АШУҮИС номын сангийн шинэ байртай боллоо. 150 000 гаруй номтой энэ өргөө АШУҮИС-ийн харьяа таван сургуулийн оюутан, судлаач, багш нарт 718 суудал бүхий 6 уншлагын танхим, 50 компьютертэй интернет өрөө, 17 суудал бүхий цахим номын сан, 56 суудал бүхий эрдэм шинжилгээний танхим, 42 суудалтай гадаад уншлагын танхим, 46 суудалтай тогтмол хэвлэлийн танхимаар үйлчлэх юм.
Хэрэглэгчдэд ая тухтай, бие даан суралцах орчин нөхцөл бүрдүүлэх энэхүү номын шинэ өргөөг нийт 3.2 тэрбум төгрөгөөр нэг жилийн хугацаанд барьж ажиглалтад оруулжээ.
Номын сангийн барилгад зориулж БСШУ-ны сайд өөрийн багцаас 2 тэрбум төгрөгийг төсөвлөжээ.
“Найрсаг Улаанбаатар” хөтөлбөрийн хүрээнд нийслэлийн Засаг даргын Тамгын газар, нийслэлийн Биеийн тамир, спортын газар, Монголын дугуйн холбоо хамтран “Дугуйн марафон”-ыг энэ амралтын өдрүүдэд зохион байгуулах гэж байна. Үүнтэй холбогдуулан маргааш буюу 2015 оны 11 дүгээр сарын 07-ны өдрийн 11:00 цагаас 13 цагийн хооронд Чингисийн талбайн зүүн талын зам, Гадаад хэргийн яамнаас Төв шуудангийн уулзвар хүртэл, Төв шуудангийн уулзвараас Чингисийн өргөн чөлөө, Зайсангийн баруун хойд уулзвар хүртэл, Богд уулын арын зам, Их тэнгэр, Их Монгол улсын гудамжнаас Үндэсний цэцэрлэгт хүрээлэн хүртэлх замыг түр хугацаагаар хэсэгчлэн хаана гэж Улаанбаатар хотын Замын цагдаагийн газраас мэдээллээ. 
Грек улсын Халкидики хотын Порто Каррас-т явагдсан Өсвөрийн шатарчдын дэлхийн аварга шалгаруулах тэмцээнд 12 хоног оюун ухаанаа уралдуулсан манай улсын ирээдүйн их мастерууд өнөөдөр тэмцээнээ дуусгаад нутгийн зүг хөлгийн жолоо заллаа.
Цахилгааны урамшууллыг энэ жил өрхүүдэд олгоогүй билээ. Учир нь эдийн засгийн хүндрэлтэй байдлаас шалтгаалан 2015 онд санхүүжилтийг нь төрөөс суулгаагүй юм. Тэгвэл ирэх 2016 онд ч цахилгааны урамшуулал олгохгүй юм байна.
Нийслэлийн удирдлагын зөвлөлийн ээлжит хуралдаан болж, Улаанбаатар хотод замын хөдөлгөөний дүрмийн зөрчлийг илрүүлж таслан зогсоох, түгжрэлийг бууруулах чиглэлээр ачигч , чирэгч автомашиныг ажиллуулах тухай асуудлыг хэлэлцлээ.
Засгийн газрын ээлжит бус хуралдаан болж, УИХ-ын гишүүн Су.Батболд нарын санаачлан боловсруулсан Монгол Улсын Их Хурлын Сонгуулийн тухай хуульд нэмэлт, өөрчлөлт оруулах тухай хуулийн төслийг хэлэлцээд асуудлыг зарчмын хувьд дэмжсэн байна. Тиймээс тодорхой саналыг хууль санаачлагчид уламжлахаар тогтжээ. Мөн УИХ-ын гишүүн Р.Бурмаа нарын санаачлан боловсруулсан Сонгуулийн тухай хуулийн төслийг хэлэлцэн дэмжиж, зарим саналыг төсөл санаачлагчид хүргүүлэх нь зүйтэй гэжээ. 
Улаанбаатар хотноо ирэх 2016 онд болох АСЕМ-ын Дээд түвшний 11 дүгээр уулзалтын бүх төрлийн ажил үйлчилгээнд Монголд үйлдвэрлэсэн бараа бүтээгдэхүүнийг ашиглахыг уриалж байгаа билээ. Тэгвэл энэ ажлын нэг хэсэг болсон “Монгол бренд-ACEM 2016” үзэсгэлэнг өнөөдөр Мишээл экспод нээхээр болжээ. Уг үзэсгэлэнд гар урлал, оёмол бүтээгдэхүүн, бэлэг дурсгал, гоёл чимэглэл, сав баглаа боодол зэрэг төрөл бүрийн үйлдвэрлэл, үйлчилгээ эрхэлдэг 120 гаруй үндэсний үйлдвэрлэгч оролцож бүтээгдэхүүн, үйлчилгээгээ сурталчлах юм байна. Өнөөдөр 13.00 цагаас үзэсгэлэнгийн нээлтийн ажиллагаа болно. Ингээд энэ сарын еснийг хүртэл үргэлжлэх юм байна.
УИХ 2015 оны төсвийн тодотголыг өнгөрөгч долоо хоногт хэлэлцэн батлав даа. Тодотголыг хэлэлцэж байхад Засгийн газар нефтийн онцгой албан татварыг “Төвийн боомтуудаар импортлох авто бензинийг тонн тутатмд 200 мянган төгрөг, дизель түлшинд 300 мянган төгрөгөөр нэмэгдүүлэе” гэсэн саналыг оруулж ирсэн байна хэмээн нэлээд шүүмжлэл дагуулсан. Нефть импортлогч компаниуд Онцгой албан татварыг нэмснээр одоо төлж байгаагаасаа гурав дахин их татварыг төлөхөөр болоод байгаа юм. Эдийн засаг элгээрээ хэвтсэн энэ үед хувийн хэвшлийнхнээ хамгийн ихээр анхаарах ёстой гэдэг ч үнэндээ нефть импортлогчдын хүзүүн дээр том хар буулга тавьчихлаа.