УИХ-ын чуулганы үдээс хойшхи хуралдаанаар Монгол Улсын нэгдсэн төсвийн 2016 оны төсвийн хүрээний мэдэгдэл, 2017-2018 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж эхлээд байна.
Тус төсөлд эдийн засгийн өсөлт ирэх онд ДНБ-ийн 4.1 хувьтай тэнцэнэ гэж заасан юм. Үүнийг УИХ-ын гишүүн Ч.Хүрэлбаатар бодитой тооцоогүй, үүнээс болж төсвийн орлого бодитойгоор тавигдахгүй 1 их наяд төгрөгийн алдагдал эргэн үүсч, хүндрэл үүсгэнэ гэж үзэж байна.
Үүний өмнө УИХ Төрөөс мөнгөний бодлогын талаар 2016 онд баримтлах үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийж, энэ хүрээнд зээлийн хүүг 1-3 хувиар бууруулах даалгаврыг Монголбанк, Засгийн газарт өгөхөөр боллоо.
Чуулганы нэгдсэн хуралдаан үргэлжилж байна.
Хил хамгаалах ерөнхий газрын Хилийн тагнуулын газрын хурандаа Н.Адъяа, Ч.Дашдорж нарыг Тагнуулын ерөнхий газрын Мөрдөн байцаах хэлтсээс эрүүгийн хэрэг үүсгэн шалгаж эхэлжээ. Баттай эх сурвалжийн мэдээлснээр тэднийг улсын нууцад хамаарах хэрэгт холбогдуулан шалгаж эхэлсэн байна. Одоогоор мөрдөн байцаалт явагдаж байгаа учраас дэлгэрэнгүй мэдээлэл өгөх боломжгүй гэж эх сурвалж хэлсэн юм. Хэрэгт холбогдсон хурандаа нарыг өчигдөр орой ШШГЕГ-ын харьяа 461 дүгээр ангид саатуулжээ.
УИХ-ын баасан гаригийн хуралдаанд Ерөнхий сайд Ч.Сайханбилэг Шилэн дансны тухай хуулийн хэрэгжилтийн талаар мэдээлэл хийлээ. Тэр мэдээллийн үеэр УИХ-ын гишүүн Д.Оюунхорол сэтгүүл зүйн амин чухал сэдвийг хөндсөн. Д.Оюунхорол гишүүн “Засгийн газар хийсэн ажлаа ард түмэнд сурталчилж, тайлагнаж байх хэрэгтэй. Ингэхгүй бол ард түмэн Засгийн газар хоёр хоорондоо хөндийрнө. Засгийн газар юу хийж байгааг ард түмэн мэдэхгүй байна. Тиймээс хийсэн ажил, баталсан хууль тогтоомжоо хэвлэл мэдээллийн хэрэгслээр сурталчлахад мөнгө төсөвлөж байх хэрэгтэй. Тэр хаалтын гэрээ гээд яриад байдаг юм чинь огт байдаггүй юм билээ. Хийсэн ажлаа сурталчилж гэрээ хийхийг л тэгж хэлдэг юм байна. Ихэнх хэвлэл мэдээлэл хувийнх байдаг учраас ингэхээс ч өөр аргагүй” гэж хэлсэн.
Чингис хааны мэндэлсэн өдөр буюу Монгол бахархалын өдөр энэ сарын 12 -нд тохиож, бүх нийтээр амрахаар болсон. Үүнтэй холбоотойгоор Замын-Үүд болон Хятадын Эрээн хотын боомт 12-нд амрах юм байна. Харин энэ чиглэлийн олон улсын галт тэрэг хуваарийн дагуу иргэдэд үйлчлэх аж. Хойд хилийн хамгийн том боомт болох Алтанбулаг нөгөөдөр хуваарийн дагуу буюу 24 цагаар ажиллах юм байна. 
Даваа гаригийн 15 цагийн орчимд уурхайн гүнд нэг хүн ухаан алдаад уначихлаа гэсэн дуудлагыг Налайх дүүрэг дэх Онцгой байдлын газрын уул уурхайн аврах анги хүлээн авчээ. Дуудлага авсан даруйдаа гурван минутын дотор аврах ангийнхан газар дээр нь очиход уурхайн гүнд нэг биш гурван хүн ухаан алдсан байжээ. Ийнхүү тэднийг уурхайн хонгилоос цаг алдалгүй гаргасан хэдий ч нэг нь ухаан орж, хоёр хүн нь нас баржээ. Энэ талаар Онцгой байдлын газрын уул уурхайн аврах ангийн салбарын дарга Н.Бямбүрэнгээс тодруулахад “Барагцаалбал 30 гаруй метрийн гүн уурхайн нүхэнд гурван хүн ороод, ухаан алдсан байсан. Нэг нь түрүүлж ороод ухаан алдчихсан гэсэн. Түүнийг аврах гэж араас нь хоёр залуу орсон байгаа юм. Агааргүй орчинд бүгчимдэн, гурвуулаа ухаан алдсан. Тэднийг гаргаж ирсэн даруйдаа бид хиймэл амьсгал болон зүрхний массаж хийн анхны тусламж үзүүлсэн. Нэг нь ухаан орсон ч хоёр нь нас барсан” гэсэн юм.
