Month: November 2015

Монголын Хуульчдын холбооны Ерөнхийлөгчөөс Шүүгчийн эрх зүйн байдлын тухай хуулийн 15 дугаар зүйлийн 15.2 дахь хэсгийг үндэслэн нэр бүхий 13 хуульчийг шүүгчээр томилохоос татгалзсан шийдвэр болон татгалзах болсон үндэслэл, шалтгааныг тодруулахаар Монгол Улсын Ерөнхийлөгч Ц.Элбэгдоржид албан бичиг хүргүүлжээ.

Мөн эдгээр 13 хуульчийг шүүгчээр дахин томилуулах тухай саналыг Ерөнхийлөгчид өргөн мэдүүлэх, 34 шүүгчийг өөрийнх нь саналыг үл харгалзан өөр шүүхэд шилжүүлэн томилсоныг залруулахыг хүссэн албан бичгийг Шүүхийн ерөнхий зөвлөлийн дарга Н.Лүндэндорж, Монголын Хуульчдын холбооны төлөөллөөр сонгогдсон Шүүхийн ерөнхий зөвлөлийн гишүүн Б.Сарантуяа нарт илгээсэн байна. Тус албан бичигт Шүүхийн ерөнхий зөвлөлөөс хууль бус үндэслэлээр шүүгчдийг чөлөөлүүлэх саналыг Монгол Улсын Ерөнхийлөгчид өргөн мэдүүлж буй байдлыг таслан зогсоох талаар дорвитой арга хэмжээ авч ажиллахыг хүсчээ.

Учир нь Шүүх байгуулах тухай хууль 2013 оны нэгдүгээр сарын 24-ний өдөр шинэчлэн батлагдсантай холбогдуулан Шүүхийн ерөнхий зөвлөлөөс санал болгосны дагуу Монгол Улсын Ерөнхийлөгчийн 2013 оны 198, 199 дүгээр зарлигаар зарим шүүхийн ерөнхий шүүгч, шүүгчийг албан тушаалаас чөлөөлж, буцаан томилохдоо 12 хуульчийг шүүгчээр буцаан томилоогүй, 34 шүүгчийг өөрийнх нь саналыг үл харгалзан өөр шүүхэд шилжүүлэн томилсон билээ. Үүний дараагаар Шүүх байгуулах тухай хуулийн шинэчилсэн найруулга 2015 оны зургадугаар сарын 19-ний өдөр дахин батлагдсантай холбогдуулан Монгол Улсын Ерөнхийлөгчийн 2015 оны 110, 111 дүгээр зарлигаар зарим шүүхийн ерөнхий шүүгч, шүүгчийг албан тушаалаас чөлөөлж, буцаан томилохдоо нэр бүхий хуульчийг шүүгчээр дахин томилоогүй юм.

Иймд Монголын Хуульчдын холбоо нь шүүхийн бүтэц, зохион байгуулалтын өөрчлөлттэй холбогдуулан шүүгчдийг албан тушаалаас нь чөлөөлж, буцаан томилохдоо томилохоос татгалзах жишиг тогтоох, өөрийнх нь саналыг үл харгалзан өөр шүүхэд шилжүүлэн томилж байгаа нь шүүхийн бие даасан байдал, шүүгчийн хараат бус байдлыг ноцтой зөрчсөн үйлдэл болсон гэж үзэж дээрх албан бичгүүдийг илгээж байгаа ажээ.

УИХ-ын Хууль зүйн байнгын хорооны өнөөдрийн хуралдаанаар Шүүх байгуулах тухай хуулийн I, II зүйлийн зарим заалт Үндсэн хуулийн холбогдох заалтыг зөрчсөн эсэх маргааныг хянан шийдвэрлэсэн тухай Үндсэн хуулийн цэцийн 2015 оны 14 дүгээр дүгнэлтийг хэлэлцсэн юм.

