Сагсан бөмбөгийн залуучуудын Улсын аварга шалгаруулах “U19” тэмцээн өчигдөр Спортын төв ордонд эхэллээ. 19 хүртэлх насны залуу тамирчид оролцож буй тус тэмцээнд эрэгтэй 20, эмэгтэй зургаан багийн тамирчид өрсөлдөж байгаа юм байна. Хөдөө, орон нутгаас Хөвсгөл, Эрдэнэт, Дорноговь аймаг, нийслэлийн алслагдсан дүүрэг болох Налайх, Багануураас тамирчид оролцож байгаа аж. 19 хүртэлх насны залуучуудын улсын аварга шалгаруулах тэмцээний аваргууд баасан гарагт тодрох юм.
“U19” залуучуудын сагсан бөмбөгийн тэмцээнийг Доржпаламын Даваахүү агсаны нэрэмжит болгон зохион байгуулж эхлээд өдгөө гурав дахь жилтэйгээ золгоод байгаа юм. Энэ удаад ч талийгаачийн ар гэрийнхэн тэмцээнийг ивээн тэтгэжээ.
Ашигт малтмалын тухай хуульд 2015 оны хоёрдугаар сарын 18-ны өдөр оруулсан нэмэлтээр стратегийн ашигт малтмалын ордын төрийн эзэмшлийн хувь, хэмжээ, түүнийг орлуулан тооцох, нөөц ашигласны тусгай төлбөр тогтоохтой холбоотой зохицуулалтыг бий болгосон юм. Цөмийн энергийн тухай хуульд цацраг идэвхт ашигт малтмалын ордыг хэмжээнээс нь үл хамааран стратегийн ач холбогдол бүхий ашигт малтмалын ордын ангилалд хамруулна гэж заасан боловч цацраг идэвхт ашигт малтмалын төрийн эзэмшлийн хувь хэмжээг гэрээний нөгөө талд шилжүүлсэн тохиолдолд уг харилцааг зохицуулах эрх зүйн хэм хэмжээг тусгаагүй байна. Тухайлбал, цацраг идэвхт ашигт малтмалын ашиглалтын тусгай зөвшөөрөлтэй холбоотой төрийн эзэмшлийн хувь хэмжээг одоогийн нөхцөл байдалд үр ашигтайгаар хэрхэн шийдвэрлэх эрх зүйн орчин тодорхой бус, нарийвчилсан зохицуулалтгүй байгаа юм. Цацраг идэвхт ашигт малтмалын ордын ашигт малтмалын нөөц ашигласны тусгай төлбөртэй холбоотой зохицуулалт хийх шаардлагатай байгаа тул Цөмийн энергийн тухай хуульд нэмэлт, өөрчлөлт оруулах тухай хуулийн төслийг боловсруулжээ. 
Монгол Улсын дээд боловсролын хөгжилд дэмжлэг үзүүлэх, дээд боловсрол, шинжлэх ухааны салбарт энтрепренер болон болон инновацийг хөгжүүлэх зорилгоор Засгийн газрыг төлөөлж АНУ-ын Массачусетсийн технологийн институттэй хамтын ажиллагааны гэрээ байгуулах эрхийг Боловсрол, соёл, шинжлэх ухааны сайд Л.Гантөмөрт олголоо.
2014 оны байдлаар нийт хүн амын 28,1 хувийг 0-14, 65,7 хувийг 15-59, 6,2 хувийг 60-аас дээш насныхан эзэлж байна. 2010-2040 оны хэтийн шинэчилсэн тооцоогоор хөдөлмөрийн насны хүн амын эзлэх хувь өндөр байх хандлага ойрын 10 жилд үргэлжлэхээр байгаа юм. Энэ нь нийгэм, эдийн засгийн хөгжлийг түргэтгэх, орлого хуримтлуулах, хүн амын өсөлтийг дэмжих хүчин зүйл бодитой байгааг харуулж байна. Гэвч 2025 оноос нийт хүн амд нөхөн үржихүйн идэвхтэй насны эмэгтэйчүүдийн эзлэх хувь буурч, 60-аас дээш насныхан бусад насны бүлгийн хүн амаас илүү хурдацтай өссөөр 2040 он гэхэд гурав дахин нэмэгдэх төлөвтэй байна. 
УИХ-ын чуулганы нэгдсэн хуралдаанаар Төрөөс мөнгөний бодлогын талаар 2016 онд баримтлах үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийж байна. УИХ-ын Эдийн засгийн байнгын хороо өнгөрсөн долоо хоногт дээрх бодлогын анхны хэлэлцүүлгийг хийх шатанд зээлийн хүүг бууруулах нь зүйтэй хэмээн үзэж энэ саналаа УИХ-д оруулж ирсэн. Зээлийн хүүг нэгээс гурван хувь болгон бууруулахыг даалгахаар болсон.
Сонгинохайрхан
Ерөнхий сайд Ч.Сайханбилэгийг огцруулах бичигт гарын үсэг зурсан гишүүдийн тоо өчигдөр орой 19 болж Н.Алтанхуяг, Х.Баттулга нар нэмэгдсэн байж магадгүй гэх мэдээлэл цацагдах болсон. Хамгийн сүүлд гэхэд УИХ-ын гишүүн Д.Хаянхярваа хүртэл дарханы засаг даргад А.Энхболдыг батламжилсан явдалд Ерөнхий сайдыг буруутгаж, огцруулах бичигт гарын үсэг зурах болсноо мэдэгдэж байсан. 
Төрийн соёрхолт, Камертон хамтлагийн ахлагч, дуучин Д.Болд өөрийн “Мартахаасаа өмнө” дуундаа саяхан клип хийлгэжээ. “B production” болон “TJ entertainment”-ийн хамтын бүтээл болох тус клипийг өнгөрсөн долоо хоногт Youtube дээр тавигдсан даруйдаа 8200 гаруй хүн үзжээ. Дууны үгийг DNK, аяыг Ocean Grey бичжээ.
Засгийн газрын ээлжит хуралдаанаар Эрүүл мэнд, спортын сайдын үүргийг түр орлон гүйцэтгэгчээр Шадар сайд Ц.Оюунбаатарыг томилсон байна.
Нийслэлийн Засаг даргын 2015 оны А/870 дугаар захирамжаар нийслэлийн нутаг дэвсгэрт байгаа мал, тэжээвэр амьтдын 2015 оны тооллогыг 12 дугаар сарын 07-ноос 17-ны өдрүүдэд явуулахаар боллоо. Тооллогын комиссыг нийслэлийн Засаг даргын Экологи, ногоон хөгжлийн асуудал хариуцсан орлогч Т.Бат-Эрдэнэ даргалах юм.