Монгол Улсын Ерөнхий сайд Ч.Сайханбилэг, Унгар улсын Ерөнхий сайд Виктор Орбан нар Төрийн ордонд албан ёсны хэлэлцээр хийлээ. Хэлэлцээр илэн далангүй, найрсаг, дотно уур амьсгалд боллоо гэдгийг хоёр Ерөнхий сайд онцоллоо.
Сүүлийн жилүүдэд манай хоёр орны харилцаа хамтын хүчин чармайлтаар өргөжин хөгжиж байна. Унгар улсын Ерөнхийлөгч, Гадаад хэргийн сайд нар манай улсад айлчилсан төдийгүй Элчин сайдын яамаа Улаанбаатар хотод 2015 онд сэргээн нээсэн нь Унгарын Засгийн газар Монгол Улстай харилцах харилцаандаа өндөр ач холбогдол өгч буйн илрэл гэдгийг Ерөнхий сайд Ч.Сайханбилэг хэлэлцээний эхэнд тэмдэглэлээ.
Энэ оны долдугаар сард Монгол Улс АСЕМ-ын дээд хэмжээний уулзалтыг зохион байгуулна. Энэ уулзалтад урьсанд талархаж байгаагаа Ерөнхий сайд Виктор Орбан хэлсэн юм.
Хоёр орны эдийн засгийн харилцаа, хамтын ажиллагааг шинэ шатанд гаргах шаардлага байна. Энэ хүрээнд Европын стандартад нийцсэн хамтарсан үйлдвэр байгуулж, бүтээгдэхүүнээ олон улсын зах зээлд гаргах нь хоёр талын ашиг сонирхолд нийцнэ. Өнөөдөр байгуулж буй Монгол Улсын Хөгжлийн банк, Унгар улсын ЭКСИМ банк хоорондын хамтын ажиллагааны санамж бичиг чухал ач холбогдолтой. Хоёр орны хувийн хэвшил хоорондын хамтарсан төслүүдийг дэмжих, зээлийн шугам нээх, хамтарсан хөрөнгө оруулалтын сан байгуулах боломжийг судалж үзэхийг Унгарын Ерөнхий сайдаас хүслээ.
2010 оноос яригдаж эхэлсэн Сонгино дахь “Биокомбинат” төрийн өмчит үйлдвэрийн газарт Унгар улсын Засгийн газрын хөнгөлөлттэй зээлээр иж бүрэн шинэчлэл хийх ажлын явцыг эрчимжүүлэх нь хоёр орны эдийн засгийн харилцаа, хамтын ажиллагаа өргөжин тэлэхэд түлхэц болно. Энэ төслийн техник, эдийн засгийн үндэслэлийг Унгарын талтай хамтарч хийх саналтай байна. Хоёр орны худалдааны нийт эргэлтийг нэмэгдүүлэх, худалдааг харилцан ашигтай хоёр урсгалтай болгоход анхаарч ажиллахыг хүсээд Унгарын хөрөнгө оруулалтыг нэмэгдүүлэх сонирхлоо Ерөнхий сайд Ч.Сайханбилэг илэрхийллээ.
Хоёр улсын Хөдөө аж ахуйн яам хооронд 2011 онд байгуулсан хамтын ажиллагааны санамж бичигт тусгагдсан ажлуудыг эрчимжүүлэх шаардлага байна. Мах, махан бүтээгдэхүүн боловсруулах үйлдвэрлэл, технологи өндөр хөгжсөн Унгар улсын туршлагыг судлах, хамтран ажиллах сонирхлоо мөн илэрхийллээ.
Уул уурхайн салбарт хамтран ажиллаж ирсэн туршлага бий. Монгол Улсын нутаг дэвсгэрт газрын ховор металын эрэл хайгуулын судалгааны ажил, мөн 1:50000 масштабтай геологийн эрэл-зураглалын ажил зохион байгуулахад хамтран ажиллах боломжтой гэлээ.
Улаанбаатар, Будапешт хотуудын хамтын ажиллагаа эрчимтэй хөгжиж байна. Хоёр хот хамтран ажиллах гэрээ саяхан байгуулсан. Гэрээнд эко-автобус үйлдвэрлэл, ухаалаг бизнес болон үзвэр үйлчилгээний төв байгуулах, Туул голын үерийн менежмент, барилгын материал үйлдвэрлэл, хөдөө ахуйн бүтээгдэхүүн үйлдвэрлэл, хоол хүнс боловсруулах үйлдвэр хамтран байгуулахаар тусгажээ.
Сонгино дахь Биокомбинат төрийн өмчит үйлдвэрийн иж бүрэн шинэчлэлийг Унгарын санхүүжилтээр хийхээр болсны дагуу цаашид энэ бүсэд Унгар улстай хамтран мал аж ахуйн гаралтай түүхий эд боловсруулах цогц комплекс бүхий дагуул хот байгуулах боломжтой талаар хоёр Ерөнхий сайд ярилцлаа.
Ерөнхий сайд Ч.Сайханбилэгийн хэлсэн саналыг дэмжиж, хамтран ажиллах бүрэн боломжтой. Хоёр орны худалдааны эргэлтийг нэмэгдүүлэх, худалдааг харилцан ашигтай болгоход анхаарч ажиллахаа Унгарын Ерөнхий сайд илэрхийллээ. Унгар улс усны нөөцийн судалгаа, гүний усны нөөц тогтоох, эм, эмийн бүтээгдэхүүн, эмнэлгийн хэрэгсэл үйлдвэрлэх туршлагатай. Эдгээр салбарт Монгол Улстай хамтран ажиллах боломж байгааг Унгарын Ерөнхий сайд хэллээ.
