Өнөөдөр Үндэсний мэдээллийн төвд Л.Гансүхийн өмгөөлөгч Ц.Баасандорж мэдээлэл хийлээ. Тэрээр хүний гэм буруутай эсэхийг шүүхийн танхимд хэлэлцэхээс бус шоронд шүүх хурлыг хийх ёсгүй хэмээн мэдэгдсэн юм. Тиймээс шүүхийн ерөнхий зөвлөлөөс энэ асуудалд анхаарч, хурлыг шүүхийн танхимд хийлгэх хүсэлтээ өнгөрсөн долоо хоногт гаргасан байна. Одоогоор шүүхийн ерөнхий зөвлөлөөс албан ёсны хариу ирүүлээгүй байгаа гэнэ. Л.Гансүхийн зүгээс ч шүүх хурлыг “Ганц худаг”-т явуулах нь зүйтэй гэсэн хариу ирвэл өлсгөлөн зарлахад бэлэн гэдгээ илэрхийлсэн байна.
Ц.Баасандорж “Үндсэн хуульд шүүх эрх мэдлийг зөвхөн шүүх хэрэгжүүлэхээр заасан. Мөн шүүхийн тогтолцоо сум дүүрэг, аймаг нийслэл, улсын дээд шүүхээс бүрдэх болохоос хорих ангиас бүрдэхгүй. Шорон гэдэг бол хүнийг ял эдлүүлдэг газар болохоос шүүх хурал болдог газар биш” гэсэн юм.
М.Ууган
УИХ-ын Хууль зүйн байнгын хорооны хуралдаанаар Өршөөл үзүүлэх тухай хуульд Ерөнхийлөгчийн тавьсан хоригийг хэлэлцэж байна. Хоригт авлига, албан тушаалын гэмт хэрэг, мөн залилангийн хэргийг багтсан юм. Түүнчлэн энэ үеэр УИХ-ын гишүүн Ө.Энхтүвшин “Өршөөлийн хуульд тавьсан хоригийг нэгэнтээ нээлттэй хэлэлцэж байгаа учраас битүү хатуугаар ярьж нууцлах шаардлага байхгүй. Ардчилсан нам, МАН-аас хэн нь хэрэгт буруутгагдаад байгаа, түүнийгээ хууль хяналтын байгууллагууд зарла. Нууц байхгүй болсон” гэлээ.
Засгийн
Улсын бүртгэлийн ерөнхий газраас санхүүгийн тайлангаа зургаа болон түүнээс дээш улирал дараалан гаргаагүй, харилцагч санхүүгийн байгууллагад тушаагаагүй аж ахуйн нэгжүүдийн жагсаалтыг гаргаад байгаа юм. Тайлангаа өгөөгүй нийт 11793 төрийн бус байгууллага, сан байгаа бөгөөд хуулийн этгээдийн улсын бүртгэлийн тухай хуулийн дагуу дээрх аж ахуйн нэгжүүдийг улсын бүртгэлээс хасч татан буулгахаар мэдээлжээ. Эдгээрийн дотор “Гал үндэстэн” холбоо, “Онги гол” хөдөлгөөн, “Хамаг Монгол” төсөл зэрэг олны танил хүмүүсийн толгойлдог байгууллага цөөнгүй байгаа аж. Хуулийн дагуу байгууллагыг татан буугдсанаас хойш 25 жилийн хугацаанд дахин сэргээх боломжгүй байдаг юм байна.
Баянзүрх дүүргийн 19 дүгээр хорооны “Цайз” захын зүүн талд Петровис ШТС-ын дэргэд траншейны нүхэнд 30 настай эрэгтэй унаж гэмтжээ. Хохирогч өчигдөр 02.00 цагийн орчимд нүхэнд унасныг Нийслэлийн Онцгой байдлын газрын Аврах ангийн долоон алба хаагч гаргаж, эмнэлэгт хүргэжээ. 
Хүүхдийг Ивээх Сан “Нэгдүгээр ангийн сурагчдын суралцах чадварыг дэмжихэд чиглэсэн сургуулийн чадавхийг бэхжүүлэх нь” шинэ төслийн нээлтээ өнөөдөр хийлээ. Нээлтийн семинарт Нийслэлийн Боловсролын Газар, Японы ЭСЯ, дүүргийн боловсролын газрын ажилтнууд болон сургуулийн төлөөлөл оролцсон юм. 
Засгийн газрын өчигдрийн хуралдаанаар Гаалийн ерөнхий газрын дарга Б.Цэнгэлийг үүрэгт ажлаас нь чөлөөлж, оронд нь О.Ганбатыг томиллоо. О.Ганбат нь ГЕГ-ын даргаар ажиллаж байгаад үүрэгт ажлаа Б.Цэнгэлд хүлээлгэж өгөөд байсан юм. 2012 оны арванхоёрдугаар сард Гаалийн ерөнхий газрын аргаар ажиллаж байсан Д.Цэвээнжавыг үүрэгт ажлаас нь чөлөөлсний дараа даргын үүргийг түр орлон гүйцэтгэж байгаад 2013 оны зургадугаар сард жинхэлж энэ оны гуравдугаар сард О.Цэнгэлд ажлаа хүлээлгэж өгөөд байсан юм. Тэрбээр орос хэлний багш мэргэжилтэй бөгөөд Сүхбаатар аймгийн Эрдэнэцагаан сумын сургуульд орос хэлний багш, Санхүүгийн зохицуулах хороонд зөвлөх, Сангийн яаманд Мониторингийн газрын даргаар ажиллаж байсан намтартай. 
Афганистан улсад үүрэг гүйцэтгэж буй манай энхийг сахиулагчдын нэг бууны суманд өртсөн харамсалтай мэдээ дуулдлаа. Тодруулбал, Афганд үүрэг гүйцэтгэж байгаа манай цэргийн багийн энхийг сахиулагч, Зэвсэгт хүчний 353 дугаар ангийн алба хаагч, дэд ахлагч Б.Нямбаяр харуулын үүрэг гүйцэтгэж байгаад шархтжээ. Тэрбээр Кабулын эмнэлэгт хэвтэж эмчлүүлсэн гэнэ. Энэ хэрэг өнгөрсөн сард болсон аж. 
Тариалангийн тухай хуулийн шинэчилсэн найруулгын төслийг хэлэлцээд Засгийн газрын гишүүдийн хуралдаан дээр гаргасан саналын тусган Улсын Их Хуралд өргөн мэдүүлэхээр тогтлоо.