчилсан
хамгийн анхны компани боллоо. Бид бусад хувьчлах компаниудад үлгэр жишээ
болохоор ажиллана, нэг зорилготой, ард түмэндээ үйлчилдэг, үндэсний том
сүлжээтэй, нээлттэй компани байна гэж хэллээ. Мөн жижиг хувьцаа
эзэмшигчдийн хувьд хувьцаагаа захиран зарцуулах эрх нь нээлттэй.
Компанийн засаглал, удирдлагыг зөв хэрэгжүүлэхэд улс төрөөс хараат
бусаар ажиллах шаардлагатай байгаа учраас төрөөс энэ боломжоор хангаж
ажиллахыг хүсч байна гэлээ.
“Да хүрээ” төвд авто машины үнэ ханш ямар байгааг хүргэж байна. Өнгөрөгч жилүүдийн мөн үетэй харьцуулахад автомашины гүйлгээ тааруу байгааг ченжүүд авто худалдаа эрхлэгчид хэлж байна. Гэхдээ тансаг зэрэглэлийн, үнэтэй жипүүд бус энгийн суудлын машины борлуулалт хэвийн байгаа гэнэ. Тодруулбал, бэлэн мөнгөөр бол 2008 оны “Prius 20”-ыг 8 сая төгрөгт, 2011 оныхыг 11 саяд шууд өгнө гэх ч хүн байсан юм. “Да хүрээ” төвөөс машиныг бэлэн мөнгөнөөс гадна банкны лизингээр өгч байна. Цагаан сарын өмнөх энэ үед автомашинаа худалдан авалт нэмэгддэг бөгөөд цагаан сарын дараанаас дөрөвдүгээр сар хүртэл боруулалт “сэргэдэггүйг” авто худалдаачид хэлэв. 
Монгол Улсын Их Хурлын чуулганы өнөөдрийн хуралдаанаар Монгол Улсын Үндсэн хуулийн цэцийн тухай хуульд өөрчлөлт оруулах тухай, Үндсэн хуулийн цэцэд маргаан хянан шийдвэрлэх ажиллагааны тухай хуульд нэмэлт, өөрчлөлт оруулах тухай, Монгол Улсын Их Хурлын чуулганы хуралдааны дэгийн тухай хуульд өөрчлөлт оруулах тухай хуулийн төслүүдийн эцсийн хэлэлцүүлгийг үргэлжлүүлэн хийлээ.
Ерөнхий боловсролын сургуулийн амралт энэ долоо хоногт дуусч, ирэх даваа гаригт буюу энэ сарын 25-нд бага, дунд, ахлах ангийнхны хичээл эхлэх ёстой юм. Бага ангийн сурагчид таван долоо хоног, дунд ангийнхан гурван долоо хоног, ахлах ангийнхан нь хоёр долоо хоног тус тус амраад ийн гуравдугаар улирлын хичээл эхлэх гэж байна.
Нийслэлийн засаг даргын захирамжаар энэ сарын 27-ноос хоёрдугаар сарын наймны өдрүүдэд цагаан идээ, махны өргөтгөсөн худалдааг Чингисийн талбайд зохион байгуулах гэж байна.
С.Зоригт агсны гэргий Б.Булганыг саатуулан шалгаад хоёр сар болж байна. Энэ хэргийг нууцын зэрэглэлд хамааруулан шалгаж эхэлсэн бөгөөд хэргийн мөрдөн байцаалтын явцын талаар хэргийг шалгаж буй ажлын хэсэг мэдээлэл огт хийгээгүй байгаа. Б.Булганы ээж Д.Байгальмаа саяхан “Биднийг огт уулзуулахгүй байгаа. Тэр бүү хэл өмгөөлөгчийг нь ч оруулахгүй гэсэн. Хууч өвчин нь сэдэрч байгаа болов уу гэж санаа зовж байна…” хэмээн ярьсан байсан. Тэгвэл Д.Булганыг ар гэрийнхэн болон өмгөөлөгчтэй нь уулзуулж байгаа гэдгийг Хүний эрхийн комиссын дарга Ж.Бямбадорж хэлсэн юм. Мөн тэрбээр хуулийн байгууллагын жижиг алдаагаа засахыг манайхаас зөвлөж, үүний дагуу тэд алдаагаа зассанаас бус Б.Булганыг айхтар эрүүдэн шүүсэн зүйлгүй гэсэн юм. 
Нийслэлийн хэмжээнд нэгдүгээр сарын 18-ны өдрийн 05:00 цагаас нэгдүгээр сарын 19-ний өдрийн 05:00 цагийн хооронд иргэд, байгууллагаас нийт 3787 удаагийн дуудлага иржээ. Эдгээрээс гэмт хэргийн 125, зөрчлийн 1065, согтуугийн 460, зам тээврийн ослын 371 дуудлага байсан байна. Иргэдээс ирүүлсэн эдгээр мэдээллийг шалгахад, гэмт хэргийн шинжтэй 81 үйлдэл бүртгэгдсэнийг холбогдох алба нэгжүүд шалгаж байгаа юм байна.
Шинэ оны босгон дээр Налайхын уурхайд дөрвөн хүн дарагдаж, нэг нь амиа алдсан харамсалтай хэрэг гарсан. Тэгвэл өчигдөр мөн Налайхын уурхайд хүн амиа алдсан хэрэг гарчээ. Тодруулбал, Налайх дүүргийн гуравдугаар хорооноос “Дүүргийн эрүүл мэндийн нэгдлийн хүлээн авах тасагт шаварт цохиулж гэмтсэн хүн ирээд нас барсан” гэсэн мэдээллийг цагдаагийн байгууллагад өгсөн байна. Мэдээллийн мөрөөр цагдаагийн байгууллагын алба хаагчид очиж шалгахад, нүүрсний уурхайд ажиллаж байсан 36 настай эрэгтэй О шаварт цохиулан гэмтэж, эмнэлэгт хүргэгдэн нас барсан байжээ. Хэргийг Налайх дүүргийн цагдаагийн хэлтэс шалгаж байна.