Month: October 2015

Японы 14 их сургууль оролцсон боловсролын яармаг өнөөдөр, маргааш
Монгол-Японы төвд хоёр өдөр зохиогдож байна. Зургаа дахь жилдээ болж буй
уг үзэсгэлэн жил ирэх тусам өргөжин, оролцогч сургуулийн тоо ч нэмэгдэж
байгаа аж. Яармагийн үеэр сургууль тус бүр дэлгэрэнгүй танилцуулга,
ганцаарчилсан зөвлөгөө өгөхөөс гадна, Японы Элчин сайдын яамнаас тус
улсын Засгийн газрын тэтгэлгийн талаар танилцуулга хийх юм байна. Мөн
Японд суралцан, эх орондоо ирэн амжилттай ажиллаж буй залуусын лекцийг
сонсох боломжтой гэсэн.

Үзэсгэлэнд Японы хамгийн олон Нобелийн шагналтан төрсөн Нагояагийн их
сургууль, тус улсын хамгийн анхны хувийн их сургууль Кэйо оролцож
байна. Түүнчлэн зарим сургуульд элсэхэд япон хэлний мэдлэг
шаардлагагүй, англи хэлээр суралцаж төгсөх боломжтой аж.

Японд суралцах монгол оюутны тоо жил ирэх тусам нэмэгдэж буйг холбогдох
албаныхан хэлсэн. Үүний шалтгаан нь Япон улс болон их сургуулиуд нь
өөрсдөө гадаад оюутныг дэмжих бодлого барьж буйтай холбоотой аж.

Малд яваад сураггүй болсон 16 настай
охин одоо болтол олдоогүй байгаа талаар Сэлэнгэ аймгийн онцгой байдлын
хэлтсээс мэдээлж байна. Сэлэнгэ аймгийн Орхон сумын Бэлэндалай багийн
“Цацын-Энгэр” гэдэг газар 16 настай, эмэгтэй М гэх хүүхэд энэ сарын 7-ны
өдөр 14:00 цагт малд яваад сураггүй болсон билээ. Энэ тухай дуудлага
мэдээлэл тус өдрийнхөө 19:40 цагт аймгийн Онцгой байдлын газарт ирсэн
бөгөөд түүнээс хойш эрлийн ажиллагаа гурав дахь өдрөө үргэлжилж байна.
Өчигдөр орой 19:10 цаг хүртэл хайж, үзэгдэх орчин хязгаарлагдсан тул
эрлийг түр зогсоон, өнөөдөр өглөөний 07:30 цагаас үргэлжлүүлж байна.

Охиныг эрэн хайх ажиллагаанд тус аймгийн
Онцгой байдлын газрын 11 албан хаагч, аймгийн Цагдаагийн газрын 17
албан хаагч, ар гэрийн хоёр иргэн, нийт 30 хүн, дөрвөн техник
хэрэгсэлтэйгээр эрэн хайх ажиллагааг зохион байгуулж буй юм.

Увс аймгийн Тариалан суманд газар хөдөлжээ. Тодруулбал сумын төвөөс хойд
зүгт 12 км-ийн зайд Хөхөө багийн нутагт “Хөхөөн уул” гэдэг газарт
/У-91086’ Ө-49088’/ өчигдөр өдрийн 12:14:06 цагт 3.7 магнитудын хүчтэй
газар хөдлөлт болсон тухай ООГФСХ-ээс мэдээлэв. Увс аймгийн Улаангом хот
болон Тариалан сумын нутаг дэвсгэрт газар хөдлөлтийн чичирхийлэл
мэдрэгдсэн ч учирсан хохиролгүй байна.

Монгол Улсын Ерөнхийлөгчийн зарлигаар
жил бүрийн тав, аравдугаар сарын хоёр дахь долоо хоногийн Бямба гарагийг
“Бүх нийтээр мод тарих үндэсний өдөр” хэмээн зарласан бөгөөд энэ өдөр
бүх нийтээр байгаль эхээ дээдлэх үзлийг түгээн дэлгэрүүлж, мод тарих,
ногоожуулах хөдөлгөөнийг олон нийтийн үйлс болгон өрнүүлж байгаа билээ.

Өнөөдөр 11:00 цагт Үндэсний цэцэрлэгт
хүрээлэнд Улсын Их Хурлын дарга З.Энхболд “Бүх нийтээр мод тарих” энэ
намрын арга хэмжээнд оролцож мод тарина. Мөн 13:00 цагт Сэлбэ голын
эрэгт байрлах цэцэрлэгт хүрээлэнд Монгол Улсын Ерөнхийлөгчийн зарлигаар
жил бүрийн тав, аравдугаар сарын хоёр дахь долоо хоногийн Бямба гарагийг
бүх нийтээр мод тарих үндэсний өдөр болгон зарласан дагуу мод тарина.

