Month: January 2016

Батлан хамгаалахын сайд Ц.Цолмон “Сайдын цаг”
уулзалтад оролцож, мэдээлэл хийлээ.

2015 онд “Монгол Улсын Батлан хамгаалах бодлогын
үндэс” баримт бичиг батлагдсантай холбоотойгоор батлан хамгаалах салбарын багц
хуулиудыг шинэчлэх эрх зүйн орчин тавигдсан. Энэ хүрээнд Батлан хамгаалах тухай,
Зэвсэгт хүчний тухай, Цэргийн албаны тухай хуулиуд, Цэргийн алба хаагчийн эрх
зүйн байдлын тухай хуулийн шинэчилсэн найруулгын төслийг боловсруулж, Монгол
Улсын Ерөнхийлөгчийн Тамгын газарт хүргүүллээ. Мөн “Цэргийн албан хаагчийн
тэтгэвэр, тэтгэмжийн тухай хуульд нэмэлт, өөрчлөлт оруулах тухай хууль”-ийн
төслийг санаачлан
боловсруулж, Улсын Их Хуралд өргөн
мэдүүлэхэд
бэлэн болсон, “Зэвсэгт хүчнийг 2030 он хүртэл хөгжүүлэх” хөтөлбөрийг
боловсруулж байна гэж Батлан хамгаалахын сайд Ц.Цолмон онцоллоо.

Бүтээн байгуулалт, энхийг дэмжих, хүмүүнлэгийн үйл
ажиллагаанд оролцох чиг үүрэгтэй “Барилга-инженерийн батальон”-ыг Архангай,
Говь-Алтай аймагт байгуулахаар болжээ. Үүнээс
гадна Орхон аймаг дахь Зэвсэгт хүчний барилгын тусгай салбарыг
“Барилга-инженерийн батальон” болгон өргөтгөх, энхийг дэмжих ажиллагааны
бригадын штаб, Баян-Өлгий аймаг дахь Зэвсэгт хүчний ангийг түшиглэн цэргийн II
шатны эмнэлэг байгуулах асуудлуудыг Засгийн газрын хуралдаанаар хэлэлцүүлэн,
шийдвэрлүүлсэн байна. Мөн энхийг сахиулах ажиллагааны хүрээнд инженерийн ротыг
илгээх чиглэлээр судлан, бэлтгэл ажлыг хангаж эхэлжээ.

“Оюутан цэрэг” хөтөлбөрийг хоёр дахь жилдээ
хэрэгжүүлж, 1000 гаруй оюутныг хамруулсан бөгөөд энэ онд ч хөтөлбөрийг үргэлжлүүлэн
хэрэгжүүлэхээр ажиллаж байна. Цаашид тус хөтөлбөрт хөдөө орон нутагт үйл
ажиллагаа явуулж байгаа их, дээд сургуулиудын оюутнуудыг хамруулах зорилт тавин
ажиллаж байна гэдгийг Ц.Цолмон сайд тодотголоо.

Батлан хамгаалахын салбарт ажиллаж буй алба хаагчдын
нийгмийн хамгаалалд анхаарч, нийслэлд цэргийн алба хаагчдын 300, албан тушаалын
63, Баян-Өлгий аймагт 40, Завхан аймагт 24 айлын орон сууцыг тус тус ашиглалтад
оруулсан байна. Бүтээн байгуулалтын хувьд “Тэмүүжин-Өрлөг” сургуулийн хичээлийн
шинэ байр, Ховд аймагт Сургалтын төв, Зэвсэгт хүчний Энхийг дэмжих Сургалтын
нэгдсэн төвд 400 цэргийн алба хаагчийн байр, Зэвсэгт хүчний 350 дугаар ангийн
хооллох заалны барилга, Зэвсэгт хүчний 353 дугаар ангийн дивизионы барилга зэргийг
ашиглалтад оруулсан гэлээ.

Монгол Улсын Засгийн
газрын 2012-2016 оны үйл ажиллагааны хөтөлбөрт туссан “Монгол цэрэг бүтээн байгуулалт” хөтөлбөр үргэлжлэн
хэрэгжиж,
“Төмөр зам” бүтээн байгуулалтын ажилд 2000 гаруй хугацаат цэргийн
алба хаагчид оролцохоор болсон зэрэг мэдээллийг хийсний дараа Батлан
хамгаалахын сайд Ц.Цолмон сэтгүүлчдийн асуултад хариуллаа гэж Засгийн газрын Хэвлэл мэдээлэл, олон нийттэй харилцах албанаас
мэдээллээ.

Төрийн байгуулалтын байнгын хорооны хуралдаанаас МАН-ын бүлэг завсарлага авсан. Тус намын бүлгийн хувьд Ерөнхий сайдыг огцруулах асуудлыг хэлэлцэх дээр тав хоногийн завсарлага авсан юм.

Тэгвэл АН-ын бүлэг Сонгуулийн талаарх тогтоолын төслүүдээр завсарлага авав. Байнгын хорооны энэ өдрийн хуралдаанаар Улсын Их Хурлын болон аймаг, нийслэлийн иргэдийн Төлөөлөгчдийн хурлын ээлжит сонгуультай холбогдсон Улсын Их Хурлын тогтоолын төслүүдийг хэлэлцэхээр төлөвлөсөн байв.

