Month: January 2016

УИХ-ын чуулганы нэгдсэн хуралдаан цаг сунган хуралдаж байна. Хуралдаанаар Ерөнхий сайд Ч.Сайханбилэгийг огцруулах асуудлыг хэлэлцэж байгаа юм.

Хэлэлцэж буй асуудалтай холбогдуулан гишүүд асуулт асууж, хариулт авч байна.

-Д.Дэмбэрэл: Ерөнхий сайдыг огцруулах саналыг гаргахдаа Оюутолгойн гэрээг үндэс болгосон. Дубайн гэрээг нягталж үзсэн. Энэ гэрээг улс оронд хохиролтой байдлаар тусгасан. Бараг 1.5 тэрбум доллар буюу манай 34 хувийн хөрөнгөө төлчих хэмжээний хөрөнгө алдчихлаа гэж Сангийн яамны мэргэжилтнүүд хэлээд байна. ҮАБЗ, УИХ-ын шийдвэрийг зөрчлөө гээд байна. Энийг юу гэж үзэж байна вэ. ҮАБ-ын шийдвэр УИХ-ын шийдвэрүүд энэ гэрээг яваандаа 51 хувийг нөхнө гэж үзсэн. Энэ шийдвэрүүдийг таныг хүчингүй болгочихлоо гэж ойлгоод байгаа. Нөгөө талаар, Тавантолгойн асуудал яасан бэ. Үүнийг л явуулахын тулд хамтарсан засаг байгуулна гээд байсан. Энэ төсөл юу болсон бэ?

Ч.Сайханбилэг: 2009 онд хийсэн гэрээг хохиролтой болгосон байна гэдэг нэг тийм шугам сонгож авсан юм шиг байна. 51 хувь болгох боломж нээлттэй байгаа. “Тавантолгой” төслийг Засгийн газар зогсоогоогүй, ажил нь хэвийн үргэлжилж байгаа.

Д.Бямбасайхан: Ил уурхайг ашигласнаар 6 тэрбум долларын ашиг олох боломжтой байгаа. Гүний уурхайг ашигласнаар 47 тэрбумын үнэ цэнэтэй байгаа. Жилд 1.2 тэрбумын мөнгөн урсгал орж ирэх боломжтой юм.

–О.Баасанхүү:100 сая долларын актыг 30 сая болгон буурууллаа. 100 сая доллар гэдэг чинь 200 тэрбум төгрөг шүү дээ. Та хэн нэгэнтэй компани байгуулж байгаад хөрөнгө оруулалтаа цаад тал нь гурав, дөрөв дахин нэмэгдүүллээ гэхэд таны хариуцлага ч нэмэгдэж байгаа гэсэн үг шүү дээ. Та өөрийнхөө компанид ингэж хандахгүй байсан биз дээ. Хууль зөрчсөн Засгийн газар огцрох ёстой гэдэг. Хууль зөрчсөн бол хууль зөрчсөн. Сайдад хариуцлага тооц гэж Л.Эрдэнэчимэг гишүүн бичиг явуулж байсныг санаж байна. Их хурлын дарга индэр дээрээс сайдаа хөөж явуул гэсэн. Та сайдаа явуулсан уу?

Ардчилсан намын дүгнэлт дотор нэг ч хууль өргөн барьдаггүй гэсэн гүтгэлэг явж байна. Би харин ч олон хууль батлуулсан хүн шүү. Хууль нэгдүгээрт юм уу, эрх мэдэл нэгдүгээрт юм уу? Оюутолгойн гэрээний алдааг засахгүй бол яагаад “Шударга ёс” эвсэлтэй хамтраад байгаа юм бэ.

Б.Бямбасайхан:Татварын ерөнхий газар шалгалт хийгээд 130 сая долларын акт тавиад маргаан таслах зөвлөл дээр очсон. Маргаан таслах зөвлөл буюу татварын шүүх маань 30 сая доллар төлөх ёстой гэсэн шийдвэр гаргасан.

Ч.Сайханбилэг:Татварын нэг байцаагч акт тавиад тэр нь эцсийн шийдвэр болчихдог зүйл хаана ч байхгүй. Татварын акт тавина. Түүнийг нь татварын маргаан зөвлөх хянана. Хамгийн эхний гаргасан шийдвэрийг хамгийн эцсийн шийдвэр гэж ойлгож болохгүй шүү дээ. Танд энэ талаар мянга тайлбарласан. Үүнийг ойлгохгүй улс төр хийгээд байвал яаж ойлгуулахаа мэдэхгүй байна. Хууль санаачлах асуудал Ерөнхий сайдыг огцруулах асуудалтай холбоогүй. Үүнийгээ тойрог байдаг бол тэндээ очиж ярь. Эсвэл доторх юмаа эвсэл дотроо ярь.

