АНУ-ын Нью-Йорк хотод төвтэй “Олигвы Энтертайнмент” бүргэдчин охин Н.Айшолпаны бодит амьдралыг өгүүлсэн киноны нээлтийг хийжээ. “The Eagle Huntress” нэртэй энэ киноны нээлтэд гол дүрийг бүтээсэн Н.Айшолпан аав, ээжийн хамт оролцлоо. Киноны зураг авалт хоёр жил үргэлжилсэн юм.
Баян-Өлгий аймгийн Бугат суманд болсон “Хыран 2014” бүргэдийн баярт анх удаа эмэгтэй бүргэдчин оролцож, 13 настай Н.Айшолпан охин түрүүлсэн билээ. Энэ нь тус наадмыг үзэхээр дэлхийн өнцөг булан бүрээс ирэх жуулчдын анхаарлыг ихэд татсан. Израилийн зурагчин Ашэр Свиденски Монголд хийсэн аяллынхаа үеэр Н.Айшолпан охины зургийг авсан нь дэлхийд алдартай BBC агентлагийн сувгаар цацагдаж, охиныг олонд таниулсан билээ.
Улмаар Холливудын нэрт жүжигчин Мишель Родригез, АНУ-ын Нью-Йоркт төвтэй “Олигвы Энтертайнмент”-ийнхэн дээрх баримт киног хийж, Австралийн нэрт дуучин Сиа “Angels by the wings” хэмээх дууг нь дуулсан юм.
Засгийн газраас “Баруун бүсийн эрчим хүчний систем” ТӨХК-ийн импортын цахилгаан эрчим хүчний гаалийн болон нэмэгдсэн өртгийн албан татвараас чөлөөлүүлэхээр өргөн барьсан Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийн анхны хэлэлцүүлгийг хийв. “Баруун бүсийн эрчим хүчний систем” ТӨХК импортоор авч байгаа цахилгааны өөрийн өртөг нь хэрэглэгчдэд борлуулж буй үнээс өндөр байдаг тул алдагдлыг улсын төсвөөс татаас өгч санхүүжүүлдэг боловч импортын цахилгаан эрчим хүчний гаалийн болон нэмэгдсэн өртгийн албан татвар нь энэ татааст тусгагдаагүйгээс эх үүсвэргүй өр үүсдэг.
УИХ-ын Төсвийн байнгын хорооны хуралдаанаар Хүний хөгжил сангийн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийв. Хэлэлцэж буй асуудалтай холбогдуулан асуулт асуух болон зарчмын зөрүүтэй саналтай гишүүн байгаагүй тул М.Зоригт гишүүн анхны хэлэлцүүлгээр нь батлуулах горимын санал гаргаж уг санал хуралдаанд оролцсон гишүүдийн 100 хувийн саналаар дэмжигдсэн юм.
Ардчилсан намын ҮЗХ-ны ээлжит бус 46 дугаар хурал Төрийн ордонд энэ сарын 20-нд болох байсан ч тодорхойгүй хугацаагаар хойшлуулсан юм. Хурал хойшилсон шалтгааныг тайлбарлахдаа Ардчилсан нам Засгийн газраа авч үлдэхийн тулд ҮЗХ-ны ээлжит бус хурлаа хойшлуулсан гэж байсан. Энэ тухай АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр хэлэхдээ “Манай нам Үндэсний зөвлөлдөх хорооны хурлаа хийх амархан. Харин Засгийн газраа авч үлдэнэ гэдэг ҮЗХ хуралдахаас илүү чухал” хэмээж байв. 
Сонгуулийн ерөнхий хорооноос нийслэлийн мандатыг нэмэгдүүлэх асуудлыг УИХ-д өргөн барьсан. Энэ асуудлыг УИХ-ын МАН-ын бүлэг эсэргүүцэж байгаагаа илэрхийлсэн билээ. Тэгвэл тус бүлгийн зарим гишүүд нийслэлийн мандатыг нэмэгдүүлэхийг дэмжиж байна.
Барьцаалан зээлдүүлэх үйлчилгээ гэсэн албан ёсны нэртэй ломбардуудад тавих шаардлагыг өндөрсгөж, тусгай зөвшөөрөл авч байж эрхлэх эрх зүйн зохицуулалтыг хийх гэж байна. Ломбардны үйл ажиллагаанд тавигдах шаардлага, шалгуурыг тогтоогоогүй, барьцаалан зээлдүүлэгчийн хөрөнгө, олгож буй нийт зээлийн хэмжээ тодорхойгүй, уг үйл ажиллагааг бүртгэх, хяналт тавих эрх зүйн зохицуулалт байхгүй байгаа нь ажиллагаа эрхлэгчид татвар төлөхгүй байх нөхцөлийг бүрдүүлж байгаа юм.
Монголын бүх ард түмний спортын XIV их наадмын хүрээнд зохиогдож буй шатрын насанд хүрэгчдийн улсын аварга шалгаруулах тэмцээний хагас шигшээ тоглолтууд МУБИС дээр явагдаж байна. Тэмцээнд эрэгтэй 84, эмэгтэй 54 шатарчин оролцож бөгөөд шигшээ тэмцээнд өрсөлдөх шатарчид ирэх баасан гаригт тодорно.
УИХ-ын Төсвийн байнгын хорооны өнөөдрийн хуралдаанаар Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай, Онцгой албан татвараас чөлөөлөх тухай хуулийн төслүүдийг хэлэлцлээ. Тус хуралдаанаар манай улсад 7 дугаар сарын 15-16-ны өдрүүдэд болох АСЕМ-ын уулзалтад тансаг зэрэглэлийн 320-350 автомашин ашиглагдах тооцоо гарсан бөгөөд шаардагдах автомашиныг хувийн хэвшлийнхний хөрөнгө оруулалт, дэмжлэгтэйгээр шийдвэрлэх нь зүйтэй гэж үзсэн юм.
Тэгвэл Монголыг төлөөлж С.Гантогоо хэмээх дуучин залуу сонгогдсон бөгөөд тэрбээр сүүлийн найман жил Солонгост амьдарч, өөрийн уран бүтээлээ туурвисаар яваа юм. Үндэсний сар шинийн баяр удахгүй тохиох гэж байгаа учраас “We are Koreans” нэвтрүүлгээр орчин үеийн зохиолын дуу хуур гэхээсээ үндэсний уран бүтээлээ түлхүү толилуулна гэдгээ тэрбээр хэлэв. Солонгосчууд ч бидэнтэй адил Цагаан сарын баярыг тэмдэглэдэг учраас нэвтрүүлгийн уран бүтээлчид энэхүү саналыг уриалгахан хүлээж авчээ. 