Монгол Улсын их хурлаас 2015 оны зургадугаар сарын 19-ний өдөр баталсан Шүүх байгуулах тухай хуулийн 1, 2 дугаар зүйлийн зарим заалт Монгол Улсын Үндсэн хуулийн Дөчин наймдугаар зүйлийн нэгдэх хэсгийн холбогдох заалтыг зөрчсөн эсэх тухай маргааныг Үндсэн хуулийн цэцийн дунд суудлын хуралдаанаараа 2015 оны арваннэгдүгээр сарын 11-ний өдөр хянан хэлэлцэж 14 дүгээр дүгнэлт гаргажээ.

Шүүх байгуулах тухай хуулийн нэгдүгээр зүйлээр иргэний болон эрүүгийн хэргийн давж заалдах шатны шүүхийг, хоёрдугаар зүйлээр дүүргийн иргэний болон эрүүгийн хэргийн анхан шатны шүүхийг байгуулахдаа нэрийн хувьд “аймгийн” болон “дүүргийн” гэж томьёолсон боловч энэ нь 2-3 аймгийн дунд давж заалдах шатны нэг шүүх, 2-3 дүүргийн дунд анхан шатны нэг шүүхтэй байх агуулгыг илэрхийлж байгаа бөгөөд энэ нь Үндсэн хуульд бэхжүүлсэн засаг захиргаа, нутаг дэвсгэрийн харьяаллын зарчмаар зохион байгуулагдах Монгол Улсын шүүхийн үндсэн тогтолцоог үгүйсгэж, иргэний үндсэн эрхийг баталгаатай эдлүүлэх, төрийн үйлчилгээг иргэдэд ойртуулах Үндсэн хуулийн суурь зарчмыг алдагдуулж, Монгол Улсын Үндсэн хуулийн Дөчин наймдугаар зүйлийн 1 дэх хэсгийн заалтыг зөрчсөн байна хэмээн Үндсэн хуулийн цэц уг хуралдаанаараа үзсэн байна.

Цэцийн дүгнэлттэй холбогдуулан гишүүд үг хэлж, байр сууриа илэрхийлсэн. УИХ-ын гишүүн Ц.Нямдорж, Цэцийн шийдвэрийг хүлээн авч, алдаагаа засах хэрэгтэй хэмээсэн бол УИХ-ын гишүүн З.Энхболд энэ асуудлыг Үндсэн хуулийн цэцийн их суудлын хуралдаанаар хэлэлцэх үеэр танилцуулах баримтуудаа цуглуулан, үндэслэлээ сайн боловсруулах хэрэгтэй гээд Үндсэн хуулийн цэцийн энэ шийдвэр Үндсэн хуульд өөрчлөлт оруулах хэрэгтэй гэдгийг харуулж байна гэж хэлсэн.

Үндсэн хуулийн цэцийн дунд суудлын хуралдаанд УИХ-ын итгэмжлэгдсэн төлөөлөгчөөр оролцсон УИХ-ын гишүүн Х.Тэмүүжин, Үндсэн хуулийн цэцийн хуралдааны үеэр тус цэцийн гишүүд үндэслэл, тайлбар сонсохгүй, шинжлэх ухааны яриа, судалгааны тоо баримтыг авч хэлэлцэхгүйгээр шийдвэр гаргасан хэмээсэн. Ингээд Үндсэн хууль зөрчсөн гэж үзсэн Шүүх байгуулах тухай хуулийн дээр дурдсан заалт тус бүрээр санал хураалт явууллаа. Байнгын хорооны хуралдаанд оролцсон гишүүдийн олонх Шүүх байгуулах тухай хуулийн 1 дүгээр зүйлийн Нэг.Иргэний хэргийн давж заалдах шатны шүүх гэсэн хэсгийн 1-8 дахь заалт, Хоёр.Эрүүгийн хэргийн давж заалдах шатны шүүх гэсэн хэсгийн 1-8 дахь заалт, 2 дугаар зүйлийн Нэг.Дүүргийн Иргэний хэргийн анхан шатны шүүх гэсэн хэсгийн 1, 2, 4 дэх заалт, Хоёр.Дүүргийн Эрүүгийн хэргийн анхан шатны шүүх гэсэн хэсгийн 1, 2, 4 дэх заалт нь Үндсэн хууль зөрчсөн гэж үзсэн Үндсэн хуулийн цэцийн дүгнэлтийг хүлээн зөвшөөрөх боломжгүй гэж үзэн санал, дүгнэлтээ чуулганы нэгдсэн хуралдаанаар хэлэлцүүлэхээр болсон юм.

