Month: January 2016

Монголын уламжлалт сар шинийн баярыг угтсан өдрүүдэд Улаанбаатар хотыг чиглэсэн орон нутгийн зам, нийслэлийн замын хөдөлгөөний ачаалал ердийнхөөс эрс нэмэгддэг бөгөөд иргэдийн цагийг хэмнэх, ачааллыг бууруулах зорилгоор 2013 оноос хойш сар шинийн баярыг угтсан түр зохицуулалт хийдэг болсон. Уг зохицуулалт энэ жил ч мөн мөрдөгдөнө.

Тодруулбал, сар шинийн баяр болох гэж байгаатай холбогдуулан нийслэлийн замын хөдөлгөөний ачааллыг бууруулах зорилгоор амралтын өдрүүдээр буюу 2016 оны 01 дүгээр сарын 30, 02 дугаар сарын 06-ны бямба гаригуудад автомашины улсын дугаарын сүүлчийн орон сондгой тоогоор төгссөн, 01 дүгээр сарын 31, 2 дугаар сарын 07-ны ням гаригуудад автомашины улсын дугаарын сүүлчийн орон тэгш тоогоор төгссөн авто тээврийн хэрэгслийг дугаарын хязгаарлалтын бүс, Сонгинохайрхан дүүргийн Саппорагийн уулзвараас Таван шарын уулзвар хүртэлх замд 10:00-20:00 цагийн хооронд авто замын хөдөлгөөнд оролцохыг хязгаарлалаа.
Мөн энэ өдрүүдэд алслагдсан гэр хорооллоос “Нарантуул” олон улсын худалдааны төв, “Хүчит Шонхор” худалдааны төв, “Дүнжингарав” худалдааны төвийн чиглэлд шинэ чиглэлээр автобус явуулна.

Чингэлтэй дүүргийн нутаг дэвсгэрт 2016 оны 01 дүгээр сарын 30, 02 дугаар сарын 06-ны Бямба гариг, 01 дүгээр сарын 31, 2 дугаар сарын 07-ны ням гаригуудад Дэнжийн мянгын авто замын хөдөлгөөнийг “Хүчит шонхор” худалдааны төвийн зүүн урд уулзвараас хойш үерийн далангийн уулзвар хүртэл урдаас хойш чиглэлд, далангаас зүүн тийш Судалт төвийн /хуучнаар/ уулзвар хүртэлх авто замын хөдөлгөөнийг баруунаас зүүн чиглэлд 08:00-17:00 цагийн хооронд нэг чигийн хөдөлгөөнд оруулж зохицуулалтын арга хэмжээ авна

Авто замын ачааллыг бууруулах ажлын хүрээнд Улаанбаатар хотын зургаан дүүргийн нутаг дэвсгэрт мах, цагаан идээний өргөтгөсөн худалдааг зохион байгуулна.

“Нийтийн үйлчилгээний Улаанбаатар нэгтгэл” нийтийн эзэмшлийн гудамж, замын гэрэлтүүлгийг сайжруулах, дүүргүүдийн орон сууц, гэр хорооллын гудамж замын гэрэлтүүлгийг бүрэн асаах, гэр хорооллын гудамж, замын хальтиргаа гулгааг арилгах, гудамж замуудыг хаасан хайс, хашлага, шон зэргийг чөлөөлж, шуурхай албаны автомашин зорчих нөхцлийг бүрдүүлэх, иргэдийн ая тухтай зорчих нөхцөлийг хангаж ажиллана.

Орхон аймгийн Баян-Өндөр сумын Бүрэнбулаг багт айл шатаж байна гэсэн дуудлага тус аймгийн онцгой байдлын албанд өчигдөр иржээ. Дуудлагын дагуу Онцгой байдлын газрын Гал унтраах, аврах 56 дугаар ангийн алба хаагчид ажиллаж, гал түймрээс хоёр болон дөрвөн настай хоёр хүүг угаартсан байсныг авран хамгаалсан байна. Алба хаагчид хүүхдүүдийг аймгийн яаралтай түргэн тусламжид хүлээлгэн өгчээ.

Дундговь аймгийн Сайнцагаан суманд өвөлжилт хүндэрч, улмаар малчид сүүлийн хэд хоног малаа бэлчээж чадахгүй байгаа гэнэ.

Энэ талаар малчид ярихдаа “Нэг наст мал, төлөг, шүдлэнгээ эрт тэжээж эхэлсэн боловч дарагдах, осгох, бээрэх зэргээр хорогдсоор байна. Энэ сараас эхлэн хүйтний эрч эрс нэмэгдэж байгаатай холбоотойгоор өдрийн турш малаа хаших тохиолдол цөөнгүй байгаа. Өдрийн турш малаа хашиж тэжээл, өвсөөр тэжээж байгаа малчдын хувьд нөөцөлсөн жаахан өвс нь дуусаад дахин өвс, тэжээл худалдаж авахад хүндрэлтэй болоод байна. Орон нутгийн зүгээс малын бэлчээр хагалах, өвс, тэжээлийг хямдаар, болж өгвөл зээлээр олгохыг хүсье” гэжээ.

Том оврын машин мөргөлдөж, 100 тонн түлш асгарчээ Өнгөрсөн шөнө Тавантолгойгоос улсын хилийн чиглэлд түлш тээвэрлэж хоёр том оврын машин мөргөлдөн, осол гарчээ.