Өчигдөр Хүн амын хөгжил, нийгмийн хамгааллын сайд С.Эрдэнэ нийтлэлч Баабарыг хуурамч бичиг баримтаар тэтгэврээ тогтоолгосныг нь нийгмийн даатгалын газрынхан илрүүлсэн гэж мэдээлсэн. Өнөөдөр Нийгмийн даатгалын газар албан ёсны твиттер хуудсаараа дамжуулан “Бат-Эрдэнийн Батбаяр буюу олноо Баабар гэж алдаршсан нийтлэлч хуурамч бичиг баримт бүрдүүлж тэтгэврээ тогтоолгожээ. Баабар гуай минь дээ” хэмээн жиргэж, нийгэмд нэлээдгүй шуугиан тарив. Энэ асуудалтай холбоотойгоор эх сурвалжаас тодруулахад “Баабар нийтлэлч энэ долоо хоногт багтаан сэтгүүлчдэд нэгдсэн мэдээлэл өгнө” гэсэн юм.
Дэлхийн банкнаас Монголын эдийн засгийн тойм тайлангаа гаргажээ. Энэ удаагийн тайландаа Монгол Улсын дотоодын нийт бүтээгдэхүүний жилийн өсөлт 2.3 хувьд хүрнэ гэж тэмдэглэжээ. Харин төсөөлөл буурсан шалтгааныг энэ намар тариаланчид ургацынхаа багагүй хувийг алдсан. Дээрээс нь аж үйлдвэрийн салбараас олох ашиг таамагласнаас бага байсан зэрэг нөлөөлсөн хэмээн тайлбарлалаа. Гол нь ирэх онд Монгол Улсын эдийн засгийн өсөлт саарах магадлалтай гэв. Ялангуяа уул уурхайн салбарын бууралт ирэх оны эдийн засагт томоохон дарамт болно гэдгийг санууллаа. Ирэх онд зөвхөн дотоодын нөхцөл байдлаас гадна, гаднын нөлөөлөл багагүй бий гэв. Ялангуяа экспортын гол зах зээл болсон БНХАУ эдийн засгийн өсөлтийн цаашдын чиг хандлага тодорхойгүй энэ үед байдал хаашаа ч эргэж мэдэхийг сануулж буй юм.
Мэргэжлийн сүмо бөхийн Их аварга Хакүхо М.Даваажаргалын нэрэмжит “Хакүхо цом” сүмо бөхийн өсвөр үеийн аварга шалгаруулах тэмцээн өнгөрөгч ням гаригт буюу 11 дүгээр сарын 8-ны өдөр Спортын төв ордын “А” зааланд боллоо. “Хакүхо сан”-гаас санаачлан зургаа дахь жилдээ зохион байгуулсан бөгөөд энэ удаагийн тэмцээнд хот, хөдөөгийн нийт 229 сүмоч хүүхэд 8, 9, 10, 11, 12, 13-15 гэсэн зургаан насны ангиллаар өрсөлдлөө. Энэхүү тэмцээний нас насны ангилалд медальт байр эзэлсэн болон амжилттай барилдсан хүүхдүүдийг бэлтгэлд хамруулж, 2016 оны хоёрдугаар сард Японы Токио хотноо зохиогдох “HAKUHO CUP” олон улсын тэмцээнд оролцох найман хүүхдийг сонгон шалгаруулах юм байна.
Дэлхийн Сэргээшийн эсрэг Агентлаг (WADA) Оросын тамирчдыг сэргээш хэрэглэсний төлөө олон улсын тэмцээн уралдаануудад оролцохыг хориглох хэрэгтэй гэсэн мэдэгдлийг өчигдөр хийжээ. Үүнээс гадна Оросын дундын зайн гүйлтийн таван тамирчин, дасгалжуулагч болон албаны нийт таван хүнийг бүх насаар нь тэмцээн уралдаанд оролцохыг нь хориглох санал гаргасан байна.
УИХ-ын чуулганы үдээс өмнөх хуралдаан завсарлалаа. Хуралдааны эхэнд Монгол Улсын Засгийн газар Азийн хөгжлийн банк хооронд байгуулж буй хөнгөлөлттэй зээлийн ерөнхий хэлэлцээрүүдийг хэлэлцэж, соёрхон баталсан. Дараа нь Төрөөс мөнгөний талаар 2016 онд баримтлах бодлогын үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийсэн. Хэлэлцүүлгийн явцад гишүүд банкуудын өнөөгийн нөхцөл байдал, чанаргүй зээлийн өрийн үзүүлэлт, улсын валютын нөөц болон зээлийн хүүг бууруулах бодлогын талаар байнгын хорооны дарга Ж.Батсууриас асуулт асууж, хариулт авсан. Ингээд зарчмын зөрүүтэй гурван саналын томъёоллоор санал хураалгаж, дэмжсэнээр чуулганы үдээс өмнөх хуралдаан завсарлалаа. Үдээс хойших хуралдаанаар Монгол Улсын төсвийн төсөл, дагалдан өргөн мэдүүлсэн бусад хуулийн төслүүдийг хэлэлцэнэ.