Засгийн газраас энэ 2016 оныг хэрэглэгчийн жил болгож байгаагаа зарлалаа. Тодруулбал, НҮБ-ын “Хэрэглэгчийн эрхийг хамгаалахад баримтлах үндсэн зарчим”-ын үзэл санаа, 2015 онд НҮБ-ын Ерөнхий ассемблейн 70 дугаар хуралдаанаар хэлэлцэн баталсан Тогтвортой хөгжлийн баримт бичигт “Хариуцлагатай хэрэглээ ба тогтвортой үйлдвэрлэлийн чиглэлээр” хэрэглэгч рүү хандан 10 жилийн төлөвлөгөө гаргаж ажиллахыг гишүүн орнууддаа зөвлөсөн зөвлөмж, Засгийн газрын мөрийн хөтөлбөрийн хэрэглэгчийн эрхийг хамгаалах талаар дэвшүүлсэн зорилтуудыг бүрэн хэрэгжүүлэх шаардлагыг үндэслэн Монгол Улсын Засгийн газраас 2016 оныг “Хэрэглэгчийн жил” болгон зарлах нь зүйтэй гэж үзсэн байна.
Хэрэглэгчийн жилийн ажлыг тогтвортой хугацаанд үр дүнтэй ажил болгон хэрэгжүүлэхийн тулд “Хэрэглэгчийн эрхийг хамгаалах хөтөлбөр”-ийг Засгийн газраар батлуулан хэрэгжилтэд нь хяналт тавьж ажиллахыг Шадар сайдад даалгажээ.
2016 оныг “Хэрэглэгчийн жил” болгосноор үйлдвэрлэл худалдаа, үйлчилгээний бүх байгууллагууд хэрэглэгчдэд хандсан менежментийн чиг хандлагыг тэргүүлэх чиглэлээ болгохын зэрэгцээ хэрэглэгчдэд хүргэж буй бараа бүтээгдэхүүн, ажил үйлчилгээ нэг бүрийг стандарт чанарын шаардлагыг бүрэн хангасан байх, нийгмийн үйлчилгээний бүх салбарын байгууллагын хэрэглэгчдэд үзүүлж буй үйлчилгээний эцсийн үр дүн нь хэрэглэгчийн сэтгэл ханамжийн хангалттай түвшнээр хэмжигддэг байх, хүн рүү чиглэсэн шинэчлэлийг менежментийн илүү дэвшилттэй түвшинд дэвшүүлэн тавьж тодорхой үр дүнд хүрэх боломжтой гэж үзсэн байна.
Хэрэглэгчийн жилд:
• Хэрэглэгчийн эрхийг хамгаалах тухай хууль болон хэрэглэгчийн эрхтэй холбогдох багц хуулиудад шинэчилсэн найруулга хийх, нэмэлт өөрчлөлт оруулах замаар эрх зүйн орчныг боловсронгуй болгох
• “Хэрэглэгчийн эрхийг хамгаалах үндэсний хөтөлбөр 2”-ыг Засгийн газраас батлан гаргаснаар хэрэглэгчийн эрхийг хамгаалах үндэсний тогтолцоо, үйл ажиллагааны арга механизмыг төлөвшүүлэх
• “Хэрэглэгчийн эрхийн хамгаалалтын төлөв байдал”-ын судалгаа дүгнэлтийг жил бүр гарган, Засгийн газраас үнэлгээ өгч, цаашид авах арга хэмжээний чиглэлийг тодорхойлдог ажлуудыг уламжлал болгох зэрэг зорилт тавьжээ.
Улаанбаатар хотын авто замын сүлжээг сайжруулж, замын хөдөлгөөний ачааллыг бууруулах зорилгоор Нэгдүгээр эмнэлгийн хашаан дундуур С.Зоригийн гудамжийг зүүн тийш Чин Ван Чагдаржавын гудамжтай холбосон шинэ зам тавилаа. Энэхүү автозам нь 2.8 метр өргөн зорчих хэсэгтэй 0.7 метр явган замтай, 3.5 метрийн өргөнтэй 75 метр урттай юм.
Олон улсын онолын болон химийн холбоо (IUPAC) -ны шийдвэрээр үелэх системд химийн дөрвөн шинэ элемент нэмэгджээ. Дөрвөн элементийн эхнийх нь 113 дугаартай Унитрий (Uut). Түүнийг Орос-Америкийн эрдэмтдийн баг 2014 онд нээжээ. Мөн Японы “Рикен” хүрээлэнгийн эрдэмтэд ч хувь нэмрээ оруулсан байна. Түүнийг “Ricken” гэж нэрлэх хамгийн өндөр магадлалтай гэж бичжээ.
