Арилжааны телевизүүдийн хувьд хоолоо олж иддэг зүйл нь реклам сурталчилгаа. Тухайн өдөр болж өнгөрсөн үйл явдлыг тоймлон хүргэдэг мэдээ мэдээллийн хөтөлбөрөө гаргадаг цаг нь хүмүүсийн буйдан дээрээ тухлан гэр бүлээрээ тойрч суухтай давхацдаг.
Энэ үед хүмүүс хоол ундаа идчихсэн, өдрийн алжаалаа тайлж хөлөө амраадаг мөч нь. Яг энэ үеэр, эсвэл киноны дундуур элдэв хоол, чихэр, ундааны рекламуудаа “чихэж” өгнө. Хоолоо идээд дуусчихсан, шүдээ угаачихсан хүмүүсийн юм идэх дурыг ингээд л хөдөлгөж эхэлнэ.
Эхний рекламыг шүлсээ залгиад өнгөрөөчихнө. Дараагийнхыг ч бас. Тэгээд гурав дахь удаагийн рекламны зайгаар хүүхдээ орц болон гудамжны дэлгүүр рүү гүйлгэнэ. Унтахын өмнөхөн гаазтай ундаа, шүдэнд наалдах чихэр, зайрмаг, шоколад идэцгээнэ.
Орой бүр ингэж амттан шимттэнээр хооллож буруу хэвшилтэй болчихсон айл зөндөө бий. Хүмүүсийн буруу гэж байхгүй. Хоолоо идээд цадчихсан байхад нь амттай юм харуулж байгалиас заяасан хариу үйлдлийг сэдрээн өдөж байгаа нь рекламны буруу. Телевизийнхэн идэх уух юмны рекламыг арай өөр цагаар гаргаж байхгүй бол рекламны өдөөлтөөр буруу хооллодог гэр бүлүүд улам л нэмэгдэх болно. Оргил цагаараа амттаны реклам явуулахгүй хоёр хоноход л хичнээн айл хүүхдээ үдэш оройгоор дэлгүүр рүү гаргахгүй, байн байн хөргөгчний хаалгаа татахгүй амар тайван унтах бол оo.
Таргалалтын нэг том шалтгаан нь орой амттан идэж, ундаа уудаг буруу хооллолт гэдгийг мэргэжилтнүүд хэлдэг. Тэгэхээр телевизүүд хэдий орлогоо бодох ёстой ч үүргээ бас ухамсарлаж рекламны цагтаа жаахан л зохицуулалт хийчихэд ард түмний эрүүл мэндэд томоохон тус хүргэх нь байна шүү.
“Өдрийн сонин”-ы мягмар гаригийн дугаар уншигчдынхаа гарт хүрээд байна. Манай өнөөдрийн дугаарт “Тонгоруу үйлдэл” хэмээх нийтлэл баримт, үзэл бодлын гуравдугаарт нүүрт хэвлэгдлээ. Уг нийтлэлээр авто худалдааны төвүүдийг хотоос гаргах нь хэр ухаалаг шийдэл болохыг нухацтай авч үзсэн байна. Мөн саяхан Баянгол дүүргийн III хороололд байрлах “Макс” төвийн нэгдүгээр давхарт “Бургер Кинг” сүлжээ ресторан нээлтээ хийсэн. Дэлхийд 14000 орчим салбартай тус түргэн хоолны рестораны бургерийн амтыг үзэхээр нийслэлийнхэн шуурч байгаа аж. Тэндээс хийсэн сонирхолтой сурвалжлагыг нэг болон долдугаар нүүрээс сонирхоорой. Энэ өдрийн дугаарт НИТХ дахь МАН-ын бүлгийн дарга Д.Амарбаясгалантай хийсэн “Хотын дарга 410 тэрбум төгрөгөөр “гараа угаагаагүй” гэдгээ батлах ёстой” хэмээх ярилцлага нийтлэгдсэн. Түүнчлэн Зам тээврийн сайд асан, УИХ-ын даргын хуулийн бодлогын зөвлөх А.