Сонгуулийн ерөнхий хороо Сонгуулийн тухай хуулийн 16 дугаар зүйлийн 16.3 дахь хэсэгт “Ээлжит сонгуулийн санал авах өдрийг санал авах өдрөөс 150-иас доошгүй хоногийн өмнө тогтооно.” гэж, 16.4 дэх хэсэгт “Улсын Их Хурлын болон аймаг, нийслэлийн иргэдийн Төлөөлөгчдийн хурлын ээлжит сонгуулийн санал авах өдөр нь нэг өдөр байна.” гэж, 16.6 дахь хэсэгт “Гадаад улсад суугаа иргэдээс санал авах өдөр /цаашид “гадаадад санал авах өдөр” гэх/-ийг Улсын Их Хурал тогтоох бөгөөд уг санал авах хугацаа нь гурав хүртэл өдөр байж болно.” гэж тус тус заасан тул Улсын Их Хурал болон аймаг, нийслэлийн иргэдийн Төлөөлөгчдийн Хурлын ээлжит сонгуулийн санал авах өдрийг тогтоох; Сонгуулийн тухай хуулийн 22 дугаар зүйлийн 22.5 дахь хэсэгт “Улсын Их Хурлын сонгуулийн тойргийг энэ хуульд заасан сонгуулийн тогтолцоо, аймаг, нийслэл, сум, дүүргийн хүн амын тоо, засаг захиргаа нутаг дэвсгэрийн нэгжийн хуваарийг харгалзан санал авах өдрөөс 150-иас доошгүй хоногийн өмнө Улсын Их Хурал байгуулж, тойргийн нутаг дэвсгэр, дугаар, төв, мандатын тоог тогтооно.” гэж заасан тул Улсын Их Хурлын сонгуулийн тойрог байгуулах, тойргийн мандатын тоо, дугаар, нутаг дэвсгэр, төвийг тогтоох саналыг Улсын Их Хуралд ирүүлжээ. Түүнчлэн Сонгуулийн автоматжуулсан системийн тухай хуулийн 6 дугаар зүйлийн 6.1.1 дэх заалтад “Улсын Их Хурал нь сонгуулийн автоматжуулсан системийг сонгуульд хэрэглэх талаар шийдвэр гаргах эрхтэй” гэж заасан тул Улсын Их Хурал болон аймаг, нийслэлийн иргэдийн Төлөөлөгчдийн Хурлын 2016 оны ээлжит сонгуульд техник хэрэгсэл хэрэглэх тухай саналаа ирүүлсэн байна.

Ингээд байнгын хорооны дарга А.Бакей эхлээд “Монгол Улсын Их Хурлын болон аймаг, нийслэлийн иргэдийн Төлөөлөгчдийн хурлын ээлжит сонгуулийн санал авах өдрийг тогтоох тухай” Улсын Их Хурлын тогтоолын төслийн талаар танилцуулсан юм. Харин энэ үед Улсын Их Хурал дахь Ардчилсан намын бүлгийн дарга Б.Гарамгайбаатар байнгын хорооны хуралдаанаар хэлэлцэхээр төлөвлөсөн Улсын Их Хурлын болон аймаг, нийслэлийн иргэдийн Төлөөлөгчдийн хурлын ээлжит сонгуультай холбоотой бүх тогтоолын төслөөс Улсын Их Хурал дахь Ардчилсан намын бүлэг 5 хоногийн завсарлага авах хүсэлт гаргасныг байнгын хорооны дарга хүлээн авч буйгаа мэдэгдсэн тул байнгын хорооны өнөөдрийн хуралдаанаар хэлэлцэхээр төлөвлөсөн асуудлууд ирэх долоо хоног хүртэл хойшлогдлоо.

УИХ дахь МАН-ын бүлгийн дэд дарга Н.Номтойбаяр Төрийн ордонд мэдээлэл хийлээ. Өнөөдөр үдээс хойш хуралдсан УИХ-ын чуулганы нэгдсэн хуралдаанаар байнгын хороодын бүрэлдэхүүнд өөрчлөлт оруулах тухай тогтоолын төслийг хэлэлцэж, баталсан. Ингэснээр УИХ-ын гишүүн Н.Батцэрэг Төрийн байгуулалтын байнгын хорооноос гарч, Эдийн засгийн байнгын хороонд харьяалагдах болсон. Харин Эдийн засгийн байнгын хорооноос УИХ-ын гишүүн Г.Батхүү чөлөөлөгдөж, Төрийн байгуулалтын байнгын хороонд харьяалагдах болсон юм.

Энэ асуудлаар Н.Номтойбаяр гишүүн мэдээлэл хийж, Н.Батцэрэг гишүүнийг эзгүйд хэлэлцэн, УИХ-ын дэгийн хуулийн дагуу нам, эвслийн бүлэг завсарлага авахыг хүсэхэд хүлээж авалгүйгээр хүч түрэн шийдлээ гэж үзэж байгаагаа илэрхийлэв.