Туркийн хүмүүнлэгийн зүтгэлтэн, соён гэгээрүүлэгч, их сэтгэгч Фетхуллах Гюлен Францын өдөр тутмын “Ле Монд” сонинд бичсэн нийтлэлдээ хэт даврах үзэл, терроризмтой тэмцэх талаар дэлхий нийт хийгээд Мусульман шашинтнуудад хандан чухал ач холбогдолтой мэдэгдэл гаргажээ. Ислам шашны нэрийг барьж үйлдсэн террорист халдлагууд нь Мусульман шашинтнуудыг нийгмээс хөндийрүүлэхэд хүргэн Ислам шашны эсрэг сөрөг ташаа ойлголт, дургүйцлийг улам бүр гүнзгийрүүлж байгааг Гюлен өгүүлээд терроризмыг өөгшүүлж хамгаалсан шашин ерөөс байдаггүй болохыг нэмж дурдсан байна.
Монголын үндэсний бөхийн холбооноос энэ сарын 13-ны өдөр Үндсэн хуулийн өдөрт зориулсан улс, аймгийн алдарт цолтой 224 бөхийн барилдааныг зохион байгуулахаар болжээ. Энэхүү барилдаан 2016 оны анхны барилдаан гэдгээрээ ихээхэн онцлогтой болох юм. Түүнээс гадна сар шинийн барилдааны өмнөх сорилго барилдаан болох тул бөх сонирхогчдын анхаарлыг татах нь лавтай. Саяхан Үндэсний эрх чөлөө, тусгаар тогтнолоо зарласан түүхэн тэмдэглэлт өдрөөр “Ерөнхийлөгчийн цом”-ын төлөөх чансаа өндөр байгаа 128 бөхийн барилдаан болж, улсын харцага Б.Пүрэвсайхан түрүүлсэн билээ.
Зам тээврийн яамны Төрийн нарийн бичгийн дарга, “Монголын төмөр зам” компанийн ТУЗ-ийн дарга асан Б.Батзаяа болон БНСУ-ын “Самсунг СТ” компанийн захирал Ли Жон Гёл нарыг баривчлан шалгаж байгаа билээ. Тэднийг бусадтай бүлэглэн улсад их хэмжээний хохирол учруулж, мөнгө угаасан байж болзошгүй” хэмээн эрүүгийн хэрэг үүсгэн шалгаж буй юм. Бүлэглэн үйлдсэн гэх энэ хэрэгт тухайн үеийн төрийн өндөр албан тушаалтнууд оролцсон байж болзошгүй мэдээлэл гарч байв. Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийнхэн энэ хэргийг шалгах явцад нэр бүхий хоёр албан тушаалтан дээрх хэрэгт холбоотой байж болох баримт нотолгоо мөрдөн байцаалтын явцад олдсон байдаг. Иймд Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийнхэн албан тушаалтнуудад холбогдох хэргийг тусгаарлан шалгуулахаар хүсэлт гаргаж, Авлигатай тэмцэх газарт шилжүүлсэн юм. АТГ-ынхан албан тушаалтнуудад холбогдох хэргийн нотлох баримт болон зарим хүний мэдүүлгийн хамт дээрх хоёр албан тушаалтны үйлдэл гэмт хэргийн бүрэлдэхүүнтэй байж болох үндэслэл байгаа учир сэжигтнээр тооцож, шалгах хэрэгтэй байгаагаа прокурорын байгууллагад оны өмнөхөн тавьсан. Прокурорын байгууллага Авлигатай тэмцэх газрынхны үндэслэлийг хүлээн авч УИХ-ын гишүүн Х.Баттулга, Зам тээврийн сайд асан А.Гансүх нарыг сэжигтнээр тооцон шалгах зөвшөөрөл олгосон байна. УИХ-ын гишүүн Х.Баттулга, Зам тээврийн сайд асан А.Гансүх нарыг сэжигтнээр байцааж эхэлсэн гэнэ. Мөн тэдэнд таслан сэргийлэх арга хэмжээ авч гадаадад зорчих эрхийг нь хязгаарласан байна. Сэжигтнээр тооцон шалгах явцад тэдний гэм буруутай нь тогтоогдвол яллагдагчаар татаж, Х.Баттулгын УИХ-ын гишүүний бүрэн эрхийн асуудлыг холбогдох газруудад нь тавих аж. Хуулийн дагуу сэжигтнээр тооцож шалгах явцад гэм буруутай гэх үндэслэл нь батлагдвал үргэлжлүүлэн 14 хоногийн дараа яллагдагчаар татах эсэхээ мөрдөн байцаагчтай зөвшилцөн прокурор шийдэх юм.