Гансүхтэй хийсэн сонирхолтой ярилцлагыг уншиж сонирхоорой. Тэрээр уг ярилцлагадаа өөрийн улс төрийн үзэл бодол болоод цаг үеийн олон үйл явдалтай холбогдуулан илэн далангүй ярилцжээ. “Шүүхийн захирамж, мэргэжлийн хяналтын газрын тогтоолыг зөрчсөн “Жинлиань” компани гурван иргэний үхэлд буруутай юу?” хэмээх Эх сурвалжийн мөрөөр үнэнийг хайсан материалын үргэлжлэл нийтлэгдсэн 11 дүгээр нүүрт юм. Баян-Өлгий аймгийн Алтай сумын нутаг дэвсгэрийн тусгай хамгаалалттай Ёлт хэмээх газраас тус сумын багийн дарга, байгаль хамгаалагч зэрэг долоон хүн улаан номонд орсон хүрэн баавгай агнаад явж байхдаа хилийн цэргийнхэнд баригджээ. Энэ талаар материалыг мөн 11 дүгээр нүүрээс унших боломжтой. Бурханхалдун ууланд гарахаар явсан таван залуу сураггүй алга болоод ес хонож байна. Харин тэдний араас Хэнтий аймгийн аврах ангийн зургаахан аврагч явсан аж. Энэ талаар материал баримт үйл явдлын долдугаар нүүрт хэвлэгдээд байна. Мөн тус нүүрт Мобикомын зарим дугаарт Эрдэнэт үйлдвэрийн Оросын талын 49 хувийг хэдэн хүн хуйвалдан авах гэж байна гэсэн утгатай мессэж очсон талаар албаны хүнээс авсан тодруулга багтсан болно. Одоогоос 70 жилийн тэртээ БНМАУ-ын тусгаар тогтнолыг баталгаажуулах бүх ард түмний санал асуулга болсон билээ. Үүнтэй холбогдуулан түүхийн ухааны доктор П.Дэлгэржаргалтай хүүрнэсэн сонирхолтой ярилцлагыг 12 дугаар нүүрээс уншаарай. Энэ мэтчилэн улс төр, гадаад мэдээ, дотоодын үйл явдал, хэвлэлийн хурал зэрэг цаг үеийн олон мэдээлэл багтсан болно. 
Сүүлийн үед залуус Бурханхалдун уулнаа мөргөхөөр гарах нь олширсон. Гэвч хүйтний улирал ирсэн энэ үед утасны сүлжээ ч барьдаггүй уг газрыг зорихдоо бэлтгэлтэй байхгүй бол горьгүй. Энэ сарын 10-ны өдөр Төв аймгийн Мөнгөнморьт сум, цаашаа Бурханхалдун, тэндээсээ Ононгийн халуун рашаан хүрэх маршруттай байсан таван залуу сураггүй алга болоод байгаа. Гэвч тэднийг эрэн хайх ажиллагаанд Онцгой байдлын ерөнхий газрын зүгээс тун ч хойрго хандаж буй юм. Тодруулбал, Хэнтий аймгийн Онцгой байдлын газрын зургаахан аврагч замд гарсан гэнэ. Уг газарт өдгөө нутаглаж байгаа хүн үгүй бөгөөд уугуул иргэдийн яриагаар утасны сүлжээ ч барихгүй, шавар намагтай тун ярвигтай нөхцөл байдал бий болсон байгаа аж. Уг үйл явдлын эргэн тойронд болоод өмнө нь төрийн дээд албан тушаалтан холбоо тасрахад хэрхэн сүржин явдал болж байсныг жишсэн материал “Өдрийн сонин”-д хэвлэгдэж байна. Маргаашийн дугаараас уншаарай.
Ирэх 2016 оны долдугаар сард Улаанбаатарт болох АСЕМ-ийн дээд хэмжээний чуулга уулзалтын бэлтгэл ажил өрнөж байна. Уг бэлтгэл ажлын хүрээнд өнөөдөр, маргааш хоёр өдөр хүндэт зочдод үйлчлэх эрх авсан зочид буудлын ерөнхий болон ахлах менежерүүдэд зориулсан сургалт “Корпорейт нэг”зочид буудалд болж байгаа юм. Нийт 44 зочид буудал АСЕМ-ийн төлөөлөгчдөд үйлчлэх эрх аваад байгаа билээ.