Унгар улсын тэтгэлгээр Монголын 400 оюутан тус улсад сурсны олонх нь анагаахын салбарт мэргэжил эзэмшсэн. Өнөөдөр 100 оюутан сурч байна, тэдний тоог 200-д хүргэх боломжтой гэж Унгарын Ерөнхий сайд хэлээд тэтгэлгийг хамтарч ажиллах эдгээр чиглэлээр суралцах оюутнуудад олгох нь зүйтэй гэсэн саналаа илэрхийллээ.
МАН-ын бүлгийн хурлаар гурван асуудлыг хэлэлцсэн байна. Юуны өмнө тус бүлгийнхэн Ерөнхий сайд Ч.Сайханбилэгийг огцруулах саналыг 100 хувь дэмжихээр нэгдсэн байна. Үүнээс гадна УИХ-ын дарга З.Энхболдыг өөрийнхөө хүсэлтээр УИХ-ын даргын ажлаа өг хэмээн шаардах бичиг хүргүүлэхээр болжээ. Харин гуравдугаарт нийслэлийн тойргийн мандатын тоог нэмэгдүүлэхгүй гэдэг саналд нэгдсэн байна. 
Ази, Европын Парламентчдын /АЕП/ дээд түвшний уулзалт энэ оны дөрөвдүгээр сарын 21-22-нд Улаанбаатар хотноо болохыг УИХ-ын дарга хэлээд, уг уулзалт арга хэмжээнд Унгар Улсын Парламентын даргад урилга илгээсэн. 
Монгол Улс, Унгар Улстай улс төр, эдийн засаг, бизнес зэрэг бүхий л салбарт харилцаа, хамтын ажиллагаагаа улам батжуулах зорилготой байна. Монгол Улс бол зөвхөн гурван сая хүний зах зээл биш, харин манай хөрш хүчирхэг хоёр улсын 1.5 тэрбум хүн амтай зах зээл биднийг хүрээлэн байдаг. Түүнчлэн өнгөрсөн жил Монгол, Японы Эдийн засгийн түншлэлийн хэлэлцээр байгуулсан бөгөөд манайд үйлдвэрлэсэн бүх төрлийн бүтээгдэхүүн 70-80 хувийн татварын хөнгөлөлттэйгөөр тус улсын хилээр нэвтрэх боломж бүрдсэнийг УИХ-ын дарга уулзалтын үеэр онцолж байв. 
“Юнивишн” компанийн хоёрдугаар сарын 1-ээс эхлэн хэрэгжүүлэх гэж буй шинэ үйлчилгээ журмын талаар болон SPS, төлбөртэй спорт сувгийн үйлчилгээний талаар сэтгүүлч Э.Амарсайхан хуульч О.Батхүү, хөлбөмбөг спорт сонирхогч иргэдийн төлөөллөөс мэдээлэл хийв. Тус компани хоёрдугаар сарын нэгнээс эхлэн иргэдийн интернет хэрэглээг хязгаарлах болсноо мэдэгдсэн. Үүнд нь хэрэглэгчид ихээхэн бухимдалтай байгаа билээ. 
Өнөөдөр Шүүхийн ерөнхий зөвлөлөөс өнгөрсөн 2015 онд шүүхээр шийдэгдсэн хэргүүдийн талаар мэдээлэл хийсэн юм. Мэдээллийн үеэр төрийн албаны халаа сэлгээ, цомхотголтой холбоотойгоор шүүхэд ирэх маргаан нэмэгдсэн гэдгийг онцолж байлаа. Тухайлбал, 2015 онд төрийн албаны маргаан өмнөх жилээс 34.7 хувиар буюу хоёр дахин нэмэгдсэн үзүүлэлттэй гарсан байна. Өөрөөр хэлбэл, Захиргааны хэргийн анхан шатны шүүхэд 2015 онд нийт 2775 хэрэг, нэхэмжлэл хүлээн авчээ. Гэхдээ эдгээрийн 641 нэхэмжлэлийг нь хүлээн авахаас татгалзаж, үлдсэн 1439 хэргийг шийдвэрлэсэн байна. Шүүхийн ерөнхий зөвлөлд нийт ирсэн маргааны 26.8 хувийг төрийн албаны асуудал эзэлжээ. Харин эдгээр маргааны дийлэнх хувь нь тухайн маргаан үүсгэж буй иргэний талд шийдэгддэг байна.
Ойрын хугацаанд БНХАУ руу үхэр, хонины махыг аль боомтоор экспортлохыг тохиролцохоор болжээ. БНХАУ 2013 онд манай улсын баруун бүсийн таван аймгийн үхэр, хонины махыг авахад шүлхийн хориг тавьсан байсан. Энэхүү хоригийг өнгөрсөн арванхоёрдугаар сард цуцалсан юм.
Монголын өсвөрийн хөлбөмбөгийн “ДМЮ” клубийн 12 хүртэлх насны баг энэ сарын 16-21-нд БНХАУ-ын ӨМӨЗО-ны Улаанхад хотод болсон олон улсын тэмцээнд амжилттай оролцоод иржээ. Өмнөд Монголын хөлбөмбөгийн холбооноос зүлгэн талбайд футзалын дүрмээр зохион байгуулсан тэмцээнд гурван улсын 15 баг өрсөлдөхөд БНХАУ-ын ӨМӨЗО-ны Хорчин аймгийн баг алт, ОХУ-ын “Чита” клуб мөнгө, Монголын “ДМЮ” хүрэл медаль хүртэв.