-Ө.Энхтүвшин: Засгийн газрын асуудлыг сэтгэлийн хөдөлгөөнгүй ярих ёстой л доо. Монгол Улс Оюутолгойн ноогдол ашгийг 2030 он хүртэл авахгүй болчихлоо гэж ярьж байна. Үүнд тодорхой хариулт өгөөч.

Д.Бямбасайхан: Өнгөрсөн тавдугаар сард зурагдсан төлөвлөгөөн дээр нийт 47 тэрбум ам.доллар гэж тооцсон. НӨАТ, гаалийн татвар нь 9.6, суутгал 2.8 ноогдол ашгийн татвар 8 тэрбум, аж ахуйн нэгжийн орлогын албан татварыг 14.5 ам.доллартай тэнцэх хэмжээний мөнгөн урсгалыг Монголын тал авна гэж тооцсон.

Гишүүдийн асуулт хариулт үргэлжилж байна.

Төрийн байгуулалтын байнгын хорооны хуралдаанаар Ерөнхий сайдыг огцруулах эсэх асуудлыг хэлэлцээд олонхийн саналаар огцруулах шаардлагагүй гэж үзсэн юм. Тэгвэл энэ асуудлыг УИХ-ын чуулганы нэгдсэн хуралдаанаар хэлэлцэх гэж байна.

Чуулганы хуралдаан цаг сунган хуралдаж байгаа юм. Ерөнхий сайдыг огцруулах тогтоолын төслийг Төрийн байгуулалтын байнгын хорооны дарга А.Бакей танилцууллаа. Хуралдаанд 72 гишүүн оролцож байна.

2016 оны 2 дугаар сарын 3-ны өдөр хуралдах Үндсэн хуулийн цэцийн дунд суудлын хуралдаанаар Нэмэгдсэн өртгийн албан татварын тухай хуулийн зарим заалтаар нотариат, өмгөөлөл, хууль зүйн зөвлөгөө өгөх ажлыг нэмэгдсэн өртгийн албан татвар ногдох үйлчилгээнд хамааруулсан нь Үндсэн хуульд заасан иргэний хууль зүйн туслалцаа авах эрх болон төрөөс хүний эрх, эрх чөлөөг хангахуйц хууль зүйн баталгааг бүрдүүлэх, хүний эрх, эрх чөлөөг зөрчихтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хариуцах тухай заалт, түүнчлэн холбогдох бусад заалтыг зөрчсөн эсэхийг хянан хэлэлцэнэ гэж Үндсэн хуулийн цэцийн хэвлэл, мэдээллийн төлөөлөгч мэдээлэв.

Г.Уянга нарын нэр бүхий 19 гишүүний өргөн мэдүүлсэн Ерөнхий сайд Ч.Сайханбилэгийг огцруулах асуудлыг Төрийн байгуулалтын байнгын хорооны хуралдаанаар сая хэлэлцлээ.

Байнгын хорооны 19 гишүүний 52 хувь нь татгалзсанаар Ерөнхий сайдыг огцруулах асуудлыг дэмжсэнгүй.

УИХ-ын Төрийн байгуулалтын байнгын хорооны Ерөнхий сайдын асуудлыг хэлэлцэж байгаа. Энэ үеэр УИХ-ын гишүүн Н.Алтанхуяг “МАН-ын 13 больё. Манай МАН бол бууртай суурьтай нам шүү. Оюутолгойн асуудлаар Ерөнхий сайдыг огцруулах асуудлыг тавьчихаад хамаг дэлхийн юм хамж шимээд яриад байх юм. УИХ-ын чуулган дээр та нар улстөржүүлээд, хэрэгтэй хэрэггүй баахан юм ярина. Энэ чинь зүгээр л шоу болоод байна. Засгийн газар хийсэн ажлаа зөв гэдгээ цаашдаа баталж, нотлоод яв. Энд хэдэн тоо яриад яах юм бэ. МАН-ынхан, М.Энхболд дарга аа, одоо больё.