Мэргэжлийн сумо бөхийн Их аварга Хакүхо М.Даваажаргалын нэрэмжит “Хакүхо цом” сүмо бөхийн өсвөр үеийн аварга шалгаруулах тэмцээн ирэх арваннэгдүгээр сарын 08-нд болохоор товлогджээ. “Хакүхо цом” өсвөрийн сүмочдын тэмцээнийг “Хакүхо сан”-гаас санаачлан зургаа дахь жилдээ зохион байгуулах гэж байна.
Баян-Өлгий аймгийн Алтай сумын нутагт орших тусгай хамгаалалттай Ёлт гэх газраас энэ сарын 12-нд хүрэн баавгай агнасан хэрэг гарсан байна.Тус хэргийг Алтай сумын байгаль хамгаалагч Б, Ёлтын тусгай хамгаалалттай газрын улсын байцаагч С, Алтай сумын засаг дарга Ш болон тус сумын иргэн М,С,Д нар хамтран үйлджээ. Тэд улсын тусгай хамгаалалттай газраас баавгай агнаснаа хүлээн зөвшөөрсөн байна. Тэдгээр хүмүүсээс “Сайга”, “Карбин”, “СКС” маркийн буу, баавгайн арьс, махыг хураан авч Баян-Өлгий аймгийн цагдаагийн хэлтэст шилжүүлжээ. 
Гүрж улсын Батуми хотод 2015 оны аравдугаар сарын 14-17-ны өдрүүдэд болсон Байт харвааны 11 дэх удааагийн Олон Улсын тэмцээнд манай шигшээ багийн тамирчид амжилттай оролцжээ. Тэмцээнд 12 орны эрэгтэй 52, эмэгтэй 32 тамирчин оролцсон бөгөөд тэмцээний өдрүүдэд бороотой, цаг агаар төдийлөн тааламжтай байгаагүй гэнэ. Гэвч манай тамирчид тун ч олзтой байсан байна. Тодруулбал, эмэгтэй хувийн шигшээ харваанд ОУХМ Н.Ариунбилэг алтан медаль, эрэгтэй хувийн шигшээ харваанд ОУХМ Ж.Гантөгс мөнгөн медаль тус тус хүртсэн байна. Түүнчлэн тэмцээний гуравдахь өдөр болсон холимог болон эрэгтэй, эмэгтэй багийн шигшээ харваанд монголын баг тамирчид мөн амжилттай оролцож бүх харваанд алтан медаль авлаа. Холимог багийн төрөлд ОУХМ Ж.Гантөгс, ОУХМ Д.Мирослава нар харвасан бол эрэгтэй багийн төрөлд ОУХМ Ж.Гантөгс, ОУХМ Г.Ган-Эрдэнэ, ОУХМ Б.Отгонболд, эмэгтэй багийн төрөлд ОУХМ Д.Мирослава, ОУХМ Н.Ариунбилэг, Спортын мастер Ч.Оюунтунгалаг нар тус тус харвасан байна. 
АНУ-ын “Gilead Sciences” компани нь элэгний С вирусийг эмчлэх ХАРВОНИ (Ледипасвир 90мг/Софосбувир 400мг) шахмал эмийг Канад улсын Patheon үйлдвэрт гэрээгээр үйлдвэрлүүлэн Монгол улсад “Access” буюу “Хүртээмж” хөтөлбөрийн хүрээнд импортлон, улсын эмийн бүртгэлд бүртгүүлэхээр болсон.
Улаанбаатар хотоос Төв аймгийн Мөнгөнморьт сумын Бурхан халдун, Ононгийн халуун рашаан чиглэлд таван иргэн Ланд-80, Ланд-200 загварын хоёр автомашинтай энэ сарын 10-ны өдөр гараад сураггүй болсон байна.