Month: August 2015

Монгол Улсын Ерөнхийлөгчийн зарлигаар 1945 оны Чөлөөлөх дайны
ялалтын түүхт 70 жилийн ойг улс орон даяар тэмдэглэж буй билээ. Уг
түүхэн ойд зориулсан “Бид ялав” үзэсгэлэн өнөөдөр нээгдлээ. Үзэсгэлэнд
дайны үеийн хүнд сорилт, тулалдаануудын ялалт, баатарлаг үйлсийг
харуулсан 100 гаруй гэрэл зураг, 20 гаруй бичиг баримт, байлдааны
талбарын газрын зураг зэргийг дэлгэн тавьжээ.

“Монгол цэргийн музей”-д дэлгэгдсэн үзэсгэлэнгийн нээлтэд БХЯ-ны
Төрийн нарийн бичгийн дарга, хошууч генерал З.Болдбаатар, ЗХЖШ-ын дэд
дарга, хошууч генерал Б.Баярмагнай, Зэвсэгт хүчний Цэргийн тагнуулын
газрын дарга, хурандаа Д.Мөнх-Очир, БХЯ-ны Гадаад хамтын ажиллагааны
газрын дарга, бригадын генерал Ч.Сосорбарам, 1945 оны чөлөөлөх дайнд
оролцож явсан, 94 настай ахмад дайчин, бэлтгэл дэд хурандаа Т.Бат-Очир,
ЗХЖШ-ын газрын дарга, хурандаа М.Эрдэнэдалай, “Монгол цэргийн музей”-н
захирал, хурандаа Г.Золзаяа нар оролцлоо.

Спортын хаан гэгдэх хөнгөн атлетикийн дэлхийн аварга шалгаруулах
тэмцээн тав хоногийн дараа Хятадын Бээжин хотод эхлэх гэж байна.

Энэ удаагийн тэмцээнд 90 гаруй орны шилдэг тамирчин өрсөлдөхөөр цуглаж
эхлэв. Манай улсын хувьд марафон гүйлтийн төрөлд гурван тамирчнаа
илгээнэ.

Тодруулбал, эрэгтэйчүүдийн ангилалд гавьяат тамирчин Б.Сэр-Од,
эмэгтэйчүүдийн төрөлд олон улсын хэмжээний мастер Б.Мөнхзаяа,
Л.Отгонбаяр нар оролцохоор бэлтгэлээ базааж байгаа юм. Хөнгөн атлетикийн
ДАШТ ирэх бямба гаригт эрэгтэйчүүдийн марафон гүйлтийн төрлөөр эхэлж
энэ сарын 30-нд эмэгтэйчүүдийн марафоноор өндөрлөнө. Тэмцээнд оролцох
гурван тамирчин Хятадын “Жордан” фирмийн хувцсаар ижилсэх юм.

Одоогоор Гавьяат тамирчин Б.Сэр-Од Хятадад бэлтгэлээ базааж байгаа бол бусад нь маргааш Бээжинг зорих ажээ.

Сонирхуулахад, ДАШТ-ий өмнө олон улсын хөнгөн атлетикийн холбооны
ээлжит их хурал болох бөгөөд энэ үеэр IAAF-ны шинэ удирдлагуудыг
сонгоно. Уг хуралд манай улсаас Монголын хөнгөн атлетикийн холбооны
ерөнхийлөгч Л.Болд, ерөнхий нарийн бичгийн дарга Ч.Зоригтбаатар нар
оролцож шинэ ерөнхийлөгчийн сонгуульд саналаа өгөх юм.

Энэ жил их, дээд сургуулийн дотуур
байрны төлбөр доод тал нь 50 мянга, дээд тал нь 200 гаруй мянган
төгрөгөөр нэмэгдсэн байна. Тухайлбал, ХААИС, ШУТИС-ийн дотуур байрны
төлбөр доод тал нь 50 мянган төгрөгөөр нэмэгдэж 400, 450 мянган
төгрөгийн үнэтэй болжээ. Харин дээд тал нь МУИС дотуур байрны төлбөрөө
230 мянган төгрөгөөр нэмж 630 мянган төгрөг болсон байна.

Улсын сургуулиудын дотуур байрны төлбөрийн мэдээллийг доорх зургаас харна уу. Дотуур байрны бүртгэлийн мэдээллийг ЭНД-ээс харна уу.

Тариаланч, малчдад өвөлжилтийн
бэлтгэлийг хангуулах үүднээс урт хугацааны хүүгүй зээлээр бага оврын
трактор олгож байгаа билээ. Одоогоор 5000 гаруй тариаланч, малчдад
тракторыг зээлээр олгоод байна. Нийтдээ 8400 трактор, дагалдах хэрэгсэл
болох хадуур,тармуур, анжисны хамт урт хугацааны хүүгүй зээлээр олгох
юм. Энэ үйл ажиллагаа одоо ч үргэлжилж байна. Тариаланч малчдын хувьд
оршин суугаа газрынхаа Засаг дарга, хүнс хөдөө аж ахуйн газрын
тодорхойлолт, урьдчилгаа төлбөрөө төлсөн баримттайгаар Тариалан
эрхлэлтийг дэмжих санд ирж трактороо авч болно.

