Month: August 2015

Тарваган тахлын байгалийн голомт манай орны хувьд 7-9-р саруудад хамгийн өндөр идэвхтэй байдаг. 2009-2013 онд Баян-Өлгий аймгийн Сагсай, Цэнгэл, Завхан аймгийн Эрдэнэхайрхан, Улиастай, Ховд аймгийн Алтай суманд тарваган тахлын улмаас таван хүн өвдөж байжээ. Энэ жилийн хувьд Ховд аймгийн Булган сумын харьяат 14 настай хүү уг халдварын улмаас нас барсан юм.

Албаны эх сурвалжийн мэдээлснээр энэ жил 17 аймгийн 157 сумын нутаг дэвсгэрт тарваган тахал өвчний байгалийн голомт бүртгэгдээд байгаа юм. Тэр дундаа Өвөрхангай аймгийн Хайрхандулаан, Уянга сум, Ховд аймгийн Үенч, Баян-Өлгий аймгийн Сагсай, Бугат, Төв аймгийн Сэргэлэн сумын нутагт байгалийн голомт идэвхжиж, Завхан аймгийн Эрдэнэхайрхан болон Говь-Алтай аймгийн Эрдэнэ, Чандмань суманд тарваган тахлын өсгөвөр илэрсээр байна.

Тиймээс нийслэлд тарваган тахал болон мал, амьтны гоц халдварт өвчин зөөвөрлөгдөн орж ирэхээс урьдчилан сэргийлэх зорилгоор наймдугаар 1-ний өдрөөс аравдугаар сарын 15-ны өдөр хүртэл мэргэжлийн байгууллагууд байнгын хяналтын цэг ажиллуулж байна. Тарваган тахал өвчний эрсдлээс өөрийгөө болон ойр дотны хүмүүсээ аврахын тулд байгалийн идэвхтэй голомтот нутагт амьдардаг иргэд, ялангуяа анчин, тууварчин, жолооч нар урьдчилан сэргийлэх вакцинд хамрагдах шаардлагатайг Онцгой байдлын ерөнхий газраас анхааруулж байна. Вакциныг Зоонозын өвчин судлалын төвд үнэ төлбөргүй хийж буй ажээ.

Нийслэлийн 2015 оны шилдэг тохижилт, ногоон байгууламжтай цэмцгэр байгууллага, аж ахуйн нэгж шалгаруулах болзолт уралдааны хүрээнд есөн дүүргийн 152 хороонд 51 ажлын хэсэг ажиллаж байгаа юм.

Ажлын хэсгүүд аж ахуйн нэгж, иргэдийн цэвэрлэгээ, ногоон байгууламж, тохижилтын ажилд үнэлгээ үүрэг даалгаврыг биелүүлээгүй газруудад 2015.05.25-ны өдрөөс “Гахай”, ахиц дэвшил гаргасан газруудад “Смайл” наалт нааж эхэлсэн.

Болзолт уралдааны хугацаанд ажлын хэсгүүд давхардсан тоогоор 73033 байгууллага, аж ахуйн нэгжийг шалгаж, 9.6 тэрбум төгрөгийн тохижилтын ажил, 144.8 га талбайд цэвэрлэгээ, угаалга, 23.4 га талбайд ногоон байгууламж хийлгэсэн.

Нийт 2186 аж ахуйн нэгжийн тохижилтыг үнэлж “Смайл”, 1368 байгууллагад “гахай” наалт наасан юм. Өгсөн үүрэг даалгавар биелүүлээгүй 16 аж ахуйн нэгжийн үйл ажиллагааг түр хугацаагаар, 1 байгууллагын үйл ажиллагааг бүр мөсөн зогсоогоод байна гэж Улаанбаатар хотын Захирагчийн ажлын албанаас мэдээллээ.

Өвөлжилтийн бэлтгэл ажлыг хангахаар малчид, тариаланчдад бага оврын тракторыг түүний дагалдах хэрэгсэл болох хадуур, тармуур, анжисны хамт урт хугацааны хүүгүй зээлээр олгож байна.

Монгол улс, БНХАУ-ын Засгийн газар хоорондын хамтын ажиллагааны гэрээний дагуу 8400 бага оврын трактор, 253 хадуур, тармуур, анжисыг урд хөршөөс авчирч, малчид болон тариаланчдад худалдаж байгаа юм.

Энэхүү бага оврын тракторын үнэ нь таван сая төгрөг бөгөөд урьдчилгаа 20 хувь буюу 1 сая төгрөгийг төлөөд, үлдэгдэл 4 саяыг дөрвөн жилийн хугацаанд тэнцүү хувааж өгөх боломжтой боллоо. Харин хадуур,тармуур болон анжисыг нийтэд нь 1,5 сая төгрөг төлөөд авах боломжтой юм.

Бага оврын энэхүү техник хэрэгслийг худалдаж авахыг хүсвэл өөрийн оршин суугаа аймгийн Засаг даргын болон Хүнс, хөдөө аж ахуйн газрын тодорхойлолт мөн урьдчилгаа төлбөр тушаасан баримтын хамт Тариалан эрхлэлтийг дэмжих санд авчирч өгөөд техникээ авч болох юм.

Жилд 1 сая тонн цемент үйлдвэрлэх хүчин чадалтай, Монголын анхны хуурай аргын цементийн үйлдвэр Дорноговь аймагт ашиглалтад орлоо. Энэхүү үйлдвэрийг Монполимет групп, Монгол Улсын Хөгжлийн банк болон Европын Сэргээн Босголт Хөгжлийн Банкны нийт 250 сая ам.долларын хөрөнгө оруулалтаар Сэнж сант ХХК бүтээн босгожээ.