Монгол Улсад Гэрэл зургийн алба үүссэн
түүхт 80 жилийн ой энэ өдрүүдэд тохиж байна. Уг түүхэн ойн хүрээнд
МГЗНХ-оос олон ажил санаачлан зохион байгуулж байгаагийн нэг нь “PRESS
PHOTO” нэртэй гэрэл зургийн үзэсгэлэн юм.

Энэхүү үзэсгэлэнд Монголын хэвлэл мэдээллийн салбарт ажиллаж буй 10 гэрэл зурагчин оролцож байгаа аж.

Энэ сарын 10-ны өдрийн 12:00 цагт Чингисийн талбайд очиж үзэсгэлэнд бүтээлээ дэлгэж буй гэрэл зурагчид болох

Г.Аргуужин – “Монголын мэдээ” сонин
Ц.Баярбаатар – Цензүргүй.МН
Б.Бямба-Очир – MPA.mn сайт
Б.Ганбаяр – “Засгийн газрын мэдээ” сонин
Ц.Мягмарсүрэн – “Өдрийн сонин”
Ү.Одбаяр – “Ардчилал” сонин
Э.Харцага – “Өнөөдөр” сонин
Б.Чадраабал – “Монцамэ” агентлаг
Т.Чимгээ – “Монцамэ” агентлаг
Г.Эрдэнэтуяа – “Үндэсний шуудан” сонин нарын бүтээлийг тольдоорой.

Нийслэлд шинээр инженерийн шугам сүлжээ барих өргөтгөн шинэчлэх, засварлахаар Авто зам, тохижилт, ногоон байгууламжийг сэтлэх, сүвлэх, орц гарц гаргах ажлын зөвшөөрлийг олгох ажлын хэсгийн ээлжит хурал боллоо.

Зөвшөөрөл авсан компаниуд журмын дагуу нөхөн сэргээлтийн зардлыг байршуулсаны дараа ажлаа эхлэх үүрэгтэй юм. Заасан хэмжээнээс илүү зам сэтэлсэн иргэн, аж ахуйн нэгж байгууллага замын нөхөн сэргээлтийн зардлыг 3 дахин нэмэгдүүлсэнтэй тэнцүү хэмжээний төлбөр төлнө. Ашиглалтын явцад замд суулт өгсөн тохиолдолд нөхөн сэргээлт хийсэн байгууллага өөрийн хөрөнгөөр дахин хийж гүйцэтгэнэ.

Зөвшөөрөл авсан компаниуд дараахь ажлуудыг гүйцэтгэнэ. Үүнд:

Нийслэлийн 376 жилийн ойд зориулсан “Спортлог-Улаанбаатар” бүх нийтийн өдөрлөг өнөөдөр 10:00 цагаас Их эзэн Чингис хааны нэрэмжит талбайд эхэллээ.

Энэхүү бүх нийтийн өдөрлөгийн зорилго нь биеийн тамир, спортын тухай хууль, нийслэлийн Засаг дарга бөгөөд Улаанбаатар хотын Захирагчийн 2013-2016 оны үйл ажиллагааны хөтөлбөр, нийслэлийн эдийн засаг, нийгмийн 2015 оны зорилтын хүрээнд өсвөр үе, залуучуудад биеийн тамир, спортын үйл ажиллагаанд татан оролцуулах, түүгээр хичээллэж, амьдралын хэвшил болгох замаар эрүүл амьдралын хэв маяг, аливаа саад, бэрхшээлийг даван туулах бие, сэтгэлийн тэсвэр хатуужилтай шинэ үеийг бий болгоход оршиж байгаа аж.

“Спортлог-Улаанбаатар” бүх нийтийн өдөрлөгийн ажиллагаанд нийслэл, дүүргийн Биеийн тамир, спортын газар, хороо, спортын холбоод, нийслэлийн Засаг даргын дэргэдэх Оюутны шигшээ баг, дүүргүүдийн Засаг даргын дэргэдэх Өсвөрийн шигшээ багийн тамирчид, нийслэл хотод үйл ажиллагаа явуулдаг фитнесийн болон спортын клубүүд, спортын IV наадмын тэмцээнд оролцогчид иргэд, Монголын залуучуудын холбоо, нийслэлийн ЕБС-ийн сурагчид, нийслэлийн ахмадууд зэрэг 60 гаруй байгууллагын 2000 гаруй төлөөлөл оролцож үйл ажиллагаагаа сурталчилж байгаа аж.