Дашрамд дуулгахад, бага оврын тракторын үнэ таван сая юм. Тариаланч,
малчдын хувьд нийт төлбөрийн 20 хувийг урьдчилж төлнө. Урьдчилгаа нь нэг
сая төгрөг болж байгаа юм. Харин үлдсэн дөрвөн сая төгрөгийг дөрвөн
жилийн хугацаанд тэнцүү хувааж өгнө. Дагалдах хэрэгсэл болох хадуур,
анжис, тармуурыг 1.5 сая төгрөгөнд авах юм байна.

“Оюу толгой” компани Далд уурхай
хариуцсан Ерөнхий менежерийн албан тушаалд Грег Фийлдийг томилжээ.
Энэхүү албан тушаал нь Оюу толгойн далд уурхайн бүтээн байгуулалтын
ажлыг гүйцэтгэхэд чухал ач холбогдолтой албан тушаалуудын нэг бөгөөд
“Оюу толгой” компанид далд уурхайг урагшлуулах анхны томилгоо болж
байгаа аж. Грег Фийлд нь энэ албан тушаалд томилогдсоноор Оюу толгойн
далд уурхайн бэлтгэл ажлыг хангахад голлох үүрэг гүйцэтгэх юм.

Оюу толгой ХХК-ийн ерөнхийлөгч бөгөөд гүйцэтгэх ерөнхий захирал Эндрью
Вүдлэй энэхүү томилгооны талаар “Далд уурхайн бүтээн байгуулалтын ажил
нь манай бизнесийн урт хугацааны ирээдүйн нэг чухал хэсэг. Грег Фийлдийг
энэ чухал албан тушаалд томилж байгааг дуулгахдаа бид таатай байна.
Грег “Оюу толгой” компанид олон чиглэлийн ажил хариуцаж ирсний зэрэгцээ
далд уурхайн блокчлон олборлолтын төслүүд болон уурхайн бүтээн
байгуулалтын чиглэлээр олон улсад ажиллаж байсан арвин туршлагатай.
Тиймээс түүнийг далд уурхайн ажилд чухал үүрэг гүйцэтгэнэ гэдэгт
итгэлтэй байна” хэмээн өгүүлсэн байна.

Грег Фийлд нь өмнө “Оюу толгой” компанид олон үүрэг гүйцэтгэж ирсэн
бөгөөд хамгийн сүүлд дэд бүтэц, үйлчилгээний хэлтсийн ерөнхий менежерээр
ажиллаж байсан юм. Тэрээр Ази, Африк, болон Австрали тивд уул уурхайн
салбарт 20 гаруй жил ажилласан байна. “Оюу толгой” компанид ажиллаж
эхлэхээсээ өмнө Грег Фийлд Австрали дахь Аргайлын алмазны уурхайд Үйл
ажиллагааны бэлэн байдал хариуцсан ерөнхий менежерийн албан тушаалыг
хашиж байжээ. Тэрээр Йоханнесбургийн их сургуулийг уул уурхайн
инженерийн мэргэжлээр төгссөн нэгэн юм байна.

Бөхийн чөлөөт барилдааны залуучуудын
ДАШТ Бразил улсын Сальвадор-да-Бахиа хотноо боллоо. Дэлхийн 52 орны 400
гаруй бөх хүч үзсэн энэхүү тэмцээнд манай улсын зургаан бөх барилдсан ч
медальд хүрсэнгүй.

Манай бөхчүүд эрэгтэйчүүдийн дөрвөн
жинд, эмэгтэй хоёр жинд хүч үзсэн. Монгол Улсын баг тамирчид Залуучуудын
ДАШТ-д 2007 оноос хойш оролцохдоо тогтмол медальт байрт шалгарсаар
иржээ. Энэ удаагийн тэмцээнд шүүгчгүй, өндөр зардалтайгаас болоод цөөхөн
тамирчин оролцсон нь багийн амжилтад нөлөөлсөн байх гэж зарим
мэргэжилтэн үзэж байна.

Монгол Улсын тамирчдын багийн ахлагчаар МЧБХ-ны дэд ерөнхийлөгч, “Хүчит
чулуут” компанийн захирал Б.Батзаяа ажиллаж, өсвөр, залуучуудын шигшээ
багийн ахлах дасгалжуулагч, “Алдар” спорт хорооны дасгалжуулагч, Гавьяат
дасгалжуулагч Ц.Хосбаяр, Дархан-Уул аймаг, “Хасу-Мегастарс” клубын
дасгалжуулагч Ё.Батдархан, Орхон аймгийн “Ирээдүйн одод” спортын дунд
сургуулийн багш Б.Идэрсайхан нарын удирдлагад зургаан бөх оролцсон.