урван жилд та нар Засгийн газрыг гурван удаа бужигнууллаа. Болиоч, хэрэггүй шүү дээ. Улс орноороо тоглохоо боливол яасан юм бэ. Зургадугаар сард сонгууль болох гэж байна. Намайг огцруулаад санаа сэтгэл чинь амарсан байх. Дараа нь Засагт орно гэж зүтгэсэн. Долоо, найман сар Ч.Сайханбилэгтэй хүзүү сээрээрээ холбогдож, тэврэлдэж явсан. Ч.Сайханбилэгийн Засгийн газар жил ажиллаж байгаагийн долоо, найман сард нь та нар хүзүү сээрээрээ тэврэлдэж хамт явсан биз дээ. Гарангуутаа учир утгагүй асуудлаар огцруулна гэж ярихаа боль. Энэ утгагүй улстөржилтөөс чинь болж ард түмэнд хор хохирол учирч байна. Энэ тоглоомоо больё. Та нар жүжиглэдгээ л болчих л доо. Та нар тийм сүрхий юм бол яах гэж засагт орж долоо, найман сар бүтээн байгуулалт саатуулсан юм бэ. Монгол Улсын хувь заяа, ард түмнээр тоглохоо боль” гэв.

Төрийн байгуулалтын байнгын хорооны хуралдаанаар Ерөнхий сайд Ч.Сайханбилэгийг огцруулах тогтоолын төслийг хэлэлцэж байна. Энэ удаа байнгын хороо 100 хувийн ирцтэй хуралдаж байгаа юм.

Г.Уянга нарын өргөн мэдүүлсэн тогтоолын төсөлд Дубайд зурагдсан Оюутолгойн санхүүжилтийн төлөвлөгөө нь Монголд ногдох ашгийг алсруулсан, үүний төлөө Ерөнхий сайд хариуцлага хүлээх ёстой хэмээн үзэж буйгаа дурдсан.

Хэлэлцэх асуудалтай холбогдуулан УИХ-ын гишүүн О.Баасанхүү, Г.Уянга нар асуулт тавьсан юм. Тухайлбал,

О.Баасанхүү гишүүн: Оюутолгойн зардлын хэтрэлтийг шалгах ажлын хэсэг ажилласан. Тэгээд зөрчил илрүүлсэн. Энэ зөрчлийн дүн хэд вэ, Ерөнхий сайд та энэ дүнг хүчингүй болгох эрхтэй юу. 2-рт, Ерөнхий сайд та анх томилогдохдоо эдийн засгаа сэргээнэ, ханшийг тогтворжуулж буулгана гэсэн. Энэ ажил чинь юу болсон юм бэ. Эдийн засаг чинь хэзээ сэргэх юм бэ гэж асуув.

Ерөнхий сайд Ч.Сайханбилэг: О.Баасанхүү гишүүн та улстөржиж гацааж нураахаа больчихвол эдийн засаг өснө гэж байв.

“Эрдэнэс Оюутолгой” компанийн захирал Да.Ганболд “Оюутолгойн хөрөнгө оруулалтын зардлыг хянахаар 20 гаруй хүний бүрэлдэхүүнтэй ажлын хэсэг байгуулагдан ажилласан. Ажлын хэсэг 1.4 тэрбум ам.долларын зөрчил илрүүлсэн. Гэхдээ тэдний дотор хөрөнгө оруулалтын гэрээ, тогтворжуулалтын гэрээнд заасан зүйлүүдийг ойлгоогүй хүмүүс байсан учраас зөрчлийн тоо ингэж гарсан. Анхан шатны бүртгэл материал тэр бүгдийгээ дахин үзэж нягталснаар хөрөнгө оруулалтын зардал 30 гаруй сая ам.доллараар хэтэрсэн гэх дүгнэлт гаргасан. Энэ дүгнэлтийг Сангийн яамны дэргэдэх Маргаан таслах зөвлөлөөр хянан баталгаажуулсны үндсэн дээр хоёр тал хүлээн зөвшөөрч гарын үсэг зурсан. Хэтэрсэн зардлыг нь хөрөнгө оруулалтын зардал биш гэж үзэх үндэслэл байхгүй” гэсэн хариулт өгсөн юм.

Гишүүн Н.Алтанхуяг:Ч.Сайханбилэг та хариуцлагаа хүлээ. Монголын төрд зөв жишиг тогтооё гэж байв.

Гишүүд асуулт асууж дуусаад, байнгын хорооны 19 гишүүнээс 14 нь үг хэлэх юм.

УИХ-ын Төрийн байгуулалтын байнгын хорооны хуралдаан эхлээд байна. Хуралдаанаар Г.Уянга нарын 19 гишүүний өргөн мэдүүлсэн Ерөнхий сайд Ч.Сайханбилэгийг огцруулах тогтоолын төслийг хэлэлцэх юм.

Төрийн байгуулалтын байнгын хороо 19 гишүүнтэй. Гишүүд бүгд хуралдаандаа суухаар ирэв.

Ерөнхий сайдыг огцруулах асуудлыг тус хороо өнгөрсөн долоо хоногт хуралдах байсан ч УИХ дахь МАН-ын бүлэг тав хоногийн завсарлага авсан юм.