“Нийтийн үйлчилгээний Улаанбаатар нэгтгэл”-ийн ажилчид “Цас цэвэрлэгээний шинэ менежмент”-ийг хэрэгжүүлж эхэлж байгаатай холбогдуулж өнгөрсөн баасан гаригт хэвлэлийнхэнд мэдээлэл хийлээ. Урьд нь цас орсны маргааш цэвэрлэх тохиолдол байсан. Харин цэвэрлэгээний шинэ менежментийг нэвтрүүлж эхэлснээр цас орсон даруйд шөнийг ч үл хамааран шууд ажиллах бөгөөд цасыг маш хурдан цэвэрлэж халтиргаа, гулгаа үүсэхээс урьдчилан сэргийлж ажиллана. Мөн давс бодис цацдаг 13 машины үйлчилгээ зэрэг явна гэж Нийтийн үйлчилгээний Улаанбаатар нэгтгэлийн гүйцэтгэх захирал Д.Энхсайхан мэдэгдлээ.
Улаанбаатар нэгтгэлийн ажилчид ажлын найман цагаар ажилладаг. Харин цэвэрлэгээний шинэ менежментийн дагуу 24 цагийн турш зам цэвэрлэгээний үйлчилгээ үзүүлэхээр болжээ. Цас орсон даруйд, цаг харгалзахгүй цэвэрлэгээ явуулна гэдгийг ажилчид хэлж байв. Түүнчлэн баруун, зүүн салбарын байрандаа замын халтиргааг арилгах бодис болох давсны нөөцийг бүрдүүлж, иргэд, аж ахуй нэгжид кг-ыг нь 400 төгрөгөөр худалдаалахаар болжээ. Ингэснээр орчин тойрныхоо халтиргаа гулгааг арилгах нөхцлийг аж ахуйн нэгж, байгууллагуудад бүрдүүлж өгч байгаа аж.
“Иргэд Улаанбаатар хотын бүх гудамж талбайг манай нэгтгэл хариуцдаг гэж буруу ойлгоод байна. Нийслэлийн 315 км замыг бид хариуцаж ажилладаг. Дүүргүүдийн тохижилт үйлчилгээний компани, орон сууцны СӨХ-үүд орчин тойрныхоо замын цэвэрлэгээг хариуцдаг. Мөн аж ахуй нэгж байгууллагууд 50 метр газраа цэвэрлэх үүрэгтэй” гэдгийг Улаанбаатар нэгтгэлийн ажилчид хэвлэлийн хурлын үеэр иргэдэд сануулж хэлэв.
Эрдэнэт хотын цэвэрлэх байгууламжийн одоогийн хүчин чадал нь хоногт 24 мянган метр куб бохир усыг цэвэрлэдэг. Шинэ барьж байгаа өргөтгөл яг ийм хэмжээний хүчин чадалтай байх юм. Хамгийн гол нь лаг боловсруулах технологийг шийдсэн байна. Энэ нь өдгөө Улаанбаатарт тулгарч байгаа цэвэрлэх байгууламжийн бохир шиг үнэр ялгаруулахгүй ажээ.
Монгол Улсын Засгийн газрын 64 дэх ээлжит хуралдаан өнөөдөр буюу 2015 оны арваннэгдүгээр сарын 16-ны 16.00 цагт Засгийн газрын хуралдааны танхимд болно. Тус хуралдаанаар дараах асуудлуудыг хэлэлцэх аж.
Нийслэлийн Засаг даргын мөрийн хөтөлбөрийн хэрэгжилтийг хангах ажлын хүрээнд нийслэлийн Жижиг дунд үйлдвэрлэлийг дэмжих төвөөс жил бүр жижиг дунд үйлдвэр эрхлэгч иргэд, аж ахуйн нэгжүүдийн бараа бүтээгдэхүүнийг зах зээлд таниулан сурталчлах, борлуулалтыг нэмэгдүүлэх, хэрэглэгч захиалагчтай холбож өгөх зорилгоор “Улаанбаатарт үйлдвэрлэв” үзэсгэлэн худалдааг зохион байгуулдаг уламжлалтай. “Улаанбаатарт үйлдвэрлэв – 2015” үзэсгэлэн худалдаа энэ сарын 20, 21, 22-ны өдрүүдэд “Мишээл экспо” төвд болох бөгөөд тус үзэсгэлэнд нийслэлийн 140 гаруй жижиг дунд үйлдвэрлэл эрхлэгч өөрсдийн үйлдвэрлэсэн бараа бүтээгдэхүүнээр оролцох юм гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Оюутнуудад сар бүр олгодог үндэсний тэтгэлэг буюу 70200 төгрөгийг ирэх сард улирлаар нь олгохоор болсон байна. Энэ улирлаас эхлэн олгох тэтгэлгийн хэмжээнд өөрчлөлт орсон юм. Тодруулбал, баклаврын хөтөлбөрт суралцагч 3.0-оос доошгүй голчтой оюутанд олгоно. Магистрын хөтөлбөрт шинээр элсэгчийн баклаврын дипломын голч дүн 3.2 оос доошгүй байх ба докторын 3.5 аас доошгүй гэж заажээ. Мөн урамшууллын тэтгэлэг авах суралцагчийн голч дүн 3.4 болон түүнээс дээш байсныг 3.6 болон түүнээс дээш, 75 хувийн урамшууллын тэтгэлэг авах өдрийн ангийн магистрант, докторантын голч дүнг 3.8 аас дээш болгох өөрчилсөн байна.
Аравдугаар сарын сүүлийн хоёр долоо хоногийн хугацаанд зэсийн ханш багагүй өсөлттэй байсан хэдий ч тогтворгүй хэвээр байна. Сүүлийн дөрвөн сарын хугацаанд ам.долларын ханш 1998-2001 төгрөгийн хооронд хэлбэлзэлтэй байсан бол өнгөрөгч долоо хоногоос эхлэн ам.долларын ханш бага зэрэг суларч байна. Амралтын өдрүүдэд ам.доллар 1991 төгрөгтэй тэнцжээ. Өнөөдрийн байдлаар ам.доллар арилжааны банкуудад 1989-1994 төгрөгөөр арилжиж байгаа бол “Найман шарга” арилжааны төвд 1988-1991 төгрөгөөр арилжиж байна.
Ази тивийн футзалын аварга шалгаруулах тэмцээний зүүн бүсийн урьдчилсан шатны хэсгийн тоглолтууд Улаанбаатар хотноо өнөөдөр гурав дахь өдрөө болно. Тэмцээний эхний өдөр ХонгКонгийг хожиж, гараагаа амжилттай эхлүүлсэн манай улсын шигшээ өчигдөр БНСУ-ын багт хожигдсон. Өнөөдөр манай шигшээ баг тоглолтгүй бөгөөд маргааш хэсгийн гурав дахь тоглолтоо БНХАУ-ын багтай хийх юм. Одоогоор хүснэгтийг БНХАУ, БНСУ тэргүүлж, Тайвань, Монгол, ХонКонг удаалж байна.
Баянзүрх дүүргийн 10 дугаар хорооны нутаг дэвсгэрт үйл ажиллагаа явуулдаг “Амгалан” худалдааны төвийн урд талд дугуй засварын газрын байр өчигдөр өглөө шатжээ. Гал унтраах, аврах 63 дугаар ангийн 7 албан хаагч ажиллаж уг галд өртөж нас барсан иргэн Ч /28 настай, эрэгтэй/-ын цогцсыг гаргаж дүүргийн Цагдаагийн газрын 3 дугаар хэлтсийн бүрэлдэхүүнд шилжүүлэн өгсөн байна.