Үйлдвэрийг нээх арга хэмжээнд Монгол Улсын Ерөнхий сайд Ч.Сайханбилэг, Дорноговь аймгийн Засаг дарга П.Ганхуяг, Барилга хот байгуулалтын дэд сайд Г.Байгальмаа, УИХ-ын гишүүн Ж.Батсуурь, Сайншанд сумын Засаг дарга Б.Батбаяр, Өргөн сумын Засаг дарга Б.Батжаргал болон бусад албаны хүмүүс оролцлоо.

Ерөнхий сайд Ч.Сайханбилэг “Хоёр жилийн өмнө энэ талбайд ирэхэд зэлүүд хоосон газар байсан. Богино хугацаанд энэ том үйлдвэрийг яаж барьж байгуулах юм бол доо гэж эргалзэж байлаа. Харин өнөөдөр Монгол Улсын эдийн засаг, тэр дундаа аж үйлдвэр, барилгын салбарт түүхэнд тэмдэглэгдэх үйл явдал болж байна. Засгийн газар баялаг бүтээгчидтэй хамтарч ажиллавал ямар том үр дүнд хүрдгийг өнөөдрийн бүтээн байгуулалт харууллаа. Монгол Улсын Засгийн газар энэ бүтээн байгуулалтын нийт санхүүжилтийн дөрөвний нэгийг гаргасан. Дэлхийн чанар, стандартыг хангасан монгол цемент бий болж байгаа нь бахархал” хэмээн бүтээн байгуулсан хүмүүст талархал илэрхийллээ.

Монцемент төслийн хүрээнд эх орныхоо хөрсөн дээр Европын стандарт шаардлагад нийцсэн орчин үеийн дэвшилтэт хуурай аргын технологитой, байгаль орчинд ээлтэй анхны ЭКО цементийн үйлдвэр байгуулсан нь энэ. Мөн энэ төслийн хүрээнд шинээр 1000 орчим айлын орон сууц, ахуйн үйлчилгээний төв, цэцэрлэг, спорт цогцолбор зэрэг бүтээн байгуулалтууд сүндэрлэн босч, Өргөн сум одоогийн байгаагаасаа 3 дахин өргөжин тэлэх юм байна.

“Найрсаг Улаанбаатар” хөтөлбөрийн хүрээнд “Вива сити” хороололд “UB Food Festival 2015” үйл ажиллагааг энэ сарын 15, 16-ны өдрүүдэд зохион байгуулах гэж байна. Энэхүү фестиваль нь 3 дахь жилдээ болж байгаа бөгөөд нийслэлчүүдэд их хотын хоолны соёлыг таниулж,1000-3000 төгрөгөөр орон орны амтат зоогийг амталж үзэх боломж олгодог онцлогтой.

“UB Food Festival” – д Улаанбаатар хотын шилдэг 50 орчим ресторан, кафе, хүнсний үйлдвэрлэгч, нийлүүлэгч компаниуд оролцох юм. Фестивалийн үеэр шилдэг тогооч нарын халз тулаан, гэр бүлийн бургер идэх уралдаан гэхчилэн олон сонирхолтой шоу хөтөлбөр болно. Мөн уламжлал ёсоор “Sweet Kitchen” facebook группын авъяаслаг эзэгтэй нар бүтээлч дизайнлаг, өвөрмөгц бялуу хийж, ирсэн зочдоо дайлах юм.

Уг үйл ажиллагааг “М Си Эс Проперти” ХХК, “M Си Эс Эстэйтс” ХХК, “Монголиан Гүрмэ энд Катеринг” ХХК, “Green Gold”, нийслэлийн Соёл урлагийн газар, Аялал Жуулчлалын газар, Монголын Тогооч нарын Холбоо зэрэг байгууллага хамтран зохион байгуулна.

Нийслэлийн нийтийн эзэмшлийн гудамж талбай, цэцэрлэгүүдэд 6, 7 дугаар сард 125.0 мянган метр квадрат зүлэг тарьж, 9000 метр квадрат цэцгийн мандал, 20.0 мянган метр квадрат талбайг цэцэгжүүлж, 750 мянган м2 талбайг цэвэрлэж,зэрлэг ургамлыг нь устгалаа.

Нисэх, Яармагийн зам дагуу 40000 м2, Их Монгол Улсын гудамжинд 5000м2, 3 дугаар Дулааны цахилгаан станцын зүүн замын 2600м2, Чингэлтэй, Амгалангийн гудамжинд 6000 м2 талбайг зүлэгжүүлсэн.

Нийт 18000 урт метр ургамлан хашлагыг засч хэлбэржүүлж, 1600.0 мянган ширхэг мод, сөөгөнд графикийн дагуу усалгаа хийлээ. Хур бороо багатай, гантай байсан учраас шинээр тарьсан зүлэг, мод сөөгөнд шөнийн цагаар хийх усалгааны давтамжийг нэмэгдүүлсэн. Хотын нийтийн эзэмшлийн гудамж, цэцэрлэгүүдийн ногоон байгууламжийн арчилгааны ажлын технологийн мөрдөлтөнд “Нийслэлийн ногоон байгууламжийн иргэний зөвлөл” “Далайн цалгиа” ТББ хяналт тавьж ажиллаа гэж Улаанбаатар хотын Захирагчийн ажлын албанаас мэдээллээ.