Энэ өдрийн хуралдаанаар Иргэний хуулийн 171.2, Үл хөдлөх эд хөрөнгийн барьцааны тухай хуулийн зарим заалт Үндсэн хууль зөрчсөн эсэх тухай маргааныг хянан хэлэлцэх Үндсэн хуулийн цэцийн их суудлын хуралдаанд оролцох УИХ-ын итгэмжлэгдсэн төлөөлөгчөөр УИХ-ын гишүүн Ж.Батзанданг томиллоо.

Монгол Улсын Шадар сайд, Монгол Улсын Онцгой комиссын дарга
Ц.Оюунбаатар “Зууны мэдээ” сонины хамт олонд Галын аюулгүй байдлын
тухай хуулиар хүлээсэн үүргээ биелүүлж, эрсдлээс сэргийлж ажилласанд нь талархал
дэвшүүлжээ.

Уг талархалд, ““Зууны мэдээ” сонины Үндэсний мэдээллийн төвд
“Эрдэнэс Тавантолгой” ХК-ийн ажилчид хэвлэлийн бага хурал хийж, энэ үеэр иргэн
С.Эрдэнэ шатамхай шингэн ашиглан өөрийгөө галдан шатаахыг оролдож, өөрийн болон
бусдын амь нас, эд хөрөнгөд ноцтой аюул учруулах нөхцөл үүсгэсэн байна.

Энэ үед танай “Зууны мэдээ” сонины удирдлага, хамт олон Галын
аюулгүй байдлын тухай хуулиар хүлээсэн үүрэг, байгууллагын дотоод журам,
ОБЕГ-ын зүгээс тавигдсан шаардлагыг ханган ажиллаж, эрдэнэт хүний амь нас
эрсдэх, галын онцгой аюул нүүрлэх, их хэмжээний хохирол амсах, олон иргэд эрүүл
мэнд, амь насаараа хохирох зэрэг олон эрсдлээс сэргийлж ажилласанд Онцгой
байдал эрхэлсэн сайдын хувьд талархал илэрхийлж байна.

Танай туршлагаар бүх аж ахуй нэгж, албан байгууллага аливаа гамшиг
осол, галын аюулаас урьдчилан сэргийлэх, түүнтэй тэмцэх, гамшгийн үед ажиллах
тоног төхөөрөмж, галын хор бэлдэх, ажилчиддаа осол гамшгийн үед ажиллах дадал
олгох, сургалт явуулах ажлыг тогтмол гүйцэтгэж байхыг анхааруулж байна”
гэжээ

Өнөөдөр Шийдлийн цагаар Ерөнхий сайд Ч.Сайханбилэг “Чингис хаан” олон улсын нисэх буудал дахь Транзит танхимын бүтээн байгуулалттай танилцлаа.

Ирэх оны долдугаар сард Монгол Улсад зохион байгуулагдах АСЕМ-ын Дээд түвшний 11 дэх уулзалтад 51 орны төр засгийн тэргүүн, олон улсын байгууллагын удирдлага, хэвлэл мэдээлэл, ёслол хамгаалалт зэрэг бусад асуудал хариуцсан нийт 3500-4000 гаруй зочин төлөөлөгч ирэх төлөвтэй байгаа. Үүнтэй холбоотойгоор Засгийн газраас “Чингис хаан” олон улсын нисэх буудалд ийнхүү транзит заал барих, зочдын танхимыг өргөтгөх, тохижуулахад шаардагдах хөрөнгийг гарган ажиллаж байгаа юм.