Х.Баттулга, А.Гансүх нарыг албан тушаалын эрх мэдлээ хэтрүүлэн ашигласан гэх үндэслэлээр шалгаж эхэлсэн байна. Ингэхдээ Зүүн чиглэлийн төмөр замын 100 км замын хөрс хуулалтын ажлыг эхлүүлсэн. Үүнийг хэн хариуцсан, хөрс хуулалтын ажлыг эхлүүлэх шуурхай хуралдааныг хэн мэдэж хийж, хэнд үүрэг болгов. Тендергүйгээр нэгэн компанийг шалгаруулж, Чингис бондын мөнгөнөөс 5.8 сая ам.долларыг хэн яах гэж өгөв. Сайншандын аж үйлдвэрийн цогцолбор босгох ажилд төсвөөс 24 тэрбум төгрөг өгсний 22 тэрбумыг нь судалгааны ажил гэх нэрийн дор шамшигдуулсан зэрэг нь албан тушаалтнуудтай холбоотой хэрэг болж байгаа аж. Нэг үгээр хэлбэл төрийн томоохон төслийг эхлүүлэх явцад өөрсдийн танил тал, багийн хүмүүсээ албан тушаалд томилж, тэднээр дамжуулж төрөөс их хэмжээний мөнгө шамшигдуулж улсыг хохироосон гэх үндэслэл гарч ирж буй бололтой. Түүнчлэн бидний олж авсан мэдээллээр Б.Батзаяа нь Монголын төрийн мэдлийн 350 га газрыг хувийн компани руу шилжүүлсэн баримт олджээ. Тэрбээр үүнийг хийхдээ дээрх албан тушаалтнуудын заавар, зөвлөмжийн дагуу хийсэн байж болох баримт ч олдсон гэнэ. Энэ мэтээр албан тушаалтнуудад хамаарах, тэднийг холбогдуулан шалгах үндэслэлүүд нь ийм байгаа аж. Мөн “МТЗ” болон “Самсунг СТ”-ийн хооронд хийсэн гэрээ нь 483 сая ам.долларын өртөгтэй. Энэ гэрээнд “Самсунг” туслан гүйцэтгэгчээ сонгон шалгаруулахдаа тендергүйгээр шууд авах эрхтэй болгож тусгасан. Энэ нь Монгол Улсын хэд хэдэн хуулийг зөрчсөн. Хамгийн түрүүнд тендерийн тухай хуулийг зөрчсөн. Хоёрдугаарт, Шударга өрсөлдөөний тухай хуулийг зөрчсөн байдаг. Дээр нь бондын мөнгийг захиран зарцуулахдаа заавал тендер зарлах үүргийг Монгол Улс бондод хөрөнгө оруулагчдын өмнө хүлээсэн байдаг. Гэвч яагаад тендергүйгээр энэ компанийг сонгох болов. Үүнд ямар албан тушаалтан оролцов гэх зэрэг асуудлууд гарах болжээ. 
Өнгөрсөн арванхоёрдугаар сарын 29-ний өдөр
Монголын хөнгөн атлетикийн шигшээ багийн тамирчид БНХАУ-д болсон олон улсын марафоны тэмцээнд амжилттай оролцож, олимпийн эрхийн нормативыг дахин биелүүллээ. Хятадын Шаньси хотод болсон тус тэмцээнд дасгалжуулагч Б.Төрбатын удирдлага дор зургаан тамирчин өрсөлдсөнөөс олон улсын хэмжээний мастер Б.Гантулга, Л.Отгонбаяр, Б.Мөнхзаяа нар олимпийн эрхийн норматив биелүүлсэн байна. Тодруулбал, эрэгтэйчүүдийн ангилалд ОУХМ Д.Гантулга XI, эмэгтэйчүүдийн ангилалд ОУХМ Л.Отгонбаяр IX, Б.Мөнхзаяа X байрт оржээ.
Засгийн газраас түүхий арьс, шир тэр дундаа адууны ширийг нэг удаагийн арга хэмжээ болгон энэ оны нэгдүгээр сарын 5-ны өдрөөс хоёрдугаар сарын 5-ны өдрийг хүртэл хугацаанд экспортлохыг зөвшөөрсөн.
Нийслэлийн Тээврийн газраас микро автобусуудын ашиглалтын хугацаа дуусч байгаа тул үйлчилгээнд явуулахгүй гэж мэдэгдэж байсан. Нийтийн тээврийн үйлчилгээнд зорчигчдын аюулгүй байдлыг хангах, тав тухтай зорчуулах зэрэг стандарт байдаг ч одоо үйлчилгээнд явж буй микронууд стандартын шаардлага хангадаггүй. Тэгвэл микро автобусны үйлчилгээ эрхлэгчдийг наймдугаар сарын 1-ээс явуулахгүй байхаар гэрээ хийж, энэ хугацаанд аж ахуйн нэгжүүд өөрсдөө парк шинэчлэл хийх тохиролцоонд хүрсэн байна. Мөн оношилгоонд заасан хугацаанд орох, зарим чиглэл маршрутыг шинэчлэн зохион байгуулахаар болжээ. Одоогоор нийслэлд нийт 340 орчим микро автобус үйлчилгээнд явж байна. Зорчигч тээврийн үйлчилгээний стандартад үйлдвэрлэснээс хойш 12-оос дээш жил болсон тээврийн хэрэгсэл ашиглахыг хориглодог. Одоо нийслэлд үйлчилгээнд явж буй микронуудын хамгийн сүүлийнхийг 2003 онд үйлдвэрлэсэн байдаг байна. Тиймээс энэ онд бүх микроны ашиглалтын хугацаа дуусч байгаа аж.