Аргын тооллоор аравдугаар сарын 7 буюу, билгийн тооллоор намрын дунд сарын 25-ны билэгт сайн өдөр Богдхан уулыг тахих төрийн ёслол болох юм байна. Нийслэлийн эрх зүйн байдлын тухай хууль, Монгол Улсын Ерөнхийлөгчийн “Төрийн тахилгатай уул хайрханы тэнгэрийг тахих төрийн ёслол үйлдэх хуваарь батлах тухай” зарлигийг үндэслэн нийслэлийн ИТХ-ын тэргүүлэгчдээс төрийн тахилгын ёслол үйлдэх тухай тогтоолыг гаргажээ.
Төрийн тахилгатай уул овооны тэнгэрийг тахих тахилгын дагуу ёслолыг холбогдох албаныхан зохион байгуулах ба одоогоор самарчдыг уулнаас буулгах, ой хээрийн түймрээс урьдчилан сэргийлэх зэрэг бэлтгэл ажлыг хийж байгаа аж.
2015 оны эхний найман сарын байдлаар улсын төсөв 600 орчим тэрбум төгрөгөөр тасалдсан байна. Оны эцэст 900-гаас нэг их наяд төгрөгт хүрнэ гэсэн тооцоог Сангийн яам гаргажээ. Үүнтэй холбоотойгоор 2015 оны төсвийн тодотголыг 2016 оны төсөв батлахаас өмнө зайлшгүй хийх шаардлагатай. УИХ-ын намрын чуулган эхлэхэд хамгийн түрүүнд хэлэлцүүлэх чиглэлийг Сангийн яам барьж ажиллаж байна гэсэн мэдээллийг Ерөнхий сайдын өрөөнд лхагва гариг бүрт болдог “Шийдлийн цаг” уулзалтын эхэнд Сангийн сайд Б.Болор өглөө.
Явган зорчигчийг мөргөж, амь насыг нь хохироогоод хэргийн газраас зугтсан жолоочийг шуурхай баривчилжээ. Сүхбаатар дүүргийн 18 дугаар хороо Дамбадаржаагийн гудамж, “Сайхан ирээдүй” ХХК-ийн зүүн замд марк, улсын дугаар нь тодорхойгүй автомашины жолооч нь явган зорчигч 43 настай эмэгтэйг мөргөж, амь насыг нь хохироогоод хэргийн газраас зугтжээ. Уг хэргийн мөрөөр Сүхбаатар дүүргийн цагдаагийн II хэлтсийн мөрдөн байцаах тасаг, эрүүгийн тасаг Сүхбаатар дүүрэг дэх замын цагдаагийн тасгийн алба хаагчид өндөржүүлсэн бэлэн байдалд ажиллаж, Rush маркийн автомашины жолооч согтууруулах ундааны зүйл хэрэглэсэн үедээ уг хэргийг үйлдсэн болохыг илрүүлсэн байна.
Өршөөлөөр суллагдах хүмүүсийг орон нутагт нь хүргэх болон зохион байгуулалтын бусад арга хэмжээний зардалд шаардагдах хөрөнгийг Засгийн газрын нөөц хөрөнгөөс гаргахаар болсон.
“Аглагийн хийд хүртлэх 6,2 км хатуу хучилттай авто зам төсөл”-ийн концессийн гэрээг “Хансуун зам” ХХК-тай байгуулах эрхийг Хөрөнгө оруулалтын газарт олгож, гэрээ байгуулах ажлыг холбогдох хууль тогтоомжийн дагуу удирдан зохион байгуулахыг Аж үйлдвэрийн сайд Д.Эрдэнэбатад Засгийн газраас даалгалаа.
Сурагчдын аюулгүй байдлыг хангах “School police” хөтөлбөрийг нийслэлийн хэмжээнд хэрэгжүүлээд хоёр жил болж байна. Тэгвэл энэ хөтөлбөрийг үндэсний хэмжээнд хэрэгжүүлэхээр болжээ. Ялангуяа аймгийн төвүүдэд энэ сараас хэрэгжүүлж эхлэхээр болсон талаар Монголын сурагчдын холбооноос мэдээллээ. Учир нь аймгийн төвийн сурагчид сургуулийнхаа орчимд мотоциклийн осолд өртөх, сургуулийн хашаанд иргэд архидан согтуурах асуудал багагүй гардаг байна. Тиймээс орон нутгийн сургуулиудаас хүсэлт ирүүлжээ.
Монгол Улсын Ерөнхий прокурорын 2015 оны 09 дүгээр сарын 03-ны өдрийн Б/274 дугаар тушаалаар Завхан аймгийн прокурорын газарт Хэрэг бүртгэх, мөрдөн байцаах ажиллагаанд тавих хяналт хариуцсан хяналтын прокуророор томилогдсон Данзансамбуугийн Шинэбал 2015 оны 09 дүгээр сарын 21-ний өдөр Прокурорын тангараг өргөжээ. 
Өршөөл үзүүлэх тухай хуулийн дагуу захиргааны хариуцлагын улмаас жолоодох эрхээ хасуулсан жолооч нарын эрхийг сэргээж эхэлсэн.