Энэ сарын дунд үе хүртэл тариалангийн бүс нутгаар гантай байсан. Тиймээс бууцай болон тариа ногооны ургалт удаашралтай байгаа билээ. Харин баяр наадмын дараагаар үргэлжлэн орсон бороо тариалангийн бүс нутгаар хангалттай чийг өгсөн ч тариаланчдын сэтгэлийг зовоосон хэвээр байгаа юм.
Тэгвэл салбар хариуцсан яамнаас энэ жилийн ургац хураалт хойшилж магадгүй гэсэн мэдээллийг өглөө. Албаны хүний хэлснээр тариалангийн нутгаар гандуу, ургалт байхгүй гэсэн шалтгаанаар нэг сарын хугацаагаар ургац хураалтыг хойшлуулна гэсэн мэдээ гарсан байгаа аж.
Энэ жил 300 гаруй мянган га-д улаанбуудай, 14 мянган га-д төмс, 9 орчим мянган га-д хүнсний ногоо тарьсан билээ.
Баянгол дүүрэгт байрладаг
Өнөө маргаашдаа газар тариалангийн бүс нутгуудаар халж, зүүн зүгийн нутгийн зүүн хэсгээр дуу цахилгаантай түр зуурын бороо орохыг Ус цаг уур орчны шинжилгээний хүрээлэнгээс анхааруулж байна. Тодруулбал баруун болон төвийн аймгуудаар үүлшин, зарим газраар дуу цахилгаантай түр зуурын ширүүн бороо орох бөгөөд хур тунадас орохын өмнө салхи 16-аас 18 метр хүрч ширүүсэх төлөвтэй байна. Говийн нутгаар солигдмол үүлтэй, түр зуурын аадар бороо орно. 
Ховд аймгийн Булган суманд тодорхойгүй хугацаагаар хөл хорио тогтоолоо. Учир нь өчигдөр тус сумын харьяат 14 настай, Г хэмээх хүү өндөр халууран баруун суганых нь булчирхай цочсон байдалтай буюу тарваган тахал өвчний шинж тэмдэгтэй эмнэлэгт хүргэгдэн ирээд нас барсан юм. Одоогоор шинжилгээний хариу эцэслэн гараагүй гэнэ. Үүнтэй холбогдуулан өчигдөр орой тус аймгийн онцгой комисс хуралдаж, хөл хорио тогтоожээ. Мөн тус суманд Ховд аймгийн Зоонозын өвчин судлалын төв, Эрүүл мэндийн газар, Бүсийн оношилгоо эмчилгээний төвийн эмч мэргэжилтнүүдийн баг ажиллажээ.
Өчигдөр
Өнөөдөр Ерөнхий сайд Ч.Сайханбилэг, Эрчим Хүчний сайд Д.Зоригт, Нийслэлийн Засаг дарга бөгөөд Улаанбаатар хотын захирагч Э.Бат-Үүл тэргүүтэй албаныхан Амгалан дулааны станцын бүтээн байгуулалтын ажилтай танилцжээ. Ирэх аравдугаар сарын 15-нд ашиглалтад тус станцын барилгын гүйцэтгэгчээр БНХАУ-ын “СМЕС” компани ажиллаж байгаа бөгөөд 2013 онд эхлүүлсэн станцын барилга угсралтын ажил одоогоор 95 хувьтай явагдаж байна. Станцын үлдсэн хэсгийг дуусгахад 3.9 тэрбум төгрөг шаардлагатай аж. Уг станцын нийт өртөг нь 75.9 сая ам.доллар бөгөөд Монгол Улсын Хөгжлийн банкнаас бондын хөрөнгөөр санхүүжүүлж байгаа юм.
Монголын хөнгөн атлетикийн холбооноос жил бүр зохион байгуулдаг “Тал нутгийн марафон” гүйлтийн уралдаан ирэх ням гаригт болох аж. “Улаанбаатар хотын аялал жуулчлал-2015” хөтөлбөрийн хүрээнд аялал жуулчлалын бүтээгдэхүүний нэр төрлийг нэмэгдүүлэх, нийтийн биеийн тамир, спортыг ард иргэдэд сурталчлах зорилготой энэхүү гүйлтэд нийслэлчүүдээс гадна гадаадын жуулчид, тамирчид өргөнөөр оролцдогоороо онцлог аж. ТУс марафон Төв аймгийн Өндөр дов хэмээх газар болох гэнэ.
Өмнөговь аймгийн Даланзадгад сумын төвийн хэсгээр өчигдөр үдээс хойш дуу цахилгаантай, хүчтэй аадар бороо орсны улмаас аймгийн төвд дахин үер буужээ. Энэ удаагийн үерийн улмаас хашаа, гэр, байшин барилгын суурийн давхар, граш, автомашинд ус орсон, автомашин шаварт суусан гэх 57 дуудлага, мэдээлэл Онцгой байдлын газарт ирсэн аж. Дуудлагын дагуу Онцгой байдлын газрынхан ажиллаж 21 автомашин, 36 том хүн, 9 хүүхэд, 36 гэр орон хашаа байшинг үерийн усанд автахаас аварчээ. Одоогоор хүний амь нас, эрүүл мэндэд эрсдэл гараагүй, харин эд хөрөнгийн хохиролын хэмжээ тогтоогдоогүй байна.
Баяр наадмын өмнөхөн Эрчим хүчний зохицуулах хорооноос айл өрхийн цахилгааны суурь төлбөрийг хоёр дахин нэмж 2000 болгосон. Тэгвэл тоолуурын заалтаар авдаг тарифыг 4.3 төгрөгөөр тус бүр нэмсэн байна.