Энэ сарын 15-ны өдрөөс эхлэн Хубилай хааны мэндэлсний 800 жилийн ойг тэмдэглэж эхэлсэн. Тэгвэл яг одоо Чингисийн талбайд “Монгол төрийн их дуулал” 261 найрал хөгжимчдийн тоглолт болж байна. Тоглолтонд үндэсний хувцасаараа гоёсон урлаг соёлын ажилтнууд XIII зууныг илтгэхүйц урлагийн тоглолтуудаа үзүүлж сонирхуулсан юм.
Өнөөдөр Хубилай хааны мэндэлсний 800 жилийн ойн арга хэмжээ 17.00 цагт АНУ-ын хөгжмийн зохиолч Griffes Charles Tomlinson-ий “Хубилай сэцэн хааны цэнгэлийн ордон” симфони найрлын нээлтээр үргэлжилнэ. Соёлын төв өргөөнд болох симфони найрлын нээлтээр эсгий туургатны үндэсний хувцасны фестиваль болох аж.
Баянхонгор аймгийн Баян-Овоо сумын Мандалхайрхан багийн “Цагаанцахир” гэдэг газар 30 настай эрэгтэй бичил уурхайн 20 метрийн гүнд шороонд дарагджээ. Энэ тухай дуудлагыг онцгойгийнхон есдүгээр сарын 21-ний 18.00 цагаас хойш эрэн хайх ажиллагааг зохион байгуулж байна. 
БНХАУ Шиняан хотноо болсон Ази тивийн оюутны 3х3 сагсан бөмбөгийн аварга шалгаруулах анхдугаар тэмцээнд манай улсаас эрэгтэй, эмэгтэй нийт дөрвөн баг оролцож, эрэгтэй I шигшээ баг мөнгөн медаль хүртсэн байна. Уг тэмцээний шигшээд шалгарсан БНХАУ болон Монгол Улсын шигшээ багыг 2016 оны 10 дугаар сард урд хөршид болох 3х3-ын Дэлхийн аварга шалгаруулах тэмцээнд оролцох урилгыг ирүүлжээ. Ингэснээр Монголын сагсан бөмбөгчид дэлхийн аварга шалгаруулах тэмцээнд анх удаа оролцохоор болж байгаа аж.
Баян-Өлгий аймгийн Баяннуур сумын Цул-Улаан багийн иргэн 50 настай эрэгтэй энэ сарын 10-нд гэрээсээ гараад сураггүй болсон. Онцгойгийнхон энэ тухай дуудлагыг энэ сарын 16-нд авч, есөн алба хаагч, орон нутгийн 14 иргэнтэй эрэн хайх ажиллагааг зохион байгуулж байсан билээ. Улмаар энэ сарын 20-ны өдөр ар гэрийнхнийх нь хүсэлтээр эрлийг зогсоожээ. 
Мэргэжлийн хяналтийн байгууллагын ээлжит цахим хурлаар нийслэл, орон нутагт хийгдэж буй хяналт шалгалт, зөвлөн туслах үйлчилгээ болон бусад ажлын талаар мэдээлэл өглөө. Орон нутагт хууль бусаар ашигт малтмал олборлох зөрчлүүд цөөнгүй гарч байгаа бөгөөд Мэргэжлийн хяналтын байгууллага холбогдох арга хэмжээг аван ажиллаж байна. Тухайлбал, Сэлэнгэ аймгийн Хүдэр, Ерөө, Баянгол сумдад зохих зөвшөөрөлгүй ашигт малтмал олборлож байсныг шалгаж, 7 нөхөрлөл, иргэдийн үйл ажиллагааг зогсоон, экологийн хохирол тооцож байна.
Нийслэлийн иргэдэд цахим системээр газар өмчлүүлэх дөрөвдүгээр ээлжийн бүртгэл 2015 оны 08 дугаар сарын 25-ны өдөр эхэлж, энэ сарын 09-нд дууссан бөгөөд Баянзүрх, Сонгинохайрхан, Хан-Уул дүүргийн нийт 22 байршлын 8727 га газарт 28963 иргэнд газар өмчлүүлсэн. Сонгинохайрхан дүүргийн зарлагдсан байршлуудад сонгогдсон иргэд дүүргийн 27 дугаар хорооны байранд, Баянзүрх дүүрэгт сонгогдсон иргэд тус дүүргийн Өмч, газрын харилцааны албанд, Хан-Уул дүүрэгт сонгогдсон иргэд дүүргийн Өмч, газрын харилцааны албанд өргөдөл гаргаж баталгажуулж байгаа юм. Өргөдлийг энэ сарын 23 хүртэл хүлээн авч дуусах байсан ч ажлын 10 хоногоор сунгаж, 10 сарын 7-ны өдрийг хүртэл хүлээн авахаар боллоо. Нийслэлийн иргэд Та бүхэн газар өмчлөх өргөдлөө хугацаандаа багтаж баталгаажуулна уу гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
НҮБ-ын Дээд хэмжээний уулзалт Нью-Йорк хотноо энэ сарын 25-27-ны өдрүүдэд болно. Энэхүү дээд хэмжээний уулзалт, НҮБ-ын Ерөнхий Ассамблейн 70 дугаар чуулганы Ерөнхий санал шүүмжлэлд Монгол Улсын Ерөнхийлөгч Ц.Элбэгдорж оролцох юм байна. Дээд хэмжээний уулзалтад 160 гаруй улс Төр, засгийн тэргүүн, 30 гаруй улс Гадаад хэргийн сайд нар оролцох аж. Уг Дээд хэмжээний уулзалтаар “Тогтвортой хөгжлийн 2030 хөтөлбөр”-ийг батлах юм байна. Дээд хэмжээний уулзалтын хүрээнд 6 үндсэн сэдвээр өндөр түвшний хэлэлцүүлэг өрнүүлнэ. Ерөнхийлөгч Ц.Элбэгдорж энэ сарын 27-ны өдөр болох “Тогтвортой хөгжлийг хангахад чиглэсэн үр дүнтэй, хариуцлагатай тогтолцоог бүрдүүлэх нь” сэдэвчилсэн хэлэлцүүлэгт оролцож, байр сууриа илэрхийлэх юм байна.
Увс аймгийн Сагил сумын Баянзүрх багийн “Хотлын дэнж” /сумаас 30 км/ гэдэг газар энэ сарын 19-нд ойн түймэр гарсан. Аймгийн Онцгой байдлын газрын 10 албан хаагч, орон нутгаас 4 иргэн, нийт 14 хүн, 2 техник хэрэгсэлтэйгээр ажиллаж 2015.09.20-ны өдрийн 21:15 цагт цурманд оруулсан. Цурман дотроо 2 голомттой, бүрэн унтраахаар ажиллаж байна.
Дундговь аймгийн Сайнцагаан сумын Тэвш багийн нутагт Дундговь аймгаас Улаанбаатар хотын чиглэлийн авто замд /аймгийн төвөөс 6 орчим км-т/ Гранд марк-2 загварын автомашин, Норд бенц загварын ачааны машинтай уржигдар шөнө мөргөлджээ. Ослын улмаас Дундговь аймгийн Луус сумын харьяат иргэн Б /35 настай, эрэгтэй/, Ц /34 настай, эмэгтэй/ нар газар дээрээ нас барсан байна. Хэргийн газарт аймгийн Онцгой байдлын газрын Гал унтраах, аврах 37 дугаар ангийн 7 албан хаагч, Цагдаагийн 13 албан хаагч,нийт 20 албан хаагч, 2 техник хэрэгсэлтэйгээр ажиллажээ.