Швейцар улсын Давос хотод жил бүр зохион байгуулдаг уламжлалтай Дэлхийн эдийн засгийн чуулга уулзалт өнөөдөр эхэлнэ.
Дөрвөн өдөр үргэлжлэх тус дээд хэмжээний уулзалтад 40 гаруй улс орны төр засгийн тэргүүн нар, мөн бизнесийн болон олон нийтийн байгууллагуудын 2500 орчим төлөөлөгч оролцох юм байна.
Давосын 46 дахь удаагийн энэхүү чуулга уулзалтад хуран цугларсан төлөөлөгчид “Аж үйлдвэрийн 4-р хувьсгалыг удирдах нь” сэдвийн хүрээнд олон улсын аюулгүй байдал, уур амьсгалын өөрчлөлт, дэлхийн эдийн засгийн өсөлтийн талаар хэлэлцэх юм.
Дэлхийн улс гүрнүүдийн төрийн тэргүүн, Ерөнхий сайдын түвшинд зохион байгуулагддаг уг чуулга уулзалтад оролцохоор Монгол Улсын Ерөнхийлөгч Швейцар улсыг зориод байгаа билээ.
Төсвийн байнгын хорооны хуралдаанаар “Тогтоолд өөрчлөлт оруулах тухай” УИХ-ын тогтоолын төслийн анхны хэлэлцүүлгийг хийв. Хэрвээ уг хууль батлагдвал 0-18 насны нийт хүүхдэд сар бүр 20 мянган төгрөг олгох юм.
Өчигдөр УИХ-ын гишүүн Г.Уянга нарын гишүүнд гарын үсэг зурж Ерөнхий сайд Ч.Сайханбилэгийг огцруулах саналыг өргөн барьсан. Дубайд гарын үсэг зурж, баталгаажуулсан Оюутолгойн далд уурхайн хөрөнгө оруулалтын гэрээ Ерөнхий сайдыг огцруулах гол шалтгаан болоод буй гэх. 
“Вашингтон Перформинг Арт” байгууллагаас хэрэгжүүлдэг Элчин сайдын яамны хөтөлбөрийн хүрээнд Америк дахь Элчин сайдын яамдад дунд сургуулийн сурагчдад өөрийн орны өв соёл, түүхийг сурталчлах боломж олгодог аж. Энэ сарын 14-нд Америк дахь Монголын элчин сайдын яам энэ хөтөлбөрт оролцож, Вашингтон хотын зүүн өмнөх хэсэгт орших МкКинли дунд сургуулийн Кейтлин Криек багштай зургадугаар ангийнханд өөрийн орны өв соёлыг сурталчилжээ. Монголын Элчин сайдын яамны Боловсрол, соёл, шинжлэх ухаан хариуцсан атташе С.Золзаяа тус сургууль дээр өөрийн биеэр очиж хичээл заасан байна. Тэрбээр хичээлийн эхэнд хүүхдүүдийг монголоор мэндчилж сургажээ. Хэдий зөв аялгатай биш ч хүүхдүүд тэр дор нь “Сайн байна уу, миний нэрийг …” хэмээн хэлж сурцгаасан гэнэ. Монгол бичгээр өөрсдийнх нь нэрийг бичүүлж сургаснаас гадна “Алунгоо эхийн домог”-ийг ангиар уншиж өгөн эв нэгдэл, хамтын хүчийн талаар ярьж ойлгуулжээ. Түүнчлэн газрын зураг дээр Монгол орныг түвэггүй олж заадаг болгожээ. Энэ тухай тэмдэглэлийг “Өдрийн сонин”-ы өнөөдрийн дугаарт Вашингтон дахь манай тусгай сурвалжлагч М.Саруул-Эрдэнэ “Америкийн монголчууд” буланд бичиж нийтэлсэн юм. 
МАХН-ын Ерөнхий нарийн бичгийн даргын үүрэг гүйцэтгэгч Ц.Шаравдоржийг МХЕГ-ын даргын үүрэг гүйцэтгэгчээр томилох шийдвэрийг Засгийн газраас гаргажээ.
Одоогоос дөрвөн жилийн өмнө буюу 2012 онд манай улсын Засгийн газраас долларын “Чингис” бонд гаргаж олон улсын бондын зах зээлд оруулж байсан. Уг бондоос 1.5 тэрбумын хөрөнгө босгосон юм. Тухайн үед бондын өгөөж Испанийнхаас доогуур байсан бол одоо бондын өгөөж 8.64 хувьд хүрчээ. Өнгөрөгч оны тавдугаар сард бондын өгөөж 4.5 хувьтай байжээ.
Сураггүй болсон эмэгтэйг өчигдөр эсэн мэнд олжээ. Сэлэнгэ аймгийн Сайхан сумын Бургалтай багийн “Зараатын хөндий” гэдэг газар нутагладаг 22 настай Б /хөгжлийн бэрхшээлтэй/ энэ сарын 18-ны өдрийн 10:00 цагт гэрийнхэнтэйгээ маргалдаад гэрээсээ хөл нүцгэн гарчээ. Энэ тухай маргааш нь буюу 19-ний өдрийн 11:30 цагт аймгийн Онцгой байдлын газарт мэдэгджээ. Дуудлагын дагуу аймгийн Онцгой байдлын газрын 12 алба хаагч, ар гэрийнхэнтэй нь хамтран эрэн хайх ажиллагааг эхлүүлжээ. 
Өнгөрсөн онд ТОСК-аас түрээсийн орон сууцыг захиалж бариулах зах зээл дээр борлогдохгүй байгаа орон сууцнаас худалдан авах замаар 1300 айлд түрээслүүлж төрийн түрээсийн орон сууцны сан бүрдүүлжээ.