Байгаль орчны улсын байцаагчид “Шаргалжуутын эргээс хайрга олборлоод байна” гэсэн гомдол иргэдээс иржээ. Тус гомдол дагуу шалгалт явуулахад голын эргээс 50 см зайд, 44 метр урт, хоёр метр гүн карьер ухсан байсан аж. Эл хэрэгт “Шаргалжуут” рашаан сувилал компани болон Шаргалжуут тосгонд эмнэлгийн барилга барьж буй “Алтайн хүч” компанийнхан холбогджээ.
Шалгасан байгууллагууд Усны тухай хуулийн 22 дугаар зүйлд “Усны сан бүхий газрын эргээс 50 метрээс багагүй зайд болон гол мөрний татамд онцгой хамгаалалтын бүс тогтооно. Онцгой хамгаалалтын бүсэд барилга, байгууламж барих, газар хагалах тэсэлгээ хийх, газар тариалан эрхлэх, ашигт малтмал олборлох, элс, хайрга, чулуу авахыг хориглоно” гэсэн заалтыг зөрчсөн гэсэн дүгнэлт гаргажээ. Тиймээс эхний ээлжинд хуулийн дагуу дээрх компаниудад тус бүрт хөдөлмөрийн хөлсний доод хэмжээг 40 дахин нэмэгдүүлсэнтэй тэнцэх хэмжээний торгууль ногдуулжээ. Мөн торгуулиас гадна хохирлыг тооцон, нөхөн төлүүлэхээр Цагдаагийн байгууллага шалгаж байгаа аж.
“Төмөр нар” монголын уран сайхны кино тун удахгүй дэлгэцнээ тун удахгүй гарах гэж байна. Энэхүү кинонд ерөнхий найруулагч Л.Ган-Эрдэнэ, зохиолч продюсер Ж.Буянтөгс, продюсер П.Бэрхээдэй, продюсер С.Орхонтуул нарын баг хамт олон ажилласан байна. 
Нийслэлийн ИТХ-ын ээлжит 25 дугаар хуралдаанаар иргэдийнх нь саналыг үндэслэн Багануур хотыг Багануур дүүрэгт, Налайх хотыг Налайх дүүрэгт байгуулах шийдвэр гарсан. Ингэснээр нийслэлийн эдийн засгийн дэд бүтэц тэнцвэртэй хөгжиж, хүн амын хэтийн төвлөрлийг багасган хотын хангамж, үйлчилгээ, аж ахуйн үйл ажиллагааг зохицуулах, оршин суугчдын нийгмийн асуудлыг шийдвэрлэх, байгаль орчны зохистой харьцааг хадгалах боломж бүрдэх билээ.
Өнгөрсөн нэгдүгээр сард Сонгинохайрхан дүүрэг дэх айлын хашаанаас занданшуулсан шарил олдсон бөгөөд ЦЕГ-аас Шүүхийн шинжилгээний үндэсний хүрээлэнгээс 200 жилийн настай болохыг нь тогтоосон. Түүнчлэн маш сайн хадгалагдсан гэх уг шарил 1826-1905 оны үед амьдарч байсан гэгээнтэн, аграмба Равсалын Санжайжавынх гэдгийг шинжээчид баталсан юм. 
УИХ-ын Байгаль орчин, хүнс, хөдөө аж ахуйн байнгын хорооны өчигдрийн хуралдаанд Хүнс, хөдөө аж ахуйн сайд Р.Бурмаа ургац хураалтын явц, буудай, гурилын хүрэлцээ, хангамжийн урьдчилсан төлөв, импортын буудай, гурилын талаар мэдээлэл хийв. 
Өнөөдөр нийслэлийн Засаг дарга Э.Бат-Үүл, нийслэлийн Мэргэжлийн хяналтын газар, нийслэлийн Авто замын газар болон ШӨХТГ зэрэг байгууллагуудын төлөөллүүд авто худалдааны бизнес эрхлэгчидтэй уулзаж, захуудыг нүүлгэх, Авто цогцолборт шилжүүлэх зэрэг асуудлаар олон талт уулзалт хийх байсан ч энэ арга хэмжээ болсонгүй.
Ононгийн халуун рашаан орохоор энэ сарын 10-нд гэрээсээ “Ланд 200”, “Ланд 80” машин хөлөглөн гарсан таван залуус гэрийнхэндээ 15-нд буцаж ирнэ гэсэн байна. Ирнэ гэсэн хугацаасаа хэтэрч, холбоо барилгүй гурав хоносон учраас 18 буюу өнгөрсөн ням гаригт ар гэрийнхэн нь Онцгой байдлын ерөнхий газарт энэ тухай мэдээлсэн. Ийнхүү тухайн өдөр ОБЕГ-аас Төв аймгийн онцгой байдлын газартай холбогдож, тэднийг эрэн хайх ажиллагааг эхлүүлсэн билээ. Тэднийг өчигдөр 16 цагийн үед Ононгийн халуун рашаанаас Хэнтий аймгийн Батширээт сум орох замд нь онцгой байдлын албаныхан олсон байна. Бороо хур их орж, намаг шавар ихтэй байсан учраас тэд замдаа бага зэрэг саатсанаас бус машин тэрэг нь эвдэрч, бензин шатахуун нь дуусч, элдэв осолд өртөөгүй болохыг эх сурвалж мэдээлсэн юм. Сураг тасраад байсан иргэдийг өчигдөр 18 цагийн үед гэрийнхэн нь нисдэг тэргээр Улаанбаатар хотод авчирсан байна. 
Дөрвөн настай охины үхэлд буруутгагдан шүүхээс 24 жилийн хорих ял сонссон Г.Маралмаа амаржиж хүүтэй болжээ. Одоогоор ээж, хүү хоёрын биеийн байдал сайн байгаа аж. Шүүхээс түүний ялыг эдлүүлж, хүүхдийг нь нэг ой хүрэхээр асран хамгаалагчид нь өгөхөөр болоод байгаа юм.
ЧИНГЭЛТЭЙ ДҮҮРГИЙН ХОЁРДУГААР ХОРООНЫ ИРГЭН Ж.ГАРАВ
10 дугаар сарын 23 Баасан гараг