Өршөөлийн хууль хэрэгжиж, 2071 хүн хорих ангиас суллагдсан. Өршөөгдөгсдийн 1558 нь одоогоор гэртээ очсон гэдгээ цагдаагийн байгууллагад албан ёсоор мэдэгдэж, бүртгүүлсэн байна. Өршөөгдсөн иргэдийг дахин гэмт хэрэгт холбогдохоос нь урьдчилан сэргийлж, Хөдөлмөрийн яам харьяа хөдөлмөрийн хэлтэс, ажил олгогчтой холбон ажлын байраар хангана гэж мэдэгдсэн. Тэгвэл өнөөдрийн байдлаар суллагдсан иргэдийн 300 гаруй нь өөрийн харьяа хөдөлмөрийн хэлтэстээ бүртгүүлж, ажилд орох анкет бөглөжээ. Харин 100 гаруй нь цалинтай л бол өнөө маргаашгүй ажилд ороход бэлэн гэсэн хүлээлттэй байна. Хүйтний улирал эхэлж, барилга бүтээн байгуулалтын ажил зогсож, ажлын байр хомс тал руугаа шилжсэн. Одоо эрэлттэй ажлын байр нь үйлчилгээ, боловсруулах үйлдвэрийн салбарт гарч буй аж.
Хөдөлмөрийн яамнаас өршөөгдсөн иргэдтэй ганцаарчилсан уулзалтуудыг хийж, тухайн хүн яг ямар мэргэжлээр, аль салбарт хэдэн төгрөгийн цалинтай хөдөлмөр эрхлэх сонирхолтой байна вэ гэдгийг сонсож, ярилцан холбогдох зааварчилгааг, зөвлөгөөг өгч эхэлжээ. Нөгөө талдаа ажил олгогчидтой тохиролцож, нэг жилээс дээших хугацаанд суллагдсан иргэдийг тогтвортой ажлын байраар хангаач гэсэн санал Хөдөлмөрийн яамнаас тавьжээ. Хэрэв ажил олгогч тухайн иргэдийг найдвартай, тогтвортой ажлын байраар хангавал Хөдөлмөр дэмжих тухай хуульд зааснаар хөдөлмөрийн хөлсийг 10 дахин нэмэгдүүлсэнтэй тэнцэхүйц мөнгөн дүнгийн урамшууллыг нэг жилд авах боломжтой.
Нийслэлийн хэмжээнд энэ сарын 15-наас 16-нд шилжих шөнө их хэмжээний цас орж, халтиргаа гулгаа үүссэн. Тиймээс өнгөрсөн шөнийн 03:00 цагаас эхлэн нийслэлийн 6 дүүргийн 214 ажилтан 18 машинаар 92.4 тонн бодис, 131.6 тонн давсыг нийтийн эзэмшлийн зам талбайд цацжээ.
УИХ дахь МАН-ын бүлэг өнөөдрийн хуралдаанаараа Үндсэн хуулийн өөрчлөлтийг хэлэлцээд дэмжих боломжгүй хэмээн үзжээ.
Монгол Улсын Ерөнхийлөгч Ц.Элбэгдорж Франц улсад айлчлал хийхээр өнөөдөр эх орноосоо мордлоо. Албан ёсны айлчлал арваннэгдүгээр сарын 18-ны Лхагва гаригт эхэлнэ. Айлчлалын үеэр Монгол улсын Ерөнхийлөгч Ц.Элбэгдорж, Франц улсын Ерөнхийлөгч Франсуа Олланд нар хэлэлцээ хийх юм. Мөн Монгол-Францын бизнес форум зохиогдоно.
“Их 20”-ийн дээд хэмжээний чуулга уулзалтад оролцож буй төрийн тэргүүнүүд Парист болсон террорист халдлагад өртөж амь үрэгдэгсдийн гэгээн дурсгалыг хүндэтгэж, нэг минут чимээгүй зогсон эмгэнэл илэрхийлэв. Мөн тэд “Исламын улс” бүлэглэлийн эсрэг цэргийн ажиллагааг эрчимжүүлэх талаар санал нэгдсэн талаар “The Guardian” уламжилжээ. 
Марокко улсын Касабланка хотноо арваннэгдүгээр сарын 13-15-нд самбо бөхийн Дэлхийн аварга шалгаруулах тэмцээн болсон. Энэ удаагийн ДАШТ-д 82 орны тамирчин оролцсоноос манай улсаас зургаан тамирчин багш, дасгалжуулагчийн хамт оролцож, нэг хүрэл медаль хүртлээ. Тодруулбал, эмэгтэйчүүдийн 64 кг-д Т.Баттөгс ДАШТ-ий медалийн тавцанд зогсож, ДАШТ-ий долоо дахь медалиа зүүлээ. 
УИХ-ын гишүүн Ц.Даваасүрэн Хууль зүйн сайд Д.Дорлигжавт Увс аймгийн Баруунтуруун суман дахь Хилийн 0311 дүгээр ангид болсон үйл явцтай холбоотой асуудлаар асуулга хүргүүлжээ. Тэрбээр асуулгадаа Хууль зүйн сайдад өмнө нь эл асуудлаар 2013 оноос хойш 4 удаа асуудлыг шийдвэрлэж өгөх хүсэлт бүхий албан тоот хүргүүлж байсан гэжээ. Өөрөөр хэлбэл, 2012 оноос хойш нийтдээ Хилийн 0311 дүгээр ангид 19-21 насны 5 залуу нас барж, 5 залуугийн биеийн байдал хүнд, бусдын асаргаанд байгаа асуудалд салбарын сайдыг тодорхой хариу өгөх нь зүйтэй хэмээн тэрбээр үзэж байгаагаа албан тоотдоо илэрхийлсэн байна. Цаашид Хөвсгөл аймгаас тус ангид цэрэг татлага явуулахгүй гэж байгаа ч өөр аймгийн хэн нэгэн эцэг эхийн хүүхдэд ийм байдал тохиолдохгүй гэх баталгаа байхгүй хэмээн үзэж Ц.Даваасүрэн гишүүн, илүү тодорхой хариу нэхэж байгаа аж. Мөн тэдгээр хүүхдүүдийн эцэг эхээс Хил хамгаалах ерөнхий газарт болон салбарын сайдад удаа дараа өргөдөл явуулж байсан боловч тодорхой хариу аваагүй гэнэ. Иймээс асуулгын хариуг УИХ-ын чуулганы нэгдсэн хуралдаанаар сонсохоор төлөвлөөд байна гэлээ.
2015 оны 11 дүгээ сарын 16-ны 08-20 цаг хүртэл
Өнгөрсөн
Төр,