Month: August 2015

Монгол Улс Малайз Улсын нийслэл Куала Лумпур
хотноо Консулын газартай боллоо. Консулын газрын нээлт наймдугаар сарын 6-ны
өдөр болсон бөгөөд нээлтэд Гадаад хэргийн сайд Л.Пүрэвсүрэн оролцжээ.
Тэрбээр Консулын газрын нээлтэд оролцохын сацуу Малайз Улсад суугаа
Монгол иргэдийн төлөөлөлтэй уулзсан байна. Сайд Л.Пүрэвсүрэн АСЕАН-ы
бүсийн чуулга (АРФ)-ны Сайд нарын 22 дугаар уулзалтад оролцож явах зуураа ийн
шинэ Консулын газрын туузыг хайчилжээ.

Монголчуудын эрх зөрчигддөг орны тоонд
Малайз улс дээгүүр жагсдаг. Тус улсад Монголын цөөнгүй иргэн амь насаа
алдаж, халдлагад өртөж байсны олонх нь охид бүсгүйчүүд юм. Тиймээс манай улс
өөрийн гэсэн Консулын газартай болсноор иргэдийнхээ эрх ашгийг хамгаалахад илүү
дөхөм гэж ажиглагчид дүгнэж байна.

Монгол Улс анх удаа Эрээний боомтоос цааш автомашинаар туршилтын тээвэр хийхээр болжээ. БНХАУ-тай хамтран хийх туршилтын тээвэрт Монгол, Хятадын талаас тус бүр таван автомашин Улаанбаатар-Тянь жин чиглэлд тээвэрлэлт хийхээр төлөвлөжээ. Үүнтэй холбоотойгоор урд хөршийн холбогдох албаныхан Монголд хүрэлцэн ирээд байгаа юм байна. Хоёр орны дамжин өнгөрөх тээврийн асуудлаарх хамтын ажиллагаанд ахиц гарч байна хэмээн салбарынхан үүнийг дүгнэж байна.

Үүнээс гадна БНХАУ, Монгол Улс, ОХУ-ын эдийн засгийн коридорыг хөгжүүлэх, худалдаа, хамтын ажиллагааны асуудлаар Эрээн хотод гурван тал чуулах гэж байна. Үүгээр авто замын боомтын шуурхай нэвтрүүлэхийг эрчимжүүлэх, боомтын бараа эргэлт, хяналт шалгалтыг хөнгөвчлөх зэрэг худалдаа, тээвэртэй холбоотой асуудлыг хөндөхөөр болжээ. Цаашид УБТЗ нийгэмлэг нь тээврийн чанарыг сайжруулах чиглэлд анхаарлаа хандуулахаар төлөвлөж байгаа юм байна.

Тухайлбал, Монгол Улсаар дамжин өнгөрөх хурдны галт тэрэгний боломжит маршрутыг судалж байгаа аж. Энэ хүрээнд Эрээн-Улаанбаатар хотын хооронд 200 км/цаг-ийн хурдтай хурдан галт тэрэг явуулахаар төлөвлөжээ. Харин агаарын тээвэрлэгч “МИАТ” компани зах зээлийн эрэлт дээр тулгуурлан есдүгээр сард Берлин, Франкфурт хот руу нэмэлт нислэг үйлдэхээр төлөвлөж байна. Энэ удаад холын нислэгийг Москва хотоор дамжихгүйгээр, шууд эцсийн чиглэлд үйлдэхээрээ онцлог юм.

“Даншиг наадам-Хүрээ цам-2015” шашин, соёлын наадам өнөөдөр Хүй долоо худагт болж байна. Өнөөдөр 2000 орчим цагдаагийн албан хаагч наадамчин олны аюулгүй байдлыг хангаж ажиллаж байгаа аж. Цагдаагийнхан өндөржүүлсэн бэлэн байдалд шилжин уртасгасан цагаар ажиллаж эхэлжээ.

Улаанбаатар хотод инженерийн шугам сүлжээний ажил гүйцэтгэх зорилгоор наймдугаар сарын 8-наас 10-ны хооронд дараах авто замыг түр хугацаагаар хаана.

Сүхбаатар дүүргийн долдугаар хороо, 100-н айлын авто замыг наймдугаар сарын 9-ний 22:00 цагаас 10-ны 08:00 цаг хүртэл хааж бохир усны шугам засварлана.

Мөн 120 мянгатын уулзвараас Их Монгол Улсын гудамж хүртэл замыг наймдугаар сарын 8-ны 22:00 цагаас 10-ны 08:00 цаг хүртэл хааж дулааны магистраль шугамын угсралтын ажил хийх юм байна.

Монголын анхдугаар Богд Өндөр гэгээн Занабазарын мэндэлсний 380 жилийн ойг тохиолдуулан Монголын Бурханы шашны сүм хийдүүд, Нийслэлийн Засаг даргын Тамгын газартай хамтран зохион байгуулж буй “Даншиг наадам-Хүрээ цам -2015” наадам Хүй долоон худагт болж байна. Наадмын хүрээнд лам нарын дунд төрөл бүрийн уралдаан тэмцээн өрнөж байгаа аж. Сонирхуулахад балин, тосон урлалын тэмцээн өнөөдөр болсон юм. Балин гэдэг нь хуурч болгосон арвайн гурилаар хийж бурхны өмнө тавих суварган, гурвалжин цац хэлбэртэй өргөлийн идээ юм. Балин өргөснөөр гадна дотны саад тотгор, хэрүүл тэмцэл, дайсан тотгор, өвчин зовлон, ган зуд тэргүүтэн эс зохилдох шалтгаан бүгд амирлуулж нас буян хайрлана хэмээдэг. Мөн унзад, голч нарын тэмцээн болсон. Хурал уншлагын зан үйлийн гол тушаалтан бол унзад, голч нар байдаг аж.