2015 оны эхний 10 сарын байдлаар ИНЕГ-ын хөрөнгө оруулалтаар “Чингис хаан” Олон улсын нисэх буудалд хийгдсэн ажил болоод Зорчигч терминалын Олон улсын зорчигчдын танхимуудыг өргөтгөх транзит заал шинээр зохион байгуулах, 4С ангиллын агаарын хөлгийн есөн зогсоол нэмж барих, хөөрч буух хучилттай зурвасны хүчитгэлийн ажлын явцыг танилцууллаа. Эдгээр ажлын гүйцэтгэл 90-100 хувьтай яваа ажээ

Ирэх онд нийслэл 698.8 тэрбум төгрөгийн орлого олно гэж тооцон өнөөдөр 2016 оны төсвийн төслөө хотын иргэддээ танилцуулж, хэлэлцүүлэг өрнүүллээ. 2015 онд Улаанбаатар хотын төсөв 637 тэрбум төгрөгөөр батлагдсан ч оны сүүлээр дээрх төсвийн алдагдал 116 тэрбумд хүрчээ. Энэ нь нийслэлийн өмчит барилга, объект зэргийн өмч, хувьчлал хийгдээгүйтэй холбоотой юм байна. Дээрх төсвийн алдагдлыг ирэх оны төсөвт шилжүүлж, 2016 оны төсвийг 61 тэрбум төгрөгөөр илүү төсөвлөсөн гэдгээ хотын санхүү хариуцсан дарга нар тайлбарлалаа. Ирэх оны төсвийн нийт орлогын 60 орчим хувийг Хүн амын орлогын албан татвараас, үлдсэнийг нь газар, өмч хувьчлалаас олж, төвлөрүүлнэ гэж тооцсон байна. Мөн ирэх онд төвлөрөх орлогынхоо 200 тэрбум орчим төгрөгийг хотын бүтээн байгуулалт, тохижилтын ажилд зориулна гэж төлөвлөжээ. Тухайлбал, Налайх чиглэлийн авто замыг шинэчлэн барина. “Их Монгол”, Баянмонгол хороолол дахь гудамж, замыг засварлаж тохижуулна. Мөн Авто тээврийн замын хажууд шинээр давхар гүүр барьж, Туул гол дээгүүрх гүүрийг шинэчилж, дахин гүүр нэмж барихаар болжээ.

Боловсролын чиглэлд оруулах хөрөнгө оруулалтыг багасгахгүй нэмнэ. Ингэснээр ирэх онд шинээр аравгаруй сургууль, цэцэрлэгийн барилгыг нэмж барина. Харин улсын төсвөөс ирэх онуудад концессын гэрээгээр хийгдэх 72 сургууль, цэцэрлэг барих газар, дэд бүтцийн асуудлыг хот хариуцан хийх юм. Үүнээс ирэх онд 30 орчим сургууль, цэцэрлэгийн барилга барих газар, дэд бүтцийг шийдэж, ажлыг эхлүүлнэ гэсэн дүр зурагтай байна. Мөн Шарга морьт чиглэлийн зуслангийн замын ажлыг дуусгаж, санхүүжилтийг нөхөн төлнө.

Төсвийн тухай хуулийн дагуу сум, дүүрэг, аймаг, хот тухайн оныхоо төсвийг иргэдтэйгээ хэлэлцэж, тэдний саналыг төсвийн зарцуулалтдаа тусгах учиртай. Энэ дагуу өнөөдөр дүүрэг, хороодын төлөөлөл нийслэлийн 2016 төсвийн төслийн хэлэлцүүлэгт оролцлоо. Ийнхүү иргэддээ хот ирэх оныхоо төсвийн төслийг танилцууллаа. Удахгүй энэ долоо хоногтоо багтаан Нийслэлийн иргэдийн төлөөлөгчдийн хуралд төсвийн төслөө өргөн барих юм. Улмаар ирэх долоо хоногт ИТХ-ын ээлжит бус хуралдааныг зарлаж, нийслэлийн 2016 оны төсвийн төслийг хэлэлцэж, татвар төлөгчдийн мөнгөөр ямар ажил хийх вэ гэдгээ иргэдийн саналд тулгуурлан жагсаана.