Осол Оюутолгойгоос 10 гаруй км-ийн зайд гарсан бөгөөд ослын газрын орчимд ойролцоогоор 100 тонн түлш асгарсан талаар эх сурвалж мэдээлэв.

Энэ ослын талаарх дуудлага урьд шөнө 03.00 цагийн үед иржээ. Ослын улмаас хүний амь нас эрсдээгүй байна. Одоогоор хэргийн газар албаныхан ажиллаж байгаа аж.

Санхүүгийн Зохицуулах Хороо үйл ажиллагаандаа “Зөвшөөрлийн цахим систем” нэвтрүүлж эхэллээ. Энэхүү системийг нэвтрүүлснээр санхүүгийн зуучлалын үйлчилгээ эрхлэх хүсэлтэй иргэд, хуулийн этгээд тусгай зөвшөөрөл авах өргөдлөө зайнаас гаргах боломжтой болж байгаа бөгөөд хүсэлт материалыг хүлээн авч, хянах бүх үйл ажиллагаа автоматжин хүний хүчин зүйлээс хамааралгүй, хүнд сурталгүй, түргэн шуурхай шийдвэрлэгдэх боломжтой боллоо.

Аж ахуйн үйл ажиллагааны тусгай зөвшөөрлийн тухай хууль болон Банк бус санхүүгийн үйл ажиллагааны хууль, Хадгаламж зээлийн хоршоо, Даатгал, Үнэт цаасны зах зээлийн тухай хууль зэрэг санхүүгийн үйл ажиллагааны хууль тогтоомжийн дагуу Хорооноос иргэн, хуулийн этгээдэд тусгай зөвшөөрөл, зөвшөөрөл олгох, тодорхой бүтээгдэхүүн үйлчилгээг бүртгэх ажиллагааг хүнд сурталтай, олон баримт бичиг шаарддаг, чирэгдэл учруулдаг гэж шүүмжлүүлдэг байсан асуудал ийнхүү эмх цэгцтэй болж эхэлсэн байна.

Цахим системд шилжсэнээр өргөдөл гаргагч иргэд, хуулийн этгээдийн бүрдүүлэх баримт бичгийн тоо цөөрч, төрийн бусад байгууллагуудаас авдаг тодорхойлолт, лавлагааг иргэд өөрсдөө авах гэж цаг, мөнгөө үрэх шаардлагагүй болж байна. Энэ ажлын хүрээнд Санхүүгийн зохицуулах хороо төрийн иргэний бүртгэл мэдээлэл, татвар, авто тээврийн үндэсний төв зэрэг төрийн байгууллагуудын сүлжээнд нэвтэрч, шаардлагатай мэдээллийг өөрөө шууд авдаг байхаар хариуцсан байгууллагуудтай тохиролцож, хамтын ажиллагааны гэрээ байгуулах шатандаа яваа юм байна. Ингэснээр төрийн байгууллагууд хоорондын мэдээллийн нууцлал, аюулгүй байдал сайжрахаас гадна, харилцан мэдээллээ солилцох боломж нээгдэнэ.

Хамгийн гол нь тусгай зөвшөөрөл эзэмшигчийн бүртгэл мэдээллийн нэгдсэн бааз бүрдсэнээр зах зээлд оролцогчдын үйл ажиллагаанд Зохицуулагч байгууллагын зүгээс тавих хяналтын чанар сайжрах ба зах зээлийг хөгжүүлэх, дэмжих бодлогын шийдвэр гаргалт тоо мэдээ, судалгаанд үндэслэгдэх зэрэг олон давуу байдлыг бий болгож байна гэж Санхүүгийн зохицуулах хорооны хэвлэл мэдээллийн албанаас мэдээлэв. Санхүүгийн зохицуулах хорооны www.frc.gov.mn вебсайтын нүүр хуудасны “Зөвшөөрлийн цахим систем” хэсэгт нэвтэрч зааврын дагуу цахим үйлчилгээг авах боломжтой юм.

Энэ сарын 25-ны өдөр Улаанбаатар хотын Замын цагдаагийн газрын Жижүүрийн шуурхай удирдлагын хэлтэст нийт 419 дуудлага бүртгэгдэв. Үүнээс зам тээврийн ослын 367 дуудлага ирж, гэмт хэргийн шинжтэй мэдээлэл 16 бүртгэгдэж, нэг хүн нас барж, 23 хүн хүнд хөнгөн гэмтжээ. Согтуугаар тээврийн хэрэгсэл жолоодсон 33 жолоочийг журамлан гарч болзошгүй осол хэргээс урьдчилан сэргийлж ажиллалаа.
Мөн Сар шинийн баяр болох гэж байгаатай холбогдуулан томоохон худалдааны төв, зах орчмын замын хөдөлгөөний ачаалал эрс нэмэгдэж түгжрэл саатал бий болдог. Иймд Замын хөдөлгөөнд оролцогч жолооч Та тээврийн хэрэгслээ зогсоолын талбайд зөв байршуулан бусад замын хөдөлгөөнд оролцогч нартаа хүндэтгэлтэй хандах, тээврийн хэрэгслийн техникийн бүрэн бүтэн байдлыг сайтар хангах, явган зорчигчдод зам тавьж өгөх, өөрсдийнхөө аюулгүй байдлыг сайтар хангаж анхаарал болгоомжтой замын хөдөлгөөнд оролцоно уу.