“Өдрийн сонин”-ы энэ удаагийн дугаар 16 нүүрээр хэвлэгдэн гарч уншигч, захиалагч нартаа хүрч байна. Өнөөдрийн дугаарт гарсан онцлох нийтлэл, ярилцлага, сурвалжлага, мэдээ мэдээллээс тоймлон хүргэе. Даваа гариг бүрт хүргэдэг “Танайд өнжье” брэнд булангийн энэ удаагийн дугаарт “Бөхийн холбоогоор овоглосон Д.Данзан гавьяатынх” орлоо. Монгол бөхийн төлөө нэгэн насаа зориулж яваа энэ эрхмийн талаар 12, 13 дугаар нүүрээс амтархан уншаарай.
Л.Гансүхийн хэргийг шүүх шүүгч Х.Идэрийн төрсөн дүү прокурор Х.Тамирыг АТГ-аас шалгаж байгаа. Энэ талаар “Л.Гансүх нарт ял оноохын тулд АТГ прокурор Х.Тамирын хэргээр шүүгчийг барьцаалав уу” хэмээх эрэн сурвалжлах материал 7 дугаар нүүрт хэвлэгдлээ. Мөн баримт, үзэл бодол буланд манай сэтгүүлч М.Мөнхцэцэг “Сэтгүүлч С.Баттулгыг баривчилж буй нь Ардчилсан намын нэр хүндийг гутаах гэсэн хууль шүүхийнхний ажил бололтой” нийтлэл хэвлэгдсэн.
Эрчим хүчний яамны Төрийн нарийн бичгийн дарга Д.Дэлгэрцогттой хийсэн “Тавдугаар цахилгаан станцын нэмэлт гэрээнүүд есдүгээр сард зурагдсанаар бүтээн байгуулалтын ажил эхэлнэ” хэмээх сонирхолтой ярилцлагыг уншиж сонирхоорой. Мөн эх орон сумаас эхэлнэ, томилолт, дэлхийн мэдээ, энэ өдөр зэрэг булангууд гарлаа.
Дашрамд дуулгахад, манай сонинтой холбоотой бүхий л мэдээллийг Мэдээлэх эрхийн утас 1900-1987 дугаараас лавлаарай.
“ӨДРИЙН СОНИН” ӨГЛӨӨ БҮХНИЙ УРГАХ НАРНААР ТАНТАЙ ХАМТ
Увс аймгийн Сагил сумын Баянзүрх багийн “Ишгэлдэйн-Ам” гэдэг газар /сумын төвөөс баруун хойд зүгт 40 км/ ойн түймэр гарчээ. Дуудлагыг 2015.07.20-ны өдрийн 18:50 цагт хүлээн авч тус аймгийн Онцгой байдлын газрын 10 албан хаагч, нэг автомашинтай, орон нутгийн 44 иргэн, гурван автомашинтай, нийт 54 хүн, дөрвөн техник хэрэгсэлтэйгээр ажиллаж, өчигдөр өдрийн 11:00 цагт галыг унтраажээ. Улмаар багийн Засаг дарга Н.Баянмөнхөд хүлээлгэн өгсөн байна.
Шийдлийн Засгийн газрын мөрийн хөтөлбөрийн хүрээнд 21 аймгийг хатуу хучилттай замаар холбох ажил хийгдэж байгаа. Энэ хүрээнд хатуу хучилттай замаар холбогдсон их багтаамжийн автобусанд цахим системийг нэвтрүүлэх зорилттой ажиллаж байгаа аж. Төрийн үйлчилгээг иргэдэд ойртуулах үүднээс хот хоорондын автобусны тасалбарыг интернэтийн орчинд хаанаас ч захиалах боломжтой болсон.
Мал, амьтны гоц халдварт болон халдварт өвчний хэд хэдэн тохиолдол орон нутагт бүртгэгджээ. Тодруулбал нэг аймгийн хоёр сумын нутагт боом өвчний гурван тохиолдол, хоёр аймгийн гурван сумын нутагт галзуу өвчний гурван тохиолдол, нийт хоёр аймгийн таван сумын нутагт зургаан тохиолдлын голомтод тогтоосон хорио цээрийн болон хязгаарлалтын дэглэм үргэлжилж байна. 
Ховд аймгийн Булган сумын Алагтолгой багийн “Бумбат” гэдэг газар 14 настай эрэгтэй Г 2015.07.10-11-ний өдөр тарваганы мах иджээ. Улмаас өндөр халуурч сумын эмнэлэгт 2015.07.19-ний өдөр ирж, хэвтэн эмчлүүлж байгаад 2015.07.21-ний өдрийн 03:43 цагт нас барсан байна. Нас барсан иргэний цогцосноос дээж авч шинжилсэн бөгөөд өнгөрсөн баасан гаригт гарсан шинжилгээний хариугаар “Тарваган тахал” өвчин болох нь тогтоогджээ.
Улаанбаатар хотын дулаан хангамжийн 3А,Б гол шугамыг ф600500 болгон өргөтгөх ажлын хүрээнд Энхтайваны өргөн чөлөөний авто замыг зургадугаар сарын 06-наас эхлэн хэсэгчлэн хааж шугам хоолойн ажил хийж байгаа билээ. Тус ажлын сүүлийн шат долдугаар сарын 13-ны өдрөөс эхэлсэн бөгөөд Улсын их дэлгүүрээс Баруун дөрвөн зам хүртэлх авто замыг түр хаагаад байна. Шугам хоолойг өргөтгөх ажил наймдугаар сарын 14-ний өдрийг хүртэл үргэлжлэх аж.
Улсын хэмжээнд Улаанбурхан өвчний 20,890 сэжигтэй тохиолдол бүртгэгдсэний 1,188 хүн лабораторийн шинжилгээгээр, 6,800 хүн эпидемиологийн холбогдол, эмнэлзүйн шинж тэмдгээр тус тус батлагдаад байна.
19 дэх удаагийн “Тал нутгийн Монгол” олон улсын марафон гүйлтийн тэмцээн Төв аймгийн нутаг Өндөр довд өнөөдөр болж байна.
Үндэсний цэцэрлэгт хүрээлэн нь бүтээн байгуулалтын ажлууд хийхээс гадна иргэдэд экологийн боловсрол олгох зорилгоор олон төсөл хөтөлбөрүүд санаачлан ажилладаг билээ. Энэ ажлынхаа хүрээнд тус төвийн дарга Б.Саранчимэгийн санаачлагаар “Эко танхим” байгуулах ажил 2014 оны наймдугаар сараас эхлэн үргэлжилсээр байна. Уг танхимд нийт 30 гаруй байгууллага хувь хүмүүсээс 200 орчим ном, товхимол сурах бичиг, гарын авлага судлагааны материалууд цугларсан байна.